Numbers 5
The Book of Numbers
܀ ܡܢܝܢܐ ܗ ܀
1 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.
2 ܦܰܩܶܕ ܠܰܒܢܰܝ̈ ܝܺܣܪܳܐܶܝܠ. ܕܢܰܦܩܽܘܢ ܠܒܰܪ ܡܶܢ ܡܰܫܪܺܝܬܳܐ. ܠܟܽܠ ܕܰܓܪܶܒ ܘܰܠܟܽܠ ܕܕܳܐܶܒ. ܘܰܠܟܽܠ ܕܰܛܡܰܐ ܒܢܰܦܫܶܗ.
3 ܡܶܢ ܕܶܟܪܳܐ ܘܰܥܕܰܡܳܐ ܠܢܶܩܒܬܳܐ. ܬܰܦܩܽܘܢ ܐܶܢܽܘܢ ܠܒܰܪ ܡܶܢ ܡܰܫܪܺܝܬܳܐ. ܘܠܳܐ ܢܛܰܡܐܽܘܢ ܡܰܫܖ̈ܝܳܬܟܽܘܢ. ܕܶܐܢܳܐ ܫܳܪܶܐ ܐ̱ܢܳܐ ܒܰܝܢܳܬܟܽܘܢ.
4 ܘܰܥܒܰܕܘ ܗܳܟܰܢܳܐ ܒܢܰܝ̈ ܝܺܣܪܳܐܶܝܠ. ܘܰܐܦܶܩܘ ܐܶܢܽܘܢ ܠܒܰܪ ܡܶܢ ܡܰܫܪܺܝܬܳܐ. ܘܰܐܝܟ ܕܶܐܡܰܪ ܡܳܪܝܳܐ ܠܡܽܘܫܶܐ. ܗܳܟܰܢܳܐ ܥܒܰܕܘ ܒܢܰܝ̈ ܝܺܣܪܳܐܶܝܠ. ܢܳܡܽܘܣܳܐ ܕܥܰܠ ܚܛܳܗ̈ܶܐ .
5 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.
6 ܐܶܡܰܪ ܠܰܒܢܰܝ̈ ܝܺܣܪܳܐܶܝܠ. ܓܰܒܪܳܐ ܐܰܘ ܐܰܢ̱ܬܬܳܐ. ܐܶܢ ܢܶܥܒܕܽܘܢ ܡܶܢ ܟܽܠ ܚܛܳܗ̈ܶܐ ܕܰܒܢܰܝ̈ܢܳܫܳܐ. ܘܢܶܥܒܕܽܘܢ ܥܰܘܠܳܐ ܩܕܳܡ ܡܳܪܝܳܐ. ܬܶܬܚܰܝܰܒ ܢܰܦܫܳܐ ܗܳܝ.
7 ܘܢܰܘܕܽܘܢ ܚܛܳܗܰܝ̈ܗܽܘܢ ܕܰܥܒܰܕܘ. ܘܢܶܗܦܽܘܟ ܚܛܳܗܶܗ ܥܰܠ ܪܺܝܫܶܗ. ܘܚܰܕ ܡܶܢ ܚܰܡܫܳܐ ܢܰܘܣܶܦ ܥܠܰܘܗܝ. ܘܰܢܦܰܢܶܐ ܠܡܰܢ ܕܕܺܝܠܶܗ ܗܽܘ ܚܛܳܗܳܐ.
8 ܘܶܐܢ ܠܰܝܬ ܠܶܗ ܠܓܰܒܪܳܐ ܡܰܢ ܕܩܰܪܺܝܒ ܠܶܗ. ܢܰܝܬܶܐ ܚܠܳܦ ܚܛܳܗܳܐ ܥܰܠ ܐܰܦܰܘ̈ܗܝ. ܚܛܳܗܳܐ ܕܡܰܝܬܶܝܢ ܚܠܳܦܰܘܗܝ ܩܕܳܡ ܡܳܪܝܳܐ ܠܟܳܗܢܳܐ ܢܶܗܘܶܐ. ܣܛܰܪ ܡܶܢ ܕܶܟܪܳܐ ܕܚܽܘܣܳܝܳܐ ܕܡܶܬܚܰܣܶܐ ܒܶܗ ܥܠܰܘܗܝ.
9 ܘܟܽܠܶܗ ܦܽܘܪܫܳܢܳܐ ܕܟܽܠܗܽܘܢ ܩܽܘܕ̈ܫܶܐ ܕܰܡܩܰܪܒܺܝܢ ܒܢܰܝ̈ ܝܺܣܪܳܐܶܝܠ ܠܟܳܗܢܳܐ. ܕܺܝܠܶܗ ܢܶܗܘܽܘܢ.
10 ܘܰܓܒܰܪ ܩܽܘܕܫܶܗ ܠܶܗ ܢܶܗܘܶܐ. ܘܰܓܒܰܪ ܕܢܶܬܶܠ ܠܟܳܗܢܳܐ. ܠܶܗ ܢܶܗܘܶܐ. ܢܳܡܽܘܣܳܐ ܕܥܰܠ ܪܽܘܚܳܐ ܕܰܛܢܳܢܳܐ.
11 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.
12 ܡܰܠܶܠ ܥܰܡ ܒܢܰܝ̈ ܝܺܣܪܳܐܶܝܠ. ܘܶܐܡܰܪ ܠܗܽܘܢ. ܓܒܰܪ ܓܒܰܪ ܟܰܕ ܬܶܫܛܶܐ ܐܰܢ̱ܬܬܶܗ. ܘܬܶܥܒܶܕ ܒܶܗ ܥܰܘܠܳܐ.
13 ܘܢܶܕܡܰܟ ܓܰܒܪܳܐ ܥܰܡܳܗ̇ ܡܰܕܡܟܳܐ ܕܙܰܪܥܳܐ. ܘܟܰܣܝܳܐ ܗܺܝ ܡܶܢ ܥܰܝ̈ܢܰܝ ܒܰܥܠܳܗ̇ ܘܰܡܛܰܫܝܳܐ. ܘܗܺܝ ܡܛܰܡܐܳܐ ܗܝ. ܘܣܳܗܕܳܐ ܠܰܝܬ ܥܠܶܝܗ̇. ܘܗܺܝ ܠܳܐ ܐܶܬܬܰܚܕܰܬ.
14 ܘܬܺܐܬܶܐ ܥܰܠ ܒܰܥܠܳܗ̇ ܪܽܘܚܳܐ ܕܰܛܢܳܢܳܐ. ܘܢܶܛܰܢ ܒܰܐܢ̱ܬܬܶܗ ܟܰܕ ܗܺܝ ܡܛܰܡܐܳܐ. ܐܰܘ ܬܺܐܬܶܐ ܥܠܰܘܗܝ ܪܽܘܚܳܐ ܕܰܛܢܳܢܳܐ. ܘܢܶܛܰܢ ܒܰܐܢ̱ܬܬܶܗ ܟܰܕ ܗܘܳܬ ܡܛܰܡܐܳܐ.
15 ܢܰܝܬܶܐ ܓܰܒܪܳܐ ܩܽܘܪܒܳܢܶܗ ܠܘܳܬ ܟܳܗܢܳܐ. ܚܰܕ ܡܶܢ ܥܶܣܪܳܐ ܠܣܰܐܬܳܐ ܩܰܡܚܳܐ ܕܰܣܥܳܖ̈ܶܐ. ܘܠܳܐ ܢܶܣܽܘܟ ܥܠܰܘܗܝ ܡܶܫܚܳܐ. ܘܠܳܐ ܢܣܺܝܡ ܥܠܰܘܗܝ ܠܒܽܘܢܬܳܐ. ܡܶܛܽܠ ܕܰܣܡܺܝܕܰܐ ܗ̱ܘ ܕܰܛܢܳܢܳܐ. ܣܡܺܝܕܰܐ ܗ̱ܘ ܕܕܽܘܟܪܳܢܳܐ ܕܡܰܕܟܰܪ ܚܛܳܗܳܐ.
16 ܢܩܰܪܒܺܝܗ̇ ܟܳܗܢܳܐ. ܘܰܬܩܽܘܡ ܩܕܳܡ ܡܳܪܝܳܐ.
17 ܘܢܶܣܰܒ ܟܳܗܢܳܐ ܡܰܝ̈ܳܐ ܩܰܕܺܝ̈ܫܶܐ ܒܡܳܐܢܳܐ ܕܦܰܚܳܪܳܐ. ܘܡܶܢ ܥܰܦܪܳܐ ܕܺܐܝܬ ܒܰܫܦܽܘܠܰܘ̈ܗܝ ܕܡܰܕܒܚܳܐ. ܢܶܣܰܒ ܟܳܗܢܳܐ. ܘܢܰܪܡܶܐ ܒܡܰܝ̈ܳܐ.
18 ܘܰܢܩܺܝܡܺܝܗ̇ ܟܳܗܢܳܐ ܠܰܐܢ̱ܬܬܳܐ ܩܕܳܡ ܡܳܪܝܳܐ. ܘܢܶܦܪܽܘܥ ܪܺܝܫܳܗ̇ ܕܰܐܢ̱ܬܬܳܐ. ܘܰܢܣܺܝܡ ܥܰܠ ܐܺܝ̈ܕܶܝܗ̇ ܣܡܺܝܕܳܐ ܕܕܽܘܟܪܳܢܳܐ. ܣܡܺܝܕܳܐ ܕܰܛܢܳܢܳܐ ܘܒܺܐܝܕܳܐ ܕܟܳܗܢܳܐ ܢܶܗܘܽܘܢ ܡܰܝ̈ܳܐ ܡܰܪܺܝܖ̈ܶܐ ܒܳܚܖ̈ܶܐ.
19 ܘܢܰܘܡܶܝܗ̇ ܟܳܗܢܳܐ ܠܰܐܢ̱ܬܬܳܐ. ܘܢܺܐܡܰܪ ܠܳܗ̇. ܐܶܢ ܠܳܐ ܕܡܶܟ ܓܰܒܪܳܐ ܥܰܡܶܟܝ. ܘܠܳܐ ܫܛܰܝܬܝ. ܘܠܳܐ ܐܶܬܛܰܡܰܐܬܝ ܠܒܰܪ ܡܶܢ ܒܰܥܠܶܟܝ. ܐܶܬܚܰܣܳܝ ܡܶܢ ܗܳܠܶܝܢ ܡܰܝ̈ܳܐ ܡܰܪܺܝܖ̈ܶܐ ܒܳܚܖ̈ܶܐ.
20 ܐܶܢ ܕܶܝܢ ܫܛܰܝܬܝ ܠܒܰܪ ܡܶܢ ܒܰܥܠܶܟܝ. ܘܶܐܬܛܰܡܰܐܬܝ. ܘܰܕܡܶܟ ܓܰܒܪܳܐ ܠܘܳܬܶܟܝ ܠܒܰܪ ܡܶܢ ܒܰܥܠܶܟܝ.
21 ܢܰܘܡܶܝܗ̇ ܟܳܗܢܳܐ ܠܰܐܢ̱ܬܬܳܐ ܒܡܰܘܡܬܳܐ ܕܠܰܘ̈ܛܳܬܳܐ. ܘܢܺܐܡܰܪ ܟܳܗܢܳܐ ܠܰܐܢ̱ܬܬܳܐ. ܢܶܬܠܶܟܝ ܡܳܪܝܳܐ ܠܠܰܘܛܬܳܐ ܘܰܠܡܰܘܡܬܳܐ ܒܓܰܘ ܥܰܡܶܟܝ. ܢܰܡܣܶܐ ܡܳܪܝܳܐ ܥܰܛ̈ܡܳܬܶܟܝ. ܘܢܶܦܽܘܚ ܟܰܪܣܶܟܝ.
22 ܘܢܶܥܠܽܘܢ ܗܳܠܶܝܢ ܡܰܝ̈ܳܐ ܒܳܚܖ̈ܶܐ ܒܟܰܪܣܶܟܝ. ܘܢܶܦܚܽܘܢ ܡܥܰܝ̈ܟܝ. ܘܢܰܡܣܽܘܢ ܥܰܛ̈ܡܳܬܶܟܝ. ܘܬܺܐܡܰܪ ܐܰܢ̱ܬܬܳܐ ܗ̱ܝ. ܐܰܡܺܝܢ. ܐܰܡܺܝܢ.
23 ܘܢܶܟܬܽܘܒ ܐܶܢܶܝܢ ܟܳܗܢܳܐ ܠܠܰܘ̈ܛܳܬܳܐ ܗܳܠܶܝܢ ܒܣܶܦܪܳܐ. ܘܢܶܥܛܶܐ ܐܶܢܶܝܢ ܒܡܰܝ̈ܳܐ ܒܳܚܖ̈ܶܐ.
24 ܘܢܰܫܩܶܝܗ̇ ܠܰܐܢ̱ܬܬܳܐ ܡܰܝ̈ܳܐ ܡܰܪܺܝܖ̈ܶܐ ܒܳܚܖ̈ܶܐ. ܘܢܶܥܠܽܘܢ ܒܳܗ̇ ܡܰܝ̈ܳܐ ܒܳܚܖ̈ܶܐ ܠܡܶܒܚܪܳܗ̇.
25 ܘܢܶܣܰܒ ܟܳܗܢܳܐ ܡܶܢ ܐܺܝ̈ܕܶܝܗ̇ ܕܰܐܢ̱ܬܬܳܐ ܣܡܺܝܕܳܐ ܕܰܛܢܳܢܳܐ. ܘܢܶܦܪܫܺܝܘܗܝ ܣܡܺܝܕܳܐ ܩܕܳܡ ܡܳܪܝܳܐ. ܘܢܰܣܩܺܝܘܗܝ ܠܡܰܕܒܚܳܐ.
26 ܘܢܶܣܰܒ. ܟܳܗܢܳܐ ܡܶܢ ܣܡܺܝܕܳܐ ܕܽܘܟܪܳܢܶܗ. ܘܢܰܣܶܩ ܠܡܰܕܒܚܳܐ.
27 ܘܗܳܝܕܶܝܢ ܢܰܫܩܶܝܗ̇ ܡܰܝ̈ܳܐ ܠܰܐܢ̱ܬܬܳܐ. ܘܶܐܢ ܐܶܬܛܰܡܐܰܬ ܘܥܶܒܕܰܬ ܥܰܘܠܳܐ ܒܒܰܥܠܳܗ̇. ܘܥܰܠܘ ܒܳܗ̇ ܡܰܝ̈ܳܐ ܒܳܚܖ̈ܶܐ. ܘܒܰܚܪܽܘܗ̇. ܘܢܶܦܚܰܬ ܟܰܪܣܳܗ̇. ܘܶܐܬܡܣܺܝ̈ ܥܰܛ̈ܡܳܬܳܗ̇. ܬܶܗܘܶܐ ܐܰܢ̱ܬܬܳܐ ܗܳܝ ܠܠܰܘܛܬܳܐ ܡܶܢ ܓܰܘ ܥܰܡܳܗ̇.
28 ܐܶܢ ܕܶܝܢ ܠܳܐ ܐܶܬܛܰܡܐܰܬ ܐܰܢ̱ܬܬܳܐ ܗܳܝ. ܘܕܰܟܝܳܐ ܗ̱ܝ. ܬܶܬܚܰܣܶܐ ܘܬܺܐܠܰܕ ܕܶܟܪܳܐ.
29 ܗܳܢܰܘ ܢܳܡܽܘܣܳܐ ܕܰܛܢܳܢܳܐ. ܟܰܕ ܬܶܫܛܶܐ ܐܰܢ̱ܬܬܳܐ ܠܒܰܪ ܡܶܢ ܒܰܥܠܳܗ̇. ܘܬܶܬܛܰܡܰܐ.
30 ܐܰܘ ܓܰܒܪܳܐ ܕܬܶܥܽܘܠ ܥܠܰܘܗܝ ܪܽܘܚܳܐ ܕܰܛܢܳܢܳܐ. ܘܢܶܛܰܢ ܒܰܐܢ̱ܬܬܶܗ. ܘܰܢܩܺܝܡܺܝܗ̇ ܠܰܐܢ̱ܬܬܳܐ ܩܕܳܡ ܡܳܪܝܳܐ. ܘܢܶܥܒܶܕ ܠܳܗ̇ ܟܳܗܢܳܐ ܗܳܢܳܐ ܟܽܠܶܗ ܢܳܡܽܘܣܳܐ.
31 ܘܢܶܗܘܶܐ ܡܚܰܣܰܝ ܓܰܒܪܳܐ ܗܰܘ ܡܶܢ ܚܛܳܗܳܐ. ܘܰܐܢ̱ܬܬܳܐ ܗܳܝ ܬܩܰܒܶܠ ܚܛܳܗܳܗ̇.