Numbers 25
The Book of Numbers
܀ ܡܢܝܢܐ ܟܗ ܀
1 ܘܺܝܬܶܒ ܝܺܣܪܳܐܶܝܠ ܒܣܳܛܺܝܡ. ܘܫܰܪܺܝ ܥܰܡܳܐ ܠܰܡܙܰܢܳܝܽܘ ܒܰܒ̈ܢܳܬ ܡܽܘܐܳܒ.
2 ܘܰܩܖ̈ܰܝ ܠܥܰܡܳܐ ܠܕܶܒܚ̈ܶܐ ܕܰܐܠܳܗܰܝ̈ܗܶܝܢ. ܘܶܐܟܰܠܘ ܥܰܡܳܐ ܘܰܣܓܶܕܘ ܠܰܐܠܳܗܰܝ̈ܗܶܝܢ.
3 ܘܶܐܫܬܰܡܠܺܝ ܝܺܣܪܳܐܶܝܠ ܒܰܒܥܶܠ ܦܥܽܘܪ. ܘܶܐܬܚܰܡܰܬ ܪܽܘܓܙܶܗ ܕܡܳܪܝܳܐ ܥܰܠ ܒܢܰܝ̈ ܝܺܣܪܳܐܶܝܠ.
4 ܘܶܐܡܰܪ ܡܳܪܝܳܐ ܠܡܽܘܫܶܐ. ܕܒܰܪ ܠܟܽܠܗܽܘܢ ܖ̈ܺܝܫܶܐ ܕܥܰܡܳܐ. ܘܦܰܪܣܳܐ ܐܶܢܽܘܢ ܩܕܳܡ ܡܳܪܝܳܐ ܠܽܘܩܒܰܠ ܫܶܡܫܳܐ. ܘܬܶܗܦܽܘܟ ܚܶܡܬܳܐ ܕܪܽܘܓܙܝ ܡܶܢ ܒܢܰܝ̈ ܝܺܣܪܳܐܶܝܠ.
5 ܘܶܐܡܰܪ ܡܽܘܫܶܐ ܠܕܰܝܳܢ̈ܶܐ ܕܺܝܣܪܳܐܶܝܠ. ܩܛܽܘܠܘ ܐ̱ܢܳܫ ܓܰܒܖ̈ܰܘܗܝ ܐܰܝܠܶܝܢ ܕܶܐܫܬܰܡܠܺܝܘ ܒܰܒܥܶܠ ܦܥܽܘܪ.
6 ܘܗܳܐ ܓܰܒܪܳܐ ܡܶܢ ܒܢܰܝ̈ ܝܺܣܪܳܐܶܝܠ. ܐܶܬܳܐ ܘܰܩܪܶܒ ܩܕܳܡ ܐܰܚܰܘ̈ܗܝ. ܘܥܰܠ ܥ̣ܰܠ ܡܶܕܝܰܢܳܝܬܳܐ. ܠܥܺܝܢ ܡܽܘܫܶܐ. ܘܰܠܥܺܝܢ ܟܽܠܳܗ̇ ܟܢܽܘܫܬܳܐ ܕܰܒܢܰܝ̈ ܝܺܣܪܳܐܶܝܠ. ܘܗܶܢܽܘܢ ܒܳܟܶܝܢ ܗܘܰܘ ܒܬܰܪܥܳܐ ܕܡܰܫܟܰܢܙܰܒܢܳܐ.
7 ܘܰܚܙܳܝܗܝ ܦܺܝܢܚܶܣ ܒܰܪ ܐܶܠܺܝܥܳܙܳܪ ܒܰܪ ܐܰܗܪܽܘܢ ܟܳܗܢܳܐ. ܘܩܳܡ ܡܶܢ ܓܰܘ ܟܢܽܘܫܬܳܐ. ܘܰܢܣܰܒ ܪܽܘܡܚܳܐ ܒܺܐܝܕܶܗ.
8 ܘܥܰܠ ܒܳܬܰܪ ܓܰܒܪܳܐ ܒܰܪ ܝܺܣܪܳܐܶܝܠ ܠܩܶܠܳܝܬܳܐ. ܘܰܕܩܰܪ ܐܶܢܽܘܢ ܠܰܬܖ̈ܰܝܗܽܘܢ. ܠܓܰܒܪܳܐ ܒܰܪ ܝܺܣܪܳܐܶܝܠ ܘܠܰܐܢ̱ܬܬܳܐ ܒܟܰܪܣܳܗ̇ ܒܩܶܠܳܝܬܳܐ. ܘܶܐܬܟܠܺܝ ܡܰܘܬܳܢܳܐ ܕܡܶܢ ܫܶܠܝܳܐ ܡܶܢ ܝܺܣܪܳܐܶܝܠ.
9 ܘܰܗܘܰܘ ܕܡܺܝܬܘ ܒܡܰܘܬܳܢܳܐ ܕܡܶܢ ܫܶܠܝܳܐ. ܥܶܣܪܺܝܢ ܘܰܐܪܒܥܳܐ ܐܰܠܦܺܝ̈ܢ.
10 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.
11 ܦܺܝܢܚܶܣ ܒܰܪ ܐܶܠܺܝܥܳܙܳܪ ܒܰܪ ܐܰܗܪܽܘܢ ܟܳܗܢܳܐ ܐܰܗܦܶܟ ܚܶܡܬܝ ܡܶܢ ܒܢܰܝ̈ ܝܺܣܪܳܐܶܝܠ. ܘܛܰܢ ܛܢܳܢܝ ܒܰܝܢܳܬܗܽܘܢ. ܘܠܳܐ ܐܰܘܒܕܶܬ ܠܰܒܢܰܝ̈ ܝܺܣܪܳܐܶܝܠ ܒܰܛܢܳܢܝ.
12 ܡܶܛܽܠ ܗܳܢܳܐ ܐܶܡ̇ܪܶܬ. ܕܗܳܐ ܝܳܗܶܒ ܐ̱ܢܳܐ ܠܶܗ ܩܝܳܡܳܐ ܕܰܫܠܳܡܳܐ.
13 ܘܢܶܗܘܶܐ ܠܶܗ. ܘܠܰܒܢܰܘ̈ܗܝ ܡܶܢ ܒܳܬܪܶܗ. ܩܝܳܡܳܐ ܕܟܳܗܢܽܘܬܳܐ ܠܥܳܠܰܡ. ܚܠܳܦ ܕܛܰܢ ܒܰܐܠܳܗܶܗ. ܘܚܰܣܺܝ ܥܰܠ ܒܢܰܝ̈ ܝܺܣܪܳܐܶܝܠ.
14 ܘܰܫܡܶܗ ܕܓܰܒܪܳܐ ܒܰܪ ܝܺܣܪܳܐܶܝܠ ܩܛܺܝܠܳܐ. ܕܶܐܬܩܛܶܠ ܥܰܡ ܡܶܕܝܰܢܳܝܬܳܐ. ܙܰܡܪܺܝ ܒܰܪ ܣܰܠܽܘ. ܪܺܝܫ ܒܶܝܬ ܐܰܒܳܗ̈ܶܐ ܕܫܰܒܛܳܐ ܕܫܶܡܥܽܘܢ.
15 ܘܰܫܡܳܗ̇ ܕܰܐܢ̱ܬܬܳܐ ܡܶܕܝܰܢܳܝܬܳܐ. ܟܽܘܣܒܺܝ ܒܰܪܬ ܨܽܘܪ. ܪܺܝܫ ܐܽܘܡܬܳܐ ܕܒܶܝܬ ܐܰܒܳܗܶܝ̈ܗ̇ ܒܡܶܕܝܰܢ ܗܽܘܝܽܘ ܗܘܳܐ.
16 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.
17 ܐܰܥܺܝܩ ܠܡܶܕܝܰܢܳܝ̈ܶܐ. ܘܰܚܪܽܘܒ ܐܶܢܽܘܢ.
18 ܡܶܛܽܠ ܕܰܡܥܺܝܩܺܝܢ ܠܟܽܘܢ. ܒܢܶܟܠܗܽܘܢ ܕܶܐܬܢܟܶܠܘ ܥܠܰܝܟܽܘܢ ܒܰܨܒܽܘܬܳܐ ܕܰܦܥܽܘܪ. ܘܒܰܨܒܽܘܬܳܐ ܕܟܽܘܣܒܺܝ ܒܰܪܬ ܪܺܝܫܐ ܕܡܶܕܝܰܢ ܚܳܬܗܽܘܢ. ܕܶܐܬܩܰܛܠܰܬ ܒܝܰܘܡܳܐ ܕܰܡܚܽܘܬܳܐ ܕܡܶܢ ܫܶܠܝܳܐ ܒܰܨܒܽܘܬܳܐ ܕܰܦܥܽܘܪ.