Numbers 32
The Book of Numbers
܀ ܡܢܝܢܐ ܠܒ ܀
1 ܘܩܶܢܝܳܢܳܐ ܪܰܒܳܐ ܗܘܳܐ ܠܰܒܢܰܝ̈ ܪܽܘܒܺܝܠ. ܘܠܰܒܢܰܝ̈ ܓܳܕ. ܕܛܳܒ ܥܰܫܺܝܢ. ܘܰܚܙܰܐܗ̇ ܠܝܰܥܙܺܝܪ. ܘܠܰܐܪܥܳܐ ܕܓܶܠܥܳܕ. ܐܰܬܪܳܐ ܕܳܐܙܶܠ ܠܒܶܝܬ ܩܶܢܝܳܢܳܐ.
2 ܘܶܐܬܰܘ ܒܢܰܝ̈ ܪܽܘܒܺܝܠ. ܘܰܒܢܰܝ̈ ܓܳܕ. ܘܶܐܡܰܪܘ ܠܡܽܘܫܶܐ ܘܠܶܐܠܺܝܥܳܙܳܪ ܟܳܗܢܳܐ. ܘܰܠܪܰܘܖ̈ܒܳܢܶܐ ܕܰܟܢܽܘܫܬܳܐ.
3 ܥܶܛܪܽܘܬ. ܘܪܺܝܒܽܘܢ. ܘܝܰܥܙܺܝܪ. ܘܢܰܡܪܳܐ. ܘܚܶܫܒܽܘܢ. ܘܰܐܠܥܰܠܳܐ. ܘܰܫܒܳܐ. ܘܢܳܒܽܘ. ܘܒܰܥܽܘܢ.
4 ܐܰܪܥܳܐ ܕܰܚܪܶܒ ܡܳܪܝܳܐ ܩܕܳܡ ܒܢܰܝ̈ ܝܺܣܪܳܐܶܝܠ. ܐܰܪܥܳܐ ܗ̱ܝ ܕܳܐܙܠܳܐ ܠܒܶܝܬ ܩܶܢܝܳܢܳܐ. ܘܰܠܥܰܒ̈ܕܰܝܟ ܐܺܝܬ ܩܶܢܝܳܢܳܐ.
5 ܘܶܐܡܰܪܘ. ܐܶܢ ܐܶܫܟܰܚܢ ܖ̈ܰܚܡܶܐ ܩܕܳܡܰܝܟ. ܬܶܬܺܝܗܶܒ ܐܰܪܥܳܐ ܗܳܕܶܐ ܠܥܰܒܕܰܝ̈ܟ ܝܽܘܪܬܳܢܳܐ. ܘܠܳܐ ܬܰܥܒܪܰܢ ܝܽܘܪܕܢܳܢ.
6 ܘܶܐܡܰܪ ܡܽܘܫܶܐ ܠܰܒܢܰܝ̈ ܪܽܘܒܺܝܠ. ܘܠܰܒܢܰܝ̈ ܓܳܕ. ܐܰܚܰܝ̈ܟܽܘܢ ܢܳܦܩܺܝܢ ܠܰܩܪܳܒܳܐ. ܘܰܐܢ̱ܬܽܘܢ ܝܳܬܒܺܝܬܽܘܢ ܗܳܪܟܳܐ.
7 ܠܡܳܢܳܐ ܬܳܒܪܺܝܢ ܐ̱ܢܬܽܘܢ ܠܶܒܳܐ ܕܰܐܚܰܝ̈ܟܽܘܢ ܒܢܰܝ̈ ܝܺܣܪܳܐܶܝܠ ܕܠܳܐ ܢܶܥܒܪܽܘܢ ܠܰܐܪܥܳܐ ܕܝܰܗܒ ܠܗܽܘܢ ܡܳܪܝܳܐ.
8 ܗܳܟܰܢܳܐ ܥܒܰܕܘ ܐܰܒܳܗܰܝ̈ܟܽܘܢ ܟܰܕ ܫܰܕܪܶܬ ܐܶܢܽܘܢ ܡܶܢ ܪܩܶܡ ܕܓܰܐܝܳܐ ܠܡܶܓܰܫ ܐܰܪܥܳܐ.
9 ܘܰܣܠܶܩܘ ܥܕܰܡܳܐ ܠܢܰܚܠܳܐ ܕܰܣܓܽܘܠܳܐ. ܘܰܚܙܰܐܗ̇ ܠܰܐܪܥܳܐ. ܘܰܬܒܰܪܘ ܠܶܒܳܐ ܕܰܒܢܰܝ̈ ܝܺܣܪܳܐܶܝܠ. ܕܠܳܐ ܢܶܥܠܽܘܢ ܠܰܐܪܥܳܐ ܕܝܰܗܒ ܠܗܽܘܢ ܡܳܪܝܳܐ.
10 ܘܶܐܬܚܰܡܰܬ ܪܽܘܓܙܶܗ ܕܡܳܪܝܳܐ ܥܠܰܝܗܽܘܢ ܒܝܰܘܡܳܐ ܗܰܘ. ܘܺܝܡܳܐ. ܘܶܐܡܰܪ.
11 ܕܠܳܐ ܢܶܚܙܽܘܢ ܓܰܒܖ̈ܶܐ ܕܰܣܠܶܩܘ ܡܶܢ ܡܶܨܪܶܝܢ ܡܶܢ ܒܰܪ ܥܶܣܪܺܝܢ ܫܢܺܝ̈ܢ ܘܰܠܥܶܠ ܐܰܪܥܳܐ ܕܺܝܡܺܝܬ ܠܰܐܒܪܳܗܳܡ. ܘܠܺܐܝܣܚܳܩ ܘܰܠܝܰܥܩܽܘܒ. ܡܶܛܽܠ ܕܠܳܐ ܫܰܡܠܺܝܘ ܒܳܬܰܪܝ.
12 ܐܶܠܳܐ ܐܶܢ ܟܳܠܳܒ ܒܰܪ ܝܽܘܦܢܳܐ ܩܰܢܙܳܝܳܐ. ܘܝܶܫܽܘܥ ܒܰܪܢܽܘܢ. ܕܫܰܡܠܺܝܘ ܒܳܬܰܪ ܡܳܪܝܳܐ.
13 ܘܶܐܬܚܰܡܰܬ ܪܽܘܓܙܶܗ ܕܡܳܪܝܳܐ ܥܰܠ ܝܺܣܪܳܐܶܝܠ. ܘܰܐܛܥܺܝ ܐܶܢܽܘܢ ܒܡܰܕܒܪܳܐ ܐܰܪܒܥܺܝܢ ܫܢܺܝ̈ܢ. ܥܕܰܡܳܐ ܕܣܳܦܘ ܟܽܠܶܗ ܕܳܪܳܐ ܕܰܥܒܰܕܘ ܒܺܝܫܬܳܐ ܩܕܳܡ ܡܳܪܝܳܐ.
14 ܘܗܳܐ ܩܳܡܬܽܘܢ ܐܳܦ ܐܰܢ̱ܬܽܘܢ ܝܰܘܡܳܢܳܐ ܚܠܳܦ ܐܰܒܳܗܰܝ̈ܟܽܘܢ ܬܰܪܒܺܝܬܳܐ ܕܓܰܒܖ̈ܶܐ ܚܰܛܳܝ̈ܶܐ. ܕܬܰܘܣܦܽܘܢ ܬܽܘܒ ܪܽܘܓܙܶܗ ܕܡܳܪܝܳܐ ܥܰܠ ܝܺܣܪܳܐܶܝܠ.
15 ܘܶܐܢ ܬܶܗܦܟܽܘܢ ܬܽܘܒ ܡܶܢ ܡܳܪܝܳܐ. ܢܰܘܣܶܦ ܬܽܘܒ ܠܡܰܛܥܳܝܽܘܬܟܽܘܢ ܒܡܰܕܒܪܳܐ. ܘܰܡܚܰܒܠܺܝܢ ܐ̱ܢܬܽܘܢ ܥܰܠ ܗܳܢܳܐ ܟܽܠܶܗ ܥܰܡܳܐ.
16 ܘܰܩܪܶܒܘ ܠܘܳܬܶܗ ܘܶܐܡܰܪܘ. ܛܝܳܖ̈ܶܐ ܕܥܳܢ̈ܳܐ ܢܶܒܢܶܐ ܠܩܶܢܝܳܢܰܢ ܗܳܪܟܳܐ. ܘܩܽܘܖ̈ܝܳܐ ܠܺܝܩܰܪܬܰܢ.
17 ܘܰܚܢܰܢ ܢܶܙܕܰܝܰܢ. ܘܢܺܐܙܰܠ ܩܕܳܡ ܒܢܰܝ̈ ܝܺܣܪܳܐܶܝܠ. ܥܕܰܡܳܐ ܕܢܰܥܶܠ ܐܶܢܽܘܢ ܠܰܐܬܪܗܽܘܢ. ܘܺܝܩܰܪܬܰܢ ܬܶܬܶܒ ܒܩܽܘܖ̈ܝܳܐ ܥܰܫܺܝ̈ܢܳܬܳܐ ܡܶܢ ܩܕܳܡ ܥܳܡܽܘܖ̈ܶܝܗ̇ ܕܰܐܪܥܳܐ.
18 ܠܳܐ ܢܶܗܦܽܘܟ ܠܒܳܬܰܝ̈ܢ. ܥܕܰܡܳܐ ܕܢܺܐܪܬܽܘܢ ܒܢܰܝ̈ ܝܺܣܪܳܐܶܝܠ. ܐ̱ܢܳܫ ܝܳܪܬܽܘܬܶܗ.
19 ܘܠܳܐ ܢܺܐܪܰܬ ܥܰܡܗܽܘܢ ܡܶܢ ܥܶܒܪܳܐ ܕܝܽܘܪܕܢܳܢ ܘܰܠܗܰܠ. ܡܶܛܽܠ ܕܩܰܒܶܠܢ ܝܳܪܬܽܘܬܰܢ ܡܶܢ ܥܶܒܪܳܐ ܕܝܽܘܪܕܢܳܢ ܡܶܢ ܡܰܕܢܚܳܐ.
20 ܘܶܐܡܰܪ ܠܗܽܘܢ ܡܽܘܫܶܐ. ܐܶܢ ܥܳܒܕܺܝܬܽܘܢ ܦܶܬܓܳܡܳܐ ܗܳܢܳܐ. ܘܡܶܙܕܰܝܢܺܝܢ ܐ̱ܢܬܽܘܢ ܩܕܳܡ ܡܳܪܝܳܐ ܠܰܩܪܳܒܳܐ.
21 ܘܥܳܒܪܺܝܢ ܐ̱ܢܬܽܘܢ ܝܽܘܪܕܢܳܢ ܟܽܠܟܽܘܢ ܟܰܕ ܡܙܰܝܢܺܝܢ ܐ̱ܢܬܽܘܢ ܩܕܳܡ ܡܳܪܝܳܐ ܠܰܩܪܳܒܳܐ. ܥܕܰܡܳܐ ܕܢܰܘܒܶܕ ܒܥܶܠܕܒܳܒܰܘ̈ܗܝ ܡܶܢ ܩܕܳܡܰܘܗܝ.
22 ܘܬܶܬܟܒܶܫ ܐܰܪܥܳܐ ܩܕܳܡ ܡܳܪܝܳܐ. ܗܳܝܕܶܝܢ ܬܶܗܦܟܽܘܢ. ܘܬܶܬܚܰܣܽܘܢ ܡܶܢ ܡܳܪܝܳܐ. ܘܡܶܢ ܝܺܣܪܳܐܶܝܠ. ܘܬܶܗܘܶܐ ܠܟܽܘܢ ܐܰܪܥܳܐ ܗܳܕܶܐ ܠܝܳܪܬܽܘܬܳܐ. ܩܕܳܡ ܡܳܪܝܳܐ.
23 ܘܶܐܢ ܠܳܐ ܥܳܒܕܺܝܬܽܘܢ ܗܳܟܰܢܳܐ. ܚܳܛܶܝܢ ܐ̱ܢܬܽܘܢ ܠܡܳܪܝܳܐ. ܘܕܰܥܘ ܕܰܚܛܳܗܰܝ̈ܟܽܘܢ ܡܰܕܪܟܺܝܢ ܠܟܽܘܢ.
24 ܒܢܰܘ ܠܟܽܘܢ ܩܽܘܖ̈ܝܳܐ ܠܺܝܩܰܪܬܟܽܘܢ. ܘܰܛܝܳܖ̈ܶܐ ܠܥܳܢ̈ܟܽܘܢ. ܘܡܶܕܶܡ ܕܰܢܦܰܩ ܡܶܢ ܦܽܘܡܟܽܘܢ ܥܒܶܕܘ.
25 ܘܶܐܡܰܪܘ ܒܢܰܝ̈ ܪܽܘܒܺܝܠ ܘܰܒܢܰܝ̈ ܓܳܕ ܠܡܽܘܫܶܐ. ܥܰܒܕܰܝ̈ܟ ܢܶܥܒܕܽܘܢ ܐܰܝܟ ܕܡܳܪܰܢ ܦܳܩܰܕ.
26 ܝܺܩܰܪܬܰܢ. ܘܢܶܫܰܝ̈ܢ. ܘܩܶܢܝܳܢܰܢ. ܘܟܽܠܶܗ ܒܥܺܝܪܰܢ. ܢܶܗܘܽܘܢ ܒܩܽܘܖ̈ܝܳܐ ܕܓܶܠܥܳܕ.
27 ܘܥܰܒܕܰܝ̈ܟ ܢܶܥܒܪܽܘܢ ܟܰܕ ܡܙܰܝܢܺܝܢ ܒܚܰܝܠܳܐ ܩܕܳܡ ܡܳܪܝܳܐ ܠܰܩܪܳܒܳܐ ܐܰܝܟ ܕܡܳܪܰܢ ܐܶܡܰܪ.
28 ܘܦܰܩܶܕ ܥܰܠ ܟܽܠܗܽܘܢ ܡܽܘܫܶܐ. ܠܶܐܠܺܝܥܳܙܳܪ ܟܳܗܢܳܐ. ܘܰܠܝܶܫܽܘܥ ܒܰܪܢܽܘܢ. ܘܰܠܖ̈ܺܝܫܶܐ ܕܫܰܒ̈ܛܶܐ ܕܰܐܒܳܗ̈ܶܐ ܕܰܒܢܰܝ̈ ܝܺܣܪܳܐܶܝܠ.
29 ܘܶܐܡܰܪ ܠܗܽܘܢ ܡܽܘܫܶܐ. ܐܶܢ ܥܳܒܪܺܝܢ ܒܢܰܝ̈ ܪܽܘܒܺܝܠ. ܘܰܒܢܰܝ̈ ܓܳܕ ܥܰܡܟܽܘܢ ܝܽܘܪܕܢܳܢ ܟܰܕ ܡܙܰܝܢܺܝܢ ܩܕܳܡ ܡܳܪܝܳܐ ܠܰܩܪܳܒܳܐ. ܘܬܶܬܟܒܶܫ ܐܰܪܥܳܐ ܩܕܳܡܰܝܟܽܘܢ. ܬܶܬܠܽܘܢ ܠܗܽܘܢ ܐܰܪܥܳܐ ܕܓܶܠܥܳܕ ܝܽܘܪܬܳܢܳܐ.
30 ܘܶܐܢ ܠܳܐ ܢܶܥܒܪܽܘܢ ܥܰܡܟܽܘܢ ܟܰܕ ܡܙܰܝܢܺܝܢ. ܢܺܐܪܬܽܘܢ ܥܰܡܟܽܘܢ ܐܰܪܥܳܐ ܕܰܟܢܰܥܢ.
31 ܘܰܥܢܰܘ ܒܢܰܝ̈ ܪܽܘܒܺܝܠ. ܘܰܒܢܰܝ̈ ܓܳܕ. ܘܶܐܡܰܪܘ ܠܡܽܘܫܶܐ. ܐܰܝܟ ܕܶܐܡܰܪ ܡܳܪܝܳܐ ܠܥܰܒܕܰܝ̈ܟ ܗܳܟܰܢܳܐ ܢܶܥܒܶܕ.
32 ܚܢܰܢ ܢܶܥܒܰܪ ܟܰܕ ܡܙܰܝܢܺܝܢ ܚܢܰܢ ܩܕܳܡ ܡܳܪܝܳܐ ܠܰܐܪܥܳܐ ܕܰܟܢܰܥܢ. ܘܕܺܝܠܰܢ ܐܽܘܚܕܳܢܳܐ ܕܝܳܪܬܽܘܬܰܢ ܒܥܶܒܪܳܐ ܕܝܽܘܪܕܢܳܢ.
33 ܘܝܰܗܒ ܠܗܽܘܢ ܡܽܘܫܶܐ ܠܰܒܢܰܝ̈ ܪܽܘܒܺܝܠ. ܘܠܰܒܢܰܝ̈ ܓܳܕ. ܘܰܠܦܶܠܓܶܗ ܕܫܰܒܛܳܐ ܕܰܡܢܰܫܶܐ ܒܰܪ ܝܰܘܣܶܦ. ܡܰܠܟܽܘܬܶܗ ܕܣܺܝܚܽܘܢ ܡܰܠܟܳܐ ܕܰܐܡܽܘܖ̈ܳܝܶܐ. ܘܡܰܠܟܽܘܬܶܗ ܕܥܽܘܓ ܡܰܠܟܳܐ ܕܡܰܬܢܺܝܢ. ܐܰܪܥܳܐ ܟܽܠܳܗ̇. ܘܩܽܘܖ̈ܝܳܗ̇ ܒܰܬܚܽܘܡܶܝ̈ܗ̇. ܘܩܽܘܖ̈ܝܳܐ ܕܰܐܪܥܳܐ ܕܰܚܕܺܝܖ̈ܳܢ ܠܳܗ̇.
34 ܘܰܒܢܰܘ ܒܢܰܝ̈ ܓܳܕ ܠܪܺܝܒܽܘܢ. ܘܰܠܥܰܛܪܽܘܬ. ܘܰܠܥܰܕܽܘܥܺܝܪ.
35 ܘܰܠܥܰܛܪܽܘܬ ܫܽܘܦܳܡ. ܘܰܠܝܰܥܙܺܝܪ. ܘܰܠܝܰܒܓܗܳܐ.
36 ܘܰܠܒܶܝܬ ܢܰܡܪܳܐ. ܘܰܠܒܶܝܬ ܗܳܪܳܢ. ܩܽܘܖ̈ܝܳܐ ܥܰܫܺܝ̈ܢܳܬܳܐ. ܘܰܛܝܳܖ̈ܶܐ ܕܥܳܢ̈ܳܐ.
37 ܘܰܒܢܰܝ̈ ܪܽܘܒܺܝܠ ܒܢܰܘ ܠܚܶܫܒܽܘܢ. ܘܠܰܐܠܥܰܠܳܐ. ܘܰܠܩܽܘܪܝܰܬܺܝܡ.
38 ܘܰܠܢܳܒܽܘ. ܘܠܰܒܥܶܠܡܽܘܢ. ܕܰܢܣܺܝ̈ܒܳܢ ܗܘܰܝ̈ ܫܡܳܐ. ܘܰܠܣܰܒܡܳܐ. ܘܰܩܪܰܘ ܫܡܳܗܰܝ̈ܗܶܝܢ ܥܰܠ ܫܡܳܗ̈ܶܐ ܕܩܽܘܖ̈ܝܳܐ ܕܰܒܢܰܘ.
39 ܘܶܐܙܰܠ ܒܢܰܝ̈ ܡܳܟܺܝܪ ܒܰܪ ܡܢܰܫܶܐ ܠܓܶܠܥܳܕ ܘܟܰܒܫܽܘܗ̇. ܘܰܐܘܒܶܕܘ ܠܳܐܡܽܘܖ̈ܳܝܶܐ ܕܒܳܗ̇.
40 ܘܝܰܗܒܳܗ̇ ܡܽܘܫܶܐ ܠܓܶܠܥܳܕ. ܠܡܳܟܺܝܪ ܒܰܪ ܡܢܰܫܶܐ. ܘܺܝܬܶܒ ܒܳܗ̇.
41 ܘܝܳܐܺܝܪ ܒܰܪ ܡܢܰܫܶܐ. ܐܶܙܰܠ ܘܰܟܒܰܫ ܟܰܦܖ̈ܽܘܢܰܝܗܶܝܢ. ܘܰܩܪܳܐ ܐܶܢܶܝܢ ܟܰܦܖ̈ܽܘܢܶܐ ܕܝܳܐܺܝܪ ܥܕܰܡܳܐ ܠܝܰܘܡܳܢܳܐ.
42 ܘܰܢܟܳܚ ܐܶܙܰܠ ܘܰܟܒܰܫ ܠܩܺܝܬ. ܘܰܠܟܰܦܖ̈ܽܘܢܶܝܗ̇. ܘܰܩܪܳܗ̇ ܒܰܫܡܶܗ ܢܟܳܚ.