Numbers 17
The Book of Numbers
܀ ܡܢܝܢܐ ܝܙ ܀
1 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.
2 ܡܰܠܶܠ ܥܰܡ ܒܢܰܝ̈ ܝܺܣܪܳܐܶܝܠ. ܘܣܰܒ ܡܶܢܗܽܘܢ ܫܰܒܛܳܐ ܫܰܒܛܳܐ ܠܒܶܝܬ ܐܰܒܳܗ̈ܶܐ ܡܶܢ ܠܘܳܬ ܟܽܠ ܪܰܘܖ̈ܒܳܢܰܝ̈ܗܽܘܢ. ܠܒܶܝܬ ܐܰܒܳܗܰܝ̈ܗܽܘܢ. ܬܪܶܥܣܰܪ ܫܰܒ̈ܛܺܝܢ. ܘܰܓܒܰܪ ܫܡܶܗ ܟܬܽܘܒ ܥܰܠ ܫܰܒܛܶܗ.
3 ܘܰܫܡܳܐ ܕܰܐܗܪܽܘܢ ܟܬܽܘܒ ܥܰܠ ܫܰܒܛܳܐ ܕܠܶܘܺܝ. ܡܶܛܽܠ ܕܚܰܕ ܚܰܕ ܫܰܒܛܳܐ ܠܒܶܝܬ ܐܰܒܳܗܰܝ̈ܗܽܘܢ.
4 ܘܣܺܝܡ ܐܶܢܽܘܢ ܒܡܰܫܟܰܢܙܰܒܢܳܐ ܩܕܳܡ ܣܳܗܕܽܘܬܳܐ. ܕܡܶܬܘܰܥܰܕ ܐ̱ܢܳܐ ܠܟܽܘܢ ܬܰܡܳܢ.
5 ܘܢܶܗܘܶܐ ܓܰܒܪܳܐ ܕܶܐܨܛܒܶܐ ܒܶܗ. ܢܰܘܥܶܐ ܫܰܒܛܶܗ. ܘܰܐܦܪܶܩ ܡܶܢܝ ܪܶܛܢܳܐ ܕܰܒܢܰܝ̈ ܝܺܣܪܳܐܶܝܠ. ܕܰܡܪܰܛܢܺܝܢ ܥܠܰܝܟܽܘܢ.
6 ܘܶܐܡܰܪ ܡܽܘܫܶܐ ܠܰܒܢܰܝ̈ ܝܺܣܪܳܐܶܝܠ. ܘܝܰܗܒܘ ܠܶܗ ܟܽܠܗܽܘܢ ܪܰܘܖ̈ܒܳܢܰܝ̈ܗܽܘܢ. ܫܰܒܛܳܐ ܫܰܒܛܳܐ ܠܪܺܝܫܳܐ ܠܟܽܠܗܽܘܢ ܒܶܝܬ ܐܰܒܳܗܰܝ̈ܗܽܘܢ. ܬܪܶܥܣܰܪ ܫܰܒ̈ܛܺܝܢ. ܘܫܰܒܛܳܐ ܕܰܐܗܪܽܘܢ ܒܓܰܘ ܫܰܒ̈ܛܰܝܗܽܘܢ.
7 ܘܣܳܡ ܐܶܢܽܘܢ ܡܽܘܫܶܐ ܠܫܰܒ̈ܛܶܐ ܩܕܳܡ ܡܳܪܝܳܐ ܒܓܰܘ ܡܰܫܟܰܢܙܰܒܢܳܐ ܕܣܳܗܕܽܘܬܳܐ.
8 ܘܰܠܝܰܘܡܳܐ ܐ̱ܚܪܺܢܳܐ. ܥܰܠ ܡܽܘܫܶܐ ܠܡܰܫܟܢܳܐ ܕܣܳܗܕܽܘܬܳܐ. ܘܰܚܙܳܐ ܕܰܐܦܪܰܥ ܫܰܒܛܳܐ ܕܰܐܗܪܽܘܢ ܕܒܶܝܬ ܠܶܘܺܝ. ܘܰܐܦܶܩ ܛܰܖ̈ܦܶܐ ܘܰܟܦܰܬ ܠܽܘܙ̈ܶܐ.
9 ܘܰܐܦܶܩ ܐܶܢܽܘܢ ܡܽܘܫܶܐ. ܠܟܽܠܗܽܘܢ ܫܰܒ̈ܛܶܐ ܡܶܢ ܩܕܳܡ ܡܳܪܝܳܐ ܠܘܳܬ ܟܽܠܗܽܘܢ ܒܢܰܝ̈ ܝܺܣܪܳܐܶܝܠ. ܘܰܚܙܰܘ. ܘܰܢܣܰܒ ܐ̱ܢܳܫ ܫܰܒܛܶܗ.
10 ܘܶܐܡܰܪ ܡܳܪܝܳܐ ܠܡܽܘܫܶܐ. ܐܰܗܦܶܟ ܫܰܒܛܳܐ ܕܰܐܗܪܽܘܢ ܩܕܳܡ ܣܳܗܕܽܘܬܳܐ. ܕܢܶܬܢܛܰܪ ܠܳܐܬܳܐ ܠܰܒܢܰܝ̈ܳܐ ܡܡܰܪܡܖ̈ܳܢܶܐ. ܕܢܶܓܡܰܪ ܪܶܛܢܗܽܘܢ ܡܶܢܝ ܘܠܳܐ ܢܡܽܘܬܽܘܢ.
11 ܘܰܥܒܰܕ ܡܽܘܫܶܐ ܐܰܝܟ ܕܦܰܩܕܶܗ ܡܳܪܝܳܐ ܗܳܟܰܢܳܐ ܥܒܰܕ.
12 ܘܶܐܡܰܪܘ ܒܢܰܝ̈ ܝܺܣܪܳܐܶܝܠ ܠܡܽܘܫܶܐ. ܗܳܐ ܣܳܦܢ ܘܶܐܒܰܕܢ. ܘܟܽܠܰܢ ܓܡܰܪܢ.
13 ܘܟܽܠ ܕܡܶܬܩܰܪܰܒ ܠܡܰܫܟܢܶܗ ܕܡܳܪܝܳܐ ܡܳܐܶܬ. ܘܗܳܐ ܐܳܦ ܚܢܰܢ ܐܰܩܶܦܢ ܠܰܡܣܳܦ.