Numbers 24
The Book of Numbers
܀ ܡܢܝܢܐ ܟܕ ܀
1 ܘܰܚܙܳܐ ܒܶܠܥܰܡ ܕܫܰܦܺܝܪ ܗܽܘ ܒܥܰܝ̈ܢܰܝ ܡܳܪܝܳܐ ܠܰܡܒܰܪܳܟܽܘܬܶܗ ܠܺܝܣܪܳܐܶܝܠ. ܘܠܳܐ ܐܶܙܰܠ ܐܰܝܟ ܕܰܒܟܽܠ ܫܳܥܳܐ ܠܡܶܕܰܥ ܢܶܚܫܳܐ. ܘܣܳܡ ܠܡܰܕܒܪܳܐ ܐܰܦܰܘ̈ܗܝ.
2 ܘܰܐܪܺܝܡ ܒܶܠܥܰܡ ܥܰܝܢܰܘ̈ܗܝ. ܘܰܚܙܳܐ ܠܺܝܣܪܳܐܶܝܠ ܟܰܕ ܫܪܶܝܢ ܫܰܒ̈ܛܺܝܢ ܫܰܒ̈ܛܺܝܢ. ܘܰܗܘܳܬ ܥܠܰܘܗܝ ܪܽܘܚܶܗ ܕܰܐܠܳܗܳܐ.
3 ܘܰܐܪܺܝܡ ܒܡܰܬܠܶܗ. ܘܶܐܡܰܪ. ܐܶܡܰܪ ܒܶܠܥܰܡ ܒܪܶܗ ܕܰܒܥܽܘܪ. ܐܶܡܰܪ ܓܰܒܪܳܐ ܕܓܰܠܝܳܐ ܥܰܝܢܶܗ.
4 ܐܶܡܰܪ ܕܰܫܡܰܥ ܡܺܐܡܪܳܐ ܕܰܐܠܳܗܳܐ. ܘܚܶܙܘܳܐ ܕܰܐܠܳܗܳܐ ܚ̣ܙܳܐ. ܟܰܕ ܪܡܶܐ ܘܰܦܬܝ̈ܚܳܢ ܥܰܝܢܰܘ̈ܗܝ.
5 ܡܳܐ ܫܰܦܺܝܪ ܡܰܫܟܢܳܟ ܝܰܥܩܽܘܒ. ܘܡܰܫܟܢܰܝ̈ܟ ܝܺܣܪܳܐܶܝܠ.
6 ܐܰܝܟ ܢܰܚ̈ܠܶܐ ܕܪܳܕܶܝܢ. ܘܰܐܝܟ ܦܰܖ̈ܕܰܝܣܶܐ ܕܥܰܠ ܢܰܗܪܳܐ. ܘܰܐܝܟ ܡܰܫܟܢܳܐ ܕܰܢ̣ܨܰܒ ܡܳܪܝܳܐ. ܘܰܐܝܟ ܐܰܖ̈ܙܶܐ ܕܥܰܠ ܡܰܝ̈ܳܐ.
7 ܢܶܦܽܘܩ ܓܰܒܪܳܐ ܡܶܢ ܒܢܰܘ̈ܗܝ. ܘܙܰܪܥܶܗ ܒܡܰܝ̈ܳܐ ܣܰܓܺܝ̈ܐܶܐ. ܘܢܶܬܬܪܺܝܡ ܡܶܢ ܐܳܓܳܓ ܡܰܠܟܳܐ. ܘܬܶܬܪܺܝܡ ܡܰܠܟܽܘܬܶܗ.
8 ܐܰܠܳܗܳܐ ܕܰܐܦܶܩ ܐܶܢܽܘܢ ܡܶܢ ܡܶܨܪܶܝܢ. ܒܥܽܘܫܢܶܗ ܘܰܒܪܰܘܡܶܗ. ܢܶܐܟܽܘܠ ܥܰܡ̈ܡܶܐ ܣܳܢܰܐܘ̈ܗܝ ܘܓܰܖ̈ܡܰܝܗܽܘܢ ܢܬܰܒܰܪ. ܘܚܰܨܰܝ̈ܗܽܘܢ ܢܦܰܣܶܩ.
9 ܪܒܰܥ ܘܰܕܡܶܟ ܐܰܝܟ ܐܰܪܝܳܐ. ܘܰܐܝܟ ܓܽܘܪܝܳܐ ܕܰܐܪܝܳܐ. ܘܡܰܢܽܘ ܢܩܺܝܡܺܝܘܗܝ. ܒܳܖ̈ܟܰܝܟ ܒܖ̈ܺܝܟܺܝܢ. ܘܠܳܝܛܰܝ̈ܟ ܠܺܝܛܺܝܢ.
10 ܘܶܐܬܚܰܡܰܬ ܪܽܘܓܙܶܗ ܕܒܳܠܳܩ ܥܰܠ ܒܶܠܥܰܡ ܘܛܰܪܶܦ ܐܺܝܕܰܘ̈ܗܝ. ܘܶܐܡܰܪ ܒܳܠܳܩ ܠܒܶܠܥܰܡ. ܠܰܡܠܳܛ ܒܥܶܠ̈ܕܒܳܒܰܝ ܩܪܺܝܬܳܟ. ܘܗܳܐ ܡܒܰܪܳܟܽܘ ܡܒܰܪܶܟ ܐܰܢ̱ܬ ܠܗܽܘܢ ܗܳܐ ܬܠܳܬ ܙܰܒܢܺܝ̈ܢ.
11 ܗܳܫܳܐ ܦܽܘܩ ܙܶܠ ܠܳܟ ܠܰܐܬܪܳܟ. ܐܶܡ̇ܪܶܬ ܕܰܡܝܰܩܳܪܽܘ ܐܶܝܰܩܪܳܟ. ܘܗܳܐ ܟܠܳܟ ܡܳܪܝܳܐ ܡܶܢ ܐܺܝܩܳܪܳܐ.
12 ܘܰܥܢܳܐ ܒܶܠܥܰܡ ܘܶܐܡܰܪ ܠܒܳܠܳܩ. ܗܳܐ ܘܳܐܦ ܠܺܐܝܙܓܰܕܰܝ̈ܟ ܕܫܰܕܰܪܬ ܠܘܳܬܝ ܐܶܡ̇ܪܶܬ.
13 ܕܶܐܢ ܢܶܬܶܠ ܠܺܝ ܒܳܠܳܩ ܡܠܶܐ ܒܰܝܬܶܗ ܣܺܐܡܳܐ ܐܰܘ ܕܰܗܒܳܐ. ܠܳܐ ܡܶܫܟܰܚ ܐ̱ܢܳܐ ܕܶܐܥܒܰܪ ܥܰܠ ܡܶܠܰܬ ܦܽܘܡܶܗ ܕܡܳܪܝܳܐ. ܘܶܐܥܒܶܕ ܡܶܢ ܠܶܒܝ ܛܳܒܬܳܐ ܐܰܘ ܒܺܝܫܬܳܐ. ܐܶܠܳܐ ܡܶܕܶܡ ܕܳܐܡܰܪ ܠܺܝ ܡܳܪܝܳܐ. ܗܰܘ ܗܽܘ ܡܡܰܠܶܠ ܐ̱ܢܳܐ.
14 ܗܳܫܳܐ ܗܳܐ ܐܳܙܶܠ ܐ̱ܢܳܐ ܠܺܝ ܠܰܐܪܥܝ. ܬܳܐ ܕܶܝܢ ܐܶܡܠܟܳܟ ܡܶܕܶܡ ܕܥܳܒܶܕ ܥܰܡܳܐ ܗܳܢܳܐ ܠܥܰܡܳܟ ܒܚܰܪܬܳܐ ܕܝܰܘ̈ܡܳܬܳܐ.
15 ܘܰܐܪܺܝܡ ܒܡܰܬܠܶܗ. ܘܶܐܡܰܪ. ܐܶܡܰܪ ܒܶܠܥܰܡ ܒܪܶܗ ܕܒܥܽܘܪ. ܐܶܡܰܪ ܓܰܒܪܳܐ ܕܓܰܠܝܳܐ ܥܰܝܢܶܗ.
16 ܐܶܡܰܪ ܕܰܫܡܰܥ ܡܺܐܡܪܳܐ ܕܰܐܠܳܗܳܐ. ܘܺܝܕܰܥ ܡܰܕܥܳܐ ܕܰܡܪܰܝܡܳܐ. ܘܚܶܙܘܳܐ ܕܰܐܠܳܗܳܐ ܚܙܳܐ. ܟܰܕ ܪܡܶܐ ܘܰܦܬܺܝ̈ܚܳܢ ܥܰܝܢܰܘ̈ܗܝ.
17 ܚܙܺܝܬܶܗ ܘܠܳܐ ܡܶܢ ܟܰܕܽܘ. ܘܚܳܪܬܶܗ ܘܠܳܐ ܗܘܳܐ ܩܰܪܺܝܒ. ܢܶܕܢܰܚ ܟܰܘܟܒܳܐ ܡܶܢ ܝܰܥܩܽܘܒ. ܘܰܢܩܽܘܡ ܪܺܝܫܐ ܡܶܢ ܝܺܣܪܳܐܶܝܠ. ܘܢܰܘܒܶܕ ܠܓܰܢ̱ܒܳܖ̈ܶܐ ܕܡܽܘܐܳܒ. ܘܰܢܫܰܥܒܶܕ ܠܟܽܠܗܽܘܢ ܒܢܰܝ̈ ܫܺܝܬ.
18 ܘܬܶܗܘܶܐ ܐܰܕܽܘܡ ܝܳܪܬܽܘܬܶܗ. ܘܣܳܥܺܝܪ ܝܳܪܬܽܘܬܳܐ ܕܰܒܥܶܠܕܒܳܒܰܘ̈ܗܝ. ܬܶܗܘܶܐ ܕܺܝܠܶܗ. ܘܺܝܣܪܳܐܶܝܠ ܢܶܩܢܶܐ ܚܰܝܠܳܐ.
19 ܘܢܶܚܽܘܬ ܡܶܢ ܝܰܥܩܽܘܒ. ܘܢܰܘܒܶܕ ܠܰܐܝܢܳܐ ܕܡܶܫܬܰܘܙܰܒ ܡܶܢ ܩܪܺܝܬܳܐ.
20 ܘܰܚܙܳܐ ܠܰܥܡܳܠܺܝܩ. ܘܰܐܪܺܝܡ ܒܡܰܬܠܶܗ. ܘܶܐܡܰܪ. ܪܺܝܫ ܥܰܡ̈ܡܶܐ ܥܡܳܠܺܝܩ. ܘܚܰܪܬܶܗ ܬܺܐܒܰܕ ܠܥܳܠܡܺܝܢ.
21 ܘܰܚܙܳܐ ܠܩܺܝܢܳܝ̈ܶܐ. ܘܰܐܪܺܝܡ ܒܡܰܬܠܶܗ. ܘܶܐܡܰܪ. ܥܰܫܺܝܢ ܡܰܘܬܒܳܟ. ܘܣܺܝܡ ܒܰܫܩܺܝܦܳܐ ܩܶܢܳܟ.
22 ܐܶܢ ܢܶܗܘܶܐ ܠܒܽܘܥܳܪܳܐ ܩܺܝܢ. ܥܕܰܡܳܐ ܠܰܐܬܽܘܪ ܢܶܫܒܽܘܢܳܟ.
23 ܘܰܐܪܺܝܡ ܒܡܰܬܠܶܗ. ܘܶܐܡܰܪ. ܘܳܝ ܡܰܢܽܘ ܢܺܚܶܐ ܡܳܐ ܕܣܳܐܶܡ ܗܳܠܶܝܢ ܐܰܠܳܗܳܐ.
24 ܘܠܶܓܝܽܘܢ̈ܶܐ ܢܳܦ̈ܩܳܢ ܡܶܢ ܐܰܪܥܳܐ ܕܟܺܬܳܝ̈ܶܐ. ܘܰܢܫܰܥܒܕܽܘܢ ܠܳܐܬܽܘܪ. ܘܰܢܫܰܥܒܕܽܘܢ ܠܥܶܒܖ̈ܳܝܶܐ. ܘܳܐܦ ܗܶܢܽܘܢ ܢܺܐܒܕܽܘܢ ܠܥܳܠܡܺܝܢ.
25 ܘܩܳܡ ܒܶܠܥܰܡ ܘܰܗܦܰܟ ܐܶܙܰܠ ܠܶܗ ܠܰܐܬܪܶܗ. ܘܳܐܦ ܒܳܠܳܩ ܐܶܙܰܠ ܠܽܐܘܪܚܶܗ.