Numbers 2
The Book of Numbers
܀ ܡܢܝܢܐ ܒ ܀
1 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ ܘܥܰܡ ܐܰܗܪܽܘܢ. ܘܶܐܡܰܪ ܠܗܽܘܢ.
2 ܓܒܰܪ ܒܛܽܘܠܩܶܗ ܒܰܐܬܖ̈ܰܘܳܬܳܐ ܕܒܶܝܬ ܐܰܒܳܗܰܝ̈ܗܽܘܢ ܢܶܫܪܽܘܢ ܒܢܰܝ̈ ܝܺܣܪܳܐܶܝܠ ܡܶܢ ܩܒܽܘܠ. ܘܰܚܕܳܪ ܡܰܫܟܰܢ ܙܰܒܢܳܐ ܢܶܫܪܽܘܢ.
3 ܘܰܕܫܳܪܶܝܢ ܠܽܘܩܕܰܡ ܡܶܢ ܡܰܕܢܚܳܐ ܛܽܘܠܩܳܐ ܕܡܰܫܪܺܝܬܳܐ ܕܝܺܗܽܘܕܳܐ ܠܚܰܝܠܗܽܘܢ. ܘܪܺܝܫܳܐ ܕܰܒܢܰܝ̈ ܝܺܗܽܘܕܳܐ. ܢܶܚܫܽܘܢ ܒܰܪ ܥܰܡܺܝܢܳܕܳܒ.
4 ܘܡܶܢܝܳܢܳܐ ܕܚܰܝܠܶܗ. ܫܰܒܥܺܝܢ ܘܰܐܪܒܥܳܐ ܐܰܠܦܺܝ̈ܢ ܘܫܶܬܡܳܐܐ.
5 ܘܰܕܫܳܪܶܝܢ ܠܘܳܬܶܗ ܫܰܒܛܳܐ ܕܺܐܝܣܳܟܳܪ. ܘܪܺܝܫܳܐ ܕܰܒܢܰܝ̈ ܐܺܝܣܳܟܳܪ. ܢܰܬܰܢܝܶܐܝܠ ܒܰܪ ܨܽܘܥܳܪ.
6 ܘܡܶܢܝܳܢܳܐ ܕܚܰܝܠܶܗ. ܚܰܡܫܺܝܢ ܘܰܐܪܒܥܳܐ ܐܰܠܦܺܝ̈ܢ ܘܰܐܪܒܰܥܡܳܐܐ.
7 ܘܫܰܒܛܳܐ ܕܰܙܒܳܘܠܽܘܢ. ܘܪܺܝܫܳܐ ܕܰܒܢܰܝ̈ ܙܒܳܘܠܽܘܢ. ܐܶܠܝܰܐܒ ܒܰܪ ܚܰܠܽܘܢ.
8 ܘܡܶܢܝܳܢܳܐ ܕܚܰܝܠܶܗ. ܚܰܡܫܺܝܢ ܘܫܰܒܥܳܐ ܐܰܠܦܺܝ̈ܢ ܘܰܐܪܒܰܥܡܳܐܐ.
9 ܟܽܠܶܗ ܡܶܢܝܳܢܳܐ ܕܡܰܫܪܺܝܬܳܐ ܕܝܺܗܽܘܕܳܐ ܡܳܐܐ ܘܰܬܡܳܢܺܝܢ ܘܶܫܬܳܐ ܐܰܠܦܺܝ̈ܢ ܘܰܐܪܒܰܥܡܳܐܐ ܠܚܰܝܠܰܘ̈ܳܬܗܽܘܢ. ܩܰܕܡܳܝܰܬ ܗܶܢܽܘܢ ܢܶܗܘܽܘܢ ܫܳܩܠܺܝܢ.
10 ܘܛܽܘܠܩܳܐ ܕܡܰܫܪܺܝܬܳܐ ܕܪܽܘܒܺܝܠ ܡܶܢ ܬܰܝܡܢܳܐ ܠܚܰܝܠܗܽܘܢ. ܘܪܺܝܫܳܐ ܕܰܒܢܰܝ̈ ܪܽܘܒܺܝܠ ܐܶܠܺܝܨܽܘܪ ܒܰܪ ܫܕܰܐܽܘܪ.
11 ܘܡܶܢܝܳܢܳܐ ܕܚܰܝܠܶܗ. ܐܰܪܒܥܺܝܢ ܘܶܫܬܳܐ ܐܰܠܦܺܝ̈ܢ ܘܚܰܡܶܫܡܳܐܐ.
12 ܘܰܕܫܳܪܶܝܢ ܠܘܳܬܶܗ ܫܰܒܛܳܐ ܕܫܶܡܥܽܘܢ. ܘܪܺܝܫܳܐ ܕܰܒܢܰܝ̈ ܫܶܡܥܽܘܢ. ܫܠܰܡܽܘܐܶܝܠ ܒܰܪ ܨܽܘܪܺܝܫܰܐܕܰܝ.
13 ܘܡܶܢܝܳܢܳܐ ܕܚܰܝܠܶܗ. ܚܰܡܫܺܝܢ ܘܬܶܫܥܳܐ ܐܰܠܦܺܝ̈ܢ ܘܬܠܳܬܡܳܐܐ.
14 ܘܫܰܒܛܳܐ ܕܓܳܕ. ܘܪܺܝܫܳܐ ܕܰܒܢܰܝ̈ ܓܳܕ ܐܶܠܝܳܐܣܳܦ ܒܰܪ ܪܰܥܽܘܐܶܝܠ.
15 ܘܡܶܢܝܳܢܳܐ ܕܚܰܝܠܶܗ. ܐܰܪܒܥܺܝܢ ܘܚܰܡܫܳܐ ܐܰܠܦܺܝ̈ܢ ܘܫܶܬܡܳܐܐ ܘܚܰܡܫܺܝܢ.
16 ܟܽܠܶܗ ܡܶܢܝܳܢܳܐ ܕܡܰܫܪܺܝܬܳܐ ܕܪܽܘܒܺܝܠ ܡܳܐܐ ܘܚܰܡܫܺܝܢ ܘܚܰܕ ܐܰܠܦܺܝ̈ܢ ܘܰܐܪܒܰܥܡܳܐܐ ܘܚܰܡܫܺܝܢ ܠܚܰܝܠܗܽܘܢ. ܒܳܬܰܪ ܩܰܕܡܳܝ̈ܶܐ ܗܘܰܘ ܫܳܩܠܺܝܢ.
17 ܘܫܳܩܶܠ ܡܰܫܟܰܢ ܙܰܒܢܳܐ. ܡܰܫܪܺܝܬܳܐ ܕܠܶܘܳܝ̈ܶܐ. ܒܓܰܘ ܡܰܫܪܺܝܬܳܐ. ܐܰܝܟ ܕܫܳܪܶܝܢ ܗܳܟܰܢܳܐ ܗܘܰܘ ܫܳܩܠܺܝܢ. ܐ̱ܢܳܫ ܥܰܡ ܛܽܘܠܩܶܗ ܠܚܰܝܠܰܘ̈ܳܬܗܽܘܢ.
18 ܘܛܽܘܠܩܳܐ ܕܡܰܫܪܺܝܬܳܐ ܕܰܐܦܪܶܝܡ. ܠܚܰܝܠܗܽܘܢ ܡܶܢ ܡܰܥܪܒܳܐ. ܘܪܺܝܫܳܐ ܕܰܒܢܰܝ̈ ܐܰܦܪܶܝܡ ܐܶܠܺܝܫܡܳܥ ܒܰܪ ܥܰܡܺܝܗܳܘܕ.
19 ܘܡܶܢܝܳܢܳܐ ܕܚܰܝܠܶܗ. ܐܰܪܒܥܺܝܢ ܐܰܠܦܺܝ̈ܢ ܘܚܰܡܶܫܡܳܐܐ.
20 ܘܰܕܫܳܪܶܝܢ ܠܘܳܬܶܗ ܫܰܒܛܳܐ ܕܰܡܢܰܫܶܐ. ܘܪܺܝܫܳܐ ܕܰܒܢܰܝ̈ ܡܢܰܫܶܐ ܓܰܡܰܠܺܝܐܶܝܠ ܒܰܪ ܦܰܪܨܽܘܪ.
21 ܘܡܶܢܝܳܢܳܐ ܕܚܰܝܠܶܗ. ܬܠܳܬܺܝܢ ܘܰܬܪܶܝܢ ܐܰܠܦܺܝ̈ܢ ܘܡܰܐܬܶܝܢ.
22 ܘܫܰܒܛܳܐ ܕܒܶܢܝܳܡܶܝܢ. ܘܪܺܝܫܳܐ ܕܰܒܢܰܝ̈ ܒܶܢܝܳܡܶܝܢ ܐܰܒܺܝܕܳܢ ܒܰܪ ܓܶܕܥܽܘܢܺܝ.
23 ܘܡܶܢܝܳܢܳܐ ܕܚܰܝܠܶܗ. ܬܠܳܬܺܝܢ ܘܚܰܡܫܳܐ ܐܰܠܦܺܝ̈ܢ ܘܰܐܪܒܰܥܡܳܐܐ.
24 ܟܽܠܶܗ ܡܶܢܝܳܢܳܐ ܕܡܰܫܪܺܝܬܳܐ ܕܰܐܦܪܶܝܡ ܡܳܐܐ ܘܰܬܡܳܢܝܳܐ ܐܰܠܦܺܝ̈ܢ ܘܡܳܐܐ ܠܚܰܝܠܗܽܘܢ. ܒܳܬܰܪ ܬܪܶܝܢ ܢܶܫܩܠܽܘܢ.
25 ܘܛܽܘܠܩܳܐ ܕܡܰܫܪܺܝܬܳܐ ܕܕܳܢ ܡܶܢ ܓܰܪܒܝܳܐ ܠܚܰܝܠܗܽܘܢ. ܘܪܺܝܫܳܐ ܕܰܒܢܰܝ̈ ܕܳܢ ܐܰܚܺܝܥܳܙܳܪ ܒܰܪ ܥܰܡܺܝܫܰܕܰܝ.
26 ܘܡܶܢܝܳܢܳܐ ܕܚܰܝܠܶܗ. ܫܬܺܝܢ ܘܰܬܪܶܝܢ ܐܰܠܦܺܝ̈ܢ ܘܰܫܒܰܥܡܳܐܐ.
27 ܘܰܕܫܳܪܶܝܢ ܠܘܳܬܶܗ ܫܰܒܛܳܐ ܕܳܐܫܺܝܪ. ܘܪܺܝܫܳܐ ܕܰܒܢܰܝ̈ ܐܳܫܺܝܪ. ܦܓܰܥܐܶܝܠ ܒܰܪ ܥܰܟܪܳܢ.
28 ܘܡܶܢܝܳܢܳܐ ܕܚܰܝܠܶܗ. ܐܰܪܒܥܺܝܢ ܘܚܰܕ ܐܰܠܦܺܝ̈ܢ ܘܚܰܡܶܫܡܳܐܐ.
29 ܘܫܰܒܛܳܐ ܕܢܰܦܬܳܠܺܝ. ܘܪܺܝܫܳܐ ܕܰܒܢܰܝ̈ ܢܰܦܬܳܠܺܝ ܐܰܚܺܝܕܳܥ ܒܰܪ ܥܺܝܢܳܢ.
30 ܘܡܶܢܝܳܢܳܐ ܕܚܰܝܠܶܗ. ܚܰܡܫܺܝܢ ܘܰܬܠܳܬܳܐ ܐܰܠܦܺܝ̈ܢ ܘܰܐܪܒܰܥܡܳܐܐ.
31 ܟܽܠܶܗ ܡܶܢܝܳܢܳܐ ܕܡܰܫܪܺܝܬܳܐ ܕܕܳܢ ܡܳܐܐ ܘܚܰܡܫܺܝܢ ܘܫܰܒܥܳܐ ܐܰܠܦܺܝ̈ܢ ܘܫܶܬܡܳܐܐ. ܒܰܐ̱ܚܪܳܝܰܬ ܛܽܘܠ̈ܩܶܐ ܢܶܗܘܽܘܢ ܫܳܩܠܺܝܢ.
32 ܗܳܠܶܝܢ ܡܶܢܝܳܢ̈ܶܐ ܕܰܒܢܰܝ̈ ܝܺܣܪܳܐܶܝܠ ܠܒܶܝܬ ܐܰܒܳܗܰܝ̈ܗܽܘܢ. ܟܽܠܗܽܘܢ ܡܶܢܝܳܢ̈ܶܐ ܕܡܰܫܖ̈ܝܳܬܳܐ ܠܚܰܝܠܗܽܘܢ. ܫܶܬܡܳܐܐ ܘܰܬܠܳܬܳܐ ܐܰܠܦܺܝ̈ܢ ܘܚܰܡܶܫ ܡܳܐܐ ܘܚܰܡܫܺܝܢ.
33 ܘܠܶܘܳܝ̈ܶܐ ܘܫܰܒܛܳܐ ܕܰܐܒܳܗܰܝ̈ܗܽܘܢ ܠܳܐ ܐܶܬܡܢܺܝܘ ܒܰܝܢܳܬ ܒܢܰܝ̈ ܝܺܣܪܳܐܶܝܠ. ܐܰܝܟ ܕܦܰܩܶܕ ܡܳܪܝܳܐ ܠܡܽܘܫܶܐ.
34 ܘܰܥܒܰܕܘ ܒܢܰܝ̈ ܝܺܣܪܳܐܶܝܠ ܟܽܠ ܕܦܰܩܶܕ ܡܳܪܝܳܐ ܠܡܽܘܫܶܐ. ܗܳܟܰܢܳܐ ܥܒܰܕܘ. ܘܗܳܟܰܢܳܐ ܫܳܩܠܺܝܢ ܗܘܰܘ ܒܛܽܘܠܩܰܝ̈ܗܽܘܢ. ܘܗܳܟܰܢܳܐ ܫܳܪܶܝܢ ܗܘܰܘ ܐ̱ܢܳܫ ܒܡܰܫܪܺܝܬܶܗ. ܥܰܠܒܶܝܬ ܐܰܒܽܘܗܝ.