Numbers 28
The Book of Numbers
܀ ܡܢܝܢܐ ܟܚ ܀
1 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.
2 ܦܰܩܶܕ ܠܰܒܢܰܝ̈ ܝܺܣܪܳܐܶܝܠ. ܘܶܐܡܰܪ ܠܗܽܘܢ. ܩܽܘܖ̈ܒܢܰܝ. ܘܠܰܚܡܳܐ ܕܩܽܘܖ̈ܒܳܢܰܝ. ܘܪܺܝܚܳܐ ܕܰܣܘܳܬܳܐ. ܢܶܗܘܽܘܢ ܢܳܛܪܺܝܢ ܘܰܡܩܰܪܒܺܝܢ ܠܺܝ ܒܙܰܒܢܰܝ̈ܗܽܘܢ.
3 ܘܶܐܡܰܪ ܠܗܽܘܢ. ܗܳܢܳܐ ܩܽܘܪܒܳܢܳܐ ܕܬܶܗܘܢ ܡܩܰܪܒܺܝܢ ܠܡܳܪܝܳܐ. ܐܶܡܖ̈ܶܐ ܒܢܰܝ̈ ܫܰܢ̱ܬܳܐ ܕܠܰܝܬ ܒܗܽܘܢ ܡܽܘܡܳܐ. ܬܪܶܝܢ ܒܝܰܘܡܳܐ ܠܝܰܩܕܳܐ ܫܰܠܡܳܐ ܐܰܡܺܝܢܳܐܺܝܬ.
4 ܐܶܡܪܳܐ ܚܰܕ ܩܰܪܶܒ ܒܨܰܦܪܳܐ. ܘܶܐܡܪܳܐ ܐ̱ܚܪܺܢܳܐ ܩܰܪܶܒ ܒܶܝܬ ܖ̈ܰܡܫܶܐ.
5 ܘܚܰܕ ܡܶܢ ܥܶܣܪܳܐ ܠܣܰܐܬܳܐ ܢܰܫܺܝܦܳܐ. ܩܽܘܪܒܳܢܳܐ ܕܦܺܝܠ ܒܡܶܫܚܳܐ ܥܨܺܝܪܳܐ ܪܽܘܒܥܶܗ ܕܗܶܡܺܝܢܳܐ.
6 ܝܰܩܕܳܐ ܫܰܠܡܳܐ ܐܰܡܺܝܢܳܐܺܝܬ. ܕܶܐܬܥܒܶܕ ܒܛܽܘܪܳܐ ܕܣܺܝܢܰܝ. ܠܪܺܝܚܳܐ ܕܰܣܘܳܬܳܐ ܩܽܘܪܒܳܢܳܐ ܠܡܳܪܝܳܐ.
7 ܘܢܽܘܩܳܝܶܗ ܚܰܡܪܳܐ ܪܽܘܒܥܶܗ ܕܗܶܡܺܝܢܳܐ. ܠܶܐܡܪܳܐ ܚܰܕ. ܒܩܽܘܕܫܳܐ ܢܶܬܢܰܩܶܐ ܢܽܘܩܳܝܳܐ ܕܥܰܬܺܝܩܳܐ ܩܕܳܡ ܡܳܪܝܳܐ.
8 ܘܶܐܡܪܳܐ ܐ̱ܚܪܺܢܳܐ ܥܒܶܕ ܒܶܝܬ ܖ̈ܰܡܫܶܐ. ܐܰܝܟ ܩܽܘܪܒܳܢܳܐ ܕܨܰܦܪܳܐ. ܘܰܐܝܟ ܢܽܘܩܳܝܶܗ ܥܒܶܕ. ܩܽܘܪܒܳܢܳܐ ܠܪܺܝܚܳܐ ܕܰܣܘܳܬܳܐ ܠܡܳܪܝܳܐ.
9 ܘܰܒܝܰܘܡܳܐ ܕܫܰܒܬܳܐ. ܐܶܡܖ̈ܶܐ ܬܪܶܝܢ ܒܢܰܝ̈ ܫܰܢ̱ܬܳܐ ܕܠܰܝܬ ܒܗܽܘܢ ܡܽܘܡܳܐ. ܘܰܬܪܶܝܢ ܥܶܣܖ̈ܽܘܢܺܝܢ ܢܰܫܺܝܦܳܐ ܕܩܽܘܪܒܳܢܳܐ ܕܦܺܝܠ ܒܡܶܫܚܳܐ. ܘܢܽܘܩܳܝܶܗ.
10 ܝܰܩܕܳܐ ܫܰܠܡܳܐ ܕܫܰܒܬܳܐ ܒܫܰܒܬܳܐ. ܥܰܠ ܝܰܩܕܳܐ ܫܰܠܡܳܐ ܐܰܡܺܝܢܳܐܺܝܬ. ܘܢܽܘܩܳܝܶܗ.
11 ܘܰܒܪܺܝܫ ܝܰܖ̈ܚܰܝܟܽܘܢ. ܩܰܪܶܒܘ ܝܰܩ̈ܕܶܐ ܫܰܠ̈ܡܶܐ ܠܡܳܪܝܳܐ. ܬܰܘܖ̈ܶܐ ܒܢܰܝ̈ ܒܰܩܪܳܐ ܬܪܶܝܢ. ܘܕܶܟܪܳܐ ܚܰܕ. ܘܶܐܡܖ̈ܶܐ ܒܢܰܝ̈ ܫܰܢ̱ܬܳܐ ܫܰܒܥܳܐ ܕܠܰܝܬ ܒܗܽܘܢ ܡܽܘܡܳܐ.
12 ܘܰܬܠܳܬܳܐ ܥܶܣܖ̈ܽܘܢܺܝܢ ܢܰܫܺܝܦܳܐ ܕܩܽܘܪܒܳܢܳܐ ܕܦܺܝܠ ܒܡܶܫܚܳܐ ܠܬܰܘܪܳܐ ܚܰܕ. ܘܰܬܪܶܝܢ ܥܶܣܖ̈ܽܘܢܺܝܢ ܢܰܫܺܝܦܳܐ ܕܦܺܝܠ ܒܡܶܫܚܳܐ ܠܕܶܟܪܳܐ ܚܰܕ.
13 ܘܥܶܣܪܽܘܢܳܐ ܚܰܕ ܢܰܫܺܝܦܳܐ ܕܩܽܘܪܒܳܢܳܐ ܕܦܺܝܠ ܒܡܶܫܚܳܐ ܠܶܐܡܪܳܐ ܚܰܕ. ܝܰܩܕܳܐ ܫܰܠܡܳܐ ܠܪܺܝܚ ܣܘܳܬܳܐ ܠܡܳܪܝܳܐ.
14 ܘܢܽܘܩܳܝܗܽܘܢ ܚܰܡܪܳܐ. ܦܶܠܓܶܗ ܕܗܶܡܺܝܢܳܐ ܢܶܗܘܶܐ ܠܬܰܘܪܳܐ. ܘܬܽܘܠܬܶܗ ܕܗܶܡܺܝܢܳܐ ܢܶܗܘܶܐ ܠܕܶܟܪܳܐ. ܘܪܽܘܒܥܶܗ ܕܗܶܡܺܝܢܳܐ ܠܶܐܡܪܳܐ. ܗܳܢܰܘ ܝܰܩܕܳܐ ܫܰܠܡܳܐ ܕܪܺܝܫ ܝܰܪܚܳܐ ܒܟܽܠܗܽܘܢ ܝܰܖ̈ܚܶܐ ܕܫܰܢ̱ܬܳܐ.
15 ܘܨܺܦܪܳܝܳܐ ܚܰܕ ܕܥܶܙ̈ܶܐ ܚܠܳܦ ܚܛܳܗܳܐ ܠܡܳܪܝܳܐ. ܥܰܠ ܝܰܩܕܳܐ ܫܰܠܡܳܐ ܐܰܡܺܝܢܳܐܺܝܬ ܢܶܬܥܒܶܕ. ܗܽܘ ܘܢܽܘܩܳܝܶܗ.
16 ܘܒܰܐܪܒܰܥܶܣܖ̈ܶܐ ܒܝܰܪܚܳܐ ܩܰܕܡܳܝܳܐ ܦܶܨܚܰܐ ܗ̱ܘ ܠܡܳܪܝܳܐ.
17 ܘܰܒܚܰܡܫܥܶܣܖ̈ܶܐ ܒܶܗ ܒܝܰܪܚܳܐ ܥܰܕܥܺܐܕܳܐ. ܫܰܒܥܳܐ ܝܰܘܡܺܝ̈ܢ ܦܰܛܺܝܪܳܐ ܢܶܬܐܟܶܠ.
18 ܝܰܘܡܳܐ ܩܰܕܡܳܝܳܐ ܩܰܪܝܳܐ ܘܩܰܕܺܝܫܳܐ. ܘܟܽܠ ܥܒܳܕܳܐ ܕܦܽܘܠܚܳܢܳܐ ܠܳܐ ܬܶܥܒܕܽܘܢ.
19 ܘܩܰܪܶܒܘ ܩܽܘܖ̈ܒܳܢܶܐ ܝܰܩ̈ܕܶܐ ܫܰܠ̈ܡܶܐ ܠܡܳܪܝܳܐ. ܬܰܘܖ̈ܶܐ ܒܢܰܝ̈ ܒܰܩܪܳܐ ܬܪܶܝܢ. ܘܕܶܟܪܳܐ ܚܰܕ. ܘܶܐܡܖ̈ܶܐ ܒܢܰܝ̈ ܫܰܢ̱ܬܳܐ ܫܰܒܥܳܐ. ܕܠܰܝܬ ܒܗܽܘܢ ܡܽܘܡܳܐ ܢܶܗܘܽܘܢ ܠܟܽܘܢ.
20 ܘܩܽܘܪܒܳܢܗܽܘܢ ܢܰܫܺܝܦܳܐ ܕܦܺܝܠ ܒܡܶܫܚܳܐ. ܬܠܳܬܳܐ ܥܶܣܖ̈ܽܘܢܺܝܢ ܠܬܰܘܪܳܐ. ܘܰܬܪܶܝܢ ܥܶܣܖ̈ܽܘܢܺܝܢ ܠܕܶܟܪܳܐ ܬܶܥܒܕܽܘܢ.
21 ܘܥܶܣܪܽܘܢܳܐ ܚܰܕ ܠܶܐܡܪܳܐ ܚܰܕ ܗܳܟܰܢܳܐ ܥܒܶܕܘ ܠܫܰܒܥܳܬܰܝ̈ܗܽܘܢ ܐܶܡܖ̈ܶܐ.
22 ܘܨܺܦܪܳܝܳܐ ܚܰܕ ܕܥܶܙ̈ܶܐ ܚܠܳܦ ܚܛܳܗܳܐ ܠܰܡܚܰܣܳܝܽܘ ܥܠܰܝܟܽܘܢ.
23 ܠܒܰܪ ܡܶܢ ܝܰܩܕܳܐ ܫܰܠܡܳܐ ܕܨܰܦܪܳܐ. ܝܰܩܕܳܐ ܫܰܠܡܳܐ ܐܰܡܺܝܢܳܐܺܝܬ ܬܶܥܒܕܽܘܢ.
24 ܗܳܠܶܝܢ ܗܘܰܝܬܽܘܢ ܥܳܒܕܺܝܢ ܒܟܽܠܝܽܘܡ ܫܰܒܥܳܐ ܝܰܘܡܺܝ̈ܢ. ܩܽܘܪܒܳܢܳܐ ܕܠܰܚܡܳܐ ܠܪܺܝܚܳܐ ܕܰܣܘܳܬܳܐ ܠܡܳܪܝܳܐ. ܥܰܠ ܝܰܩܕܳܐ ܫܰܠܡܳܐ ܐܰܡܺܝܢܳܐܺܝܬ ܢܶܬܥܒܶܕ. ܗܽܘ ܘܢܽܘܩܳܝܶܗ.
25 ܘܝܰܘܡܳܐ ܕܫܰܒܥܳܐ ܩܰܪܝܳܐ ܘܩܰܕܺܝܫܳܐ ܢܶܗܘܶܐ ܠܟܽܘܢ. ܘܟܽܠ ܥܒܳܕ ܕܦܽܘܠܚܳܢܳܐ ܠܳܐ ܬܶܥܒܕܽܘܢ.
26 ܘܰܒܝܰܘܡܳܐ ܕܒܰܟܳܖ̈ܶܐ. ܡܳܐ ܕܰܡܩܰܪܒܺܝܢ ܐ̱ܢܬܽܘܢ ܣܡܺܝܕܳܐ ܡܶܢ ܚܰܕܬܳܐ ܠܡܳܪܝܳܐ. ܒܫܳܒܽܘܥܰܝ̈ܟܽܘܢ. ܩܰܪܝܳܐ ܘܩܰܕܺܝܫܳܐ ܢܶܗܘܶܐ ܠܟܽܘܢ. ܘܟܽܠ ܥܒܳܕ ܕܦܽܘܠܚܳܢܳܐ ܠܳܐ ܬܶܥܒܕܽܘܢ.
27 ܘܩܰܪܶܒܘ ܝܰܩ̈ܕܶܐ ܫܰܠ̈ܡܶܐ ܠܪܺܝܚ ܣܘܳܬܳܐ ܠܡܳܪܝܳܐ. ܬܰܘܖ̈ܶܐ ܒܢܰܝ̈ ܒܰܩܪܳܐ ܬܪܶܝܢ. ܘܕܶܟܪܳܐ ܚܰܕ. ܘܶܐܡܖ̈ܶܐ ܒܢܰܝ̈ ܫܰܢ̱ܬܳܐ ܫܰܒܥܳܐ.
28 ܘܩܽܘܪܒܳܢܗܽܘܢ ܢܰܫܺܝܦܳܐ ܕܦܺܝܠ ܒܡܶܫܚܳܐ. ܬܠܳܬܳܐ ܥܶܣܖ̈ܽܘܢܺܝܢ ܠܬܰܘܪܳܐ ܚܰܕ. ܘܰܬܪܶܝܢ ܥܶܣܖ̈ܽܘܢܺܝܢ ܠܕܶܟܪܳܐ ܚܰܕ.
29 ܘܥܶܣܪܽܘܢܳܐ ܚܰܕ ܠܶܐܡܪܳܐ ܚܰܕ. ܗܳܟܰܢܳܐ ܠܫܰܒܥܳܬܰܝ̈ܗܽܘܢ ܐܶܡܖ̈ܶܐ.
30 ܘܨܺܦܪܳܝܳܐ ܚܰܕ ܕܥܶܙ̈ܶܐ ܠܰܡܚܰܣܳܝܽܘ ܥܠܰܝܟܽܘܢ.
31 ܣܛܰܪ ܡܶܢ ܝܰܩܕܳܐ ܫܰܠܡܳܐ ܐܰܡܺܝܢܳܐ ܘܰܣܡܺܝܕܶܗ ܗܘܰܝܬܽܘܢ ܥܳܒܕܺܝܢ. ܕܠܰܝܬ ܒܗܽܘܢ ܡܽܘܡܳܐ. ܘܢܽܘܩܳܝܗܽܘܢ.