Numbers 20
The Book of Numbers
܀ ܡܢܝܢܐ ܟ ܀
1 ܘܶܐܬܰܘ ܒܢܰܝ̈ ܝܺܣܪܳܐܶܝܠ ܟܽܠܳܗ̇ ܟܢܽܘܫܬܳܐ ܠܡܰܕܒܪܳܐ ܕܨܺܝܢ ܒܝܰܪܚܳܐ ܩܰܕܡܳܝܳܐ. ܘܺܝܬܶܒ ܥܰܡܳܐ ܒܰܪܩܶܡ. ܘܡܺܝܬܬ ܬܰܡܳܢ ܡܰܪܝܰܡ. ܘܶܐܬܩܰܒܪܰܬ ܬܰܡܳܢ.
2 ܘܠܰܝܬ ܗܘܳܐ ܡܰܝ̈ܳܐ ܠܥܰܡܳܐ ܕܢܶܫܬܶܐ. ܘܶܐܬܟܰܢܫܘ ܥܰܡܳܐ ܥܰܠ ܡܽܘܫܶܐ ܘܥܰܠ ܐܰܗܪܽܘܢ.
3 ܘܰܢܨܰܘ ܥܰܡܳܐ ܥܰܡ ܡܽܘܫܶܐ ܘܥܰܡ ܐܰܗܪܽܘܢ. ܘܶܐܡܰܪܘ ܠܗܽܘܢ. ܐܶܫܬܽܘܦ ܕܶܝܢ ܡܺܝܬܢ ܒܡܰܘܬܳܢܳܐ ܕܰܐܚܰܝ̈ܢ ܩܕܳܡ ܡܳܪܝܳܐ.
4 ܠܡܳܢܳܐ ܐܰܝܬܺܝܬܽܘܢ ܟܢܽܘܫܬܶܗ ܕܡܳܪܝܳܐ ܠܡܰܕܒܪܳܐ ܗܳܢܳܐ. ܕܰܢܡܽܘܬ ܬܢܳܢ ܚܢܰܢ ܘܰܒܥܺܝܪܰܢ.
5 ܘܰܠܡܳܢܳܐ ܐܰܣܶܩܬܽܘܢܳܢ ܡܶܢ ܡܶܨܪܶܝܢ. ܘܰܐܝܬܺܝܬܽܘܢܳܢ ܠܰܐܬܪܳܐ ܗܳܢܳܐ ܒܺܝܫܳܐ. ܠܳܐ ܐܰܬܪܳܐ ܕܒܶܝܬ ܙܰܪܥܳܐ. ܘܳܐܦܠܳܐ ܕܓܽܘܦ̈ܢܶܐ. ܘܬܺܐܢ̈ܶܐ. ܘܖ̈ܽܘܡܳܢܶܐ. ܘܳܐܦܠܳܐ ܡܰܝ̈ܳܐ ܠܡܶܫܬܳܐ.
6 ܘܶܐܬܰܘ ܡܽܘܫܶܐ ܘܰܐܗܪܽܘܢ ܡܶܢ ܩܕܳܡ ܟܢܽܘܫܬܳܐ. ܠܬܰܪܥܳܐ ܕܡܰܫܟܰܢܙܰܒܢܳܐ. ܘܰܢܦܰܠܘ ܥܰܠ ܐܰܦܰܝ̈ܗܽܘܢ. ܘܶܐܬܓܠܺܝ ܥܠܰܝܗܽܘܢ ܫܽܘܒܚܶܗ ܕܡܳܪܝܳܐ.
7 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.
8 ܣܰܒ ܠܳܟ ܫܰܒܛܳܐ. ܘܰܟܢܽܘܫ ܟܢܽܘܫܬܳܐ ܐܰܢ̱ܬ ܘܰܐܗܪܽܘܢ ܐܰܚܽܘܟ. ܘܡܰܠܶܠ ܥܰܠ ܟܺܐܦܳܐ ܠܥܺܢܰܝ̈ܗܽܘܢ. ܘܬܶܬܶܠ ܡܶܝ̈ܗ̇. ܘܰܐܦܶܩ ܠܗܽܘܢ ܡܰܝ̈ܳܐ ܡܶܢ ܟܺܐܦܳܐ. ܘܰܐܫܩܳܗ̇ ܠܰܟܢܽܘܫܬܳܐ ܘܠܰܒܥܺܝܪܗܽܘܢ.
9 ܘܰܢ̣ܣܰܒ ܡܽܘܫܶܐ ܫܰܒܛܳܐ ܡܶܢ ܩܕܳܡ ܡܳܪܝܳܐ ܐܰܝܟ ܕܦܰܩܕܶܗ.
10 ܘܟ̣ܰܢܶܫܘ ܡܽܘܫܶܐ ܘܰܐܗܪܽܘܢ ܠܟܽܠܳܗ̇ ܟܢܽܘܫܬܳܐ ܠܘܳܬ ܟܺܐܦܳܐ. ܘܶܐܡܰܪ ܠܗܽܘܢ. ܫܡ̣ܰܥܘ ܗܳܫܳܐ ܡܡܰܪܡܖ̈ܳܢܶܐ. ܡܶܢ ܗܳܕܶܐ ܟܺܐܦܳܐ ܢܳܦܶܩ ܠܟܽܘܢ ܡܰܝ̈ܳܐ.
11 ܘܰܐܪܺܝܡ ܡܽܘܫܶܐ ܐܺܝܕܶܗ. ܘܰܡܚܳܗ̇ ܠܟܺܐܦܳܐ ܒܫܰܒܛܶܗ ܬܰܪܬܶܝܢ ܙܰܒܢܺܝ̈ܢ. ܘܰܢܦܰܩܘ ܡܰܝ̈ܳܐ ܣܰܓܺܝ̈ܐܶܐ. ܘܶܐܫܬܺܝܘ ܥܰܡܳܐ ܟܽܠܶܗ. ܘܰܒܥܺܝܪܗܽܘܢ.
12 ܘܶܐܡܰܪ ܡܳܪܝܳܐ ܠܡܽܘܫܶܐ ܘܠܰܐܗܪܽܘܢ. ܥܰܠ ܕܠܳܐ ܗܰܝܡܶܢܬܽܘܢ ܒܺܝ ܠܰܡܩܰܕܳܫܽܘܬܰܢܝ ܩܕܳܡ ܒܢܰܝ̈ ܝܺܣܪܳܐܶܝܠ. ܡܶܛܽܠ ܗܳܢܳܐ ܠܳܐ ܬܰܥܠܽܘܢܳܗ̇ ܠܰܟܢܽܘܫܬܳܐ ܗܳܕܶܐ ܠܰܐܪܥܳܐ ܕܝܶܗܒܶܬ ܠܗܽܘܢ.
13 ܗܳܠܶܝܢ ܐܶܢܽܘܢ ܡܰܝ̈ܳܐ ܕܡܰܨܽܘܬܳܐ. ܕܰܢܨܰܘ ܒܢܰܝ̈ ܝܺܣܪܳܐܶܝܠ ܩܕܳܡ ܡܳܪܝܳܐ. ܘܶܐܬܩܰܕܰܫ ܒܗܽܘܢ.
14 ܘܫܰܕܰܪ ܡܽܘܫܶܐ ܐܺܝܙ̈ܓܰܕܶܐ ܡܶܢ ܪܩܶܡ ܠܘܳܬ ܡܰܠܟܳܐ ܕܰܐܕܽܘܡ. ܗܳܟܰܢܳܐ ܐܳܡܰܪ ܐܰܚܽܘܟ ܝܺܣܪܳܐܶܝܠ. ܐܰܢ̱ܬ ܝܳܕܰܥ ܐܰܢ̱ܬ ܟܽܠܳܗ̇ ܠܶܐܘܬܳܐ ܕܰܐܕܪܶܟܬܰܢ.
15 ܘܰܢܚܶܬܘ ܐܰܒܳܗܰܝ̈ܢ ܠܡܶܨܪܶܝܢ. ܘܺܝܬܒܢ ܒܡܶܨܪܶܝܢ ܝܰܘ̈ܡܳܬܳܐ ܣܰܓܺܝ̈ܐܶܐ. ܘܰܐܒܐܶܫܘ ܠܰܢ ܡܶܨܖ̈ܳܝܶܐ. ܘܠܰܐܒܳܗܰܝ̈ܢ.
16 ܘܨܰܠܺܝܢ ܩܕܳܡ ܡܳܪܝܳܐ ܘܰܫܡܰܥ ܒܩܳܠܰܢ. ܘܫܰܕܰܪ ܡܰܠܰܐܟܳܐ ܘܰܐܦܩܰܢ ܡܶܢ ܡܶܨܪܶܝܢ. ܘܗܳܐ ܚܢܰܢ ܒܰܪܩܶܡ ܩܪܺܝܬܳܐ ܕܰܒܣܽܘܦ ܬܚܽܘܡܳܟ.
17 ܗܳܫܳܐ ܢܶܥܒܰܪ ܒܰܐܪܥܳܟ. ܠܳܐ ܢܶܥܒܰܪ ܒܚܰܩܠܳܐ ܘܰܒܟܰܪܡܳܐ. ܘܠܳܐ ܢܶܫܬܶܐ ܡܶܢ ܡܰܝ̈ܳܐ ܕܓܽܘ̈ܒܶܐ. ܐܶܠܳܐ ܒܽܐܘܪܚ ܡܰܠܟܳܐ ܢܺܐܙܰܠ. ܘܠܳܐ ܢܶܣܛܶܐ ܠܳܐ ܠܝܰܡܺܝܢܳܐ ܘܠܳܐ ܠܣܶܡܳܠܳܐ. ܥܕܰܡܳܐ ܕܢܶܥܒܰܪ ܬܚܽܘܡܳܟ.
18 ܘܶܐܡܰܪ ܠܶܗ ܐܰܕܽܘܡ. ܠܳܐ ܬܶܥܒܰܪ ܒܰܬܚܽܘܡܝ. ܕܠܳܐ ܒܚܰܪܒܳܐ ܐܶܦܽܘܩ ܠܽܐܘܪܥܳܟ.
19 ܘܶܐܡܰܪܘ ܠܶܗ ܒܢܰܝ̈ ܝܺܣܪܳܐܶܝܠ ܒܰܫܒܺܝܠܳܐ ܢܶܣܰܩ. ܘܶܐܢ ܡܶܢ ܡܰܝ̈ܟ ܢܶܫܬܶܐ ܚܢܰܢ ܘܰܒܥܺܝܪܰܢ. ܢܶܬܶܠ ܕܡܰܝ̈ܗܽܘܢ. ܒܰܠܚܽܘܕ ܒܖ̈ܶܓܠܰܝܢ ܢܶܥܒܰܪ.
20 ܘܶܐܡܰܪ ܠܗܽܘܢ ܐܰܕܽܘܡ. ܠܳܐ ܬܶܥܒܪܽܘܢ. ܘܰܢܦܰܩ ܐܰܕܽܘܡ ܠܽܐܘܪܥܗܽܘܢ ܒܥܰܡܳܐ ܥܰܫܺܝܢܳܐ. ܘܒܺܐܝܕܳܐ ܬܰܩܺܝܦܬܳܐ.
21 ܘܠܳܐ ܨܒ̣ܳܐ ܐܰܕܽܘܡ ܠܡܶܫܒܰܩ ܠܰܒܢܰܝ̈ ܝܺܣܪܳܐܶܝܠ ܠܡܶܥܒܰܪ ܒܰܬܚܽܘܡܶܗ. ܘܰܣܛܳܐ ܠܶܗ ܝܺܣܪܳܐܶܝܠ ܡܶܢܶܗ.
22 ܘܰܫܩܰܠܘ ܡܶܢ ܪܩܶܡ. ܘܶܐܬܰܘ ܒܢܰܝ̈ ܝܺܣܪܳܐܶܝܠ ܟܽܠܳܗ ܟܢܽܘܫܬܳܐ ܠܗܽܘܪ ܛܽܘܪܳܐ.
23 ܡܰܦܩܳܢܶܗ ܕܰܐܗܪܽܘܢ: ܘܶܐܡܰܪ ܡܳܪܝܳܐ ܠܡܽܘܫܶܐ ܘܠܰܐܗܪܽܘܢ ܒܗܽܘܪ ܛܽܘܪܳܐ. ܒܰܬܚܽܘܡܳܐ ܕܰܐܪܥܳܐ ܕܰܐܕܽܘܡ.
24 ܢܶܬܟܢܶܫ ܐܰܗܪܽܘܢ ܠܘܳܬ ܥܰܡܶܗ. ܡܶܛܽܠ ܕܠܳܐ ܢܶܥܽܘܠ ܠܰܐܪܥܳܐ ܕܝܶܗܒܶܬ ܠܰܒܢܰܝ̈ ܝܺܣܪܳܐܶܝܠ. ܥܰܠ ܕܡܰܪܡܰܪܬܽܘܢ ܡܶܠܰܬ ܦܽܘܡܝ ܒܡܰܝ̈ܳܐ ܕܡܰܨܽܘܬܳܐ. ܘܠܳܐ ܩܰܕܶܫܬܽܘܢܳܢܝ ܒܡܰܝ̈ܳܐ ܠܥܺܝ̈ܢܝܰܗܽܘܢ.
25 ܕܒܰܪ ܠܰܐܗܪܽܘܢ ܘܠܶܐܠܺܝܥܳܙܳܪ ܒܪܶܗ. ܘܰܐܣܶܩ ܐܶܢܽܘܢ ܠܗܽܘܪ ܛܽܘܪܳܐ.
26 ܘܰܐܫܠܰܚ ܠܰܐܗܪܽܘܢ ܢܰܚܬܰܘ̈ܗܝ. ܘܰܐܠܒܶܫ ܐܶܢܽܘܢ ܠܶܐܠܺܝܥܳܙܳܪ ܒܪܶܗ. ܘܰܐܗܪܽܘܢ ܢܶܬܟܢܶܫ ܘܰܢܡܽܘܬ ܬܰܡܳܢ.
27 ܘܰܥܒܰܕ ܡܽܘܫܶܐ ܐܰܝܟ ܕܦܰܩܕܶܗ ܡܳܪܝܳܐ. ܘܰܣܠܶܩܘ ܠܗܽܘܪ ܛܽܘܪܳܐ ܠܥܺܝܢ ܟܽܠܳܗ ܟܢܽܘܫܬܳܐ.
28 ܘܰܐܫܠܰܚ ܡܽܘܫܶܐ ܠܰܐܗܪܽܘܢ ܢܰܚܬܰܘ̈ܗܝ. ܘܰܐܠܒܶܫ ܐܶܢܽܘܢ ܠܶܐܠܺܝܥܳܙܳܪ ܒܪܶܗ. ܘܡܺܝܬ ܬܰܡܳܢ ܐܰܗܪܽܘܢ ܒܗܽܘܪ ܛܽܘܪܳܐ. ܘܰܢܚܶܬܘ ܡܽܘܫܶܐ ܘܶܐܠܺܝܥܳܙܳܪ ܡܶܢ ܛܽܘܪܳܐ.
29 ܘܰܚܙܰܘ ܟܽܠܳܗ ܟܢܽܘܫܬܳܐ ܕܡܺܝܬ ܐܰܗܪܽܘܢ. ܘܰܒܟܰܘ ܥܰܠ ܐܰܗܪܽܘܢ ܬܠܳܬܺܝܢ ܝܰܘܡܺܝ̈ܢ. ܟܽܠܗܽܘܢ ܕܒܶܝܬ ܝܺܣܪܳܐܶܝܠ.