Numbers 23
The Book of Numbers
܀ ܡܢܝܢܐ ܟܓ ܀
1 ܘܶܐܡܰܪ ܒܶܠܥܰܡ ܠܒܳܠܳܩ. ܒܢܺܝ ܠܺܝ ܗܳܪܟܳܐ ܫܰܒܥܳܐ ܡܰܕܒܚܺܝ̈ܢ. ܘܛܰܝܶܒ ܠܺܝ ܗܳܪܟܳܐ ܫܰܒܥܳܐ ܬܰܘܖ̈ܺܝܢ. ܘܫܰܒܥܳܐ ܕܶܟܖ̈ܺܝܢ.
2 ܘܰܥܒܰܕ ܒܳܠܳܩ ܐܰܝܟ ܕܶܐܡܰܪ ܠܶܗ ܒܶܠܥܰܡ. ܘܰܐܣܶܩܘ ܒܳܠܳܩ ܘܒܶܠܥܰܡ ܬܰܘܖ̈ܶܐ ܘܕܶܟܖ̈ܶܐ ܥܰܠ ܡܰܕܒܚܳܐ.
3 ܘܶܐܡܰܪ ܒܶܠܥܰܡ ܠܒܳܠܳܩ. ܩܽܘܡ ܗܳܪܟܳܐ ܠܘܳܬ ܥܠ̈ܰܘܳܬܳܟ. ܘܶܐܢܳܐ ܐܺܙܰܠ. ܛܳܟ ܢܶܩܪܶܐ ܡܳܪܝܳܐ ܠܽܐܘܪܥܝ. ܘܦܶܬܓܳܡܳܐ ܕܰܡܚܰܘܶܐ ܠܺܝ ܐܶܚܰܘܶܝܘܗܝ ܠܳܟ. ܘܶܐܙܰܠ ܫܰܦܝܳܐܺܝܬ.
4 ܘܶܐܬܓܠܺܝ ܐܰܠܳܗܳܐ ܥܰܠ ܒܶܠܥܰܡ. ܘܶܐܡܰܪ ܠܶܗ. ܫܰܒܥܳܐ ܡܰܕܒܚܺܝ̈ܢ ܛܰܝܶܒܬ. ܘܰܐܣ̣ܶܩܬ ܬܰܘܖ̈ܶܐ ܘܕܶܟܖ̈ܶܐ ܥܰܠ ܡܰܕܒܚܳܐ.
5 ܘܣܳܡ ܡܳܪܝܳܐ ܡܶܠܬܳܐ ܒܦܽܘܡܶܗ ܕܒܶܠܥܰܡ. ܘܶܐܡܰܪ ܠܶܗ. ܙܶܠ ܠܘܳܬ ܒܳܠܳܩ. ܘܗܳܟܰܢܳܐ ܡܰܠܶܠ.
6 ܘܶܐܬܳܐ ܠܘܳܬܶܗ. ܘܗܽܘ ܩܳܐܶܡ ܗܘܳܐ ܠܘܳܬ ܥ̈ܠܰܘܳܬܶܗ. ܗܽܘ ܘܟܽܠܗܽܘܢ ܪܰܘܖ̈ܒܳܢܶܐ ܕܡܽܘܐܳܒ.
7 ܘܰܐܪܺܝܡ ܒܡܰܬܠܶܗ. ܘܶܐܡܰܪ. ܡܶܢ ܐܳܪܳܡ ܕܰܒܪܰܢܝ ܒܳܠܳܩ ܡܰܠܟܳܐ ܕܡܽܘܐܳܒܳܝ̈ܶܐ. ܡܶܢ ܛܽܘܖ̈ܰܝ ܡܰܕܢܚܳܐ. ܘܶܐܡܰܪ ܠܺܝ ܬܳܐ ܠܽܘܛ ܠܺܝ ܠܝܰܥܩܽܘܒ. ܘܬܳܐ ܐܰܘܒܶܕ ܠܺܝ ܠܺܝܣܪܳܐܶܝܠ.
8 ܡܳܢܳܐ ܐܶܠܽܘܛܺܝܘܗܝ. ܕܠܳܐ ܠܳܛܶܗ ܐܰܠܳܗܳܐ. ܘܡܳܢܳܐ ܐܰܘܒܕܺܝܘܗܝ. ܕܠܳܐ ܐܰܘܒܕܶܗ ܡܳܪܝܳܐ.
9 ܡܶܛܽܠ ܕܡܶܢ ܪܺܝܫܐ ܕܛܽܘܪܳܐ ܚܙܺܝܬܶܗ. ܘܡܶܢ ܖ̈ܳܡܳܬܳܐ ܚܰܪܬܶܗ. ܗܳܐ ܥܰܡܳܐ ܒܰܠܚܽܘܕܰܘܗܝ ܫ̣ܪܳܐ. ܘܰܒܥܰܡ̈ܡܶܐ ܠܳܐ ܡܶܬܚܫܶܒ.
10 ܡܰܢܽܘ ܡܶܫܟܰܚ ܠܡܶܡܢܳܐ ܥܰܟܪܶܗ ܕܝܰܥܩܽܘܒ. ܘܡܶܢܝܳܢܳܐ ܕܪܽܘܒܥܶܗ ܕܺܝܣܪܳܐܶܝܠ. ܬܡܽܘܬ ܢܰܦܫܝ ܡܰܘܬܳܐ ܕܰܬܖ̈ܺܝܨܰܝܗܽܘܢ. ܘܬܶܗܘܶܐ ܚܰܪܬܝ ܐܰܟܘܳܬܗܽܘܢ.
11 ܘܶܐܡܰܪ ܒܳܠܳܩ ܠܒܶܠܥܰܡ. ܡܳܢܳܐ ܥܒܰܕܬ ܠܺܝ. ܠܰܡܠܳܛ ܒܥܶܠ̈ܕܒܳܒܰܝ ܩܪܺܝܬܳܟ. ܘܗܳܐ ܡܒܰܪܳܟܽܘ ܡܒܰܪܶܟ ܐܰܢ̱ܬ ܠܗܽܘܢ.
12 ܘܰܥܢܳܐ ܒܶܠܥܰܡ ܘܶܐܡܰܪ. ܗܳܐ ܡܶܕܶܡ ܕܣܳܐܶܡ ܡܳܪܝܳܐ ܒܦܽܘܡܝ. ܗܰܘ ܗܽܘ ܢܳܛܰܪ ܐ̱ܢܳܐ ܠܰܡܡܰܠܳܠܽܘ.
13 ܘܶܐܡܰܪ ܠܶܗ ܒܳܠܳܩ. ܬܳܐ ܥܰܡܝ ܠܰܐܬܪܳܐ ܐ̱ܚܪܺܢܳܐ ܕܬܶܚܙܶܝܘܗܝ ܡܶܢ ܬܰܡܳܢ. ܒܪܰܡ ܕܶܝܢ ܚܰܪܬܶܗ ܬܶܚܙܶܐ. ܘܟܽܠܶܗ ܠܳܐ ܬܶܚܙܶܐ. ܘܠܽܘܛܶܝܗܝ ܠܺܝ ܡܶܢ ܬܰܡܳܢ.
14 ܘܕܰܒܪܶܗ ܠܰܚܩܰܠ ܕܰܘ̈ܩܶܐ ܠܪܺܝܫ ܪܳܡܬܳܐ ܘܰܒ̣ܢܳܐ ܫܰܒܥܳܐ ܡܰܕܒܚܺܝ̈ܢ. ܘܰܐܣܶܩ ܬܰܘܖ̈ܶܐ ܘܕܶܟܖ̈ܶܐ ܥܰܠ ܡܰܕܒܚ̈ܶܐ.
15 ܘܶܐܡܰܪ ܒܶܠܥܰܡ ܠܒܳܠܳܩ. ܩܽܘܡ ܗܳܪܟܳܐ ܠܘܳܬ ܥ̈ܠܰܘܳܬܳܟ. ܘܶܐܢܳܐ ܐܶܡܛܶܐ ܥܕܰܡܳܐ ܠܗܳܪܟܳܐ.
16 ܘܶܐܬܓܠܺܝ ܡܳܪܝܳܐ ܥܰܠ ܒܶܠܥܰܡ. ܘܣܳܡ ܡܶܠܬܳܐ ܒܦܽܘܡܶܗ. ܘܶܐܡܰܪ ܠܶܗ. ܙܶܠ ܠܘܳܬ ܒܳܠܳܩ ܘܗܳܟܰܢܳܐ ܐܶܡܰܪ ܠܶܗ.
17 ܘܶܐܬܳܐ ܠܘܳܬܶܗ. ܘܗܽܘ ܩܳܐܶܡ ܗܘܳܐ ܠܘܳܬ ܥ̈ܠܰܘܳܬܶܗ. ܘܪܰܘܖ̈ܒܳܢܶܐ ܕܡܽܘܐܳܒ ܥܰܡܶܗ. ܘܶܐܡܰܪ ܠܶܗ ܒܳܠܳܩ. ܡܳܢܳܐ ܐܶܡܰܪ ܡܳܪܝܳܐ.
18 ܘܰܐܪܺܝܡ ܒܡܰܬܠܶܗ. ܘܶܐܡܰܪ. ܩܽܘܡ ܒܳܠܳܩ ܘܰܫܡܰܥ ܘܨܽܘܬ ܠܣܳܗܕܽܘܬܝ ܒܰܪܨܶܦܽܘܪ.
19 ܠܳܐ ܗܘܳܐ ܓܰܒܪܳܐ ܐܰܠܳܗܳܐ ܕܰܢܕܰܓܶܠ. ܘܳܐܦܠܳܐ ܒܰܪܢܳܫܳܐ ܕܢܶܬܡܰܠܰܟ ܗܽܘ ܐܳܡܰܪ ܘܥܳܒܶܕ. ܘܡܶܠܬܶܗ ܩܰܝܳܡܳܐ ܠܥܳܠܡܺܝܢ.
20 ܗܳܐ ܠܰܡܒܰܪܳܟܽܘ ܐܶܬܕܰܒܪܶܬ. ܘܒܽܘܪܟܬܳܐ ܠܳܐ ܐܰܗܦܶܟ.
21 ܠܳܐ ܚܳܙܶܐ ܐ̱ܢܳܐ ܥܰܘܠܳܐ ܒܝܰܥܩܽܘܒ. ܘܠܳܐ ܚܳܐܰܪ ܐ̱ܢܳܐ ܥܶܠܳܝܳܐ ܒܺܝܣܪܳܐܶܝܠ ܡܳܪܝܳܐ ܐܰܠܳܗܶܗ ܥܰܡܶܗ. ܘܬܶܫܒܽܘܚܬܳܐ ܕܡܰܠܟܶܗ ܒܶܗ.
22 ܐܰܠܳܗܳܐ ܕܰܐܦܶܩ ܐܶܢܽܘܢ ܡܶܢ ܡܶܨܪܶܝܢ. ܒܥܽܘܫܢܶܗ ܘܰܒܪܰܘܡܶܗ.
23 ܡܶܛܽܠ ܕܠܳܐ ܢܶܚܫܶܐ ܒܝܰܥܩܽܘܒ. ܘܳܐܦܠܳܐ ܩܶܨܡܳܐ ܒܺܝܣܪܳܐܶܝܠ. ܐܰܝܟ ܕܰܒܙܰܒܢܳܐ ܗܳܢܳܐ ܢܶܬܐܡܰܪ ܠܝܰܥܩܽܘܒ ܘܠܺܝܣܪܳܐܶܝܠ ܡܳܢܳܐ ܥܳܒܶܕ ܐܰܠܳܗܳܐ.
24 ܗܳܐ ܥܰܡܳܐ ܐܰܝܟ ܐܰܪܝܳܐ ܩܳܐܶܡ. ܘܰܐܝܟ ܐܰܪܝܳܐ ܡܶܫܬܰܩܰܠ ܠܳܐ ܢܶܕܡܰܟ ܥܕܰܡܳܐ ܕܢܶܐܟܽܘܠ ܬܒܪܳܐ. ܘܰܕܡܳܐ ܕܰܩ̈ܛܺܝܠܶܐ ܢܶܫܬܶܐ.
25 ܘܶܐܡܰܪ ܒܳܠܳܩ ܠܒܶܠܥܰܡ. ܠܳܐ ܡܠܳܛ ܬܠܽܘܛܺܝܘܗܝ. ܘܳܐܦܠܳܐ ܡܒܰܪܰܟܽܘ ܬܒܰܪܟܺܝܘܗܝ.
26 ܘܰܥܢܳܐ ܒܶܠܥܰܡ ܘܶܐܡܰܪ ܠܒܳܠܳܩ. ܠܳܐ ܐܶ݀ܡܪܶܬ ܠܳܟ ܕܟܽܠ ܕܳܐܡܰܪ ܠܺܝ ܡܳܪܝܳܐ. ܗܰܘ ܗܽܘ ܥܳܒܶܕ ܐ̱ܢܳܐ.
27 ܘܶܐܡܰܪ ܒܳܠܳܩ ܠܒܶܠܥܰܡ. ܬܳܐ ܐܶܕܒܪܳܟ ܠܰܐܬܪܳܐ ܐ̱ܚܪܺܢܳܐ. ܟܒܰܪ ܢܶܫܦܰܪ ܒܥܰܝ̈ܢܰܝ ܐܰܠܳܗܳܐ. ܘܠܽܘܛܶܝܗܝ ܠܺܝ ܡܶܢ ܬܰܡܳܢ.
28 ܘܰܕܒܰܪ ܒܳܠܳܩ ܠܒܶܠܥܰܡ. ܠܪܺܝܫ ܦܥܽܘܪ ܕܡܶܬܚܙܶܐ ܠܽܘܩܒܰܠ ܐܰܫܺܝܡܽܘܢ.
29 ܘܶܐܡܰܪ ܒܶܠܥܰܡ ܠܒܳܠܳܩ. ܒܢܺܝ ܠܺܝ ܗܳܪܟܳܐ ܫܰܒܥܳܐ ܡܰܕܒܚܺܝ̈ܢ. ܘܛܰܝܶܒ ܠܺܝ ܗܳܪܟܳܐ ܫܰܒܥܳܐ ܬܰܘܖ̈ܺܝܢ. ܘܫܰܒܥܳܐ ܕܶܟܖ̈ܺܝܢ.
30 ܘܰܥܒܰܕ ܒܳܠܳܩ ܐܰܝܟ ܕܶܐܡܰܪ ܠܶܗ ܒܶܠܥܰܡ. ܘܰܐܣܶܩ ܬܰܘܖ̈ܶܐ ܘܕܶܟܖ̈ܶܐ ܥܰܠ ܡܰܕܒܚ̈ܶܐ.