Numbers 34
The Book of Numbers
܀ ܡܢܝܢܐ ܠܕ ܀
1 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.
2 ܦܰܩܶܕ ܠܰܒܢܰܝ̈ ܝܺܣܪܳܐܶܝܠ. ܘܶܐܡܰܪ ܠܗܽܘܢ. ܐܰܢ̱ܬܽܘܢ ܥܳܠܺܝܢ ܐܰܢ̱ܬܽܘܢ ܠܰܐܪܥܳܐ ܕܰܟܢܰܥܢ. ܗܳܕܶܐ ܐܰܪܥܳܐ ܬܶܬܦܰܠܰܓ ܠܟܽܘܢ ܒܝܽܘܪܬܳܢܳܐ. ܐܰܪܥܳܐ ܕܰܟܢܰܥܢ ܒܰܬܚܽܘܡܶܝ̈ܗ̇.
3 ܘܢܶܗܘܶܐ ܠܟܽܘܢ ܣܶܛܪܳܐ ܕܬܰܝܡܢܳܐ. ܡܶܢ ܡܰܕܒܪܳܐ ܕܨܺܝܢ ܥܰܠ ܬܚܽܘܡܳܐ ܕܰܐܕܽܘܡ. ܘܢܶܗܘܶܐ ܠܟܽܘܢ ܬܚܽܘܡܳܐ ܕܬܰܝܡܢܳܐ. ܡܶܢ ܣܽܘܦ ܝܰܡܳܐ ܕܡܶܠܚܳܐ ܡܶܢ ܡܰܕܢܚܳܐ.
4 ܘܢܶܗܘܶܐ ܟܳܪܶܟ ܬܚܽܘܡܟܽܘܢ ܡܶܢ ܬܰܝܡܢܳܐ ܠܡܰܣܩܳܢܳܐ ܕܰܣܦܰܪܘܺܝܡ. ܘܢܶܗܘܶܐ ܥܳܒܰܪ ܠܨܺܝܢ. ܘܢܶܗܘܽܘܢ ܡܰܦܩܳܢܰܘ̈ܗܝ ܡܶܢ ܬܰܝܡܢܳܐ ܠܰܪܩܶܡ ܕܓܰܐܝܳܐ. ܘܢܶܦܽܘܩ ܥܰܠ ܚܰܨܳܪ ܐܶܕܰܪ. ܘܢܶܥܒܰܪ ܠܥܰܨܡܽܘܢ.
5 ܘܢܶܬܟܪܶܟ ܬܚܽܘܡܳܐ ܡܶܢ ܥܰܨܡܽܘܢ ܠܢܰܚܠܳܐ ܕܡܶܨܪܶܝܢ. ܘܢܶܗܘܽܘܢ ܡܰܦܩܳܢܰܘ̈ܗܝ ܠܝܰܡܳܐ.
6 ܘܰܬܚܽܘܡܳܐ ܕܝܰܡܳܐ ܢܶܗܘܶܐ ܠܟܽܘܢ. ܝܰܡܳܐ ܪܰܒܳܐ ܘܰܬܚܽܘܡܶܗ. ܗܳܢܳܐ ܢܶܗܘܶܐ ܠܟܽܘܢ ܬܚܽܘܡܳܐ ܕܝܰܡܳܐ.
7 ܘܗܳܢܳܐ ܢܶܗܘܶܐ ܠܟܽܘܢ ܬܚܽܘܡܳܐ ܕܓܰܪܒܝܳܐ. ܡܶܢ ܝܰܡܳܐ ܪܰܒܳܐ ܬܶܬܰܚܡܽܘܢ ܠܟܽܘܢ ܠܗܽܘܪ ܛܽܘܪܳܐ.
8 ܘܡܶܢ ܗܽܘܪ ܛܽܘܪܳܐ ܬܶܬܰܚܡܽܘܢ ܠܡܰܥܠܳܢܳܐ ܕܰܚܡܳܬ. ܘܢܶܗܘܽܘܢ ܡܰܦܩܳܢܰܘ̈ܗܝ ܕܰܬܚܽܘܡܳܐ ܠܰܨܕܳܕ.
9 ܘܢܶܗܘܶܐ ܢܳܦܶܩ ܬܚܽܘܡܳܐ ܠܙܰܦܪܽܘܢ. ܘܢܶܗܘܽܘܢ ܡܰܦܩܳܢܰܘ̈ܗܝ ܠܰܚܨܰܪ ܥܰܝܢܳܢ. ܗܳܠܶܝܢ ܢܶܗܘܽܘܢ ܠܟܽܘܢ ܬܚܽܘ̈ܡܶܐ ܕܓܰܪܒܝܳܐ.
10 ܘܰܬܬܰܚܡܽܘܢ ܠܟܽܘܢ ܬܚܽܘܡܳܐ ܕܡܰܕܢܚܳܐ. ܡܶܢ ܚܨܰܪ ܥܰܝܢܳܢ ܠܫܳܦܳܡ.
11 ܘܢܶܗܘܶܐ ܢܳܚܶܬ ܬܚܽܘܡܳܐ ܡܶܢ ܫܳܦܳܡ ܠܕܶܒܠܰܬ. ܡܶܢ ܡܰܕܢܰܚ ܠܥܺܝܢ. ܘܢܶܗܘܶܐ ܢܳܚܶܬ ܬܚܽܘܡܳܐ. ܘܢܶܗܘܶܐ ܣܳܡܶܟ ܠܣܶܛܪܳܐ ܕܝܰܡܳܐ ܕܟܶܢܪܰܬ ܡܶܢ ܡܰܕܢܚܳܐ.
12 ܘܢܶܗܘܶܐ ܢܳܚܶܬ ܬܚܽܘܡܳܐ ܠܝܽܘܪܕܢܳܢ. ܘܢܶܗܘܽܘܢ ܡܰܦܩܳܢܰܘ̈ܗܝ ܠܝܰܡܳܐ ܕܡܶܠܚܳܐ. ܗܳܕܶܐ ܬܶܗܘܶܐ ܠܟܽܘܢ ܐܰܪܥܳܐ ܒܰܬܚܽܘܡܶܝ̈ܗ̇ ܟܰܕ ܚܳܕܪܳܐ.
13 ܘܦܰܩܶܕ ܡܽܘܫܶܐ ܠܰܒܢܰܝ̈ ܝܺܣܪܳܐܶܝܠ. ܘܶܐܡܰܪ ܠܗܽܘܢ. ܗܳܕܳܐ ܗ̱ܝ ܐܰܪܥܳܐ ܕܰܬܦܰܠܓܽܘܢ ܒܦܶܨ̈ܶܐ. ܕܦܰܩܶܕ ܡܳܪܝܳܐ ܠܡܶܬܰܠ ܠܬܶܫܥܳܐ ܫܰܒ̈ܛܺܝܢ. ܘܰܠܦܶܠܓܽܘܬ ܫܰܒܛܳܐ.
14 ܡܶܛܽܠ ܕܰܢܣܰܒܘ ܫܰܒܛܳܐ ܕܰܒܢܰܝ̈ ܪܽܘܒܺܝܠ ܠܒܶܝܬ ܐܰܒܳܗܰܝ̈ܗܽܘܢ. ܘܫܰܒܛܳܐ ܕܰܒܢܰܝ̈ ܓܳܕ ܠܒܶܝܬ ܐܰܒܳܗܰܝ̈ܗܽܘܢ. ܘܦܶܠܓܶܗ ܕܫܰܒܛܳܐ ܕܰܡܢܰܫܶܐ ܩܰܒܶܠܘ ܝܳܪܬܽܘܬܗܽܘܢ.
15 ܬܪܶܝܢ ܫܰܒ̈ܛܺܝܢ ܘܦܶܠܓܽܘܬ ܫܰܒܛܳܐ. ܩܰܒܶܠܘ ܝܳܪܬܽܘܬܗܽܘܢ ܡܶܢ ܥܶܒܪܳܐ ܕܝܽܘܪܕܢܳܢ ܕܺܐܝܪܺܝܚܽܘ. ܩܰܕܡܳܝܰܬ ܡܶܢ ܡܰܕܢܚܳܐ.
16 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.
17 ܗܳܠܶܝܢ ܫܡܳܗ̈ܶܐ ܕܓܰܒܖ̈ܶܐ ܕܡܰܘܪܬܺܝܢ ܠܟܽܘܢ ܐܰܪܥܳܐ. ܐܶܠܺܝܥܳܙܳܪ ܟܳܗܢܳܐ. ܘܝܶܫܽܘܥ ܒܰܪܢܽܘܢ.
18 ܘܚܰܕ ܚܰܕ ܪܺܝܫܐ ܡܶܢ ܫܰܒܛܳܐ ܕܒܰܪܘ ܕܰܢܦܰܠܓܽܘܢ ܠܟܽܘܢ ܐܰܪܥܳܐ.
19 ܘܗܳܠܶܝܢ ܫܡܳܗ̈ܶܐ ܕܖ̈ܺܝܫܶܐ ܕܓܰܒܖ̈ܶܐ. ܡܶܢ ܫܰܒܛܳܐ ܕܺܝܗܽܘܕܳܐ. ܟܳܠܳܒ ܒܰܪ ܝܽܘܦܢܳܐ.
20 ܡܶܢ ܫܰܒܛܳܐ ܕܫܶܡܥܽܘܢ. ܫܰܠܡܽܘܐܶܝܠ ܒܰܪ ܥܰܡܺܝܗܽܘܪ.
21 ܡܶܢ ܫܰܒܛܳܐ ܕܒܶܢܝܳܡܶܝܢ ܐܶܠܕܳܕ ܒܰܪ ܟܶܣܠܽܘܢ.
22 ܡܶܢ ܫܰܒܛܳܐ ܕܕܳܢ. ܒܰܩܺܝ ܒܰܪ ܝܰܓܠܺܝ.
23 ܡܶܢ ܫܰܒܛܳܐ ܕܝܰܘܣܶܦ. ܡܶܢ ܫܰܒܛܳܐ ܕܰܡܢܰܫܶܐ. ܢܰܚܠܳܐܶܝܠ ܒܰܪ ܐܳܦܽܘܕ.
24 ܘܡܶܢ ܫܰܒܛܳܐ ܕܰܐܦܪܶܝܡ. ܩܰܡܽܘܐܶܝܠ ܒܰܪ ܫܰܦܛܳܢ.
25 ܡܶܢ ܫܰܒܛܳܐ ܕܰܙܒܽܘܠܽܘܢ ܐܶܠܺܝܨܳܦܰܢ ܒܰܪ ܦܰܪܢܳܟ.
26 ܡܶܢ ܫܰܒܛܳܐ ܕܺܐܝܣܳܟܳܪ. ܦܛܳܐܶܝܠ ܒܰܪ ܥܳܙܽܘܪ.
27 ܡܶܢ ܫܰܒܛܳܐ ܕܳܐܫܺܝܪ. ܐܰܚܺܝܗܽܘܕ ܒܰܪ ܫܰܠܽܘܡܺܝ.
28 ܡܶܢ ܫܰܒܛܳܐ ܕܢܰܦܬܳܠܺܝ. ܦܕܳܐܶܝܠ ܒܰܪ ܥܰܡܺܝܗܽܘܕ.
29 ܠܗܳܠܶܝܢ ܦܰܩܶܕ ܡܳܪܝܳܐ ܕܢܰܘܪܬܽܘܢ ܠܰܒܢܰܝ̈ ܝܺܣܪܳܐܶܝܠ ܒܰܐܪܥܳܐ ܕܰܟܢܰܥܢ.