Numbers 15
The Book of Numbers
܀ ܡܢܝܢܐ ܝܗ ܀
1 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.
2 ܡܰܠܶܠ ܥܰܡ ܒܢܰܝ̈ ܝܺܣܪܳܐܶܝܠ. ܘܶܐܡܰܪ ܠܗܽܘܢ. ܡܳܐ ܕܥܰܠܬܽܘܢ ܠܰܐܪܥܳܐ ܕܒܶܝܬ ܡܰܥܡܰܪܟܽܘܢ ܕܝܳܗܶܒ ܐ̱ܢܳܐ ܠܟܽܘܢ ܝܽܘܪܬܳܢܳܐ.
3 ܩܰܪܶܒܘ ܩܽܘܪܒܳܢܳܐ ܠܡܳܪܝܳܐ ܥܠܳܬܳܐ. ܐܰܘ ܕܶܒܚܳܐ. ܦܪܽܘܫܘ ܢܶܕܪܳܐ. ܐܰܘ ܦܽܘܪܫܳܢܳܐ ܐܰܘ ܒܥܰܕܥܺܐܕܰܝ̈ܟܽܘܢ. ܘܰܥܒܶܕܘ ܪܺܝܚܳܐ ܕܰܣܘܳܬܳܐ ܠܡܳܪܝܳܐ ܡܶܢ ܬܰܘܖ̈ܶܐ ܘܡܶܢ ܥܳܢ̈ܳܐ.
4 ܘܰܢܩܰܪܶܒ ܗܰܘ ܕܰܡܩܰܪܶܒ ܩܽܘܪܒܳܢܶܗ ܠܡܳܪܝܳܐ. ܣܡܺܝܕܳܐ ܢܰܫܺܝܦܳܐ. ܥܶܣܪܽܘܢܳܐ ܕܦܺܝܠ ܒܪܽܘܒܥܶܗ ܕܗܶܡܺܝܢܳܐ ܕܡܶܫܚܳܐ.
5 ܘܚܰܡܪܳܐ ܠܢܽܘܩܳܝܳܐ. ܪܽܘܒܥܶܗ ܕܗܶܡܺܝܢܳܐ ܩܰܪܶܒ ܥܰܠ ܥܠܳܬܳܐ. ܐܰܘ ܠܕܶܒܚܳܐ ܕܶܐܡܪܳܐ ܚܰܕ.
6 ܐܰܘ ܠܕܶܟܪܳܐ ܚܰܕ. ܘܰܥܒܶܕ ܩܽܘܪܒܳܢܳܐ ܢܰܫܺܝܦܳܐ. ܬܪܶܝܢ ܥܶܣܖ̈ܽܘܢܺܝܢ. ܕܦܺܝܠܺܝܢ ܒܡܶܫܚܳܐ. ܬܽܘܠܬܶܗ ܕܗܶܡܺܝܢܳܐ.
7 ܘܚܰܡܪܳܐ ܠܢܽܘܩܳܝܳܐ ܬܽܘܠܬܶܗ ܕܗܶܡܺܝܢܳܐ. ܩܰܪܶܒ ܪܺܝܚܳܐ ܕܰܣܘܳܬܳܐ ܠܡܳܪܝܳܐ.
8 ܘܶܐܢ ܡܩܰܪܶܒ ܐܰܢ̱ܬ ܒܰܪ ܒܰܩܪܳܐ ܝܰܩܕܳܐ ܫܰܠܡܳܐ. ܐܰܘ ܕܶܒܚܳܐ ܠܡܶܦܪܰܫ ܢܶܕܪܳܐ. ܐܰܘ ܫܰܠܡܳܐ ܠܡܳܪܝܳܐ.
9 ܩܰܪܶܒ ܥܰܠ ܒܰܪ ܒܰܩܪܳܐ ܩܽܘܪܒܳܢܳܐ ܢܰܫܺܝܦܳܐ. ܬܠܳܬܳܐ ܥܶܣܖ̈ܽܘܢܺܝܢ ܕܦܺܝܠܺܝܢ ܒܡܶܫܚܳܐ ܦܶܠܓܶܗ ܕܗܶܡܺܝܢܳܐ.
10 ܘܚܰܡܪܳܐ ܩܰܪܶܒ ܠܢܽܘܩܳܝܳܐ ܦܶܠܓܶܗ ܕܗܶܡܺܝܢܳܐ. ܩܽܘܪܒܳܢܳܐ ܠܪܺܝܚܳܐ ܕܰܣܘܳܬܳܐ ܠܡܳܪܝܳܐ.
11 ܗܳܟܰܢܳܐ ܥܒܶܕܘ ܠܬܰܘܪܳܐ ܚܰܕ. ܘܰܠܕܶܟܪܳܐ ܚܰܕ. ܐܰܘ ܠܶܐܡܪܳܐ ܡܶܢ ܐܶܡܖ̈ܶܐ. ܐܰܘ ܡܶܢ ܥܶܙ̈ܶܐ.
12 ܐܰܝܟ ܡܶܢܝܳܢܳܐ ܕܥܳܒܕܺܝܢ ܐܢ̱ܬܽܘܢ. ܗܳܟܰܢܳܐ ܥܒܶܕܘ ܠܚܰܕ ܚܰܕ ܒܡܶܢܝܳܢܗܽܘܢ.
13 ܟܽܠܗܽܘܢ ܕܒܶܝܬ ܝܺܣܪܳܐܶܝܠ ܢܶܥܒܕܽܘܢ ܗܳܠܶܝܢ ܗܳܟܰܢܳܐ. ܘܰܢܩܰܪܒܽܘܢ ܩܽܘܪܒܳܢܳܐ ܠܪܺܝܚܳܐ ܕܰܣܘܳܬܳܐ ܠܡܳܪܝܳܐ.
14 ܘܶܐܢ ܢܶܥܡܰܪ ܥܰܡܟܽܘܢ ܐܰܝܢܳܐ ܕܡܶܬܦܢܶܐ ܠܘܳܬܝ. ܐܰܘ ܒܰܝܢܳܬܟܽܘܢ ܠܕܳܖ̈ܰܝܟܽܘܢ. ܘܢܶܥܒܶܕ ܩܽܘܪܒܳܢܳܐ ܕܪܺܝܚܳܐ ܕܰܣܘܳܬܳܐ ܠܡܳܪܝܳܐ. ܐܰܝܟ ܕܥܳܒܕܺܝܢ ܐܢ̱ܬܽܘܢ ܗܳܟܰܢܳܐ ܢܶܥܒܶܕ.
15 ܢܳܡܽܘܣܳܐ ܚܰܕ ܢܶܗܘܶܐ ܠܟܽܘܢ. ܘܠܰܐܝܢܳܐ ܕܡܶܬܦܢܶܐ ܠܘܳܬܝ ܕܥܳܡܰܪ ܥܰܡܟܽܘܢ. ܢܳܡܽܘܣܳܐ ܠܥܳܠܰܡ ܠܕܳܖ̈ܰܝܟܽܘܢ. ܐܰܝܢܳܐ ܕܡܶܬܦܢܶܐ ܠܘܳܬܝ. ܐܰܟܘܳܬܟܽܘܢ ܢܶܗܘܶܐ ܩܕܳܡ ܡܳܪܝܳܐ.
16 ܢܳܡܽܘܣܳܐ ܚܰܕ ܘܕܺܝܢܳܐ ܚܰܕ ܢܶܗܘܶܐ ܠܟܽܘܢ. ܘܠܰܐܝܠܶܝܢ ܕܡܶܬܦܢܶܝܢ ܠܘܳܬܝ ܕܥܳܡܪܺܝܢ ܥܰܡܟܽܘܢ.
17 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.
18 ܡܰܠܶܠ ܥܰܡ ܒܢܰܝ̈ ܝܺܣܪܳܐܶܝܠ. ܘܶܐܡܰܪ ܠܗܽܘܢ. ܡܳܐ ܕܥܰܠܬܽܘܢ ܠܰܐܪܥܳܐ ܕܡܰܥܶܠ ܐ̱ܢܳܐ ܠܟܽܘܢ ܠܬܰܡܳܢ.
19 ܡܳܐ ܕܳܐܟܠܺܝܢ ܐ̱ܢܬܽܘܢ ܡܶܢ ܠܰܚܡܳܐ ܕܰܐܪܥܳܐ. ܦܪܽܘܫܘ ܦܽܘܪܫܳܢܳܐ ܠܡܳܪܝܳܐ.
20 ܡܶܢ ܪܺܝܫ ܐܳܨ̈ܘܳܬܟܽܘܢ. ܚܳܚܽܘܪܬܳܐ ܦܪܽܘܫܘ ܦܽܘܪܫܳܢܳܐ ܠܡܳܪܝܳܐ. ܐܝܟ ܦܽܘܪܫܳܢܳܐ ܕܶܐܕܪܳܐ ܗܳܟܰܢܳܐ ܦܽܘܪܫܽܘܗ̇.
21 ܪܺܝܫ ܐܳܨܘ̈ܳܬܟܽܘܢ ܗܰܒܘ ܦܽܘܪܫܳܢܳܐ ܠܡܳܪܝܳܐ ܠܕܳܖ̈ܰܝܟܽܘܢ.
22 ܘܶܐܢ ܬܶܛܥܽܘܢ ܘܠܳܐ ܬܶܥܒܕܽܘܢ ܗܳܠܶܝܢ ܟܽܠܗܽܘܢ ܦܽܘܩ̈ܕܳܢܶܐ ܕܡܰܠܶܠ ܡܳܪܝܳܐ ܥܰܡ ܡܽܘܫܶܐ.
23 ܟܽܠܡܶܕܶܡ ܕܦܰܩܶܕ ܡܳܪܝܳܐ ܠܘܳܬܟܽܘܢ ܒܺܐܝܕܳܐ ܕܡܽܘܫܶܐ. ܡܶܢ ܝܰܘܡܳܐ ܕܦܰܩܶܕ ܡܳܪܝܳܐ ܘܰܠܗܰܠ ܠܕܳܖ̈ܰܝܟܽܘܢ.
24 ܘܶܐܢ ܡܶܢ ܩܕܳܡ ܥܰܝ̈ܢܶܝܗ̇ ܕܰܟܢܽܘܫܬܳܐ ܐܶܬܥܰܒܕܰܬ ܛܽܘܥܝܰܝ. ܢܩܰܪܒܽܘܢ ܟܽܠܳܗ̇ ܟܢܽܘܫܬܳܐ. ܬܰܘܪܳܐ ܚܰܕ ܒܰܪ ܒܰܩܪܳܐ. ܠܰܥܠܳܬܳܐ ܠܪܺܝܚܳܐ ܕܰܣܘܳܬܳܐ ܠܡܳܪܝܳܐ. ܘܰܣܡܺܝܕܶܗ. ܘܢܽܘܩܳܝܶܗ ܐܰܝܟ ܙܶܕܩܶܗ. ܘܨܺܦܪܳܝܳܐ ܚܰܕ ܕܥܶܙ̈ܶܐ ܠܰܚܛܳܗܳܐ.
25 ܘܰܢܚܰܣܶܐ ܟܳܗܢܳܐ ܥܰܠ ܟܽܠܳܗ̇ ܟܢܽܘܫܬܳܐ ܕܰܒܢܰܝ̈ ܝܺܣܪܳܐܶܝܠ. ܘܢܶܫܬܒܶܩ ܠܗܽܘܢ. ܡܶܛܽܠ ܕܛܽܘܥܝܰܝ ܗܺܝ. ܘܗܶܢܽܘܢ ܐܰܝܬܺܝܘ ܩܽܘܖ̈ܒܢܰܝ̈ܗܽܘܢ ܩܽܘܪܒܳܢܳܐ ܠܡܳܪܝܳܐ. ܘܕܰܚܠܳܦ ܚܛܳܗܰܝ̈ܗܽܘܢ ܩܽܘܪܒܳܢܳܐ ܠܡܳܪܝܳܐ ܥܰܠ ܣܰܟ̈ܠܘܳܬܗܽܘܢ.
26 ܘܢܶܫܬܒܶܩ ܠܗܽܘܢ ܠܟܽܠܳܗ̇ ܟܢܽܘܫܬܳܐ ܕܰܒܢܰܝ̈ ܝܺܣܪܳܐܶܝܠ. ܘܠܰܐܝܠܶܝܢ ܕܡܶܬܦܢܶܝܢ ܠܘܳܬܝ ܕܥܳܡܰܪܺܝܢ ܒܺܝܣܪܳܐܶܝܠ. ܡܶܛܽܠ ܕܰܕܟܽܠܶܗ ܗܺܝ ܥܰܡܳܐ ܛܽܘܥܝܰܝ.
27 ܘܶܐܢ ܢܰܦܫܳܐ ܚܕܳܐ ܬܶܚܛܶܐ ܒܛܽܘܥܝܰܝ. ܬܩܰܪܶܒ ܥܶܙܳܐ ܒܰܪܬ ܫܰܢ̱ܬܳܐ ܚܠܳܦ ܚܛܳܗܳܐ.
28 ܘܰܢܚܰܣܶܐ ܟܳܗܢܳܐ ܥܰܠ ܢܰܦܫܳܐ ܕܰܚܛܳܬ ܒܰܚܛܳܗܳܐ ܕܛܽܘܥܝܰܝ ܩܕܳܡ ܡܳܪܝܳܐ. ܘܢܶܬܚܰܣܶܐ ܥܠܰܘܗܝ ܘܢܶܫܬܒܶܩ ܠܶܗ.
29 ܘܠܰܒܢܰܝ̈ ܝܺܣܪܳܐܶܝܠ ܘܠܰܐܝܠܶܝܢ ܕܡܶܬܦܢܶܝܢ ܠܘܳܬܝ ܕܥܳܡܪܺܝܢ ܒܰܝܢܳܬܟܽܘܢ. ܢܳܡܽܘܣܳܐ ܚܰܕ ܢܶܗܘܶܐ ܠܟܽܘܢ. ܠܡܰܢ ܕܥܳܒܶܕ ܒܛܽܘܥܝܰܝ.
30 ܘܢܰܦܫܳܐ ܕܬܶܥܒܶܕ ܒܺܐܝܕܳܐ ܪܳܡܬܳܐ. ܡܶܢܟܽܘܢ ܘܡܶܢ ܐܰܝܠܶܝܢ ܕܡܶܬܦܢܶܝܢ ܠܘܳܬܝ. ܩܕܳܡ ܡܳܪܝܳܐ ܓܰܕܶܦ. ܬܺܐܒܰܕ ܢܰܦܫܳܐ ܗܳܝ ܡܶܢ ܥܰܡܳܗ̇.
31 ܡܶܛܽܠ ܕܫܳܛ ܦܶܬܓܳܡܰܘ̈ܗܝ ܕܡܳܪܝܳܐ. ܘܰܠܦܽܘܩܕܳܢܰܘ̈ܗܝ ܒܰܛܶܠ. ܬܺܐܒܰܕ ܢܰܦܫܳܐ ܗܳܝ. ܘܥܰܘܠܳܗ̇ ܥܠܶܝܗ̇.
32 ܘܰܗܘܰܘ ܒܢܰܝ̈ ܝܺܣܪܳܐܶܝܠ ܒܡܰܕܒܪܳܐ. ܘܶܐܫܟܰܚܘ ܓܰܒܪܳܐ ܚܰܕ ܟܰܕ ܠܳܩܶܛ ܩܰܝ̈ܣܶܐ ܒܝܰܘܡܳܐ ܕܫܰܒܬܳܐ.
33 ܘܩܰܪܒܽܘܗܝ ܗܳܢܽܘܢ ܕܶܐܫܟܚܽܘܗܝ ܟܰܕ ܠܳܩܶܛ ܩܰܝ̈ܣܶܐ. ܠܘܳܬ ܡܽܘܫܶܐ ܘܰܠܘܳܬ ܐܰܗܪܽܘܢ ܘܰܠܘܳܬ ܟܽܠܳܗ̇ ܟܢܽܘܫܬܳܐ.
34 ܘܚܰܒܫܽܘܗܝ ܒܶܝܬ ܢܛܽܘܪܬܳܐ. ܡܶܛܽܠ ܕܠܳܐ ܥܕܰܟܺܝܠ ܐܶܬܦܰܫܰܩ ܡܳܢܳܐ ܢܶܬܥܒܶܕ ܠܶܗ.
35 ܘܶܐܡܰܪ ܡܳܪܝܳܐ ܠܡܽܘܫܶܐ. ܡܶܬܩܛܳܠܽܘ ܢܶܬܩܛܶܠ ܓܰܒܪܳܐ. ܘܡܶܪܓܰܡ ܢܶܪܓܡܽܘܢܶܗ ܟܽܠܳܗ̇ ܟܢܽܘܫܬܳܐ ܒܟܺܐܦ̈ܶܐ ܠܒܰܪ ܡܶܢ ܡܰܫܪܺܝܬܳܐ.
36 ܘܰܐܦܩܽܘܗܝ ܟܽܠܳܗ̇ ܟܢܽܘܫܬܳܐ ܠܒܰܪ ܡܶܢ ܡܰܫܪܺܝܬܳܐ. ܘܪܰܓܡܽܘܗܝ ܒܟܺܐܦ̈ܶܐ ܘܡܺܝܬ. ܐܰܝܟ ܕܦܰܩܶܕ ܡܳܪܝܳܐ ܠܡܽܘܫܶܐ.
37 ܢܳܡܽܘܣܳܐ ܕܥܰܠ ܨܽܘ̈ܨܝܳܬܳܐ. ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.
38 ܡܰܠܶܠ ܥܰܡ ܒܢܰܝ̈ ܝܺܣܪܳܐܶܝܠ. ܘܶܐܡܰܪ ܠܗܽܘܢ. ܘܢܶܥܒܕܽܘܢ ܠܗܽܘܢ ܨܽܘܨ̈ܝܳܬܳܐ ܥܰܠ ܟܶܢ̈ܦܶܐ ܕܡܰܖ̈ܛܽܘܛܰܝܗܽܘܢ. ܠܕܳܖ̈ܰܝܗܽܘܢ. ܘܢܶܥܒܕܽܘܢ ܒܨܽܘܨ̈ܝܳܬܳܐ ܕܟܶܢ̈ܦܰܝܗܽܘܢ ܚܽܘܛܳܐ ܕܬܶܟܠܬܳܐ.
39 ܘܢܶܗܘ̈ܝܳܢ ܠܟܽܘܢ ܨܽܘܨ̈ܝܳܬܳܐ. ܕܬܶܚܙܽܘܢ ܐܶܢܶܝܢ. ܘܬܶܬܕܰܟܪܽܘܢ ܟܽܠܗܽܘܢ ܦܽܘܩܕܳܢܰܘ̈ܗܝ ܕܡܳܪܝܳܐ ܐܰܠܳܗܟܽܘܢ. ܘܬܶܥܒܕܽܘܢ ܐܶܢܽܘܢ. ܘܠܳܐ ܬܶܛܥܽܘܢ ܒܳܬܰܪ ܠܶܒܰܝ̈ܟܽܘܢ. ܘܒܳܬܰܪ ܖ̈ܶܥܝܳܢܰܝܟܽܘܢ. ܕܛܳܥܶܝܢ ܐ̱ܢܬܽܘܢ ܒܳܬܰܪܗܽܘܢ.
40 ܘܬܶܬܕܰܟܪܽܘܢ ܘܬܶܥܒܕܽܘܢ ܟܽܠܗܽܘܢ ܦܽܘܩܕܳܢܰܝ̈. ܘܬܶܗܘܢ ܩܰܕܺܝܫܺܝܢ ܠܰܐܠܳܗܟܽܘܢ.
41 ܐܶܢܳܐ ܐ̱ܢܳܐ ܡܳܪܝܳܐ ܐܰܠܳܗܟܽܘܢ. ܕܰܐܦܶܩܬܟܽܘܢ ܡܶܢ ܐܰܪܥܳܐ ܕܡܶܨܪܶܝܢ. ܕܶܐܗܘܶܐ ܠܟܽܘܢ ܐܰܠܳܗܳܐ. ܐܶܢܳܐ ܐ̱ܢܳܐ ܡܳܪܝܳܐ ܐܰܠܳܗܟܽܘܢ.