Numbers 14
The Book of Numbers
܀ ܡܢܝܢܐ ܝܕ ܀
1 ܘܰܐܪܺܝܒܰܬ ܟܽܠܳܗ̇ ܟܢܽܘܫܬܳܐ. ܘܰܐܪܺܝܡܘ ܩܳܠܗܽܘܢ ܒܰܒܟܳܬܳܐ. ܘܰܒܟܰܘ ܥܰܡܳܐ ܒܠܺܠܝܳܐ ܗܰܘ ܒܟܳܬܳܐ ܪܰܒܬܳܐ.
2 ܘܰܪܛܶܢܘ ܒܝܰܘܡܳܐ ܗܰܘ ܥܰܠ ܡܽܘܫܶܐ. ܘܥܰܠ ܐܰܗܪܽܘܢ. ܟܽܠܗܽܘܢ ܒܢܰܝ̈ ܝܺܣܪܳܐܶܝܠ. ܘܶܐܡܰܪܘ ܠܗܽܘܢ ܟܽܠܳܗ̇ ܟܢܽܘܫܬܳܐ. ܐܶܫܬܽܘܦ ܕܶܝܢ ܡܺܝܬܰܢ ܒܺܐܝܕܶܗ ܕܡܳܪܝܳܐ ܒܰܐܪܥܳܐ ܕܡܶܨܪܶܝܢ. ܐܰܘ ܒܡܰܕܒܪܳܐ ܗܳܢܳܐ ܐܶܫܬܽܘܦ ܕܶܝܢ ܡܺܝܬܰܢ.
3 ܠܡܳܢܳܐ ܡܰܥܶܠ ܠܰܢ ܡܳܪܝܳܐ ܠܰܐܪܥܳܐ ܗܳܕܶܐ ܕܢܶܦܶܠ ܒܚܰܪܒܳܐ. ܘܢܶܫܰܝ̈ܢ ܘܺܝܩܰܪܬܰܢ ܢܶܗܘ̈ܝܳܢ ܠܒܶܙܬܳܐ. ܦܰܩܳܚ ܗܘܳܐ ܠܰܢ ܟܰܕ ܝܳܬܒܺܝܢ ܗܘܰܝܢ ܒܡܶܨܪܶܝܢ.
4 ܘܶܐܡܰܪ ܐ̱ܢܳܫ ܠܰܐܚܽܘܗܝ. ܬܰܘ ܢܶܥܒܶܕ ܠܰܢ ܪܺܝܫܳܐ. ܘܢܶܗܦܽܘܟ ܠܡܶܨܪܶܝܢ.
5 ܘܰܢܦܰܠܘ ܡܽܘܫܶܐ ܘܰܐܗܪܽܘܢ ܥܰܠ ܐܰܦܰܝ̈ܗܽܘܢ. ܩܕܳܡ ܟܽܠܶܗ ܟܶܢܫܳܐ ܕܰܟܢܽܘܫܬܳܐ ܕܰܒܢܰܝ̈ ܝܺܣܪܳܐܶܝܠ.
6 ܘܝܶܫܽܘܥ ܒܰܪ ܢܽܘܢ. ܘܟܳܠܳܒ ܒܰܪ ܝܽܘܦܢܳܐ. ܡܶܢ ܓܫܽܘ̈ܫܶܐ ܕܰܐܪܥܳܐ. ܨܰܪܺܝܘ ܢܰܚܬܰܝ̈ܗܽܘܢ.
7 ܘܶܐܡܰܪܘ ܠܟܽܠܳܗ̇ ܟܢܽܘܫܬܳܐ. ܕܰܒܢܰܝ̈ ܝܺܣܪܳܐܶܝܠ. ܐܰܪܥܳܐ ܕܰܥܒܰܪܢ ܒܳܗ̇ ܠܡܶܓܫܳܗ̇. ܛܳܒܳܐ ܗ̱ܝ ܐܰܪܥܳܐ ܛܳܒ.
8 ܐܶܢ ܨܳܒܶܐ ܒܰܢ ܡܳܪܝܳܐ ܘܡܰܥܶܠ ܠܰܢ ܠܰܐܪܥܳܐ ܗܳܕܶܐ ܘܝܳܗܶܒ ܠܳܗ̇ ܠܰܢ. ܐܰܪܥܳܐ ܗ̱ܝ ܕܡܰܪܕܝܳܐ ܚܰܠܒܳܐ ܘܕܶܒܫܳܐ.
9 ܒܰܠܚܽܘܕ ܥܰܠ ܡܳܪܝܳܐ ܠܳܐ ܬܶܡܪܕܽܘܢ. ܘܰܐܢ̱ܬܽܘܢ ܠܳܐ ܬܶܕܚܠܽܘܢ ܡܶܢ ܥܰܡܳܐ ܕܰܐܪܥܳܐ. ܡܶܛܽܠ ܕܠܰܚܡܰܢ ܐܶܢܽܘܢ. ܥܳܒܰܪ ܠܶܗ ܓܶܝܪ ܥܽܘܫܢܗܽܘܢ ܡܶܢܗܽܘܢ. ܘܡܳܪܝܳܐ ܥܰܡܰܢ ܗܽܘ. ܠܳܐ ܬܶܕܚܠܽܘܢ ܡܶܢܗܽܘܢ.
10 ܘܶܐܡܰܪܘ ܟܽܠܳܗ̇ ܟܢܽܘܫܬܳܐ ܠܡܶܪܓܰܡ ܐܶܢܽܘܢ ܒܟܺܐܦ̈ܶܐ. ܘܫܽܘܒܚܶܗ ܕܡܳܪܝܳܐ ܐܶܬܓܠܺܝ ܒܰܥܢܳܢܳܐ ܒܡܰܫܟܰܢܙܰܒܢܳܐ. ܠܥܺܝܢ ܟܽܠܗܽܘܢ ܒܢܰܝ̈ ܝܺܣܪܳܐܶܝܠ.
11 ܘܶܐܡܰܪ ܡܳܪܝܳܐ ܠܡܽܘܫܶܐ. ܥܕܰܡܳܐ ܠܶܐܡܰܬܝ ܡܰܪܓܙܺܝܢ ܠܺܝ ܥܰܡܳܐ ܗܳܢܳܐ. ܘܰܥܕܰܡܳܐ ܠܶܐܡܰܬܝ ܠܳܐ ܡܗܰܝܡܢܺܝܢ ܠܺܝ. ܒܟܽܠܗܽܘܢ ܐܳܬܘ̈ܳܬܳܐ ܕܥܶܒܕܶܬ ܒܰܝܢܳܬܗܽܘܢ.
12 ܐܶܡܚܶܐ ܐܶܢܽܘܢ ܒܡܰܘܬܳܢܳܐ. ܘܰܐܘܒܶܕ ܐܶܢܽܘܢ. ܘܶܐܥܒܕܳܟ ܠܥܰܡܳܐ ܕܪܰܒ ܘܥܰܫܺܝܢ ܡܶܢܗܽܘܢ.
13 ܘܶܐܡܰܪ ܡܽܘܫܶܐ ܠܡܳܪܝܳܐ. ܢܶܫܡܥܽܘܢ ܡܶܨܖ̈ܳܝܶܐ. ܕܰܐܣܶܩܬ ܒܚܰܝܠܳܟ ܠܥܰܡܳܐ ܗܳܢܳܐ ܡܶܢ ܒܰܝܢܳܬܗܽܘܢ.
14 ܘܢܺܐܡܪܽܘܢ ܥܳܡܽܘܖ̈ܶܝܗ̇ ܕܰܐܪܥܳܐ ܗܳܕܶܐ. ܕܰܫܡܰܥܘ ܕܰܐܢ̱ܬ ܗܽܘ ܡܳܪܝܳܐ ܒܓܰܘܶܗ ܕܥܰܡܳܐ ܗܳܢܳܐ. ܕܥܺܝܢ ܒܥܺܝܢ ܐܶܬܚܙܺܝܬ ܡܳܪܝܳܐ. ܘܰܥܢܳܢܳܟ ܩܳܝܡܳܐ ܠܥܶܠ ܡܶܢܗܽܘܢ. ܘܰܒܥܰܡܽܘܕܳܐ ܕܰܥܢܳܢܳܐ ܐܶܙܰܠܬ ܩܕܳܡܰܝܗܽܘܢ ܒܺܐܝܡܳܡܳܐ. ܘܰܒܥܰܡܽܘܕܳܐ ܕܢܽܘܪܳܐ ܒܠܺܠܝܳܐ.
15 ܘܡܳܐ ܕܰܩܛܰܠܬܳܝܗܝ ܠܥܰܡܳܐ ܗܳܢܳܐ ܐܰܝܟ ܚܰܕ ܓܒܰܪ. ܢܺܐܡܪܽܘܢ ܥܰܡ̈ܡܶܐ ܕܰܫܡܰܥܘ ܫܶܡܥܳܟ.
16 ܡܶܛܽܠ ܕܠܳܐ ܐܶܫܟܰܚ ܡܳܪܝܳܐ ܕܢܰܥܠܺܝܘܗܝ ܠܥܰܡܳܐ ܗܳܢܳܐ ܠܰܐܪܥܳܐ ܕܺܝܡܳܐ ܠܰܐܒܳܗܰܝ̈ܗܽܘܢ. ܥܰܠ ܗܰܘ ܗܽܘ ܢܰܟܶܣ ܐܶܢܽܘܢ ܒܡܰܕܒܪܳܐ.
17 ܘܗܳܫܳܐ ܢܺܐܪܰܒ ܚܰܝܠܳܟ ܡܳܪܝܳܐ. ܐܰܝܟ ܕܡܰܠܶܠܬ ܘܶܐܡܰܪܬ.
18 ܡܳܪܝܳܐ ܢܰܓܺܝܪܳܐ ܪܽܘܚܳܟ. ܘܣܰܓܺܝܐܳܐ ܛܰܝܒܽܘܬܳܟ. ܘܫܳܒܶܩ ܐܰܢ̱ܬ ܠܥܰܘܠܳܐ ܘܠܰܚܛܺܝܬܳܐ. ܘܰܡܙܰܟܳܝܽܘ ܠܳܐ ܡܙܰܟܶܐ ܐܰܢ̱ܬ. ܦܳܩܶܕ ܐܰܢ̱ܬ ܚܰܘ̈ܒܶܐ ܕܰܐܒܳܗ̈ܶܐ ܥܰܠ ܒܢܰܝ̈ܳܐ. ܘܥܰܠ ܒܢܰܝ̈ ܒܢܰܝ̈ܳܐ. ܥܰܠ ܬܠܳܬܳܐ ܘܥܰܠ ܐܰܪܒܥܳܐ ܕܳܖ̈ܺܝܢ.
19 ܫܒܽܘܩ ܗܳܫܳܐ ܠܥܰܘܠܶܗ ܕܥܰܡܳܐ ܗܳܢܳܐ ܐܰܝܟ ܣܽܘܓܐܳܐ ܕܛܰܝ̈ܒܘܳܬܳܟ. ܘܰܐܝܟ ܕܰܫܒܰܩܬ ܠܗܽܘܢ ܡܶܢ ܡܶܨܪܶܝܢ ܘܰܥܕܰܡܳܐ ܠܗܳܫܳܐ.
20 ܘܶܐܡܰܪ ܡܳܪܝܳܐ ܠܡܽܘܫܶܐ. ܫܶܒܩܶܬ ܠܗܽܘܢ ܐܰܝܟ ܡܶܠܬܳܟ.
21 ܒܪܰܡ ܕܶܝܢ ܚܰܝ ܐ̱ܢܳܐ. ܘܶܐܬܡܠܺܝ ܫܽܘܒܚܶܗ ܕܡܳܪܝܳܐ ܒܰܐܪܥܳܐ ܟܽܠܳܗ̇.
22 ܘܟܽܠܗܽܘܢ ܓܰܒܖ̈ܶܐ ܕܰܚܙܰܘ ܫܽܘܒܚܝ. ܘܳܐܬܘ̈ܳܬܳܐ ܕܥܶܒܕܶܬ ܒܡܶܨܪܶܝܢ ܘܰܒܡܰܕܒܪܳܐ. ܘܢܰܣܝܽܘܢܝ ܗܳܐ ܥܣܰܪ ܙܰܒܢܺܝ̈ܢ ܘܠܳܐ ܫܡܰܥܘ ܒܩܳܠܝ.
23 ܐܶܢ ܢܶܚܙܽܘܢܳܗ̇ ܠܰܐܪܥܳܐ ܕܺܝܡܺܝܬ ܠܰܐܒܳܗܰܝ̈ܗܽܘܢ. ܟܽܠ ܡܰܖ̈ܓܙܳܢܰܝ ܠܳܐ ܢܶܚܙܘܢܳܗ̇.
24 ܘܥܰܒܕܝ ܟܳܠܳܒ. ܚܠܳܦ ܕܰܗܘܳܬ ܪܽܘܚܝ ܥܰܡܶܗ. ܘܫܰܡܠܺܝ ܒܳܬܰܪܝ. ܐܰܥܠܺܝܘܗܝ ܠܰܐܪܥܳܐ ܕܥܰܠ ܠܬܰܡܳܢ. ܘܙܰܪܥܶܗ ܢܺܐܪܬܺܝܗ̇.
25 ܘܥܰܡܠܩܳܝ̈ܶܐ ܘܰܟܢܰܥ̈ܢܳܝܶܐ ܝܳܬܒܺܝܢ ܒܛܽܘܪܳܐ. ܡܚܳܪ ܐܶܬܦܢܰܘ ܘܰܫܩܽܘܠܘ ܠܟܽܘܢ ܠܡܰܕܒܪܳܐ ܠܽܐܘܪܚܳܐ ܕܝܰܡܳܐ ܕܣܽܘܦ.
26 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ ܘܥܰܡ ܐܰܗܪܽܘܢ. ܘܶܐܡܰܪ ܠܗܽܘܢ.
27 ܥܕܰܡܳܐ ܠܶܐܡܰܬܝ ܟܢܽܘܫܬܳܐ ܗܳܕܶܐ ܒܺܝܫܬܳܐ ܪܳܛܢܺܝܢ ܩܕܳܡܰܝ. ܪܶܛܢܳܐ ܕܪܳܛܢܺܝܢ ܩܕܳܡܰܝ ܒܢܰܝ̈ ܝܺܣܪܳܐܶܝܠ ܫܶܡܥܶܬ.
28 ܐܶܡܰܪ ܠܗܽܘܢ. ܚܰܝ ܐ̱ܢܳܐ ܐܳܡܰܪ ܡܳܪܝܳܐ. ܐܶܠܳܐ ܐܰܝܟ ܕܶܐܡܰܪܬܽܘܢ ܩܕܳܡܰܝ. ܗܳܟܰܢܳܐ ܐܶܥܒܶܕ ܠܟܽܘܢ.
29 ܒܡܰܕܒܪܳܐ ܗܳܢܳܐ ܢܶܦ̈ܠܳܢ ܫܠܰܕܰܝ̈ܟܽܘܢ. ܘܟܽܠܶܗ ܡܶܢܝܳܢܟܽܘܢ. ܘܟܽܠܶܗ ܚܽܘܫܒܳܢܟܽܘܢ. ܡܶܢ ܒܰܪ ܥܶܣܪܺܝܢ ܫܢܺܝ̈ܢ ܘܰܠܥܶܠ. ܥܰܠ ܕܰܪܛܶܢܬܽܘܢ ܥܠܰܝ.
30 ܠܳܐ ܬܶܥܠܽܘܢ ܠܰܐܪܥܳܐ ܕܰܐܪܺܝܡܶܬ ܐܺܝܕܝ ܠܡܰܫܪܝܽܘܬܟܽܘܢ ܒܳܗ̇. ܐܶܠܳܐ ܐܶܢ ܟܳܠܳܒ ܒܰܪ ܝܽܘܦܢܳܐ. ܘܝܶܫܽܘܥ ܒܰܪܢܽܘܢ.
31 ܘܺܝܩܰܪܬܟܽܘܢ ܕܶܐܡܰܪܬܽܘܢ. ܠܒܶܙܬܳܐ ܬܶܗܘܶܐ. ܘܰܒܢܰܝ̈ܟܽܘܢ ܕܠܳܐ ܝܺܕܰܥܘ ܝܰܘܡܳܢܳܐ ܛܳܒܬܳܐ ܘܒܺܝܫܬܳܐ. ܗܶܢܽܘܢ ܢܶܥܠܽܘܢ ܠܰܐܪܥܳܐ. ܘܰܐܝܬܶܐ ܐܶܢܽܘܢ ܘܢܶܕܥܽܘܢܳܗ̇ ܠܰܐܪܥܳܐ ܕܰܐܣܠܺܝܬܽܘܢ.
32 ܘܰܫܠܰܕܰܝ̈ܟܽܘܢ ܕܺܝܠܟܽܘܢ ܢܶܦ̈ܠܳܢ ܒܡܰܕܒܪܳܐ ܗܳܢܳܐ.
33 ܘܰܒܢܰܝ̈ܟܽܘܢ ܢܶܗܘܽܘܢ ܪܳܥܶܝܢ ܒܡܰܕܒܪܳܐ ܗܳܢܳܐ ܐܰܪܒܥܺܝܢ ܫܢܺܝ̈ܢ. ܘܰܢܩܰܒܠܽܘܢ ܙܳܢܝܽܘܬܟܽܘܢ. ܥܕܰܡܳܐ ܕܰܢܣܽܘ̈ܦܳܢ ܫܠܰܕܰܝ̈ܟܽܘܢ ܒܡܰܕܒܪܳܐ ܗܳܢܳܐ.
34 ܒܡܶܢܝܳܢܳܐ ܕܝܰܘ̈ܡܳܬܳܐ ܕܓܰܫܬܽܘܢܳܗ̇ ܠܰܐܪܥܳܐ ܐܰܪܒܥܺܝܢ ܝܰܘܡܺܝ̈ܢ. ܝܰܘܡܳܐ ܠܫܰܢ̱ܬܳܐ ܬܩܰܒܠܽܘܢ ܥܰܘܠܟܽܘܢ ܐܰܪܒܥܺܝܢ ܫܢܺܝ̈ܢ. ܘܬܶܕܥܽܘܢ ܕܥܰܠ ܕܰܪܛܶܢܬܽܘܢ ܩܕܳܡܰܝ.
35 ܐܶܢܳܐ ܡܳܪܝܳܐ ܐܶܡܪܶܬ. ܕܗܳܟܰܢܳܐ ܐܶܥܒܶܕ ܠܳܗ̇ ܠܟܽܠܳܗ̇ ܟܢܽܘܫܬܳܐ ܗܳܕܶܐ ܒܺܝܫܬܳܐ ܕܶܐܬܘܰܥܰܕܬܽܘܢ ܩܕܳܡܰܝ. ܒܡܰܕܒܪܳܐ ܗܳܢܳܐ ܢܣܽܘܦܽܘܢ. ܘܬܰܡܳܢ ܢܡܽܘܬܽܘܢ.
36 ܘܓܰܒܖ̈ܶܐ ܕܫܰܕܰܪ ܡܽܘܫܶܐ ܠܡܶܓܰܫ ܐܰܪܥܳܐ. ܗܦܰܟܘ ܐܰܪܛܶܢܘ ܥܠܰܘܗܝ ܟܽܠܳܗ̇ ܟܢܽܘܫܬܳܐ. ܕܢܰܦܩܽܘܢ ܛܶܒܳܐ ܒܺܝܫܳܐ ܥܰܠ ܐܰܪܥܳܐ.
37 ܘܡܺܝܬܘ ܓܰܒܖ̈ܶܐ ܕܰܐܦܶܩܘ ܛܶܒܳܐ ܒܺܝܫܳܐ ܥܰܠ ܐܰܪܥܳܐ ܒܡܰܘܬܳܢܳܐ ܕܡܶܢ ܫܶܠܝܳܐ ܩܕܳܡ ܡܳܪܝܳܐ.
38 ܘܝܶܫܽܘܥ ܒܰܪܢܽܘܢ. ܘܟܳܠܳܒ ܒܰܪ ܝܽܘܦܢܳܐ ܚܝܰܘ ܡܶܢ ܓܰܒܖ̈ܶܐ ܗܳܢܽܘܢ ܕܶܐܙܰܠܘ ܠܡܶܓܰܫ ܐܰܪܥܳܐ.
39 ܘܶܐܡܰܪ ܡܽܘܫܶܐ ܦܶܬܓܳܡ̈ܶܐ ܗܳܠܶܝܢ ܠܟܽܠܗܽܘܢ ܒܢܰܝ̈ ܝܺܣܪܳܐܶܝܠ. ܘܺܝܬܶܒܘ ܥܰܡܳܐ ܒܶܐܒܠܳܐ ܪܰܒܳܐ.
40 ܘܩܰܕܶܡܘ ܒܨܰܦܪܳܐ. ܘܰܣܠܶܩܘ ܠܪܺܝܫ ܛܽܘܪܳܐ. ܘܶܐܡܰܪܘ. ܗܳܐ ܣܳܠܩܺܝܢܰܢ ܠܰܐܬܪܳܐ ܕܶܐܡܰܪ ܠܰܢ ܡܳܪܝܳܐ ܥܰܠ ܕܰܚܛܰܝܢ.
41 ܘܶܐܡܰܪ ܠܗܽܘܢ ܡܽܘܫܶܐ. ܠܡܳܢܳܐ ܥܒܰܪܬܽܘܢ ܥܰܠ ܡܠܰܬ ܦܽܘܡܶܗ ܕܡܳܪܝܳܐ. ܡܶܛܽܠ ܗܳܢܳܐ ܠܳܐ ܡܰܣܩܺܝܢ ܐܢ̱ܬܽܘܢ ܠܪܺܝܫ.
42 ܠܳܐ ܬܶܣܩܽܘܢ ܡܶܛܽܠ ܕܠܳܐ ܗܘܳܐ ܥܰܡܟܽܘܢ ܡܳܪܝܳܐ. ܕܠܳܐ ܬܶܬܰܒܪܽܘܢ ܩܕܳܡ ܒܥܶܠܕܒܳܒܰܝ̈ܟܽܘܢ.
43 ܡܶܛܽܠ ܕܰܟܢܰܥ̈ܢܳܝܶܐ ܘܥܰܡܠܩܳܝ̈ܶܐ. ܐܺܝܬ ܬܰܡܳܢ ܩܕܳܡܰܝܟܽܘܢ. ܘܬܶܦܠܽܘܢ ܒܚܰܪܒܳܐ. ܥܰܠ ܕܰܗܦܰܟܬܽܘܢ ܡܶܢ ܒܳܬܰܪ ܡܳܪܝܳܐ. ܘܠܳܐ ܢܶܗܘܶܐ ܡܳܪܝܳܐ ܥܰܡܟܽܘܢ.
44 ܘܫܰܪܺܝܘ ܠܡܶܣܰܩ ܠܪܺܝܫ ܛܽܘܪܳܐ. ܘܩܺܐܒܽܘܬܳܐ ܕܰܩܝܳܡܶܗ ܕܡܳܪܝܳܐ ܘܡܽܘܫܶܐ. ܠܳܐ ܦܪܰܩܘ ܡܶܢ ܓܰܘ ܡܰܫܪܺܝܬܳܐ.
45 ܘܰܢܚܶܬܘ ܥܰܡܠܩܳܝ̈ܶܐ ܘܰܟܢܰܥ̈ܢܳܝܶܐ ܕܝܳܬܒܺܝܢ ܒܛܽܘܪܳܐ ܗܰܘ. ܘܰܚܪܰܒܘ ܐܶܢܽܘܢ. ܘܰܪܕܰܦܘ ܐܶܢܽܘܢ ܥܕܰܡܳܐ ܠܚܶܪܡܳܐ.