Numbers 33
The Book of Numbers
܀ ܡܢܝܢܐ ܠܓ ܀
1 ܘܗܳܠܶܝܢ ܡܰܫܩܠܳܢ̈ܶܐ ܕܰܒܢܰܝ̈ ܝܺܣܪܳܐܶܝܠ ܕܰܢܦܰܩܘ ܡܶܢ ܐܰܪܥܳܐ ܕܡܶܨܪܶܝܢ ܠܚܰܝܠܰܘ̈ܳܬܗܽܘܢ. ܒܺܐܝܕܳܐ ܕܡܽܘܫܶܐ ܘܕܰܐܗܪܽܘܢ.
2 ܘܰܟܬܰܒ ܡܽܘܫܶܐ ܡܰܦܩܳܢܰܝ̈ܗܽܘܢ. ܘܡܰܫ̈ܩܠܳܢܰܝܗܽܘܢ. ܒܡܶܠܰܬ ܦܽܘܡܶܗ ܕܡܳܪܝܳܐ. ܘܗܳܠܶܝܢ ܡܰܦܩܳܢܰܝ̈ܗܽܘܢ. ܘܡܰܫ̈ܩܠܳܢܰܝܗܽܘܢ.
3 ܘܰܫܩܰܠܘ ܡܶܢ ܪܰܥܡܣܺܝܣ. ܒܚܰܡܫܰܥܶܣܖ̈ܶܐ ܒܝܰܪܚܳܐ ܩܰܕܡܳܝܳܐ ܡܶܢ ܒܳܬܰܪ ܦܶܨܚܳܐ. ܘܰܢܦܰܩܘ ܒܢܰܝ̈ ܝܺܣܪܳܐܶܝܠ ܒܺܐܝܕܳܐ ܪܳܡܬܳܐ ܠܥܺܝܢ ܟܽܠܗܽܘܢ ܡܶܨܖ̈ܳܝܶܐ.
4 ܘܡܶܨܖ̈ܳܝܶܐ ܩܳܒܪܺܝܢ ܗܘܰܘ ܠܒܽܘܟܖ̈ܶܐ ܕܩܰܛܶܠ ܒܗܽܘܢ ܡܳܪܝܳܐ. ܘܒܰܐܠܳܗܰܝ̈ܗܽܘܢ ܥܒܰܕ ܡܳܪܝܳܐ ܕܺܝܢܳܐ.
5 ܘܰܫܩܰܠܘ ܒܢܰܝ̈ ܝܺܣܪܳܐܶܝܠ ܡܶܢ ܪܰܥܡܣܺܝܣ. ܘܰܫܪܰܘ ܒܣܳܟܽܘܬ.
6 ܘܰܫܩܰܠܘ ܡܶܢ ܣܳܟܽܘܬ. ܘܰܫܪܰܘ ܒܳܐܬܳܡ ܕܰܒܣܰܘ̈ܦܰܝ ܡܰܕܒܪܳܐ.
7 ܘܰܫܩܰܠܘ ܡܶܢ ܐܳܬܳܡ. ܘܰܫܪܰܘ ܥܰܠ ܦܽܘܡ ܚܶܐܪܺܝܬܳܐ ܕܰܩܕܳܡ ܒܥܶܠܨܦܽܘܢ. ܘܰܫܪܰܘ ܩܕܳܡ ܡܰܓܕܽܘܠ.
8 ܘܰܫܩܰܠܘ ܡܶܢ ܦܽܘܡ ܚܶܐܪܺܝܬܳܐ. ܘܶܐܙܰܠܘ ܒܓܰܘ ܝܰܡܳܐ ܠܡܰܕܒܪܳܐ. ܘܶܐܙܰܠܘ ܡܰܪܕܶܐ ܬܠܳܬܳܐ ܝܰܘܡܺܝ̈ܢ ܒܡܰܕܒܪܳܐ ܕܰܐܬܳܡ. ܘܰܫܪܰܘ ܒܡܽܘܪܰܬ.
9 ܘܰܫܩܰܠܘ ܡܶܢ ܡܽܘܪܰܬ. ܘܶܐܬܰܘ ܠܳܐܠܺܝܡ. ܘܒܳܐܠܺܝܡ ܐܺܝܬ ܗܘܰܝ̈ ܬܰܪܬܰܥܶܣܖ̈ܶܐ ܥܰܝ̈ܢܳܬܳܐ ܕܡܰܝ̈ܳܐ. ܘܫܰܒܥܺܝܢ ܕܶܩ̈ܠܺܝܢ. ܘܰܫܪܰܘ ܬܰܡܳܢ.
10 ܘܰܫܩܰܠܘ ܡܶܢ ܐܳܠܺܝܡ. ܘܰܫܪܰܘ ܥܰܠ ܝܰܕ ܝܰܡܳܐ ܕܣܽܘܦ.
11 ܘܰܫܩܰܠܘ ܡܶܢ ܝܰܕ ܝܰܡܳܐ ܕܣܽܘܦ. ܘܰܫܪܰܘ ܒܡܰܕܒܪܳܐ ܕܣܺܝܢ.
12 ܘܰܫܩܰܠܘ ܡܶܢ ܡܰܕܒܪܳܐ ܕܣܺܝܢ. ܘܰܫܪܰܘ ܒܪܰܦܩܳܐ.
13 ܘܰܫܩܰܠܘ ܡܶܢ ܪܰܦܩܳܐ. ܘܰܫܪܰܘ ܒܳܐܠܽܘܫ.
14 ܘܰܫܩܰܠܘ ܡܶܢ ܐܳܠܽܘܫ. ܘܰܫܪܰܘ ܒܰܪܦܺܝܕܺܝܢ. ܘܠܰܝܬ ܗܘܰܘ ܬܰܡܳܢ ܡܰܝ̈ܳܐ ܠܥܰܡܳܐ ܕܢܶܫܬܽܘܢ.
15 ܘܰܫܩܰܠܘ ܡܶܢ ܪܦܺܝܕܺܝܢ. ܘܰܫܪܰܘ ܒܡܰܕܒܪܳܐ ܕܣܺܝܢܰܝ.
16 ܘܰܫܩܰܠܘ ܡܶܢ ܡܰܕܒܪܳܐ ܕܣܺܝܢܰܝ. ܘܰܫܪܰܘ ܒܩܰܒܖ̈ܶܐ ܕܖ̈ܳܓܰܝ ܪܶܓܬܳܐ.
17 ܘܰܫܩܰܠܘ ܡܶܢ ܩܰܒܖ̈ܶܐ ܕܖ̈ܳܓܰܝ ܪܶܓܬܳܐ. ܘܰܫܪܰܘ ܒܚܶܨܪܽܘܬ.
18 ܘܰܫܩܰܠܘ ܡܶܢ ܚܶܨܪܽܘܬ. ܘܰܫܪܰܘ ܒܪܶܬܡܳܐ.
19 ܘܰܫܩܰܠܘ ܡܶܢ ܪܶܬܡܳܐ. ܘܰܫܪܰܘ ܒܪܰܡܽܘܢ ܦܰܪܶܨ.
20 ܘܰܫܩܰܠܘ ܡܶܢ ܪܰܡܽܘܢ ܦܰܪܶܨ. ܘܰܫܪܰܘ ܒܠܶܒܢܳܐ.
21 ܘܰܫܩܰܠܘ ܡܶܢ ܠܶܒܢܳܐ. ܘܰܫܪܰܘ ܒܪܳܣܳܐ.
22 ܘܰܫܩܰܠܘ ܡܶܢ ܪܳܣܳܐ. ܘܰܫܪܰܘ ܒܩܰܗܠܰܬ.
23 ܘܰܫܩܰܠܘ ܡܶܢ ܩܰܗܠܰܬ. ܘܰܫܪܰܘ ܒܛܽܘܪܳܐ ܕܫܳܦܳܪ.
24 ܘܫܩܰܠܘ ܡܶܢ ܛܽܘܪܳܐ ܕܫܳܦܳܪ. ܘܰܫܪܰܘ ܒܚܶܕܕܳܐ.
25 ܘܰܫܩܰܠܘ ܡܶܢ ܚܶܕܕܳܐ. ܘܰܫܪܰܘ ܒܡܰܩܗܰܠܽܘܬ.
26 ܘܰܫܩܰܠܘ ܡܶܢ ܡܰܩܗܰܠܽܘܬ. ܘܰܫܪܰܘ ܒܬܳܚܳܬ.
27 ܘܰܫܩܰܠܘ ܡܶܢ ܬܳܚܳܬ. ܘܰܫܪܰܘ ܒܬܳܪܰܚ.
28 ܘܰܫܩܰܠܘ ܡܶܢ ܬܳܪܰܚ. ܘܰܫܪܰܘ ܒܡܶܬܩܳܐ.
29 ܘܰܫܩܰܠܘ ܡܶܢ ܡܶܬܩܳܐ. ܘܰܫܪܰܘ ܒܚܰܫܡܽܘܢܳܐ.
30 ܘܰܫܩܰܠܘ ܡܶܢ ܚܰܫܡܽܘܢܳܐ. ܘܰܫܪܰܘ ܒܡܰܣܪܽܘܬ.
31 ܘܰܫܩܰܠܘ ܡܶܢ ܡܰܣܪܽܘܬ. ܘܰܫܪܰܘ ܒܰܒܢܰܝ̈ ܝܰܥܩܳܢ.
32 ܘܰܫܩܰܠܘ ܡܶܢ ܒܢܰܝ̈ ܝܰܥܩܳܢ. ܘܰܫܪܰܘ ܒܚܳܪ ܓܰܕܓܰܕ.
33 ܘܰܫܩܰܠܘ ܡܶܢ ܚܳܪ ܓܰܕܓܰܕ ܘܰܫܪܰܘ ܒܝܰܛܒܰܬ.
34 ܘܰܫܩܰܠܘ ܡܶܢ ܝܰܛܒܰܬ. ܘܰܫܪܰܘ ܒܥܰܟܪܽܘܢܳܐ.
35 ܘܰܫܩܰܠܘ ܡܶܢ ܥܰܟܪܽܘܢܳܐ. ܘܰܫܪܰܘ ܒܥܺܨܺܝܢܽܘ ܓܒܰܪ.
36 ܘܰܫܩܰܠܘ ܡܶܢ ܥܺܨܺܝܢܽܘ ܓܒܰܪ. ܘܰܫܪܰܘ ܒܡܰܕܒܪܳܐ ܕܨܺܝܢ ܕܗܺܝ ܗܺܝ ܩܕܶܫ.
37 ܘܰܫܩܰܠܘ ܡܶܢ ܩܕܶܫ. ܘܰܫܪܰܘ ܒܗܽܘܪ ܛܽܘܪܳܐ ܕܰܒܣܰܘ̈ܦܰܝ ܐܰܪܥܳܐ ܕܰܐܕܽܘܡ.
38 ܘܰܣܠܶܩ ܐܰܗܪܽܘܢ ܟܳܗܢܳܐ ܒܡܶܠܰܬ ܦܽܘܡܶܗ ܕܡܳܪܝܳܐ ܠܗܽܘܪ ܛܽܘܪܳܐ ܘܡܺܝܬ ܬܰܡܳܢ. ܒܰܫܢܰܬ ܐܰܪܒܥܺܝܢ ܕܰܢܦܰܩܘ ܒܢܰܝ̈ ܝܺܣܪܳܐܶܝܠ ܡܶܢ ܐܰܪܥܳܐ ܕܡܶܨܪܶܝܢ. ܒܝܰܪܚܳܐ ܩܰܕܡܳܝܳܐ ܒܚܰܕ ܒܝܰܪܚܳܐ.
39 ܘܰܐܗܪܽܘܢ ܒܰܪ ܡܳܐܐ ܗܘܳܐ ܘܥܶܣܪܺܝܢ ܘܰܬܠܳܬ ܫܢܺܝ̈ܢ. ܟܰܕ ܡܺܝܬ ܒܗܽܘܪ ܛܽܘܪܳܐ.
40 ܘܰܫܡܰܥ ܟܢܰܥܢܳܝܳܐ ܡܰܠܟܳܐ ܕܓܳܕܳܪ ܕܥܳܡܰܪ ܒܬܰܝܡܢܳܐ ܒܰܐܪܥܳܐ ܕܰܟܢܰܥܢ. ܟܰܕ ܐܶܬܰܘ ܒܢܰܝ̈ ܝܺܣܪܳܐܶܝܠ.
41 ܘܰܫܩܰܠܘ ܡܶܢ ܗܽܘܪ ܛܽܘܪܳܐ. ܘܰܫܪܰܘ ܒܨܰܠܡܽܘܢܳܐ.
42 ܘܰܫܩܰܠܘ ܡܶܢ ܨܰܠܡܽܘܢܳܐ. ܘܰܫܪܰܘ ܒܦܺܝܢܽܘܢ.
43 ܘܰܫܩܰܠܘ ܡܶܢ ܦܺܝܢܽܘܢ. ܘܰܫܪܰܘ ܒܰܐܒܽܘܬ.
44 ܘܰܫܩܰܠܘ ܡܶܢ ܐܰܒܽܘܬ. ܘܰܫܪܰܘ ܒܥܰܝܢܳܐ ܕܥܶܒܖ̈ܳܝܶܐ. ܒܰܬܚܽܘܡܳܐ ܕܡܽܘܐܳܒ.
45 ܘܰܫܩܰܠܘ ܡܶܢ ܥܰܝܢܳܐ ܕܥܶܒܖ̈ܳܝܶܐ. ܘܰܫܪܰܘ ܒܪܺܝܒܽܘܢ ܓܰܕ.
46 ܘܰܫܩܰܠܘ ܡܶܢ ܪܺܝܒܽܘܢ ܓܰܕ. ܘܰܫܪܰܘ ܒܰܒܥܶܠܡܽܘܢ ܕܰܒܠܰܬܺܝܡ.
47 ܘܰܫܩܰܠܘ ܡܶܢ ܒܥܶܠܡܽܘܢ ܕܰܒܠܰܬܺܝܡ ܘܰܫܪܩܘ ܒܛܽܘܪܳܐ ܕܥܶܒܖ̈ܳܝܶܐ ܕܰܩܕܳܡ ܢܳܒܽܘ.
48 ܘܰܫܩܰܠܘ ܡܶܢ ܛܽܘܪܳܐ ܕܥܶܒܖ̈ܳܝܶܐ. ܘܰܫܪܰܘ ܒܥܰܪܒܽܘܬ ܡܽܘܐܳܒ ܕܥܰܠ ܝܽܘܪܕܢܳܢ ܕܺܐܝܪܺܝܚܽܘ.
49 ܘܰܫܪܰܘ ܥܰܠ ܝܽܘܪܕܢܳܢ ܡܶܢ ܒܶܝܬ ܐܰܫܺܝܡܽܘܢ. ܘܰܥܕܰܡܳܐ ܠܳܐܒܳܠ ܣܳܛܺܝܡ ܕܰܒܥܰܪܒܽܘܬ ܡܽܘܐܳܒ.
50 ܘܶܐܡܰܪ ܡܳܪܝܳܐ ܠܡܽܘܫܶܐ ܒܥܰܪܒܽܘܬ ܡܽܘܐܳܒ ܕܥܰܠ ܝܽܘܪܕܢܳܢ ܕܺܐܝܪܺܝܚܽܘ.
51 ܡܰܠܶܠ ܥܰܡ ܒܢܰܝ̈ ܝܺܣܪܳܐܶܝܠ. ܘܶܐܡܰܪ ܠܗܽܘܢ. ܐܰܢ̱ܬܽܘܢ ܥܳܒܪܺܝܢ ܐܰܢ̱ܬܽܘܢ ܝܽܘܪܕܢܳܢ ܠܰܐܪܥܳܐ ܕܰܟܢܰܥܢ.
52 ܘܬܰܘܒܕܽܘܢ ܟܽܠܗܽܘܢ ܥܳܡܽܘܖ̈ܶܝܗ̇ ܕܰܐܪܥܳܐ ܡܶܢ ܩܕܳܡܰܝܟܽܘܢ. ܘܬܽܘܒܕܽܘܢ ܟܽܠܗܶܝܢ ܣܶܓ̈ܕܳܬܗܽܘܢ. ܘܟܽܠܗܽܘܢ ܨܰܠ̈ܡܶܐ ܕܢܶܣ̈ܟܳܬܗܽܘܢ ܬܰܘܒܕܽܘܢ. ܘܟܽܠܗܶܝܢ ܥܠܰܘ̈ܳܬܗܽܘܢ ܬܶܥܩܪܽܘܢ.
53 ܘܬܺܐܪܬܽܘܢܳܗ̇ ܠܰܐܪܥܳܐ ܘܬܶܬܒܽܘܢ ܒܳܗ̇. ܡܶܛܽܠ ܕܰܠܟܽܘܢ ܝܰܗܒܬܳܗ̇ ܠܰܐܪܥܳܐ ܠܡܺܐܪܬܳܗ̇.
54 ܘܺܝܪܰܬܘ ܐܰܪܥܳܐ ܒܦܶܨ̈ܶܐ ܕܫܰܖ̈ܒܳܬܟܽܘܢ. ܠܣܰܓܺܝ̈ܐܶܐ ܬܰܣܓܽܘܢ ܝܳܪܬܽܘܬܳܐ. ܘܠܰܙܥܽܘܖ̈ܶܐ ܬܰܙܥܪܽܘܢ ܝܳܪܬܽܘܬܳܐ. ܡܰܢ ܕܣܳܠܩܳܐ ܠܶܗ ܦܶܨܬܳܐ ܠܫܰܒ̈ܛܶܐ ܕܰܐܒܳܗܰܝ̈ܟܽܘܢ ܢܺܐܪܬܽܘܢ.
55 ܘܶܐܢ ܠܳܐ ܬܰܘܒܕܽܘܢ ܠܥܳܡܽܘܖ̈ܶܐ ܕܰܐܪܥܳܐ ܡܶܢ ܩܕܳܡܰܝܟܽܘܢ. ܗܳܢܽܘܢ ܕܡܶܫܬܰܚܪܺܝܢ ܡܶܢܗܽܘܢ. ܢܶܗܘܽܘܢ ܣܶܟ̈ܶܐ ܒܥܰܝܢܰܝ̈ܟܽܘܢ. ܘܠܽܘܠ̈ܝܳܬܳܐ ܒܨܶܕܥܰܝ̈ܟܽܘܢ. ܘܰܢܥܺܝܩܽܘܢ ܠܟܽܘܢ ܒܰܐܪܥܳܐ ܕܥܳܡܪܺܝܢ ܐ̱ܢܬܽܘܢ ܒܳܗ̇.
56 ܘܰܐܝܟ ܕܶܐܬܚܰܫܒܶܬ ܕܶܐܥܒܶܕ ܠܗܽܘܢ. ܐܶܥܒܶܕ ܠܟܽܘܢ.