Numbers 29
The Book of Numbers
܀ ܡܢܝܢܐ ܟܛ ܀
1 ܘܰܒܚܰܕ ܒܝܰܪܚܳܐ ܕܫܰܒܥܳܐ. ܩܰܪܝܳܐ ܘܩܰܕܺܝܫܳܐ ܢܶܗܘܶܐ ܠܟܽܘܢ. ܘܟܽܠ ܥܒܳܕ ܕܦܽܘܠܚܳܢܳܐ ܠܳܐ ܬܶܥܒܕܽܘܢ. ܝܰܘܡܳܐ ܕܝܽܘܒܳܒܳܐ ܢܶܗܘܶܐ ܠܟܽܘܢ.
2 ܘܰܥܒܶܕܘ ܝܰܩ̈ܕܶܐ ܫܰܠ̈ܡܶܐ. ܠܪܺܝܚܳܐ ܕܰܣܘܳܬܳܐ ܠܡܳܪܝܳܐ. ܬܰܘܪܳܐ ܚܰܕ ܒܰܪ ܒܰܩܪܳܐ. ܘܕܶܟܪܳܐ ܚܰܕ. ܘܶܐܡܖ̈ܶܐ ܒܢܰܝ̈ ܫܰܢ̱ܬܳܐ ܫܰܒܥܳܐ. ܕܠܰܝܬ ܒܗܽܘܢ ܡܽܘܡܳܐ.
3 ܘܩܽܘܪܒܳܢܗܽܘܢ ܢܰܫܺܝܦܳܐ ܕܦܺܝܠ ܒܡܶܫܚܳܐ. ܬܠܳܬܳܐ ܥܶܣܖ̈ܽܘܢܺܝܢ ܠܬܰܘܪܳܐ ܚܰܕ. ܘܰܬܪܶܝܢ ܥܶܣܖ̈ܽܘܢܺܝܢ ܠܕܶܟܪܳܐ ܚܰܕ.
4 ܘܥܶܣܪܽܘܢܳܐ ܚܰܕ ܠܶܐܡܪܳܐ ܚܰܕ. ܗܳܟܰܢܳܐ ܠܫܰܒܥܳܬܰܝ̈ܗܽܘܢ ܐܶܡܖ̈ܶܐ.
5 ܘܨܺܦܪܳܝܳܐ ܚܰܕ ܕܥܶܙ̈ܶܐ ܠܰܚܛܳܗܳܐ. ܠܰܡܚܰܣܳܝܽܘ ܥܠܰܝܟܽܘܢ.
6 ܣܛܰܪ ܡܶܢ ܝܰܩܕܳܐ ܫܰܠܡܳܐ ܕܪܺܝܫ ܝܰܪܚܳܐ. ܘܰܣܡܺܝܕܶܗ. ܝܰܩܕܳܐ ܫܰܠܡܳܐ ܐܰܡܺܝܢܳܐ ܘܰܣܡܺܝܕܗܽܘܢ. ܘܢܽܘܩܳܝܗܽܘܢ. ܐܰܝܟ ܙܶܕܩܗܽܘܢ. ܠܪܺܝܚ ܣܘܳܬܳܐ ܩܽܘܪܒܳܢܳܐ ܠܡܳܪܝܳܐ.
7 ܘܒܰܥܣܰܪܬܳܐ ܒܝܰܪܚܳܐ ܗܳܢܳܐ ܕܫܰܒܥܳܐ. ܩܰܪܝܳܐ ܘܩܰܕܺܝܫܳܐ ܢܶܗܘܶܐ ܠܟܽܘܢ. ܘܟܽܠ ܥܒܳܕܳܐ ܕܦܽܘܠܚܳܢܳܐ ܠܳܐ ܬܶܥܒܕܽܘܢ.
8 ܘܩܰܪܶܒܘ ܝܰܩ̈ܕܶܐ ܫܰܠ̈ܡܶܐ ܠܡܳܪܝܳܐ ܠܪܺܝܚܳܐ ܕܰܣܘܳܬܳܐ. ܬܰܘܪܳܐ ܚܰܕ ܒܰܪ ܒܰܩܪܳܐ. ܘܕܶܟܪܳܐ ܚܰܕ. ܘܶܐܡܖ̈ܶܐ ܒܢܰܝ̈ ܫܰܢ̱ܬܳܐ ܫܰܒܥܳܐ. ܕܠܰܝܬ ܒܗܽܘܢ ܡܽܘܡܳܐ.
9 ܘܩܽܘܪܒܳܢܗܽܘܢ ܢܰܫܺܝܦܳܐ ܕܦܺܝܠ ܒܡܶܫܚܳܐ. ܬܠܳܬܳܐ ܥܶܣܖ̈ܽܘܢܺܝܢ ܠܬܰܘܪܳܐ. ܘܰܬܪܶܝܢ ܥܶܣܖ̈ܽܘܢܺܝܢ ܠܕܶܟܪܳܐ.
10 ܘܥܶܣܪܽܘܢܳܐ ܚܰܕ ܠܶܐܡܪܳܐ ܚܰܕ. ܗܳܟܰܢܳܐ ܠܫܰܒܥܳܬܰܝ̈ܗܽܘܢ ܐܶܡܖ̈ܶܐ.
11 ܘܨܺܦܪܳܝܳܐ ܚܰܕ ܕܥܶܙ̈ܶܐ ܚܠܳܦ ܚܛܳܗܳܐ. ܣܛܰܪ ܡܶܢ ܝܰܩܕܳܐ ܕܚܽܘܣܳܝܳܐ ܝܰܩܕܳܐ ܫܰܠܡܳܐ ܐܰܡܺܝܢܳܐ. ܘܰܣܡܺܝܕܗܽܘܢ. ܘܢܽܘܩܳܝܗܽܘܢ.
12 ܘܰܒܚܰܡܫܰܥܶܣܖ̈ܶܐ ܒܝܰܪܚܳܐ ܗܳܢܳܐ ܕܫܰܒܥܳܐ. ܩܰܪܝܳܐ ܘܩܰܕܺܝܫܳܐ ܢܶܗܘܶܐ ܠܟܽܘܢ. ܘܟܽܠ ܥܒܳܕ ܕܦܽܘܠܚܳܢܳܐ ܠܳܐ ܬܶܥܒܕܽܘܢ. ܘܰܥܒܶܕܘ ܥܰܕܥܺܐܕܳܐ ܠܡܳܪܝܳܐ ܫܰܒܥܳܐ ܝܰܘܡܺܝ̈ܢ.
13 ܘܩܰܪܶܒܘ ܝܰܩ̈ܕܶܐ ܫܰܠ̈ܡܶܐ ܩܽܘܪܒܳܢܳܐ ܕܪܺܝܚܳܐ ܕܰܣܘܳܬܳܐ ܠܡܳܪܝܳܐ. ܬܰܘܖ̈ܶܐ ܒܢܰܝ̈ ܒܰܩܪܳܐ ܬܠܳܬܰܥܣܰܪ. ܘܕܶܟܖ̈ܶܐ ܬܪܶܝܢ ܘܶܐܡܖ̈ܶܐ ܒܢܰܝ̈ ܫܰܢ̱ܬܳܐ ܐܰܪܒܬܰܥܣܰܪ ܕܠܰܝܬ ܒܗܽܘܢ ܡܽܘܡܳܐ.
14 ܘܩܽܘܪܒܳܢܗܽܘܢ ܢܰܫܺܝܦܳܐ ܕܦܺܝܠ ܒܡܶܫܚܳܐ. ܬܠܳܬܳܐ ܥܶܣܖ̈ܽܘܢܺܝܢ ܠܬܰܘܖ̈ܶܐ ܚܰܕ. ܗܳܟܰܢܳܐ ܠܰܬܠܳܬܰܥܣܰܪ ܬܰܘܖ̈ܺܝܢ. ܘܰܬܪܶܝܢ ܥܶܣܖ̈ܽܘܢܺܝܢ ܠܕܶܟܪܳܐ ܚܰܕ. ܗܳܟܰܢܳܐ ܠܰܬܪܶܝܢ ܕܶܟܖ̈ܺܝܢ.
15 ܘܥܶܣܪܽܘܢܳܐ ܚܰܕ ܠܶܐܡܪܳܐ ܚܰܕ. ܗܳܟܰܢܳܐ ܠܰܐܪܒܬܰܥܣܰܪ ܐܶܡܖ̈ܺܝܢ.
16 ܘܨܺܦܪܳܝܳܐ ܚܰܕ ܕܥܶܙ̈ܶܐ ܠܰܚܛܳܗܳܐ. ܣܛܰܪ ܡܶܢ ܝܰܩܕܳܐ ܫܰܠܡܳܐ ܐܰܡܺܝܢܳܐ ܘܰܣܡܺܝܕܶܗ. ܘܢܽܘܩܳܝܶܗ.
17 ܘܰܒܝܰܘܡܳܐ ܕܰܬܪܶܝܢ. ܬܰܘܖ̈ܶܐ ܒܢܰܝ̈ ܒܰܩܪܳܐ ܬܪܶܥܣܰܪ. ܘܕܶܟܖ̈ܶܐ ܬܪܶܝܢ. ܘܶܐܡܖ̈ܶܐ ܒܢܰܝ̈ ܫܰܢ̱ܬܳܐ ܐܰܪܒܰܥܣܰܪ. ܕܠܰܝܬ ܒܗܽܘܢ ܡܽܘܡܳܐ.
18 ܘܰܣܡܺܝܕܗܽܘܢ ܘܢܽܘܩܳܝܗܽܘܢ ܕܬܰܘܖ̈ܶܐ ܘܰܕܕܶܟܖ̈ܶܐ ܘܕܶܐܡܖ̈ܶܐ. ܒܡܶܢܝܳܢܗܽܘܢ ܐܰܝܟ ܙܶܕܩܗܽܘܢ.
19 ܘܨܺܦܪܳܝܳܐ ܚܰܕ ܕܥܶܙ̈ܶܐ ܚܠܳܦ ܚܛܳܗܳܐ. ܣܛܰܪ ܡܶܢ ܝܰܩܕܳܐ ܫܰܠܡܳܐ ܐܰܡܺܝܢܳܐ ܘܰܣܡܺܝܕܶܗ. ܘܢܽܘܩܳܝܶܗ.
20 ܘܰܒܝܰܘܡܳܐ ܕܰܬܠܳܬܳܐ. ܬܰܘܖ̈ܶܐ ܚܕܰܥܣܰܪ. ܘܕܶܟܖ̈ܶܐ ܬܪܶܝܢ. ܘܶܐܡܖ̈ܶܐ ܒܢܰܝ̈ ܫܰܢ̱ܬܳܐ ܐܰܪܒܰܥܣܰܪ. ܕܠܰܝܬ ܒܗܽܘܢ ܡܽܘܡܳܐ.
21 ܘܰܣܡܺܝܕܗܽܘܢ ܘܢܽܘܩܳܝܗܽܘܢ ܕܬܰܘܖ̈ܶܐ ܘܰܕܕܶܟܖ̈ܶܐ ܘܕܶܐܡܖ̈ܶܐ. ܒܡܶܢܝܳܢܗܽܘܢ ܐܰܝܟ ܙܶܕܩܗܽܘܢ.
22 ܘܨܺܦܪܳܝܳܐ ܚܰܕ ܕܥܶܙ̈ܶܐ ܚܠܳܦ ܚܛܳܗܳܐ. ܣܛܰܪ ܡܶܢ ܝܰܩܕܳܐ ܫܰܠܡܳܐ ܐܰܡܺܝܢܳܐ ܘܰܣܡܺܝܕܶܗ. ܘܢܽܘܩܳܝܶܗ.
23 ܘܰܒܝܰܘܡܳܐ ܕܰܐܪܒܥܳܐ. ܬܰܘܖ̈ܶܐ ܥܶܣܪܳܐ. ܘܕܶܟܖ̈ܶܐ ܬܪܶܝܢ. ܘܶܐܡܖ̈ܶܐ ܒܢܰܝ̈ ܫܰܢ̱ܬܳܐ ܐܰܪܒܬܰܥܣܰܪ. ܕܠܰܝܬ ܒܗܽܘܢ ܡܽܘܡܳܐ.
24 ܘܰܣܡܺܝܕܗܽܘܢ ܘܢܽܘܩܳܝܗܽܘܢ ܕܬܰܘܖ̈ܶܐ ܘܰܕܕܶܟܖ̈ܶܐ ܘܕܶܐܡܖ̈ܶܐ. ܒܡܶܢܝܳܢܗܽܘܢ ܐܰܝܟ ܙܶܕܩܗܽܘܢ.
25 ܘܨܺܦܪܳܝܳܐ ܚܰܕ ܕܥܶܙ̈ܶܐ ܚܠܳܦ ܚܛܳܗܳܐ. ܣܛܰܪ ܡܶܢ ܝܰܩܕܳܐ ܫܰܠܡܳܐ ܐܰܡܺܝܢܳܐ. ܘܰܣܡܺܝܕܶܗ. ܘܢܽܘܩܳܝܶܗ.
26 ܘܰܒܝܰܘܡܳܐ ܕܚܰܡܫܳܐ. ܬܰܘܖ̈ܶܐ ܬܶܫܥܳܐ. ܘܕܶܟܖ̈ܶܐ ܬܪܶܝܢ. ܘܶܐܡܖ̈ܶܐ ܒܢܰܝ̈ ܫܰܢ̱ܬܳܐ ܐܰܪܒܬܰܥܣܰܪ. ܕܠܰܝܬ ܒܗܽܘܢ ܡܽܘܡܳܐ.
27 ܘܰܣܡܺܝܕܗܽܘܢ ܘܢܽܘܩܳܝܗܽܘܢ ܕܬܰܘܖ̈ܶܐ ܘܰܕܕܶܟܖ̈ܶܐ ܘܕܶܐܡܖ̈ܶܐ. ܒܡܶܢܝܳܢܗܽܘܢ ܐܰܝܟ ܙܶܕܩܗܽܘܢ.
28 ܘܨܺܦܪܳܝܳܐ ܚܰܕ ܕܥܶܙ̈ܶܐ ܠܰܚܛܳܗܳܐ. ܣܛܰܪ ܡܶܢ ܝܰܩܕܳܐ ܫܰܠܡܳܐ ܐܰܡܺܝܢܳܐ ܘܰܣܡܺܝܕܶܗ. ܘܢܽܘܩܳܝܶܗ.
29 ܘܰܒܝܰܘܡܳܐ ܕܶܫܬܳܐ. ܬܰܘܖ̈ܶܐ ܬܡܳܢܝܳܐ. ܘܕܶܟܖ̈ܶܐ ܬܪܶܝܢ. ܘܶܐܡܖ̈ܶܐ ܒܢܰܝ̈ ܫܰܢ̱ܬܳܐ ܐܰܪܒܬܰܥܣܰܪ ܕܠܰܝܬ ܒܗܽܘܢ ܡܽܘܡܳܐ.
30 ܘܰܣܡܺܝܕܗܽܘܢ ܘܢܽܘܩܳܝܗܽܘܢ ܕܬܰܘܖ̈ܶܐ. ܘܰܕܕܶܟܖ̈ܶܐ. ܘܕܶܐܡܖ̈ܶܐ ܒܡܶܢܝܳܢܗܽܘܢ ܐܰܝܟ ܙܶܕܩܗܽܘܢ.
31 ܘܨܺܦܪܳܝܳܐ ܚܰܕ ܕܥܶܙ̈ܶܐ ܚܠܳܦ ܚܛܳܗܳܐ. ܣܛܰܪ ܡܶܢ ܝܰܩܕܳܐ ܫܰܠܡܳܐ ܐܰܡܺܝܢܳܐ ܘܰܣܡܺܝܕܶܗ. ܘܢܽܘܩܳܝܶܗ.
32 ܘܰܒܝܰܘܡܳܐ ܕܫܰܒܥܳܐ. ܬܰܘܖ̈ܶܐ ܫܰܒܥܳܐ. ܘܕܶܟܖ̈ܶܐ ܬܪܶܝܢ. ܘܶܐܡܖ̈ܶܐ ܒܢܰܝ̈ ܫܰܢ̱ܬܳܐ ܐܰܪܒܬܰܥܣܰܪ ܕܠܰܝܬ ܒܗܽܘܢ ܡܽܘܡܳܐ.
33 ܘܰܣܡܺܝܕܗܽܘܢ ܘܢܽܘܩܳܝܗܽܘܢ. ܕܬܰܘܖ̈ܶܐ. ܘܰܕܕܶܟܖ̈ܶܐ. ܘܕܶܐܡܖ̈ܶܐ. ܒܡܶܢܝܳܢܗܽܘܢ ܐܰܝܟ ܙܶܕܩܗܽܘܢ.
34 ܘܨܺܦܪܳܝܳܐ ܚܰܕ ܕܥܶܙ̈ܶܐ ܠܰܚܛܳܗܳܐ. ܣܛܰܪ ܡܶܢ ܝܰܩܕܳܐ ܫܰܠܡܳܐ ܐܰܡܺܝܢܳܐ. ܘܰܣܡܺܝܕܶܗ ܘܢܽܘܩܳܝܶܗ.
35 ܘܰܒܝܰܘܡܳܐ ܕܰܬܡܳܢܝܳܐ ܗܘܰܝܬܽܘܢ ܟܳܢܫܺܝܢ. ܘܟܽܠ ܥܒܳܕ ܕܦܽܘܠܚܳܢܳܐ ܠܳܐ ܬܶܥܒܕܽܘܢ.
36 ܘܩܰܪܶܒܘ ܝܰܩ̈ܕܶܐ ܫܰܠ̈ܡܶܐ ܩܽܘܪܒܳܢܳܐ ܠܪܺܝܚ ܣܘܳܬܳܐ ܠܡܳܪܝܳܐ. ܬܰܘܪܳܐ ܚܰܕ ܒܰܪ ܒܰܩܪܳܐ. ܘܕܶܟܪܳܐ ܚܰܕ. ܘܶܐܡܖ̈ܶܐ ܒܢܰܝ̈ ܫܰܢ̱ܬܳܐ ܐܰܪܒܥܳܐ ܕܠܰܝܬ ܒܗܽܘܢ ܡܽܘܡܳܐ.
37 ܘܰܣܡܺܝܕܗܽܘܢ ܘܢܽܘܩܳܝܗܽܘܢ ܕܬܰܘܖ̈ܶܐ ܘܰܕܕܶܟܖ̈ܶܐ. ܘܕܶܐܡܖ̈ܶܐ. ܒܡܶܢܝܳܢܗܽܘܢ ܐܰܝܟ ܙܶܕܩܗܽܘܢ.
38 ܘܨܺܦܪܳܝܳܐ ܚܰܕ ܕܥܶܙ̈ܶܐ ܠܰܚܛܳܗܳܐ. ܣܛܰܪ ܡܶܢ ܝܰܩܕܳܐ ܫܰܠܡܳܐ ܐܰܡܺܝܢܳܐ. ܘܰܣܡܺܝܕܶܗ. ܘܢܽܘܩܳܝܶܗ.
39 ܗܳܠܶܝܢ ܗܘܰܝܬܽܘܢ ܥܳܒܕܺܝܢ ܠܡܳܪܝܳܐ ܒܥܰܕܥܺܐܕܰܝ̈ܟܽܘܢ. ܣܛܰܪ ܡܶܢ ܢܶܕܖ̈ܰܝܟܽܘܢ. ܘܰܣܛܰܪ ܡܶܢ ܦܽܘܖ̈ܫܳܢܰܝܟܽܘܢ. ܘܝܰܩܕܰܝ̈ܟܽܘܢ ܫܰܠ̈ܡܶܐ. ܘܰܣܡܺܝܕܟܽܘܢ ܘܢܽܘܩܳܝܟܽܘܢ. ܘܩܽܘܖ̈ܒܳܢܰܝܟܽܘܢ.