Numbers 30
The Book of Numbers
܀ ܡܢܝܢܐ ܠ ܀
1 ܘܶܐܡܰܪ ܡܽܘܫܶܐ ܠܰܒܢܰܝ̈ ܝܺܣܪܳܐܶܝܠ. ܟܽܠ ܕܦܰܩܶܕ ܡܳܪܝܳܐ ܠܡܽܘܫܶܐ.
2 ܘܡܰܠܶܠ ܡܽܘܫܶܐ ܥܰܡ ܖ̈ܺܝܫܶܐ ܕܫܰܒ̈ܛܶܐ ܕܰܒܢܰܝ̈ ܝܺܣܪܳܐܶܝܠ. ܘܶܐܡܰܪ ܠܗܽܘܢ. ܗܳܢܰܘ ܦܶܬܓܳܡܳܐ ܕܦܰܩܕܰܢܝ ܡܳܪܝܳܐ.
3 ܓܰܒܪܳܐ ܟܰܕ ܢܶܕܽܘܪ ܢܶܕܪܳܐ ܠܡܳܪܝܳܐ. ܘܢܺܐܡܶܐ ܒܡܰܘܡܳܬܳܐ. ܘܢܶܐܣܽܘܪ ܐܶܣܳܪܳܐ ܥܰܠ ܢܰܦܫܶܗ. ܠܳܐ ܢܒܰܛܶܠ ܡܶܠܬܶܗ. ܟܽܠܡܶܕܶܡ ܕܰܢܦܰܩ ܡܶܢ ܦܽܘܡܶܗ ܢܶܥܒܶܕ.
4 ܘܰܐܢ̱ܬܬܳܐ ܟܰܕ ܬܶܕܽܘܪ ܢܶܕܪܳܐ ܠܡܳܪܝܳܐ. ܘܬܶܐܣܽܘܪ ܐܶܣܳܪܳܐ ܥܰܠ ܢܰܦܫܳܗ̇ ܒܛܰܠܝܽܘܬܳܗ̇ ܒܶܝܬ ܐܰܒܽܘܗ̇.
5 ܘܢܶܫܡܰܥ ܐܰܒܽܘܗ̇ ܢܶܕܪܳܐ ܘܶܐܣܳܪܳܐ ܕܶܐܣܪܰܬ ܥܰܠ ܢܰܦܫܳܗ̇. ܘܢܶܫܬܽܘܩ ܠܶܗ ܐܰܒܽܘܗ̇. ܢܶܬܩܰܝܡܽܘܢ ܟܽܠܗܽܘܢ ܢܶܕܖ̈ܶܐ ܘܶܐܣܳܖ̈ܶܐ ܕܶܐܣܪܰܬ ܥܰܠ ܢܰܦܫܳܗ̇.
6 ܘܶܐܢ ܢܒܰܛܶܠ ܐܶܢܽܘܢ ܐܰܒܽܘܗܝ ܒܝܰܘܡܳܐ ܕܫܳܡܰܥ ܟܽܠܗܽܘܢ ܢܶܕܖ̈ܶܐ. ܘܟܽܠܗܽܘܢ ܐܶܣܳܖ̈ܶܐ ܕܶܐܣܪܰܬ ܥܰܠ ܢܰܦܫܳܗ̇. ܠܳܐ ܢܶܬܩܰܝܡܽܘܢ. ܘܡܳܪܝܳܐ ܢܶܫܒܽܘܩ ܠܳܗ̇. ܡܶܛܽܠ ܕܒܰܛܶܠ ܐܶܢܽܘܢ ܐܰܒܽܘܗܝ.
7 ܘܶܐܢ ܬܶܗܘܶܐ ܠܓܰܒܪܳܐ. ܘܢܶܕܖ̈ܶܝܗ̇ ܥܠܶܝܗ̇. ܐܰܘ ܦܽܘܪܫܳܢܳܐ ܕܣܶܦ̈ܘܳܬܳܗ̇ ܕܶܐܣܪܰܬ ܥܰܠ ܢܰܦܫܳܗ̇.
8 ܘܢܶܫܡܰܥ ܒܰܥܠܳܗ̇. ܒܝܰܘܡܳܐ ܕܫܳܡܰܥ ܘܢܶܫܬܽܘܩ ܠܶܗ. ܢܶܬܩܰܝܡܽܘܢ ܟܽܠܗܽܘܢ ܢܶܕܖ̈ܶܐ. ܘܶܐܣܳܖ̈ܶܐ ܕܶܐܣܪܰܬ ܥܰܠ ܢܰܦܫܳܗ̇ ܢܶܬܩܰܝܡܽܘܢ.
9 ܘܶܐܢ ܒܝܰܘܡܳܐ ܕܰܫܡܰܥ ܒܰܥܠܳܗ̇ ܒܰܛܶܠ ܐܶܢܽܘܢ. ܢܶܒܛܠܽܘܢ ܢܶܕܖ̈ܶܐ ܘܦܽܘܖ̈ܫܳܢܶܐ ܕܣܶܦ̈ܘܳܬܳܗ̇ ܕܶܐܣܪܰܬ ܥܰܠ ܢܰܦܫܳܗ̇. ܘܡܳܪܝܳܐ ܢܶܫܒܽܘܩ ܠܳܗ̇.
10 ܘܢܶܕܪܳܐ ܕܰܐܪܡܰܠܬܳܐ. ܘܕܰܫܒܺܝܩܬܳܐ. ܟܽܠ ܕܳܐܣܪܳܐ ܥܰܠ ܢܰܦܫܳܗ̇ ܢܶܬܩܰܝܰܡ ܥܠܶܝܗ̇.
11 ܘܶܐܢ ܒܶܝܬ ܒܰܥܠܳܗ̇ ܢܶܕܪܰܬ. ܐܰܘ ܐܶܣܪܰܬ ܐܶܣܳܪܳܐ ܥܰܠ ܢܰܦܫܳܗ̇ ܒܡܰܘܡܳܬܳܐ.
12 ܘܢܶܫܡܰܥ ܒܰܥܠܳܗ̇ ܘܢܶܫܬܽܘܩ ܠܶܗ ܘܠܳܐ ܢܒܰܛܶܠ ܐܶܢܽܘܢ. ܢܶܬܩܰܝܡܽܘܢ ܟܽܠܗܽܘܢ ܢܶܕܖ̈ܶܐ. ܘܟܽܠܗܽܘܢ ܐܶܣܳܖ̈ܶܐ ܕܶܐܣܪܰܬ ܥܰܠ ܢܰܦܫܳܗ̇ ܢܶܬܩܰܝܡܽܘܢ.
13 ܘܶܐܢ ܡܒܰܛܳܠܽܘ ܢܒܰܛܶܠ ܐܶܢܽܘܢ ܒܰܥܠܳܗ̇ ܒܝܰܘܡܳܐ ܕܫܳܡܰܥ. ܟܽܠ ܡܶܕܶܡ ܕܰܢܦܰܩ ܡܶܢ ܣܶܦ̈ܘܳܬܳܗ̇ ܠܢܶܕܖ̈ܶܐ. ܘܠܶܐܣܳܖ̈ܶܐ ܕܶܐܣܪܰܬ ܥܰܠ ܢܰܦܫܳܗ̇. ܠܳܐ ܢܶܬܩܰܝܡܽܘܢ. ܡܶܛܽܠ ܕܒܰܥܠܳܗ̇ ܒܰܛܶܠ ܐܶܢܽܘܢ. ܘܡܳܪܝܳܐ ܢܶܫܒܽܘܩ ܠܳܗ̇.
14 ܟܽܠܗܽܘܢ ܢܶܕܖ̈ܶܐ ܘܟܽܠܗܶܝܢ ܡܰܘܡܳܬܳܐ ܕܶܐܣܳܖ̈ܶܐ ܕܰܡܣܰܓܦܺܝܢ ܢܰܦܫܳܐ. ܒܰܥܠܳܗ̇ ܢܩܰܝܶܡ ܐܶܢܽܘܢ ܘܒܰܥܠܳܗ̇ ܢܒܰܛܶܠ ܐܶܢܽܘܢ.
15 ܘܶܐܢ ܡܶܫܬܰܩ ܢܶܫܬܽܘܩ ܠܶܗ ܒܰܥܠܳܗ̇ ܡܶܢ ܝܽܘܡ ܠܝܽܘܡ. ܢܶܬܩܰܝܡܽܘܢ ܟܽܠܗܽܘܢ ܢܶܕܖ̈ܶܐ. ܘܟܽܠܗܽܘܢ ܐܶܣܳܖ̈ܶܐ ܕܶܐܣܪܰܬ ܥܰܠ ܢܰܦܫܳܗ̇. ܡܶܛܽܠ ܕܰܫܬܶܩ ܠܶܗ ܒܰܥܠܳܗ̇ ܒܝܰܘܡܳܐ ܕܰܫܡܰܥ.
16 ܘܶܐܢ ܡܒܰܛܳܠܽܘ ܢܒܰܛܶܠ ܐܶܢܽܘܢ ܡܶܢ ܒܳܬܰܪ ܕܫܳܡܰܥ. ܢܩܰܒܶܠ ܚܛܳܗܳܗ̇.
17 ܗܳܠܶܝܢ ܢܳܡܽܘܣ̈ܶܐ ܕܦܰܩܶܕ ܡܳܪܝܳܐ ܠܡܽܘܫܶܐ ܒܶܝܬ ܓܰܒܪܳܐ ܠܰܐܢ̱ܬܬܶܗ. ܘܒܶܝܬ ܐܰܒܳܐ ܠܒܰܪܬܶܗ ܒܛܰܠܝܽܘܬܳܗ̇ ܒܶܝܬ ܐܰܒܽܘܗ̇