Numbers 11
The Book of Numbers
܀ ܡܢܝܢܐ ܝܐ ܀
1 ܘܟܰܕ ܪܛܶܢܘ ܗܘܰܘ ܥܰܡܳܐ. ܐܶܬܒܐܶܫ ܩܕܳܡ ܡܳܪܝܳܐ. ܘܰܫܡܰܥ ܡܳܪܝܳܐ ܘܶܐܬܚܰܡܰܬ ܪܽܘܓܙܶܗ. ܘܣܶܦܰܬ ܒܗܽܘܢ ܢܽܘܪܶܗ ܕܡܳܪܝܳܐ. ܘܶܐܟܰܠܬ ܒܰܚܕܳܖ̈ܶܝܗ̇ ܕܡܰܫܪܺܝܬܳܐ.
2 ܘܰܓܥܰܘ ܥܰܡܳܐ ܥܰܠ ܡܽܘܫܶܐ. ܘܨܰܠܺܝ ܡܽܘܫܶܐ ܩܕܳܡ ܡܳܪܝܳܐ. ܘܫܶܠܝܰܬ ܢܽܘܪܳܐ.
3 ܘܰܩܪܳܐ ܫܡܶܗ ܕܰܐܬܪܳܐ ܗܰܘ ܝܰܩܕܳܢܳܐ. ܡܶܛܽܠ ܕܣܶܦܰܬ ܒܗܽܘܢ ܢܽܘܪܶܗ ܕܡܳܪܝܳܐ.
4 ܘܚܰܠܽܘܛܳܐ ܕܺܐܝܬ ܗܘܰܘ ܒܰܝܢܳܬܗܽܘܢ ܪܰܓܘ ܪܶܓܬܳܐ. ܘܰܗܦܰܟܘ ܐܰܒܟܺܝܘ ܐܳܦ ܠܰܒܢܰܝ̈ ܝܺܣܪܳܐܶܝܠ. ܘܳܐܡܪܺܝܢ. ܡܰܢ ܕܶܝܢ ܐܰܘܟܠܰܢ ܒܶܣܪܳܐ.
5 ܐܶܬܕܟܰܪܢ ܢܽܘ̈ܢܶܐ ܕܳܐܟܠܺܝܢ ܗܘܰܝܢ ܒܡܶܨܪܶܝܢ ܡܰܓܳܢ. ܘܰܩܛܰܝ̈ܳܐ ܘܦܰܛܺܝܚ̈ܶܐ ܘܟܰܖ̈ܳܬܳܐ. ܘܒܶܨ̈ܠܶܐ. ܘܬܽܘܡܳܐ.
6 ܘܗܳܫܳܐ ܗܳܐ ܢܰܚܒܳܐ ܢܰܦܫܰܢ. ܘܠܰܝܬ ܡܶܕܶܡ. ܐܶܠܳܐ ܐܶܢ ܗܳܢܳܐ ܡܰܢܢܳܐ ܕܰܩܕܳܡ ܥܰܝ̈ܢܰܝܢ.
7 ܘܡܰܢܢܳܐ ܐܰܝܟ ܙܰܪܥܳܐ ܗܘܳܐ ܕܟܽܘܣܒܰܪܬܳܐ. ܘܥܰܝܢܶܗ ܐܰܝܟ ܥܰܝܢܳܐ ܕܒܶܪܽܘܠܚܳܐ.
8 ܘܡܶܬܟܰܪܟܺܝܢ ܥܰܡܳܐ ܘܠܳܩܛܺܝܢ ܠܶܗ. ܘܛܳܚܢܺܝܢ ܠܶܗ ܒܪܰܚܝܳܐ. ܘܕܳܩܺܝܢ ܠܶܗ ܒܰܡܕܳܟܬܳܐ ܘܰܡܒܰܫܠܺܝܢ ܠܶܗ ܒܩܶܕܪܳܐ. ܘܥܳܒܕܺܝܢ ܡܶܢܶܗ ܪܰܥܦܳܐ. ܘܗܳܘܶܐ ܛܰܥܡܶܗ ܐܰܝܟ ܛܰܥܡܳܐ ܕܠܺܝܫ ܒܡܶܫܚܳܐ.
9 ܘܡܳܐ ܕܢܳܚܶܬ ܛܰܠܳܐ ܥܰܠ ܡܰܫܪܺܝܬܳܐ ܒܠܺܠܝܳܐ. ܢܳܚܶܬ ܥܠܰܘܗܝ ܡܰܢܢܳܐ.
10 ܘܰܫܡܰܥ ܡܽܘܫܶܐ ܠܥܰܡܳܐ ܟܰܕ ܒܳܟܶܝܢ ܒܫܰܖ̈ܒܳܬܗܽܘܢ. ܐ̱ܢܳܫ ܒܰܬܪܰܥ ܡܰܫܟܢܶܗ. ܘܶܐܬܚܰܡܰܬ ܪܽܘܓܙܶܗ ܕܡܳܪܝܳܐ. ܘܳܐܦ ܒܥܰܝܢܰܘ̈ܗܝ ܕܡܽܘܫܶܐ ܐܶܬܒܐܶܫ.
11 ܘܶܐܡܰܪ ܡܽܘܫܶܐ ܠܡܳܪܝܳܐ. ܡܳܪܝ. ܠܡܳܢܳܐ ܐܰܒܐܶܫܬ ܠܥܰܒܕܳܟ. ܘܰܠܡܳܢܳܐ ܠܳܐ ܐܶܫܟܚܶܬ ܖ̈ܰܚܡܶܐ ܒܥܰܝ̈ܢܰܝܟ. ܕܰܐܪܡܺܝܬܳܝܗܝ ܥܠܰܝ ܟܽܠܶܗ ܛܰܥܢܶܗ ܕܥܰܡܳܐ ܗܳܢܳܐ.
12 ܕܰܠܡܳܐ ܐܶܢܳܐ ܒܛܶܢܬܶܗ ܠܗܳܢܳܐ ܟܽܠܶܗ ܥܰܡܳܐ ܐܰܘ ܕܰܠܡܳܐ ܐܶܢܳܐ ܝܺܠܶܕܬܶܗ. ܕܳܐܡܰܪ ܐܰܢ̱ܬ ܠܺܝ ܫܰܩܠܳܝܗܝ ܒܥܽܘܒܳܟ ܐܰܝܟ ܕܰܡܫܰܩܶܠ ܡܪܰܒܝܳܢܳܐ ܠܝܳܠܽܘܕܳܐ. ܠܰܐܪܥܳܐ ܕܺܝܡܰܝܬ ܠܰܐܒܳܗܰܝ̈ܗܽܘܢ.
13 ܐܰܝܡܶܟܳܐ ܠܺܝ ܒܶܣܪܳܐ ܕܶܐܬܶܠ ܠܗܳܢܳܐ ܟܽܠܶܗ ܥܰܡܳܐ. ܕܒܳܟܶܝܢ ܥܠܰܝ. ܘܳܐܡܪܺܝܢ. ܗܰܒ ܠܰܢ ܒܶܣܪܳܐ ܕܢܶܐܟܽܘܠ.
14 ܠܳܐ ܡܶܫܟܰܚ ܐ̱ܢܳܐ ܕܶܐܣܰܝܒܰܪ ܒܰܠܚܽܘܕܰܝ ܠܗܳܢܳܐ ܟܽܠܶܗ ܥܰܡܳܐ. ܡܶܛܽܠ ܕܥܰܫܺܝܢ ܗ̱ܘ ܡܶܢܝ.
15 ܐܶܢ ܗܳܟܰܢܳܐ ܥܳܒܶܕ ܐܰܢ̱ܬ ܠܺܝ. ܩܛܽܘܠܰܝܢܝ ܡܶܩܛܰܠ. ܐܶܢ ܐܶܫܟܚܶܬ ܖ̈ܰܚܡܶܐ ܒܥܰܝ̈ܢܰܝܟ. ܘܠܳܐ ܐܶܚܙܶܐ ܒܒܺܝܫܬܝ.
16 ܘܶܐܡܰܪ ܡܳܪܝܳܐ ܠܡܽܘܫܶܐ. ܟܰܢܶܫ ܠܺܝ ܫܰܒܥܺܝܢ ܓܰܒܖ̈ܺܝܢ ܡܶܢ ܣܳܒ̈ܶܐ ܕܺܝܣܪܳܐܶܝܠ. ܐܰܝܠܶܝܢ ܕܝܳܕܰܥ ܐܰܢ̱ܬ ܕܗܶܢܽܘܢ ܐܶܢܽܘܢ ܖ̈ܺܝܫܰܘܗܝ ܕܥܰܡܳܐ ܘܣܳܦܖ̈ܰܘܗܝ. ܘܰܕܒܰܪ ܐܶܢܽܘܢ ܠܡܰܫܟܰܢ ܙܰܒܢܳܐ. ܘܢܶܬܛܰܝܒܽܘܢ ܬܰܡܳܢ ܥܰܡܳܟ.
17 ܘܶܐܚܽܘܬ ܘܶܐܡܰܠܶܠ ܥܰܡܳܟ ܬܰܡܳܢ. ܘܶܐܒܨܽܘܪ ܡܶܢ ܪܽܘܚܳܐ ܕܰܥܠܰܝܟ ܘܶܐܣܺܝܡ ܥܠܰܝܗܽܘܢ. ܘܢܶܫܩܠܽܘܢ ܥܰܡܳܟ ܒܛܰܥܢܶܗ ܕܥܰܡܳܐ ܗܳܢܳܐ. ܘܠܳܐ ܬܶܫܩܽܘܠ ܐܰܢ̱ܬ ܒܰܠܚܽܘܕܰܝܟ.
18 ܘܶܐܡܰܪ ܡܽܘܫܶܐ ܠܥܰܡܳܐ. ܐܶܬܩܰܕܰܫܘ ܡܚܳܪ ܕܬܶܐܟܠܽܘܢ ܒܶܣܪܳܐ. ܡܶܛܽܠ ܕܰܒܟܰܝܬܽܘܢ ܩܕܳܡ ܡܳܪܝܳܐ ܘܶܐܡܰܪܬܽܘܢ. ܡܰܢ ܕܶܝܢ ܐܰܘܟܠܰܢ ܒܶܣܪܳܐ. ܡܶܛܽܠ ܕܛܳܒ ܗܘܳܐ ܠܰܢ ܒܡܶܨܪܶܝܢ. ܘܢܶܬܶܠ ܠܟܽܘܢ ܡܳܪܝܳܐ ܒܶܣܪܳܐ ܕܬܶܐܟܠܽܘܢ.
19 ܠܳܐ ܚܰܕ ܝܽܘܡ ܬܶܐܟܠܽܘܢܶܗ. ܘܠܳܐ ܬܪܶܝܢ ܝܰܘܡܺܝ̈ܢ. ܘܠܳܐ ܚܰܡܫܳܐ ܝܰܘܡܺܝ̈ܢ. ܘܳܐܦܠܳܐ ܥܶܣܪܳܐ ܝܰܘܡܺܝ̈ܢ. ܘܠܳܐ ܥܶܣܪܺܝܢ ܝܰܘܡܺܝ̈ܢ.
20 ܥܕܰܡܳܐ ܠܺܝܪܰܚ ܝܰܘܡܺܝ̈ܢ ܬܶܐܟܠܽܘܢܶܗ. ܥܕܰܡܳܐ ܕܢܶܦܽܘܩ ܡܶܢ ܢܚܺܝܖ̈ܰܝܟܽܘܢ ܘܬܶܗܘܶܐ ܠܟܽܘܢ ܐܰܦܬܳܪܳܐ ܥܰܠ ܕܰܐܣܠܺܝܬܽܘܢ ܠܡܳܪܝܳܐ ܕܰܒܟܽܘܢ. ܘܰܒܟܰܝܬܽܘܢ ܩܕܳܡ ܡܳܪܝܳܐ ܘܶܐܡܰܪܬܽܘܢ. ܠܡܳܢܳܐ ܓܶܝܪ ܢܦܰܩܢ ܡܶܢ ܡܶܨܪܶܝܢ.
21 ܘܶܐܡܰܪ ܡܽܘܫܶܐ ܩܕܳܡ ܡܳܪܝܳܐ. ܫܶܬܡܳܐܐ ܐܰܠܦܺܝ̈ܢ ܓܰܒܪܳܐ ܖ̈ܶܓܠܳܝܶܐ. ܥܰܡܳܐ ܕܶܐܢܳܐ ܒܰܝܢܳܬܗܽܘܢ. ܘܰܐܢ̱ܬ ܐܶܡܰܪܬ ܕܒܶܣܪܳܐ ܐܶܬܶܠ ܠܗܽܘܢ. ܘܢܶܐܟܠܽܘܢ ܝܺܪܰܚ ܝܰܘܡܺܝ̈ܢ.
22 ܐܶܢ ܥܳܢ̈ܳܐ ܘܬܰܘܖ̈ܶܐ ܡܶܬܢܰܟܣܺܝܢ ܠܗܽܘܢ. ܡܳܢܳܐ ܥܳܒܕܺܝܢ ܠܗܽܘܢ. ܘܶܐܢ ܟܽܠܗܽܘܢ ܢܽܘ̈ܢܶܐ ܕܝܰܡܳܐ ܡܶܬܬܨܺܝܕܺܝܢ ܠܗܽܘܢ. ܠܰܐܝܟܳܐ ܡܡܰܠܶܝܢ ܠܗܽܘܢ.
23 ܘܶܐܡܰܪ ܡܳܪܝܳܐ ܠܡܽܘܫܶܐ. ܐܺܝܕܶܗ ܕܡܳܪܝܳܐ ܡܡܰܠܝܳܐ. ܗܳܫܳܐ ܬܶܚܙܶܐ ܐܶܢ ܗܳܘܝܳܐ ܡܶܠܰܬܝ ܐܰܘ ܠܳܐ.
24 ܘܰܢܦܰܩ ܡܽܘܫܶܐ. ܘܶܐܡܰܪ ܠܥܰܡܳܐ ܦܶܬܓܳܡܰܘ̈ܗܝ ܕܡܳܪܝܳܐ. ܘܟܰܢܶܫ ܫܰܒܥܺܝܢ ܓܰܒܖ̈ܺܝܢ ܡܶܢ ܣܳܒ̈ܶܐ ܕܥܰܡܳܐ. ܘܰܐܩܺܝܡ ܐܶܢܽܘܢ ܚܕܳܖ̈ܰܘܗܝ ܕܡܰܫܟܢܳܐ.
25 ܘܰܢܚܶܬ ܡܳܪܝܳܐ ܒܰܥܢܳܢܳܐ. ܘܡܰܠܶܠ ܥܰܡܶܗ. ܘܒܰܨܰܪ ܡܶܢ ܪܽܘܚܳܐ ܕܰܥܠܰܘܗܝ. ܘܝܰܗܒ ܥܰܠ ܫܰܒܥܺܝܢ ܓܰܒܖ̈ܺܝܢ ܣܳܒ̈ܶܐ. ܘܟܰܕ ܫܪܳܬ ܥܠܰܝܗܽܘܢ ܪܽܘܚܳܐ. ܐܶܬܢܰܒܺܝܘ ܘܠܳܐ ܐܰܘܣܶܦܘ.
26 ܘܶܐܫܬܚܰܪܘ ܬܪܶܝܢ ܓܰܒܖ̈ܺܝܢ ܒܡܰܫܪܺܝܬܳܐ. ܫܡܶܗ ܕܚܰܕ ܐܶܠܕܳܕ. ܘܰܫܡܶܗ ܕܰܐ̱ܚܪܺܢܳܐ ܡܺܝܕܳܕ. ܘܰܫܪܳܬ ܥܠܰܝܗܽܘܢ ܪܽܘܚܳܐ. ܘܳܐܦ ܗܶܢܽܘܢ ܟܬܺܝܒܺܝܢ ܗܘܰܘ. ܘܠܳܐ ܐܶܬܰܘ ܠܡܰܫܟܢܳܐ. ܘܶܐܬܢܰܒܺܝܘ ܒܡܰܫܪܺܝܬܳܐ.
27ܘܰܪܗܶܛ ܥܠܰܝܡܳܐ ܘܚܰܘܺܝ ܠܡܽܘܫܶܐ. ܘܶܐܡܰܪ ܠܶܗ. ܐܶܠܕܳܕ ܘܡܺܝܕܳܕ ܗܳܐ ܡܶܬܢܰܒܶܝܢ ܒܡܰܫܪܺܝܬܳܐ.
28 ܘܰܥܢܳܐ ܗܽܘܫܳܥ ܒܰܪܢܽܘܢ. ܡܫܰܡܫܳܢܶܗ ܕܡܽܘܫܶܐ ܡܶܢ ܛܰܠܝܽܘܬܶܗ. ܘܶܐܡܰܪ ܠܶܗ. ܡܳܪܝ ܡܽܘܫܶܐ ܟܠܺܝ ܐܶܢܽܘܢ.
29 ܐܶܡܰܪ ܠܶܗ ܡܽܘܫܶܐ ܠܳܐ ܬܰܛܢܰܢܝ. ܡܰܢ ܕܶܝܢ ܥ̣ܒܰܕ ܟܽܠܶܗ ܥܰܡܶܗ ܕܡܳܪܝܳܐ ܢܒܺܝ̈ܶܐ. ܡܶܛܽܠ ܕܝܰܗܒ ܡܳܪܝܳܐ ܪܽܘܚܶܗ ܥܠܰܝܗܽܘܢ.
30 ܘܥܰܠ ܡܽܘܫܶܐ ܠܡܰܫܪܺܝܬܳܐ ܗܽܘ ܘܣܳܒ̈ܶܐ. ܕܺܝܣܪܳܐܶܝܠ.
31 ܘܪܽܘܚܳܐ ܫܶܩܠܰܬ ܡܶܢ ܩܕܳܡ ܡܳܪܝܳܐ. ܘܰܐܣܩܰܬ ܣܰܠܘܰܝ ܡܶܢ ܝܰܡܳܐ. ܘܰܐܪܡܝܰܬ ܥܰܠ ܡܰܫܪܺܝܬܳܐ. ܡܰܪܕܶܐ ܝܰܘܡܳܐ ܠܟܳܐ. ܘܡܰܪܕܶܐ ܝܰܘܡܳܐ ܠܟܳܐ. ܚܕܳܖ̈ܶܝܗ̇ ܕܡܰܫܪܺܝܬܳܐ. ܘܰܐܝܟ ܬܰܪܬܶܝܢ ܐܰܡܺܝ̈ܢ ܥܰܠ ܐܰܦܰܝ̈ ܐܰܪܥܳܐ.
32 ܘܩܳܡ ܥܰܡܳܐ ܟܽܠܶܗ ܐܺܝܡܳܡܳܐ ܗܰܘ. ܘܟܽܠܶܗ ܠܺܠܝܳܐ. ܘܟܽܠܶܗ ܐܺܝܡܳܡܳܐ ܕܒܳܬܪܶܗ. ܘܟܰܢܫܽܘܗ̇ ܠܣܰܠܘܰܝ. ܐܰܝܢܳܐ ܕܰܐܙܥܰܪ ܟܰܢܶܫ ܥܶܣܪܳܐ ܟܖ̈ܰܘܳܢ. ܘܰܫܛܰܚܘ ܠܗܽܘܢ ܡܰܫܛ̈ܚܶܐ ܚܕܳܖ̈ܶܝܗ̇ ܕܡܰܫܪܺܝܬܳܐ.
33 ܒܶܣܪܳܐ ܥܕܰܟܺܝܠ ܒܶܝܬ ܫܶܢܰܝ̈ܗܽܘܢ. ܘܥܰܕܠܳܐ ܥ̣ܒܰܪ ܬܩܶܦ ܪܽܘܓܙܶܗ ܕܡܳܪܝܳܐ ܥܰܠ ܥܰܡܳܐ. ܘܰܡ̣ܚܳܐ ܡܳܪܝܳܐ ܒܥܰܡܳܐ ܡܚܽܘܬܳܐ ܕܛܳܒ ܪܰܒܳܐ.
34 ܘܰܩܪܳܐ ܫܡܶܗ ܕܰܐܬܪܳܐ ܗܰܘ ܩܰܒܖ̈ܶܐ ܕܪܶܓܬܳܐ. ܡܶܛܽܠ ܕܬܰܡܳܢ ܩܒܰܪܘ ܠܥܰܡܳܐ ܕܪܰܓܘ ܪܶܓܬܳܐ.
35 ܘܡܶܢ ܩܰܒܖ̈ܶܐ ܕܪܶܓܬܳܐ ܫܩܰܠܘ ܥܰܡܳܐ ܠܚܶܨܪܽܘܬ. ܘܰܗܘܰܘ ܒܚܶܨܪܽܘܬ.