Numbers 9
The Book of Numbers
܀ ܡܢܝܢܐ ܛ ܀
1 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ ܒܡܰܕܒܪܳܐ ܕܣܺܝܢܰܝ. ܒܰܫܢܰܬ ܬܰܪܬܶܝܢ ܟܰܕ ܢܦܰܩܘ ܒܢܰܝ̈ ܝܺܣܪܳܐܶܝܠ ܡܶܢ ܐܰܪܥܳܐ ܕܡܶܨܪܶܝܢ. ܒܝܰܪܚܳܐ ܩܰܕܡܳܝܳܐ. ܘܶܐܡܰܪ ܠܶܗ.
2 ܢܶܥܒܕܽܘܢ ܒܢܰܝ̈ ܝܺܣܪܳܐܶܝܠ ܦܶܨܚܳܐ ܒܙܰܒܢܶܗ.
3 ܒܰܐܪܒܰܥܶܣܖ̈ܶܐ ܒܝܰܪܚܳܐ ܗܳܢܳܐ. ܒܶܝܬ ܖ̈ܰܡܫܶܐ ܢܶܥܒܕܽܘܢܶܗ ܒܙܰܒܢܶܗ. ܐܰܝܟ ܟܽܠܗܽܘܢ ܦܽܘܩܕܳܢܰܘ̈ܗܝ. ܘܰܐܝܟ ܟܽܠܗܽܘܢ ܕܺܝܢܰܘ̈ܗܝ ܢܶܥܒܕܽܘܢܶܗ.
4 ܘܶܐܡܰܪ ܡܽܘܫܶܐ ܠܰܒܢܰܝ̈ ܝܺܣܪܳܐܶܝܠ ܕܢܶܥܒܕܽܘܢ ܦܶܨܚܳܐ.
5 ܘܰܥܒܰܕܘ ܦܶܨܚܳܐ ܒܰܐܪܒܰܥܶܣܖ̈ܶܐ ܒܝܰܪܚܳܐ ܩܰܕܡܳܝܳܐ. ܒܶܝܬ ܖ̈ܰܡܫܶܐ ܒܡܰܕܒܪܳܐ ܕܣܺܝܢܰܝ. ܐܰܝܟ ܕܦܰܩܶܕ ܡܳܪܝܳܐ ܠܡܽܘܫܶܐ. ܗܳܟܰܢܳܐ ܥ̣ܒܰܕܘ ܒܢܰܝ̈ ܝܺܣܪܳܐܶܝܠ.
6 ܘܓܰܒܖ̈ܶܐ ܕܛܰܡܐܺܝ̣ܢ ܗܘܰܘ ܒܢܰܦܫܳܐ ܕܐ̱ܢܳܫ̈ܳܐ. ܠܳܐ ܐܶܫܟܰܚܘ ܠܡܶܥܒܰܕ ܦܶܨܚܳܐ ܒܝܰܘܡܳܐ ܗܰܘ. ܘܰܩܪܶܒܘ ܩܕܳܡ ܡܽܘܫܶܐ ܘܰܩܕܳܡ ܐܰܗܪܽܘܢ ܒܝܰܘܡܳܐ ܗܰܘ.
7 ܘܳܐܡܪܺܝܢ ܠܗܽܘܢ ܗܳܢܽܘܢ ܓܰܒܖ̈ܶܐ. ܚܢܰܢ ܛܰܡܐܺܝܢܰܢ ܒܢܰܦܫܳܐ ܕܐ̱ܢܳܫ̈ܐ. ܠܡܳܢܳܐ ܡܶܬܟܠܶܝܢ ܚܢܰܢ. ܘܠܳܐ ܡܩܰܪܒܺܝܢܰܢ ܩܽܘܪܒܳܢܶܗ ܕܡܳܪܝܳܐ ܒܙܰܒܢܶܗ ܒܰܝܢܳܬ ܒܢܰܝ̈ ܝܺܣܪܳܐܶܝܠ.
8 ܘܶܐܡܰܪ ܠܗܽܘܢ ܡܽܘܫܶܐ. ܩܽܘܡܘ ܥܰܠ ܕܽܘܟܬܟܽܘܢ. ܘܶܐܫܡܰܥ ܡܳܢܳܐ ܦܳܩܶܕ ܡܳܪܝܳܐ ܥܠܰܝܟܽܘܢ.
9 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.
10 ܡܰܠܶܠ ܥܰܡ ܒܢܰܝ̈ ܝܺܣܪܳܐܶܝܠ. ܘܶܐܡܰܪ ܠܗܽܘܢ. ܓܒܰܪ ܓܒܰܪ ܟܰܕ ܢܶܗܘܶܐ ܛܡܰܐ ܒܢܰܦܫܳܐ. ܐܰܘ ܒܽܐܘܪܚܳܐ ܗܽܘ ܪܰܚܺܝܩܬܳܐ. ܐܰܘ ܒܕܳܖ̈ܰܝܟܽܘܢ. ܢܶܥܒܶܕ ܦܶܨܚܳܐ ܠܡܳܪܝܳܐ.
11 ܒܰܐܪܒܰܥܶܣܖ̈ܶܐ ܒܝܰܪܚܳܐ ܕܰܬܪܶܝܢ. ܒܶܝܬ ܖ̈ܰܡܫܶܐ ܢܶܥܒܕܽܘܢܶܗ. ܥܰܠ ܦܰܛܺܝܪܳܐ ܘܰܡܪܳܖ̈ܶܐ ܢܶܐܟܠܽܘܢܶܗ.
12 ܘܠܳܐ ܢܰܘܬܪܽܘܢ ܡܶܢܶܗ ܠܨܰܦܪܳܐ. ܘܓܰܪܡܳܐ ܠܳܐ ܢܶܬܒܪܽܘܢ ܒܶܗ. ܐܰܝܟ ܟܽܠܶܗ ܦܽܘܩܕܳܢܳܐ ܕܦܶܨܚܳܐ ܢܶܥܒܕܽܘܢܶܗ.
13 ܘܓܰܒܪܳܐ ܕܰܕܟܶܐ ܗܽܘ ܘܠܳܐ ܗܘܳܐ ܒܽܐܘܪܚܳܐ. ܘܠܳܐ ܥ̣ܒܰܕ ܦܶܨܚܳܐ ܒܙܰܒܢܶܗ. ܬܺܐܒܰܕ ܢܰܦܫܳܐ ܗܳܝ ܡܶܢ ܥܰܡܳܗ̇. ܥܰܠ ܕܠܳܐ ܩܰܪܶܒ ܩܽܘܪܒܳܢܶܗ ܕܡܳܪܝܳܐ ܒܙܰܒܢܶܗ. ܚܛܳܗܳܐ ܢܩܰܒܶܠ ܓܰܒܪܳܐ ܗܰܘ.
14 ܘܟܰܕ ܢܶܥܡܰܪ ܥܰܡܟܽܘܢ ܐܰܝܢܳܐ ܕܡܶܬܦܢܶܐ ܠܘܳܬܝ. ܘܢܶܥܒܶܕ ܦܶܨܚܳܐ ܠܡܳܪܝܳܐ. ܐܰܝܟ ܦܽܘܩܕܳܢܳܐ ܕܦܶܨܚܳܐ. ܘܰܐܝܟ ܕܺܝܢܰܘ̈ܗܝ ܗܳܟܰܢܳܐ ܢܶܥܒܶܕ. ܢܳܡܽܘܣܳܐ ܚܰܕ ܢܶܗܘܶܐ ܠܟܽܘܢ ܘܠܰܐܝܢܳܐ ܕܡܶܬܦܢܶܐ ܠܘܳܬܝ. ܘܰܠܥܳܡܽܘܪܳܐ ܕܰܐܪܥܳܐ.
15 ܘܰܒܝܰܘܡܳܐ ܕܩܳܡ ܡܰܫܟܢܳܐ. ܟܰܣܝܰܬ ܥܢܳܢܳܐ ܠܡܰܫܟܰܢܙܰܒܢܳܐ. ܘܠܰܐܦܰܝ̈ ܬܰܪܥܳܐ ܕܣܳܗܕܽܘܬܳܐ. ܘܰܒܪܰܡܫܳܐ ܗܰܘ ܗܘܳܐ ܗ̱ܘܳܐ ܥܰܠ ܡܰܫܟܢܳܐ. ܐܰܝܟ ܚܶܙܘܳܐ ܕܢܽܘܪܳܐ ܥܕܰܡܳܐ ܠܨܰܦܪܳܐ.
16 ܘܗܳܟܰܢܳܐ ܗܳܘܶܐ ܗܘܳܐ ܐܰܡܺܝܢܳܐܺܝܬ. ܘܰܥܢܳܢܳܐ ܡܟܰܣܝܳܐ ܗܘܳܬ ܠܶܗ ܒܺܐܝܡܳܡܳܐ. ܘܚܶܙܘܳܐ ܕܢܽܘܪܳܐ ܒܠܺܠܝܳܐ.
17 ܘܶܐܡܰܬܝ ܕܣܳܠܩܳܐ ܥܢܳܢܳܐ ܡܶܢ ܡܰܫܟܢܳܐ. ܒܳܬܰܪܟܶܢ ܫܳܩܠܺܝܢ ܒܢܰܝ̈ ܝܺܣܪܳܐܶܝܠ. ܘܒܰܐܬܪܳܐ ܕܫܳܪܝܳܐ ܒܶܗ ܥܢܳܢܳܐ. ܬܰܡܳܢ ܫܳܪܶܝܢ ܒܢܰܝ̈ ܝܺܣܪܳܐܶܝܠ.
18 ܒܡܶܠܰܬ ܦܽܘܡܶܗ ܕܡܳܪܝܳܐ ܫܳܩܠܺܝܢ ܒܢܰܝ̈ ܝܺܣܪܳܐܶܝܠ. ܘܰܒܡܶܠܰܬ ܦܽܘܡܶܗ ܕܡܳܪܝܳܐ ܫܳܪܶܝܢ. ܟܽܠܗܽܘܢ ܝܰܘ̈ܡܳܬܳܐ ܕܫܳܪܝܳܐ ܥܢܳܢܳܐ ܥܰܠ ܡܰܫܟܢܳܐ ܫܳܪܶܝܢ.
19 ܘܡܳܐ ܕܡܰܓܪܳܐ ܥܢܳܢܳܐ ܥܰܠ ܡܰܫܟܢܳܐ ܝܰܘ̈ܡܳܬܳܐ ܣܰܓܺܝ̈ܐܶܐ. ܢܳܛܪܺܝܢ ܒܢܰܝ̈ ܝܺܣܪܳܐܶܝܠ ܡܰܛܰܪܬܶܗ ܕܡܳܪܝܳܐ ܘܠܳܐ ܫܳܩܠܺܝܢ.
20 ܘܺܐܝܬ ܙܰܒܢܳܐ ܕܗܳܘܝܳܐ ܥܢܳܢܳܐ ܝܰܘ̈ܡܳܬܳܐ ܕܡܶܢܝܳܢܳܐ ܥܰܠ ܡܰܫܟܢܳܐ. ܒܡܶܠܰܬ ܦܽܘܡܶܗ ܕܡܳܪܝܳܐ ܫܳܪܶܝܢ. ܘܰܒܡܶܠܰܬ ܦܽܘܡܶܗ ܕܡܳܪܝܳܐ ܫܳܩܠܺܝܢ.
21 ܘܺܐܝܬ ܙܰܒܢܳܐ ܕܗܳܘܝܳܐ ܥܢܳܢܳܐ ܥܰܠ ܡܰܫܟܢܳܐ ܡܶܢ ܪܰܡܫܳܐ ܘܰܥܕܰܡܳܐ ܠܨܰܦܪܳܐ. ܘܣܳܠܩܳܐ ܥܢܳܢܳܐ ܒܨܰܦܪܳܐ ܘܫܳܩܠܺܝܢ. ܐܰܘ ܐܺܝܡܳܡܳܐ ܐܰܘ ܠܺܠܝܳܐ ܣܳܠܩܳܐ ܥܢܳܢܳܐ. ܘܫܳܩܠܺܝܢ.
22 ܐܰܘ ܝܰܘ̈ܡܳܬܳܐ. ܐܰܘ ܝܰܖ̈ܚܶܐ. ܐܰܘ ܥܶܕܳܢ ܒܥܶܕܳܢ. ܟܡܳܐ ܕܡܰܓܪܳܐ ܥܢܳܢܳܐ ܠܡܶܫܪܳܐ ܥܰܠ ܡܰܫܟܢܳܐ. ܗܳܟܰܢܳܐ ܫܳܪܶܝܢ ܒܢܰܝ̈ ܝܺܣܪܳܐܶܝܠ ܘܠܳܐ ܫܳܩܠܺܝܢ. ܘܡܳܐ ܕܣܶܠܩܰܬ ܥܢܳܢܳܐ ܫܳܩܠܺܝܢ.
23 ܒܡܶܠܰܬ ܦܽܘܡܶܗ ܕܡܳܪܝܳܐ ܫܳܪܶܝܢ. ܘܰܒܡܶܠܰܬ ܦܽܘܡܶܗ ܕܡܳܪܝܳܐ ܫܳܩܠܺܝܢ. ܘܡܰܛܰܪܬܶܗ ܕܡܳܪܝܳܐ ܢܳܛܪܺܝܢ. ܐܰܝܟ ܡܶܠܰܬ ܦܽܘܡܶܗ ܕܡܳܪܝܳܐ ܒܺܐܝܕܳܐ ܕܡܽܘܫܶܐ.