Numbers 13
The Book of Numbers
܀ ܡܢܝܢܐ ܝܓ ܀
1 ܘܗܳܝܕܶܝܢ ܫܩܰܠܘ ܥܰܡܳܐ ܡܶܢ ܚܶܨܪܽܘܬ. ܘܰܫܪܰܘ ܒܡܰܕܒܪܳܐ ܕܦܳܪܳܢ.
2 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.
3 ܫܰܕܰܪ ܓܰܒܖ̈ܶܐ ܕܢܶܓܫܽܘܢ ܐܰܪܥܳܐ ܕܰܟܢܰܥܢ. ܕܝܳܗܶܒ ܐ̱ܢܳܐ ܠܰܒܢܰܝ̈ ܝܺܣܪܳܐܶܝܠ. ܚܰܕ ܚܰܕ ܓܰܒܪܳܐ ܡܶܢ ܫܰܒܛܳܐ ܕܰܐܒܳܗܰܘ̈ܗܝ ܫܰܕܰܪ. ܟܽܠ ܪܺܝܫܐ ܕܺܐܝܬ ܒܗܽܘܢ.
4 ܘܫܰܕܰܪ ܐܶܢܽܘܢ ܡܽܘܫܶܐ ܡܶܢ ܡܰܕܒܪܳܐ ܕܦܳܪܳܢ. ܒܡܶܠܰܬ ܦܽܘܡܶܗ ܕܡܳܪܝܳܐ. ܟܽܠܗܽܘܢ ܓܰܒܖ̈ܶܐ ܖ̈ܺܝܫܶܐ ܐܶܢܽܘܢ ܕܺܝܣܪܳܐܶܝܠ.
5 ܘܗܳܠܶܝܢ ܫܡܳܗܰܝ̈ܗܽܘܢ. ܡܶܢ ܫܰܒܛܳܐ ܕܪܽܘܒܺܝܠ. ܫܳܡܽܘܥ ܒܰܪ ܙܰܟܽܘܪ.
6 ܡܶܢ ܫܰܒܛܳܐ ܕܫܶܡܥܽܘܢ. ܫܳܦܳܛ ܒܰܪ ܚܰܕܺܝ.
7 ܡܶܢ ܫܰܒܛܳܐ ܕܺܝܺܗܽܘܕܳܐ. ܟܳܠܳܒ ܒܰܪ ܝܽܘܦܢܳܐ.
8 ܡܶܢ ܫܰܒܛܳܐ ܕܺܐܝܣܳܟܳܪ. ܢܳܓܳܐܶܝܠ ܒܰܪ ܝܰܘܣܶܦ.
9 ܡܶܢ ܫܰܒܛܳܐ ܕܰܐܦܪܶܝܡ. ܗܽܘܫܳܥ ܒܰܪܢܽܘܢ.
10 ܡܶܢ ܫܰܒܛܳܐ ܕܒܶܢܝܳܡܶܝܢ. ܦܰܠܛܺܝ ܒܰܪ ܕܰܦܽܘ.
11 ܡܶܢ ܫܰܒܛܳܐ ܕܰܙܒܳܘܠܽܘܢ. ܓܰܕܝܳܐܶܝܠ ܒܰܪ ܣܽܘܪܺܝ.
12 ܡܶܢ ܫܰܒܛܳܐ ܕܝܰܘܣܶܦ. ܡܶܢ ܫܰܒܛܳܐ ܕܰܡܢܰܫܶܐ. ܓܰܕܺܝ ܒܰܪ ܣܽܘܣܺܝ.
13 ܡܶܢ ܫܰܒܛܳܐ ܕܕܳܢ. ܓܰܡܰܠܺܝܐܶܝܠ ܒܰܪ ܓܰܡܠܺܝ.
14 ܡܶܢ ܫܰܒܛܳܐ ܕܳܐܫܺܝܪ. ܣܳܬܽܘܪ ܒܰܪ ܡܰܠܟܺܝܠ.
15 ܡܶܢ ܫܰܒܛܳܐ ܕܢܰܦܬܳܠܺܝ. ܢܰܚܒܺܝ ܒܰܪ ܘܰܦܣܺܝ.
16 ܡܶܢ ܫܰܒܛܳܐ ܕܓܳܕ. ܓܽܘܐܶܝܠ ܒܰܪ ܡܰܟܺܝܪ.
17 ܗܳܠܶܝܢ ܫܡܳܗ̈ܶܐ ܕܓܰܒܖ̈ܶܐ ܕܫܰܕܰܪ ܡܽܘܫܶܐ ܠܡܶܓܰܫ ܐܰܪܥܳܐ. ܘܰܩܪܳܐ ܡܽܘܫܶܐ ܠܗܽܘܫܳܥ ܒܰܪܢܽܘܢ ܝܶܫܽܘܥ.
18 ܘܫܰܕܰܪ ܐܶܢܽܘܢ ܡܽܘܫܶܐ ܠܡܶܓܰܫ ܐܰܪܥܳܐ ܕܰܟܢܰܥܢ. ܘܶܐܡܰܪ ܠܗܽܘܢ. ܣܰܩܘ ܗܳܟܰܢܳܐ ܠܬܰܝܡܢܳܐ. ܘܣܰܩܘ ܠܛܽܘܪܳܐ.
19 ܘܰܚܙܰܘ ܠܰܐܪܥܳܐ ܡܳܢܳܐ ܗ̱ܝ. ܘܰܠܥܰܡܳܐ ܕܝܳܬܒܺܝܢ ܒܳܗ̇. ܐܶܢ ܥܰܫܺܝܢ ܗܽܘ ܐܰܘ ܚܰܠܳܫ. ܐܰܘ ܙܥܽܘܪ ܗܽܘ ܐܰܘ ܣܰܓܺܝ.
20 ܘܡܳܢܳܐ ܗ̱ܝ ܐܰܪܥܳܐ ܕܝܳܬܒܺܝܢ ܒܳܗ̇. ܐܶܢ ܫܰܡܺܝܢܳܐ ܗ̱ܝ. ܐܰܘ ܐܺܝܬ ܒܳܗ̇ ܐܺܝ̈ܠܳܢܶܐ ܐܰܘ ܠܳܐ.
21 ܘܶܐܬܚܰܝܰܠܘ ܘܣܰܒܘ ܡܶܢ ܦܺܐܖ̈ܶܐ ܕܰܐܪܥܳܐ. ܘܝܰܘ̈ܡܳܬܳܐ ܝܰܘ̈ܡܰܝ ܒܰܟܳܖ̈ܶܐ ܕܥܶܢ̈ܒܶܐ.
22 ܘܰܣܠܶܩܘ ܘܓܰܫܽܘܗ̇ ܠܰܐܪܥܳܐ ܡܶܢ ܡܰܕܒܪܳܐ ܕܨܺܝܢ. ܘܰܥܕܰܡܳܐ ܠܪܳܚܽܘܒ ܕܰܒܡܰܥܠܳܢܳܐ ܕܰܚܡܳܬ.
23 ܘܰܣܠܶܩܘ ܠܬܰܝܡܢܳܐ. ܘܶܐܬܰܘ ܥܕܰܡܳܐ ܠܚܶܒܪܽܘܢ. ܘܬܰܡܳܢ ܗܘܰܘ ܐܰܚܺܝܡܳܢ. ܘܫܺܝܫܰܝ. ܘܬܽܘܠܡܰܝ ܒܢܰܝ̈ ܓܰܢ̱ܒܳܖ̈ܶܐ. ܘܚܶܒܪܽܘܢ ܫܒܰܥ ܫܢܺܝ̈ܢ ܐܶܬܒܰܢܝܰܬ ܩܕܳܡ ܨܳܥܳܢ ܕܰܒܡܶܨܪܶܝܢ.
24 ܘܶܐܬܘ ܥܕܰܡܳܐ ܠܢܰܚܠܳܐ ܕܰܣܓܽܘܠܳܐ. ܘܰܦܣܰܩܘ ܡܶܢ ܬܰܡܳܢ ܫܰܒܽܘܩܳܐ. ܘܰܣܓܽܘܠܳܐ ܚܰܕ ܕܥܶܢ̈ܒܶܐ. ܘܫܰܩܠܽܘܗܝ ܒܩܽܘܦܳܐ ܒܶܝܬ ܬܪܶܝܢ. ܘܡܶܢ ܖ̈ܽܘܡܳܢܶܐ ܘܡܶܢ ܬܺܐܢ̈ܶܐ.
25 ܘܠܰܐܬܪܳܐ ܗܰܘ ܩܪܰܘ ܢܰܚܠܳܐ ܕܰܣܓܽܘܠܳܐ. ܡܶܛܽܠ ܣܓܽܘܠܳܐ ܕܰܩܛܰܦܘ ܡܶܢ ܬܰܡܳܢ ܒܢܰܝ̈ ܝܺܣܪܳܐܶܝܠ.
26 ܘܰܗܦܰܟܘ ܡܶܢ ܓܶܫܬܳܗ̇ ܕܰܐܪܥܳܐ ܒܳܬܰܪ ܐܰܪܒܥܺܝܢ ܝܰܘܡܺܝ̈ܢ.
27 ܘܶܐܬܰܘ ܠܘܳܬ ܡܽܘܫܶܐ. ܘܰܠܘܳܬ ܐܰܗܪܽܘܢ. ܘܰܠܘܳܬ ܟܽܠܳܗ̇ ܟܢܽܘܫܬܳܐ ܕܰܒܢܰܝ̈ ܝܺܣܪܳܐܶܝܠ. ܠܡܰܕܒܪܳܐ ܕܦܳܪܳܢ ܠܰܪܩܶܡ. ܘܰܐܬܺܝܒܽܘܗܝ ܦܶܬܓܳܡܳܐ ܠܶܗ ܘܰܠܟܽܠܳܗ̇ ܟܢܽܘܫܬܳܐ. ܘܚܰܘܺܝܘ ܐܶܢܽܘܢ ܦܺܐܖ̈ܶܐ ܕܰܐܪܥܳܐ.
28 ܘܶܐܫܬܰܥܺܝܘ ܠܶܗ. ܘܶܐܡܰܪܘ. ܐܶܙܰܠܢ ܠܰܐܪܥܳܐ ܕܫܰܕܰܪܬܳܢ. ܘܡܰܪܕܝܳܐ ܚܰܠܒܳܐ ܘܕܶܒܫܳܐ. ܘܗܳܠܶܝܢ ܦܺܐܖ̈ܶܝܗ̇.
29 ܒܪܰܡ ܕܶܝܢ ܥܰܫܺܝܢ ܥܰܡܳܐ ܕܝܳܬܒܺܝܢ ܒܰܐܪܥܳܐ. ܘܩܽܘܖ̈ܝܳܐ ܥܰܫ̈ܺܝܢܳܢ ܘܛܳܒ ܪܰܘܖ̈ܒܳܢ. ܘܳܐܦ ܒܢܰܝ̈ ܓܰܢ̱ܒܳܖ̈ܶܐ ܚ̣ܙܰܝܢ ܬܰܡܳܢ.
30 ܥܡܳܠܺܝܩ ܝܳܬܶܒ ܒܰܐܪܥܳܐ ܕܬܰܝܡܢܳܐ. ܘܚܺܝ̈ܬܳܝܶܐ. ܘܝܰܒܽܘܣܳܝ̈ܶܐ. ܘܳܐܡܽܘܖ̈ܳܝܶܐ. ܝܳܬܒܺܝܢ ܒܛܽܘܪܳܐ. ܘܰܟܢܰܥܢܳܝ̈ܶܐ ܝܳܬܒܺܝܢ ܥܰܠ ܝܰܕ ܝܰܡܳܐ. ܘܥܰܠ ܝܰܕ ܝܽܘܪܕܢܳܢ.
31 ܘܫܰܬܶܩ ܟܳܠܳܒ ܥܰܡܳܐ ܡܶܢ ܡܽܘܫܶܐ. ܘܶܐܡܰܪ. ܡܶܣܰܩ ܢܶܣܰܩ. ܘܢܺܐܪܬܺܝܗ̇. ܡܶܛܽܠ ܕܰܡܨܶܝܢ ܚܢܰܢ ܚܰܝܠܳܗ̇.
32 ܘܓܰܒܖ̈ܶܐ ܕܰܣܠܶܩܘ ܥܰܡܶܗ ܐܳܡܪܺܝܢ. ܠܳܐ ܡܶܫܟܚܺܝܢܰܢ ܠܡܶܣܰܩ ܥܰܠ ܥܰܡܳܐ. ܡܶܛܽܠ ܕܥܰܫܺܝܢ ܗܽܘ ܡܶܢܰܢ.
33 ܘܰܐܦܶܩܘ ܛܶܒܳܗ̇ ܕܰܐܪܥܳܐ ܗܳܢܽܘܢ ܕܓܰܫܽܘܗ̇ ܠܰܒܢܰܝ̈ ܝܺܣܪܳܐܶܝܠ. ܘܶܐܡܰܪܘ ܠܗܽܘܢ. ܐܰܪܥܳܐ ܕܰܥܒܰܪܢ ܒܳܗ̇ ܘܓܰܫܢܳܗ̇. ܐܰܪܥܳܐ ܐܳܟܠܰܬ ܥܳܡܽܘܖ̈ܶܝܗ̇ ܗܺܝ. ܘܟܽܠ ܥܰܡܳܐ ܕܰܚܙܰܝܢ ܒܓܰܘܳܗ̇. ܓܰܒܖ̈ܶܐ ܐܶܢܽܘܢ ܕܰܡܫܽܘܚܬܳܐ.
34 ܘܬܰܡܳܢ ܚܙܰܝܢ ܓܰܢ̱ܒܳܖ̈ܶܐ. ܒܢܰܝ̈ ܓܰܢ̱ܒܳܖ̈ܶܐ. ܕܡܶܢ ܓܰܢ̱ܒܳܖ̈ܶܐ. ܘܰܗܘܰܝܢ ܒܥܰܝܢܰܝ̈ܗܽܘܢ ܐܰܝܟ ܩܰܡ̈ܨܶܐ. ܗܳܟܰܢܳܐ ܗܘܰܝܢ ܒܥܰܝܢܰܝ̈ܗܽܘܢ.