Numbers 19
The Book of Numbers
܀ ܡܢܝܢܐ ܝܛ ܀
1 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ ܘܥܰܡ ܐܰܗܪܽܘܢ. ܘܶܐܡܰܪ ܠܗܽܘܢ.
2 ܗܳܢܰܘ ܦܽܘܩܕܳܢܳܐ ܕܢܳܡܽܘܣܳܐ ܕܦܰܩܶܕ ܡܳܪܝܳܐ ܘܶܐܡܰܪ. ܐܶܡܰܪ ܠܰܒܢܰܝ̈ ܝܺܣܪܳܐܶܝܠ. ܘܢܰܝܬܽܘܢ ܠܳܟ ܬܽܘܪܬܳܐ ܣܽܘܡܳܩܬܳܐ ܫܰܠܡܬܳܐ ܕܠܰܝܬ ܒܳܗ̇ ܡܽܘܡܳܐ. ܕܠܳܐ ܢܦܰܠ ܥܠܶܝܗ̇ ܢܺܝܪܳܐ.
3 ܘܗܰܒܽܘܗ̇ ܠܶܐܠܺܝܥܳܙܳܪ ܟܳܗܢܳܐ. ܘܢܰܦܩܺܝܗ̇ ܠܒܰܪ ܡܶܢ ܡܰܫܪܺܝܬܳܐ. ܘܢܶܟܣܺܝܗ̇ ܩܕܳܡܰܘܗܝ.
4 ܘܢܶܣܰܒ ܐܶܠܺܝܥܳܙܳܪ ܟܳܗܢܳܐ. ܡܶܢ ܕܡܳܗ̇ ܒܨܶܒܥܶܗ. ܘܢܶܪܽܘܣ ܠܽܘܩܒܰܠ ܐܰܦܰܝ̈ ܡܰܫܟܰܢܙܰܒܢܳܐ. ܡܶܢ ܕܡܳܐ ܫܒܰܥ ܙܰܒܢܺܝ̈ܢ.
5 ܘܢܰܘܩܕܶܝܗ̇ ܠܬܽܘܪܬܳܐ ܩܕܳܡܰܘܗܝ. ܘܡܶܫܟܳܗ̇. ܘܰܕܡܳܗ̇. ܘܒܶܣܪܳܗ̇ ܥܰܡ ܦܶܪܬܳܗ̇ ܢܰܘܩܶܕ.
6 ܘܢܶܣܰܒ ܟܳܗܢܳܐ ܩܰܝܣܳܐ ܕܰܐܪܙܳܐ. ܘܙܽܘܦܳܐ. ܘܨܽܘܒܥܳܐ ܕܰܙܚܽܘܪܺܝܬܳܐ. ܘܢܰܪܡܶܐ ܒܓܰܘ ܝܰܩܕܳܢܳܗ̇ ܕܬܽܘܪܬܳܐ.
7 ܘܰܢܚܰܠܶܠ ܡܳܐܢܰܘ̈ܗܝ ܟܳܗܢܳܐ. ܘܢܰܣܚܶܐ ܒܶܣܪܶܗ ܒܡܰܝ̈ܳܐ. ܘܗܳܝܕܶܝܢ ܢܶܥܽܘܠ ܠܡܰܫܪܺܝܬܳܐ. ܘܢܶܗܘܶܐ ܛܡܰܐ ܟܳܗܢܳܐ ܥܕܰܡܳܐ ܠܪܰܡܫܳܐ.
8 ܘܡܰܢ ܕܡܰܘܩܶܕ ܠܳܗ̇ ܠܬܽܘܪܬܳܐ. ܢܚܰܠܶܠ ܡܳܐܢܰܘ̈ܗܝ. ܘܢܰܣܚܶܐ ܒܶܣܪܶܗ ܒܡܰܝ̈ܳܐ. ܘܢܶܗܘܶܐ ܛܡܰܐ ܥܕܰܡܳܐ ܠܪܰܡܫܳܐ.
9 ܘܢܶܟܢܽܘܫ ܓܰܒܪܳܐ ܕܰܕܟܶܐ ܩܶܛܡܳܗ̇ ܕܬܽܘܪܬܳܐ. ܘܢܰܪܡܶܝܘܗܝ ܠܒܰܪ ܡܶܢ ܡܰܫܪܺܝܬܳܐ ܒܰܐܬܪܳܐ ܕܰܕܟܶܐ. ܘܢܶܗܘܶܐ ܢܛܺܝܪ ܠܟܽܠܳܗ̇ ܟܢܽܘܫܬܳܐ ܕܰܒܢܰܝ̈ ܝܺܣܪܳܐܶܝܠ. ܠܡܰܛܰܪܬܳܐ ܠܡܰܝ̈ܳܐ ܕܰܪܣܳܣܳܐ. ܡܶܛܽܠ ܕܰܚܛܳܗܰܐ ܗ̱ܘ.
10 ܘܰܢܚܰܠܶܠ ܡܳܐܢܰܘ̈ܗܝ ܗܰܘ ܕܟܳܢܶܫ ܩܶܛܡܳܐ ܕܬܽܘܪܬܳܐ. ܘܢܶܗܘܶܐ ܛܡܰܐ ܥܕܰܡܳܐ ܠܪܰܡܫܳܐ. ܘܢܶܗܘܶܐ ܠܰܒܢܰܝ̈ ܝܺܣܪܳܐܶܝܠ. ܘܠܰܐܝܠܶܝܢ ܕܡܶܬܦܢܶܝܢ ܠܘܳܬܝ ܕܥܳܡܪܺܝܢ ܒܰܝܢܳܬܗܽܘܢ. ܢܳܡܽܘܣܳܐ ܠܥܳܠܰܡ.
11 ܘܡܰܢ ܕܩܳܪܶܒ ܠܡܺܝܬܳܐ ܕܟܽܠ ܢܰܦܫܳܐ ܕܐ̱ܢܳܫܳܐ. ܢܶܗܘܶܐ ܛܡܰܐ ܫܰܒܥܳܐ ܝܰܘܡܺܝ̈ܢ.
12 ܘܢܶܪܽܘܣ ܥܠܰܘܗܝ ܒܝܰܘܡܳܐ ܕܰܬܠܳܬܳܐ. ܘܰܒܝܰܘܡܳܐ ܕܫܰܒܥܳܐ. ܘܢܶܬܕܰܟܶܐ ܘܶܐܢ ܠܳܐ ܢܶܪܽܘܣ ܥܠܰܘܗܝ ܒܝܰܘܡܳܐ ܕܰܬܠܳܬܳܐ. ܘܰܒܝܰܘܡܳܐ ܕܫܰܒܥܳܐ ܠܳܐ ܢܶܬܕܰܟܶܐ.
13 ܘܟܽܠ ܕܢܶܩܪܽܘܒ ܠܡܺܝܬܳܐ ܕܟܽܠ ܢܰܦܫܳܐ ܕܐ̱ܢܳܫܳܐ ܕܰܢܡܽܘܬ. ܘܠܳܐ ܢܶܪܽܘܣ ܥܠܰܘܗܝ. ܠܡܰܫܟܢܶܗ ܕܡܳܪܝܳܐ ܛܰܡܰܐ. ܬܺܐܒܰܕ ܢܰܦܫܳܐ ܗܳܝ ܡܶܢ ܝܺܣܪܳܐܶܝܠ. ܡܶܛܽܠ ܕܡܰܝ̈ܳܐ ܕܰܪܣܳܣܳܐ ܠܳܐ ܪܰܣ̣ ܥܠܰܘܗܝ. ܬܽܘܒ ܢܶܗܘܶܐ ܛܡܰܐ. ܘܛܰܡܐܽܘܬܶܗ ܒܶܗ.
14 ܗܳܢܰܘ ܢܳܡܽܘܣܳܐ ܕܐ̱ܢܳܫܳܐ ܟܰܕ ܢܡܽܘܬ ܒܡܰܫܟܢܳܐ. ܟܽܠ ܕܥܳܐܶܠ ܠܡܰܫܟܢܳܐ ܘܟܽܠ ܕܰܒܡܰܫܟܢܳܐ ܗܽܘ. ܢܶܗܘܶܐ ܛܡܰܐ ܫܰܒܥܳܐ ܝܰܘܡܺܝ̈ܢ.
15 ܘܟܽܠ ܡܳܐܢܳܐ ܕܗܳܘܶܐ ܦܬܺܝܚ ܘܠܳܐ ܗܘܳܐ ܫܺܝܥ. ܛܡܰܐ ܗܽܘ.
16 ܘܟܽܠ ܕܢܶܩܪܽܘܒ ܥܰܠ ܐܰܦܰܝ̈ ܚܰܩܠܳܐ ܠܰܩܛܺܝܠܳܐ ܕܚܰܪܒܳܐ. ܐܰܘ ܠܡܺܝܬܳܐ. ܐܰܘ ܠܓܰܪܡܳܐ ܕܐ̱ܢܳܫܳܐ. ܐܰܘ ܠܩܰܒܪܳܐ. ܢܶܗܘܶܐ ܛܡܰܐ ܫܰܒܥܳܐ ܝܰܘܡܺܝ̈ܢ.
17 ܘܢܶܣܒܽܘܢ ܠܰܐܝܢܳܐ ܕܰܛܡܰܐ ܡܶܢ ܥܰܦܪܳܐ ܕܝܰܩܕܳܢܳܐ ܕܰܚܛܳܗܳܐ. ܘܢܰܪܡܽܘܢ ܥܠܰܘܗܝ ܡܰܝ̈ܳܐ ܚܰܝ̈ܶܐ ܥܰܠ ܡܳܐܢܳܐ.
18 ܘܢܶܣܰܒ ܙܽܘܦܳܐ. ܘܢܶܨܒܽܘܥ ܒܡܰܝ̈ܳܐ ܓܰܒܪܳܐ ܕܰܕܟܶܐ. ܘܢܶܪܽܘܣ ܥܰܠ ܡܰܫܟܢܳܐ ܘܥܰܠ ܡܳܐܢ̈ܶܐ. ܘܥܰܠ ܟܽܠ ܢܰܦ̈ܫܳܬܳܐ ܕܺܐܝܬ ܗܘܰܝ̈ ܬܰܡܳܢ. ܘܥܰܠ ܟܽܠܡܰܢ ܕܰܩܪܶܒ ܠܓܰܪܡܳܐ ܐܰܘ ܠܰܩܛܺܝܠܳܐ. ܐܰܘ ܠܡܺܝܬܳܐ ܐܰܘ ܠܩܰܒܪܳܐ.
19 ܢܶܪܽܘܣ ܕܰܟܝܳܐ ܥܰܠ ܛܡܰܐ ܒܝܰܘܡܳܐ ܕܰܬܠܳܬܳܐ. ܘܰܒܝܰܘܡܳܐ ܕܫܰܒܥܳܐ. ܘܢܶܪܽܘܣ ܥܠܰܘܗܝ ܒܝܰܘܡܳܐ ܕܫܰܒܥܳܐ. ܘܰܢܚܰܠܶܠ ܡܳܐܢܰܘ̈ܗܝ. ܘܢܶܣܚܶܐ ܒܡܰܝ̈ܳܐ. ܘܢܶܬܕܰܟܶܐ ܒܪܰܡܫܳܐ.
20 ܘܓܰܒܪܳܐ ܕܢܶܗܘܶܐ ܛܡܰܐ. ܘܠܳܐ ܢܶܬܪܣܶܣ ܥܠܰܘܗܝ. ܬܺܐܒܰܕ ܢܰܦܫܳܐ ܗܳܝ ܡܶܢ ܓܰܘ ܟܢܽܘܫܬܳܗ̇. ܡܶܛܽܠ ܕܡܰܩܕܫܶܗ ܕܡܳܪܝܳܐ ܛܡܰܐ. ܡܰܝ̈ܳܐ ܕܰܪܣܳܣܳܐ ܠܳܐ ܪܰܣ̣ ܥܠܰܘܗܝ. ܛܡܰܐ ܗܽܘ.
21 ܘܢܶܗܘܶܐ ܠܟܽܘܢ ܢܳܡܽܘܣܳܐ ܠܥܳܠܰܡ. ܘܡܰܢ ܕܪܳܐܶܣ ܡܰܝ̈ܳܐ ܕܰܪܣܳܣܳܐ. ܢܚܰܠܶܠ ܡܳܐܢܰܘ̈ܗܝ. ܘܡܰܢ ܕܩܳܪܶܒ ܠܡܰܝ̈ܳܐ ܕܰܪܣܳܣܳܐ. ܢܶܗܘܶܐ ܛܡܰܐ ܥܕܰܡܳܐ ܠܪܰܡܫܳܐ.
22 ܘܟܽܠ ܕܢܶܩܪܽܘܒ ܠܶܗ ܛܰܡܐܳܐ. ܢܶܗܘܶܐ ܛܡܰܐ. ܘܢܰܦܫܳܐ ܕܬܶܩܪܽܘܒ ܠܶܗ. ܬܶܗܘܶܐ ܛܰܡܐܳܐ ܥܕܰܡܳܐ ܠܪܰܡܫܳܐ.