Numbers 3
The Book of Numbers
܀ ܡܢܝܢܐ ܓ ܀
1 ܘܗܳܠܶܝܢ ܬܰܘܠ̈ܕܳܬܶܗ ܕܰܐܗܪܽܘܢ ܘܰܕܡܽܘܫܶܐ. ܒܝܰܘܡܳܐ ܕܡܰܠܶܠ ܡܳܪܝܳܐ ܥܰܡ ܡܽܘܫܶܐ ܒܛܽܘܪܳܐ ܕܣܺܝܢܰܝ.
2 ܘܗܳܠܶܝܢ ܫܡܳܗ̈ܶܐ ܕܰܒܢܰܝ̈ ܐܰܗܪܽܘܢ. ܒܽܘܟܪܶܗ ܢܳܕܳܒ. ܘܰܐܒܺܝܗܽܘ. ܘܶܐܠܺܝܥܳܙܳܪ. ܘܺܐܝܬܳܡܳܪ.
3 ܗܳܠܶܝܢ ܫܡܳܗ̈ܶܐ ܕܒܢܰܝ̈ ܐܰܗܪܽܘܢ ܟܳܗܢܳܐ. ܕܶܐܬܡܫܰܚܘ ܘܫܰܡܠܺܝܘ ܐܺܝܕܰܝ̈ܗܽܘܢ ܠܟܳܗܢܽܘܬܳܐ.
4 ܘܡܺܝܬܘ ܢܳܕܳܒ ܘܰܐܒܺܝܗܽܘ ܩܕܳܡ ܡܳܪܝܳܐ. ܟܰܕ ܩܰܪܶܒܘ ܢܽܘܪܳܐ ܢܽܘܟܪܳܝܬܳܐ ܩܕܳܡ ܡܳܪܝܳܐ. ܒܡܰܕܒܪܳܐ ܕܣܺܝܢܰܝ. ܘܰܒܢܰܝ̈ܳܐ ܠܳܐ ܗܘܰܘ ܠܗܽܘܢ. ܘܟܰܗܶܢܘ ܐܶܠܺܝܥܳܙܳܪ ܘܺܐܝܬܳܡܳܪ. ܒܰܚܝܰܝ̈ ܐܰܗܪܽܘܢ ܐܰܒܽܘܗܽܘܢ.
5 ܘܡܰܠܶܠ ܡܳܪܝܳܐ ܥܡ ܡܽܘܫܶܐ ܘܶܐܡܰܪ ܠܶܗ.
6 ܩܰܪܶܒ ܠܫܰܒܛܳܐ ܕܠܶܘܺܝ. ܘܰܐܩܺܝܡܳܝܗܝ ܩܕܳܡ ܐܰܗܪܽܘܢ ܟܳܗܢܳܐ. ܘܰܢܫܰܡܫܽܘܢܶܗ.
7 ܘܢܶܛܪܽܘܢ ܡܰܛܰܪܬܶܗ. ܘܡܰܛܰܪܬܳܐ ܕܟܽܠܳܗ̇ ܟܢܽܘܫܬܳܐ ܩܕܳܡ ܡܳܪܝܳܐ ܩܕܳܡ ܡܰܫܟܰܢ ܙܰܒܢܳܐ. ܠܡܶܦܠܰܚ ܦܽܘܠܚܳܢܳܐ ܕܡܰܫܟܢܳܐ.
8 ܘܢܶܛܪܽܘܢ ܟܽܠܗܽܘܢ ܡܳܐܢ̈ܶܐ ܕܡܰܫܟܰܢ ܙܰܒܢܳܐ ܡܰܛܰܪܬܳܐ ܕܰܒܢܰܝ̈ ܝܺܣܪܳܐܶܝܠ. ܠܡܶܦܠܰܚ ܦܽܘܠܚܳܢܳܐ ܕܡܰܫܟܢܳܐ.
9 ܘܬܶܬܶܠ ܐܶܢܽܘܢ ܠܠܶܘܳܝ̈ܶܐ ܠܰܐܗܪܽܘܢ ܘܠܰܒܢܰܘ̈ܗܝ. ܡܰܘܗܰܒܬܳܐ ܝܺܗܺܝܒܺܝܢ ܐܶܢܽܘܢ ܠܶܗ ܡܶܢ ܓܰܘ ܒܢܰܝ̈ ܝܺܣܪܳܐܶܝܠ.
10 ܘܠܰܐܗܪܽܘܢ ܘܠܰܒܢܰܘ̈ܗܝ ܦܰܩܶܕ. ܘܢܶܛܪܽܘܢ ܟܳܗܢܽܘܬܗܽܘܢ. ܘܢܽܘܟܪܳܝܳܐ ܕܩܳܪܶܒ. ܢܶܬܩܛܶܠ.
11 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.
12 ܗܳܐ ܐܶܢܳܐ ܢܶܣܒܶܬ ܠܠܶܘܳܝ̈ܶܐ ܡܶܢ ܓܰܘ ܒܢܰܝ̈ ܝܺܣܪܳܐܶܝܠ. ܚܠܳܦ ܟܽܠ ܒܽܘܟܪܳܐ ܕܦܳܬܰܚ ܟܽܠ ܡܰܪܒܥܳܐ ܡܶܢ ܒܢܰܝ̈ ܝܺܣܪܳܐܶܝܠ. ܕܢܶܗܘܽܘܢ ܠܺܝ ܠܶܘܳܝ̈ܶܐ.
13 ܡܶܛܽܠ ܕܕܺܝܠܝ ܗܽܘ ܟܽܠ ܒܽܘܟܪܳܐ. ܒܝܰܘܡܳܐ ܕܩܶܛܠܶܬ ܟܽܠܗܽܘܢ ܒܽܘܟܖ̈ܶܐ ܕܒܰܐܪܥܳܐ ܕܡܶܨܪܶܝܢ. ܩܰܕܫܶܬ ܠܺܝ ܟܽܠ ܒܽܘܟܪܳܐ ܕܰܒܢܰܝ̈ ܝܺܣܪܳܐܶܝܠ. ܡܶܢ ܐ̱ܢܳܫܳܐ ܘܰܥܕܰܡܳܐ ܠܰܒܥܺܝܪܳܐ. ܠܺܝ ܢܶܗܘܽܘܢ. ܐܶܢܳܐ ܐ̱ܢܳܐ ܡܳܪܝܳܐ.
14 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ ܒܡܰܕܒܪܳܐ ܕܣܺܝܢܰܝ. ܘܶܐܡܰܪ ܠܶܗ.
15 ܡܢܺܝ ܠܰܒܢܰܝ̈ ܠܶܘܺܝ ܠܫܰܖ̈ܒܳܬܗܽܘܢ. ܠܒܶܝܬ ܐܰܒܳܗܰܝ̈ܗܽܘܢ. ܟܽܠ ܕܶܟܪܳܐ ܡܶܢ ܒܰܪ ܝܰܪܚܳܐ ܘܰܠܥܶܠ ܬܶܡܢܶܐ ܐܶܢܽܘܢ.
16 ܘܰܡܢܳܐ ܐܶܢܽܘܢ ܡܽܘܫܶܐ ܒܡܶܠܰܬ ܦܽܘܡܶܗ ܕܡܳܪܝܳܐ. ܐܰܝܟ ܕܶܐܬܦܰܩܰܕ.
17 ܘܰܗܘܰܘ ܗܳܠܶܝܢ ܒܢܰܝ̈ ܠܶܘܺܝ ܒܰܫܡܳܗܰܝ̈ܗܽܘܢ. ܓܶܪܫܽܘܢ. ܘܩܳܗܳܬ. ܘܡܳܪܪܳܝ.
18 ܘܗܳܠܶܝܢ ܫܡܳܗ̈ܶܐ ܕܰܒܢܰܝ̈ ܓܶܪܫܽܘܢ ܠܫܰܖ̈ܒܳܬܗܽܘܢ. ܠܶܒܢܺܝ. ܘܫܶܡܥܺܝ.
19 ܘܰܒܢܰܝ̈ ܩܳܗܳܬ ܠܫܰܖ̈ܒܳܬܗܽܘܢ. ܥܰܡܪܰܡ. ܘܝܰܨܗܳܪ. ܘܚܶܒܪܽܘܢ. ܘܥܽܘܙܺܝܶܠ.
20 ܘܰܒܢܰܝ̈ ܡܳܪܪܳܝ ܠܫܰܖ̈ܒܳܬܗܽܘܢ. ܡܰܚܠܺܝ. ܘܡܽܘܫܺܝ. ܗܳܠܶܝܢ ܐܶܢܽܘܢ ܫܰܖ̈ܒܳܬܳܐ ܕܠܶܘܳܝ̈ܶܐ ܠܒܶܝܬ ܐܰܒܳܗܰܝ̈ܗܽܘܢ.
21 ܠܓܶܪܫܽܘܢ ܫܰܪܒܬܳܐ ܕܠܶܒܢܺܝ. ܘܫܰܪܒܬܳܐ ܕܫܶܡܥܺܝ. ܗܳܠܶܝܢ ܐܶܢܽܘܢ ܫܰܪܒܬܳܐ ܕܓܶܪܫܽܘܢ.
22 ܘܡܶܢܝܳܢܗܽܘܢ ܒܡܶܢܝܳܢܳܐ ܕܟܽܠ ܕܶܟܪܳܐ ܡܶܢ ܒܰܪ ܝܰܪܚܳܐ. ܘܰܠܥܶܠ. ܫܰܒܥܳܐ ܐܰܠܦܺܝ̈ܢ ܘܚܰܡܶܫܡܳܐܐ.
23 ܫܰܪܒܬܳܐ ܕܓܶܪܫܽܘܢ ܒܶܣܬܰܪ ܡܰܫܟܢܳܐ ܢܶܗܘܽܘܢ ܫܪܶܝܢ ܡܶܢ ܡܰܥܪܒܳܐ.
24 ܘܪܺܝܫܳܐ ܕܒܶܝܬ ܐܰܒܳܗ̈ܶܐ ܕܓܶܪܫܽܘܢ ܐܶܠܝܳܐܣܳܦ ܒܰܪ ܐܶܠܝܰܐܒ.
25 ܘܡܰܛܰܪܬܳܐ ܕܰܒܢܰܝ̈ ܓܶܪܫܽܘܢ ܒܡܰܫܟܰܢ ܙܰܒܢܳܐ. ܡܰܫܟܢܳܐ ܘܰܐܦܰܝ̈ ܬܰܪܥܶܗ. ܘܰܦܪܳܣܶܗ. ܘܰܦܪܳܣܳܐ ܕܬܰܪܥܳܐ ܕܡܰܫܟܰܢ ܙܰܒܢܳܐ.
26 ܘܓܳܠܓ̈ܶܐ ܕܕܳܪܬܳܐ. ܘܰܦܪܳܣܳܐ ܕܬܰܪܥܳܐ ܕܕܳܪܬܳܐ ܕܥܰܠ ܡܰܫܟܢܳܐ ܘܥܰܠ ܡܰܕܒܚܳܐ ܟܰܕ ܚܳܕܰܪ. ܘܛܽܘܢܒܰܘ̈ܗܝ ܘܟܽܠܗܽܘܢ ܦܽܘܠܚܳܢܰܘ̈ܗܝ.
27 ܘܰܠܩܗܳܬ ܫܰܪܒܬܳܐ ܕܥܰܡܪܰܡ. ܘܫܰܪܒܬܳܐ ܕܝܰܨܗܳܪ. ܘܫܰܪܒܬܳܐ ܕܚܶܒܪܽܘܢ. ܘܫܰܪܒܬܳܐ ܕܥܽܘܙܺܝܶܠ. ܗܳܠܶܝܢ ܐܶܢܶܝܢ ܫܰܖ̈ܒܳܬܳܐ ܕܩܳܗܳܬ.
28 ܘܡܶܢܝܳܢܗܽܘܢ ܒܡܶܢܝܳܢܳܐ ܕܟܽܠ ܕܶܟܪܳܐ ܡܶܢ ܒܰܪ ܝܰܪܚܳܐ ܘܰܠܥܶܠ ܬܡܳܢܝܳܐ ܐܰܠܦܺܝ̈ܢ ܘܫܶܬ ܡܳܐܐ. ܢܳܛܖ̈ܰܝ ܡܰܛܰܪܬܳܐ ܕܩܽܘܕܫܳܐ.
29 ܘܫܰܪܒܬܳܐ ܕܒܶܝܬ ܩܳܗܳܬ. ܢܶܫܪܽܘܢ ܥܰܠ ܫܦܽܘܠܰܘ̈ܗܝ ܕܡܰܫܟܢܳܐ ܡܶܢ ܬܰܝܡܢܳܐ.
30 ܘܪܺܝܫܳܐ ܕܒܶܝܬ ܐܰܒܳܗ̈ܶܐ ܕܫܰܪܒܬܳܐ ܕܩܳܗܳܬ. ܐܶܠܝܳܨܦܳܢ ܒܰܪ ܥܽܘܙܺܝܶܠ.
31 ܘܰܡܛܰܪܬܗܽܘܢ ܩܺܐܒܽܘܬܳܐ. ܘܦܳܬܽܘܪܳܐ. ܘܰܡܢܳܪܬܳܐ. ܘܡܰܕܒܚܳܐ. ܘܡܳܐܢܰܝ̈ ܩܽܘܕܫܳܐ ܕܰܡܫܺܡܫܺܝܢ ܒܗܽܘܢ. ܘܰܐܦܰܝ̈ ܬܰܪܥܳܐ ܘܟܽܠܶܗ ܦܽܘܠܚܳܢܶܗ.
32 ܘܪܺܝܫܳܐ ܕܖ̈ܺܝܫܶܐ ܕܠܶܘܳܝ̈ܶܐ. ܐܶܠܺܝܥܳܙܳܪ ܒܪܶܗ ܕܰܐܗܪܽܘܢ ܟܳܗܢܳܐ. ܕܫܰܠܺܝܛ ܥܰܠ ܢܳܛܖ̈ܰܝ ܡܰܛܰܪܬܳܐ ܕܩܽܘܕܫܳܐ.
33 ܘܰܕܡܳܪܪܳܝ ܫܰܪܒܬܳܐ ܕܡܰܚܠܺܝ. ܘܫܰܪܒܬܳܐ ܕܡܽܘܫܺܝ. ܗܳܠܶܝܢ ܐܶܢܽܘܢ ܫܰܖ̈ܒܳܬܳܐ ܕܡܳܪܪܳܝ.
34 ܘܡܶܢܝܳܢܗܽܘܢ ܒܡܶܢܝܳܢܳܐ. ܕܟܽܠ ܕܶܟܪܳܐ ܡܶܢ ܒܰܪ ܝܰܪܚܳܐ ܘܰܠܥܶܠ. ܫܬܳܐ ܐܰܠܦܺܝ̈ܢ ܘܡܰܐܬܶܝܢ.
35 ܘܪܺܝܫܳܐ ܕܒܶܝܬ ܐܰܒܳܗ̈ܶܐ ܕܫܰܪܒܬܳܐ ܕܡܳܪܪܳܝ. ܨܽܘܪܺܝܐܶܝܠ ܒܰܪ ܐܰܒܺܝܚܶܠ. ܥܰܠ ܫܦܽܘܠܰܘ̈ܗܝ ܕܡܰܫܟܢܳܐ ܢܶܗܘܽܘܢ ܫܪܶܝܢ ܡܶܢ ܓܰܪܒܝܳܐ.
36 ܘܫܽܘܠܛܳܢܳܐ ܕܡܰܛܰܪܬܳܐ ܕܰܒܢܰܝ̈ ܡܳܪܪܳܝ. ܕܰܦ̈ܶܐ ܕܡܰܫܟܢܳܐ. ܘܡܽܘܟܠܰܘ̈ܗܝ. ܘܰܩܝܳܡܰܘ̈ܗܝ. ܘܣܳܡܟܰܘ̈ܗܝ. ܘܟܽܠܗܽܘܢ ܡܳܐܢܰܘ̈ܗܝ. ܘܟܽܠܶܗ ܦܽܘܠܚܳܢܶܗ.
37 ܘܥܰܡܽܘܕܳܐ ܕܕܳܪܬܳܐ ܟܰܕ ܚܳܕܪܺܝܢ. ܘܛܽܘܢܒܰܝ̈ܗܽܘܢ. ܘܣܳܡܟܰܝ̈ܗܽܘܢ. ܘܓܶܠܓܰܝ̈ܗܽܘܢ.
38 ܘܰܕܫܳܪܶܝܢ ܩܕܳܡ ܡܰܫܟܢܳܐ ܡܶܢ ܡܰܕܢܚܳܐ. ܩܕܳܡ ܡܰܫܟܰܢ ܙܰܒܢܳܐ ܡܶܢ ܡܰܕܢܚܳܐ. ܡܽܘܫܶܐ. ܘܰܐܗܪܽܘܢ ܘܰܒܢܰܘ̈ܗܝ. ܕܢܳܛܪܺܝܢ ܡܰܛܰܪܬܳܐ ܕܩܽܘܕܫܳܐ ܥܰܠ ܡܰܛܰܪܬܳܐ ܕܒܢܰܝ̈ ܝܺܣܪܳܐܶܝܠ. ܘܢܽܘܟܪܳܝܳܐ ܕܩܳܪܶܒ ܢܶܬܩܛܶܠ.
39 ܟܽܠܗܽܘܢ ܡܶܢܝܳܢ̈ܶܐ ܕܠܶܘܳܝ̈ܶܐ ܕܰܡܢܳܐ ܡܽܘܫܶܐ. ܒܡܶܠܰܬ ܦܽܘܡܶܗ ܕܡܳܪܝܳܐ. ܟܽܠ ܕܶܟܪܳܐ ܡܶܢ ܒܰܪ ܝܰܪܚܳܐ ܘܰܠܥܶܠ. ܥܶܣܪܺܝܢ ܘܰܬܪܶܝܢ ܐܰܠܦܺܝ̈ܢ.
40 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ. ܡܢܺܝ ܟܽܠ ܒܽܘܟܪܳܐ ܕܶܟܪܳܐ ܕܰܒܢܰܝ̈ ܝܺܣܪܳܐܶܝܠ. ܡܶܢ ܒܰܪ ܝܰܪܚܳܐ ܘܰܠܥܶܠ.
41 ܘܩܰܒܶܠ ܡܶܢܝܳܢܳܐ ܕܰܫܡܳܗܰܝ̈ܗܽܘܢ. ܘܰܬܩܰܪܶܒ ܐܶܢܽܘܢ ܠܺܝ ܠܠܶܘܳܝ̈ܶܐ. ܐܶܢܳܐ ܐ̱ܢܳܐ ܡܳܪܝܳܐ. ܚܠܳܦ ܟܽܠܗܽܘܢ ܒܽܘܟܖ̈ܶܐ ܕܰܒܢܰܝ̈ ܝܺܣܪܳܐܶܝܠ. ܘܰܒܥܺܝܪܳܐ ܕܠܶܘܳܝ̈ܶܐ. ܚܠܳܦ ܟܽܠܗܽܘܢ ܒܽܘܟܖ̈ܶܐ ܕܰܒܥܺܝܪܳܐ ܕܰܒܢܰܝ̈ ܝܺܣܪܳܐܶܝܠ.
42 ܘܰܡܢܳܐ ܡܽܘܫܶܐ ܐܰܝܟܰܢܳܐ ܕܦܰܩܕܶܗ ܡܳܪܝܳܐ. ܟܽܠܗܽܘܢ ܒܽܘܟܖ̈ܶܐ ܕܰܒܢܰܝ̈ ܝܺܣܪܳܐܶܝܠ.
43 ܘܰܗܘܰܘ ܟܽܠܗܽܘܢ ܒܽܘܟܖ̈ܶܐ ܕܶܟܖ̈ܶܐ ܒܡܶܢܝܳܢܳܐ ܕܰܫܡܳܗ̈ܶܐ. ܡܶܢ ܒܰܪ ܝܰܪܚܳܐ ܘܰܠܥܶܠ. ܡܶܢܝܳܢܗܽܘܢ ܥܶܣܪܺܝܢ ܘܰܬܪܶܝܢ ܐܰܠܦܺܝ̈ܢ ܘܡܰܐܬܶܝܢ ܘܫܰܒܥܺܝܢ ܘܰܬܠܳܬܳܐ.
44 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.
45 ܩܰܪܶܒ ܠܠܶܘܳܝ̈ܶܐ ܚܠܳܦ ܟܽܠ ܒܽܘܟܪܳܐ ܕܒܢܰܝ̈ ܝܺܣܪܳܐܶܝܠ. ܘܰܒܥܺܝܪܳܐ ܕܠܶܘܳܝ̈ܶܐ ܚܠܳܦ ܒܥܺܝܪܗܽܘܢ. ܘܢܶܗܘܽܘܢ ܠܺܝ ܠܶܘܳܝ̈ܶܐ. ܐܶܢܳܐ ܐ̱ܢܳܐ ܡܳܪܝܳܐ.
46 ܘܦܽܘܪܩܳܢܳܐ ܕܡܰܐܬܶܝܢ ܘܫܰܒܥܺܝܢ ܘܰܬܠܳܬܳܐ. ܕܝܰܬܺܝܪܺܝܢ ܥܰܠ ܠܶܘܳܝ̈ܶܐ ܒܽܘܟܖ̈ܶܐ ܕܰܒܢܰܝ̈ ܝܺܣܪܳܐܶܝܠ.
47 ܣܰܒ ܚܰܡܫܳܐ ܚܰܡܫܳܐ ܡܰܬܩ̈ܳܠܺܝܢ ܠܪܺܝܫܳܐ. ܒܡܰܬܩܳܠܳܐ ܕܩܽܘܕܫܳܐ. ܣܰܒ ܥܶܣܪܺܝܢ ܡܳܥ̈ܝܺܢ ܠܡܰܬܩܳܠܳܐ.
48 ܘܗܰܒܳܝܗܝ ܟܶܣܦܳܐ ܕܦܽܘܪܩܳܢܳܐ. ܕܰܐܝܠܶܝܢ ܕܝܰܬܺܝܪܺܝܢ ܒܗܽܘܢ. ܠܰܐܗܪܽܘܢ ܘܠܰܒܢܰܘ̈ܗܝ.
49 ܘܰܢܣܰܒ ܡܽܘܫܶܐ ܟܶܣܦܳܐ ܕܦܽܘܪܩܳܢܳܐ ܡܶܢ ܗܳܢܽܘܢ ܕܝܰܬܺܝܪܺܝܢ ܥܰܠ ܦܽܘܪܩܳܢܳܐ ܕܠܶܘܳܝ̈ܶܐ.
50 ܡܶܢ ܒܽܘܟܖ̈ܶܐ ܕܰܒܢܰܝ̈ ܝܺܣܪܳܐܶܝܠ. ܘܰܢܣܰܒ ܟܶܣܦܳܐ ܐܳܠܶܦ ܘܰܬܠܳܬܡܳܐܐ ܘܶܫܬܺܝܢ ܘܚܰܡܫܳܐ ܡܰܬܩ̈ܳܠܺܝܢ ܒܡܰܬܩܳܠܳܐ ܕܩܽܘܕܫܳܐ.
51 ܘܝܰܗܒ ܡܽܘܫܶܐ ܟܶܣܦܳܐ ܕܦܽܘܪܩܳܢܳܐ ܠܰܐܗܪܽܘܢ ܘܠܰܒܢܰܘ̈ܗܝ. ܐܰܝܟ ܡܶܠܰܬ ܦܽܘܡܶܗ ܕܡܳܪܝܳܐ. ܐܰܝܟܰܢܳܐ ܕܦܰܩܶܕ ܡܳܪܝܳܐ ܠܡܽܘܫܶܐ.