Numbers 27
The Book of Numbers
܀ ܡܢܝܢܐ ܟܙ ܀
1 ܘܰܩܪܶܒ ܒ̈ܢܳܬܶܗ ܕܰܨܠܶܦܚܰܕ. ܒܰܪ ܚܳܦܳܪ. ܒܰܪ ܓܶܠܥܳܕ. ܒܰܪ ܡܳܟܺܝܪ. ܒܰܪ ܡܢܰܫܶܐ. ܡܶܢ ܫܰܪܒܬܳܐ ܕܰܡܢܰܫܶܐ ܒܰܪ ܝܰܘܣܶܦ. ܘܗܳܠܶܝܢ ܫܡܳܗ̈ܶܐ ܕܰܒ̈ܢܳܬܶܗ. ܡܰܚܠܳܐ. ܘܝܰܥܳܐ. ܘܚܰܓܠܳܐ. ܘܡܶܠܟܳܐ. ܘܬܰܪܨܳܐ.
2 ܘܩܳܡ̈ܝ ܩܕܳܡ ܡܽܘܫܶܐ. ܘܰܩܕܳܡ ܐܶܠܺܝܥܳܙܳܪ ܟܳܗܢܳܐ. ܘܰܩܕܳܡ ܪܰܘܖ̈ܒܳܢܶܐ. ܘܰܩܕܳܡ ܟܽܠܳܗ̇ ܟܢܽܘܫܬܳܐ. ܒܬܰܪܥܳܐ ܕܡܰܫܟܰܢ ܙܰܒܢܳܐ. ܘܳܐܡܖ̈ܳܢ.
3 ܐܰܒܽܘܢ ܡܺܝܬ ܒܡܰܕܒܪܳܐ. ܘܠܳܐ ܗܘܳܐ ܒܓܰܘ ܟܢܽܘܫܬܳܐ ܗܘܳܐ ܗܳܝ ܕܩܳܡܰܬ ܩܕܳܡ ܡܳܪܝܳܐ ܒܰܟܢܽܘܫܬܶܗ ܕܩܽܘܪܳܚ. ܡܶܛܽܠ ܕܒܰܚܛܳܗܰܘ̈ܗܝ ܓܶܝܪ ܡܺܝܬ. ܘܰܒܢܰܝ̈ܐ ܠܳܐ ܗܘܰܘ ܠܶܗ.
4 ܠܡܳܢܳܐ ܡܶܬܥܛܶܐ ܫܡܶܗ ܕܰܐܒܽܘܢ ܡܶܢ ܓܰܘ ܫܰܪܒܬܶܗ ܕܠܰܝܬ ܠܶܗ ܒܪܳܐ. ܗܰܒ ܠܰܢ ܝܳܪܬܽܘܬܳܐ ܒܰܝܢܳܬ ܐܰܚ̈ܶܐ ܕܰܐܒܽܘܢ.
5 ܘܩܰܪܶܒ ܡܽܘܫܶܐ ܕܺܝܢܗܶܝܢ ܩܕܳܡ ܡܳܪܝܳܐ.
6 ܘܶܐܡܰܪ ܡܳܪܝܳܐ ܠܡܽܘܫܶܐ.
7 ܟܺܐܢܳܐܺܝܬ ܐܳܡܖ̈ܳܢ ܒܢ̈ܳܬܶܗ ܕܰܨܠܶܦܚܰܕ. ܗܰܒ ܠܗܶܝܢ ܐܽܘܚܕܳܢܳܐ ܝܳܪܬܽܘܬܳܐ ܒܰܝܢܳܬ ܐܰܚܰܘ̈ܗܝ ܕܰܐܒܽܘܗܶܝܢ. ܘܰܐܩܺܝܡ ܠܗܶܝܢ ܝܳܪܬܽܘܬܳܐ ܕܰܐܒܽܘܗܶܝܢ.
8 ܘܶܐܡܰܪ ܠܰܒܢܰܝ̈ ܝܺܣܪܳܐܶܝܠ. ܓܰܒܪܳܐ ܟܰܕ ܢܡܽܘܬ ܘܠܰܝܬ ܠܶܗ ܒܪܳܐ. ܗܰܒܘ ܝܳܪܬܽܘܬܶܗ ܠܒܰܪܬܶܗ.
9 ܘܶܐܢ ܠܰܝܬ ܠܶܗ ܒܰܪܬܳܐ. ܗܰܒܘ ܝܳܪܬܽܘܬܶܗ ܠܰܐܚܰܘ̈ܗܝ.
10 ܘܶܐܢ ܠܰܝܬ ܠܶܗ ܐܰܚ̈ܶܐ. ܗܰܒܘ ܝܳܪܬܽܘܬܶܗ ܠܕܳܕܰܘ̈ܗܝ.
11 ܘܶܐܢ ܠܰܝܬ ܠܶܗ ܕܳܕ̈ܶܐ. ܗܰܒܘ ܝܳܪܬܽܘܬܶܗ ܠܰܐܝܢܳܐ ܕܩܰܪܺܝܒ ܠܶܗ ܡܶܢ ܫܰܪܒܬܶܗ ܘܢܺܐܪܬܺܝܘܗܝ. ܘܢܶܗܘܶܐ ܠܰܒܢܰܝ̈ ܝܺܣܪܳܐܶܝܠ ܢܳܡܽܘܣܳܐ ܕܕܺܝܢܳܐ. ܐܰܝܟ ܕܦܰܩܶܕ ܡܳܪܝܳܐ ܠܡܽܘܫܶܐ.
12 ܘܶܐܡܰܪ ܡܳܪܝܳܐ ܠܡܽܘܫܶܐ. ܣܰܩ ܠܛܽܘܪܳܐ ܗܳܢܳܐ ܕܥܶܒܖ̈ܳܝܶܐ. ܘܰܚܙܺܝܗ̇ ܠܰܐܪܥܳܐ ܕܰܟܢܰܥܢ ܕܝܳܗܶܒ ܐ̱ܢܳܐ ܠܰܒܢܰܝ̈ ܝܺܣܪܳܐܶܝܠ.
13 ܚܙܺܝܗ̇ ܘܶܐܬܟܰܢܫ ܐܳܦ ܐܰܢܬ ܠܘܳܬ ܥܰܡܳܟ. ܐܰܝܟ ܕܶܐܬܟܰܢܫ ܐܰܗܪܽܘܢ ܐܰܚܽܘܟ.
14 ܥܰܠ ܕܡܰܪܡܰܪܬܗܽܘܢ ܡܶܠܰܬ ܦܽܘܡܝ ܒܡܰܕܒܪܳܐ ܕܨܺܝܢ. ܒܡܰܨܽܘܬܳܐ ܕܰܟܢܽܘܫܬܳܐ. ܘܠܳܐ ܩܰܕܶܫܬܽܘܢܳܢܝ ܒܡܰܝ̈ܳܐ ܠܥܺܢܰܝ̈ܗܽܘܢ ܗܳܢܽܘܢ ܐܶܢܽܘܢ ܡܰܝ̈ܳܐ ܕܡܰܨܽܘܬܳܐ. ܕܰܪܩܶܡ ܒܡܰܕܒܪܳܐ ܕܨܺܝܢ. ܘܡܰܠܶܠ ܡܽܘܫܶܐ
15 ܩܕܳܡ ܡܳܪܝܳܐ. ܘܶܐܡܰܪ.
16 ܢܶܦܩܽܘܕ ܡܳܪܝܳܐ ܐܰܠܳܗܳܐ ܕܖ̈ܽܘܚܳܬܳܐ ܕܟܽܠ ܒܣܰܪ ܓܰܒܪܳܐ ܚܰܕ ܥܰܠ ܟܢܽܘܫܬܳܐ.
17 ܕܢܶܦܽܘܩ ܩܕܳܡܰܝܗܽܘܢ. ܘܰܕܢܶܥܽܘܠ ܩܕܳܡܝܗܽܘܢ. ܘܰܕܢܰܦܶܩ ܐܶܢܽܘܢ. ܘܰܕܢܰܥܶܠ ܐܶܢܽܘܢ. ܕܠܳܐ ܬܶܗܘܶܐ ܟܢܽܘܫܬܶܗ ܕܡܳܪܝܳܐ ܐܰܝܟ ܥܳܢ̈ܳܐ ܕܠܰܝܬ ܠܳܗ̇ ܪܳܥܝܳܐ.
18 ܘܶܐܡܰܪ ܡܳܪܝܳܐ ܠܡܽܘܫܶܐ. ܕܒܰܪ ܠܳܟ ܠܝܶܫܽܘܥ ܒܰܪܢܽܘܢ ܓܰܒܪܳܐ ܕܪܽܘܚܳܐ ܒܶܗ. ܘܣܺܝܡ ܐܺܝܕܳܟ ܥܠܰܘܗܝ.
19 ܘܰܐܩܺܝܡܳܝܗܝ ܩܕܳܡ ܐܶܠܺܝܥܳܙܳܪ ܟܳܗܢܳܐ. ܘܰܩܕܳܡ ܟܽܠܳܗ̇ ܟܢܽܘܫܬܳܐ. ܘܦܰܩܶܕܳܝܗܝ ܠܥܺܢܰܝ̈ܗܽܘܢ.
20 ܘܗܰܒ ܡܶܢ ܫܽܘܒܚܳܟ ܥܠܰܘܗܝ. ܕܢܶܫܡܥܽܘܢܶܗ ܟܽܠܳܗ̇ ܟܢܽܘܫܬܳܐ ܕܰܒܢܰܝ̈ ܝܺܣܪܳܐܶܝܠ.
21 ܘܰܩܕܳܡ ܐܶܠܺܝܥܳܙܳܪ ܟܳܗܢܳܐ ܢܩܽܘܡ. ܘܢܶܗܘܶܐ ܫܳܐܶܠ ܠܶܗ ܢܳܡܽܘܣܳܐ ܕܫܶܐܠܬܳܐ ܩܕܳܡ ܡܳܪܝܳܐ. ܒܡܶܠܰܬ ܦܽܘܡܶܗ ܢܶܗܘܽܘܢ ܢܳܦܩܺܝܢ. ܘܰܒܡܶܠܰܬ ܦܽܘܡܶܗ ܥܳܐܠܺܝܢ. ܘܟܽܠܗܽܘܢ ܒܢܰܝ̈ ܝܺܣܪܳܐܶܝܠ ܥܰܡܶܗ. ܘܟܽܠܳܗ̇ ܟܢܽܘܫܬܳܐ.
22 ܘܰܥܒܰܕ ܡܽܘܫܶܐ ܐܰܝܟ ܕܦܰܩܕܶܗ ܡܳܪܝܳܐ. ܘܰܕܒܰܪ ܠܝܶܫܽܘܥ. ܘܰܐܩܺܝܡܶܗ ܩܕܳܡ ܐܶܠܺܝܥܳܙܳܪ ܟܳܗܢܳܐ. ܘܰܩܕܳܡ ܟܽܠܳܗ̇ ܟܢܽܘܫܬܳܐ.
23 ܘܣܳܡ ܐܺܝܕܶܗ ܥܠܰܘܗܝ. ܘܦܰܩܕܶܗ. ܐܰܝܟܰܢܳܐ ܕܡܰܠܶܠ ܡܳܪܝܳܐ ܒܺܐܝܕܳܐ ܕܡܽܘܫܶܐ.