Numbers 31
The Book of Numbers
܀ ܡܢܝܢܐ ܠܐ ܀
1 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.
2 ܐܶܬܒܰܥ ܥܝܳܪܬܳܐ ܕܰܒܢܰܝ̈ ܝܺܣܪܳܐܶܝܠ ܡܶܢ ܡܶܕܝܰܢܳܝ̈ܶܐ. ܘܗܳܝܕܶܝܢ ܬܶܬܟܢܶܫ ܠܘܳܬ ܥܰܡܳܟ.
3 ܘܶܐܡܰܪ ܡܽܘܫܶܐ ܠܥܰܡܳܐ. ܙܰܝܶܢܘ ܡܶܢܟܽܘܢ ܓܰܒܖ̈ܶܐ ܠܚܰܝܠܳܐ. ܘܢܶܗܘܽܘܢ ܥܰܠ ܡܶܕܝܰܢܳܝ̈ܶܐ ܘܢܶܬܒܥܽܘܢ ܬܒܰܥܬܶܗ ܕܡܳܪܝܳܐ ܡܶܢ ܡܶܕܝܰܢܳܝ̈ܶܐ.
4 ܐܳܠܶܦ ܐܳܠܶܦ ܡܶܢ ܫܰܒܛܳܐ. ܡܶܢ ܟܽܠܗܽܘܢ ܫܰܒ̈ܛܶܐ ܕܰܒܢܰܝ̈ ܝܺܣܪܳܐܶܝܠ. ܫܰܕܰܪܘ ܒܚܰܝܠܳܐ.
5 ܘܶܐܬܓܒܺܝܘ ܡܶܢ ܫܰܒ̈ܛܶܐ ܕܰܒܢܰܝ̈ ܝܺܣܪܳܐܶܝܠ ܐܰܠܦܳܐ ܐܰܠܦܳܐ ܡܶܢ ܫܰܒܛܳܐ. ܬܪܶܥܣܰܪ ܐܰܠܦܺܝ̈ܢ ܕܰܡܙܰܝܢܺܝܢ ܒܚܰܝܠܳܐ.
6 ܘܫܰܕܰܪ ܐܶܢܽܘܢ ܡܽܘܫܶܐ ܐܳܠܶܦ ܡܶܢ ܫܰܒܛܳܐ. ܬܪܶܥܣܰܪ ܐܰܠܦܺܝ̈ܢ ܕܰܡܙܰܝܢܺܝܢ. ܠܗܽܘܢ ܘܰܠܦܺܝܢܚܶܣ ܒܰܪ ܐܶܠܺܝܥܳܙܳܪ ܟܳܗܢܳܐ ܒܚܰܝܠܳܐ. ܘܡܳܐܢ̈ܶܐ ܕܩܽܘܕܫܳܐ ܘܩܰܖ̈ܢܳܬܳܐ ܕܝܽܘܒܳܒܳܐ ܒܺܐܝܕܶܗ.
7 ܘܶܐܬܚܰܝܰܠܘ ܥܰܠ ܡܶܕܝܰܢ ܐܰܝܟ ܕܦܰܩܶܕ ܡܳܪܝܳܐ ܠܡܽܘܫܶܐ. ܘܩܰܛܶܠܘ ܟܽܠ ܕܶܟܪܳܐ.
8 ܘܰܠܡܰܠ̈ܟܶܐ ܕܡܶܕܝܰܢ ܩܛܰܠܘ ܥܰܡ ܩܛܺܝܠܰܝ̈ܗܽܘܢ. ܠܳܐܘܺܝ ܘܠܰܪܩܶܡ. ܘܰܠܨܽܘܪ. ܘܰܠܚܽܘܪ. ܘܠܰܪܒܳܥ. ܚܰܡܫܳܐ ܡܰܠ̈ܟܶܐ ܡܶܕܝܰܢܳܝ̈ܶܐ. ܘܰܠܒܶܠܥܰܡ ܒܰܪ ܒܳܥܽܘܪ ܩܛܰܠܘ ܒܚܰܪܒܳܐ.
9 ܘܰܫܒܰܘ ܒܢܰܝ̈ ܝܺܣܪܳܐܶܝܠ ܠܢܶܫ̈ܶܐ ܕܡܶܕܝܰܢ. ܘܠܺܝܩܰܪܬܗܽܘܢ. ܘܰܠܟܽܠܶܗ ܒܥܺܝܪܗܽܘܢ. ܘܰܠܟܽܠܶܗ ܩܶܢܝܳܢܗܽܘܢ. ܘܰܠܟܽܠܗܽܘܢ ܢܶܟܣܰܝ̈ܗܽܘܢ ܒܰܙܘ.
10 ܘܰܠܟܽܠܗܶܝܢ ܩܽܘܖ̈ܝܳܐ ܕܒܶܝܬ ܡܰܥܡܰܪܗܽܘܢ. ܘܰܠܟܽܠܗܽܘܢ ܫܶܛܚܰܝ̈ܗܽܘܢ ܐܰܘܩܶܕܘ ܒܢܽܘܪܳܐ.
11 ܘܰܕܒܰܪܘ ܠܟܽܠܳܗ̇ ܫܒܺܝܬܳܐ. ܘܰܠܟܽܠܳܗ̇ ܕܒܳܪܬܳܐ ܕܰܒܢܰܝ̈ܢܳܫܳܐ. ܘܕܰܒܥܺܝܪܳܐ.
12 ܘܰܐܝܬܝܽܘܗ̇ ܠܘܳܬ ܡܽܘܫܶܐ. ܘܰܠܘܳܬ ܐܶܠܺܝܥܳܙܳܪ ܟܳܗܢܳܐ. ܘܰܠܘܳܬ ܟܽܠܳܗ̇ ܟܢܽܘܫܬܳܐ ܕܰܒܢܰܝ̈ ܝܺܣܪܳܐܶܝܠ. ܫܒܺܝܬܳܐ. ܘܰܕܒܳܪܬܳܐ. ܘܒܶܙܬܳܐ ܠܡܰܫܪܺܝܬܳܐ. ܠܥܰܪܒܽܘܬ ܡܽܘܐܳܒ ܕܥܰܠ ܝܽܘܪܕܢܳܢ ܕܺܐܝܪܺܝܚܽܘ.
13 ܘܰܢܦܰܩܘ ܡܽܘܫܶܐ ܘܶܐܠܺܝܥܳܙܳܪ ܟܳܗܢܳܐ. ܘܟܽܠܗܽܘܢ ܪܰܘܖ̈ܒܳܢܶܐ ܕܰܟܢܽܘܫܬܳܐ ܠܽܐܘܪܥܗܽܘܢ ܠܒܰܪ ܡܶܢ ܡܰܫܪܺܝܬܳܐ.
14 ܘܰܪܓܶܙ ܡܽܘܫܶܐ ܥܰܠ ܦܳܩܽܘ̈ܕܶܐ ܕܚܰܝܠܳܐ. ܖ̈ܺܝܫܰܝ. ܐܰܠܦ̈ܶܐ. ܘܖ̈ܺܝܫܰܝ ܡܰܐܘ̈ܳܬܳܐ. ܕܶܐܬܰܘ ܡܶܢ ܚܰܝܠܳܐ ܕܰܩܪܳܒܳܐ.
15 ܘܶܐܡܰܪ ܠܗܽܘܢ ܡܽܘܫܶܐ. ܠܡܳܢܳܐ ܐܰܚܺܝܬܽܘܢ ܟܽܠܗܶܝܢ ܢܶܩ̈ܒܳܬܳܐ.
16 ܕܗܶܢܶܝܢ ܗܘܰܝ̈ ܬܽܘܩܠܬܳܐ ܠܰܒܢܰܝ̈ ܝܺܣܪܳܐܶܝܠ ܒܡܶܠܬܶܗ ܕܒܶܠܥܰܡ. ܘܰܡܪܰܕܘ ܘܰܐܥܠܺܝܘ ܒܡܳܪܝܳܐ ܒܰܨܒܽܘܬܳܐ ܕܰܦܥܽܘܪ. ܘܰܗܘܳܐ ܡܰܘܬܳܢܳܐ ܕܡܶܢ ܫܶܠܝܳܐ ܒܰܟܢܽܘܫܬܶܗ ܕܡܳܪܝܳܐ.
17 ܗܳܫܳܐ ܩܛܽܘܠܘ ܟܽܠܗܽܘܢ ܛܠܳܝ̈ܶܐ ܕܶܟܖ̈ܶܐ. ܘܟܽܠ ܐܰܢ̱ܬܬܳܐ ܕܝܳܕܥܳܐ ܡܰܕܡܟܳܐ ܕܕܶܟܖ̈ܶܐ. ܩܛܽܘܠܘ.
18 ܘܟܽܠ ܝܺܩܰܪܬܳܐ ܕܢܶܫ̈ܶܐ ܕܠܳܐ ܝܺܕܰܥܝ̈ ܡܰܕܡܟܳܐ ܕܕܶܟܖ̈ܶܐ ܐܰܚܰܘ ܠܟܽܘܢ.
19 ܐܰܢ̱ܬܽܘܢ ܕܶܝܢ ܫܪܰܘ ܠܒܰܪ ܡܶܢ ܡܰܫܪܺܝܬܳܐ ܫܰܒܥܳܐ ܝܰܘܡܺܝ̈ܢ. ܟܽܠ ܕܰܩܛܰܠ ܢܰܦܫܳܐ ܘܟܽܠ ܕܰܩܪܶܒ ܠܰܩܛܺܝܠܳܐ. ܪܽܘܣܘ ܥܠܰܘܗܝ ܒܝܰܘܡܳܐ ܕܰܬܠܳܬܳܐ. ܘܰܒܝܰܘܡܳܐ ܕܫܰܒܥܳܐ. ܐܰܢ̱ܬܽܘܢ ܘܰܫܒܺܝܬܟܽܘܢ.
20 ܘܟܽܠܳܗ̇ ܬܰܟܣܺܝܬܳܐ. ܘܟܽܠ ܡܳܐܢܳܐ ܕܡܶܫܟܳܐ. ܘܟܽܠ ܡܳܐܢܳܐ ܕܣܰܥܪܳܐ. ܘܟܽܠ ܡܳܐܢܳܐ ܕܩܰܝܣܳܐ ܪܽܘܣܘ ܥܠܰܘܗܝ.
21 ܘܶܐܡܰܪ ܐܶܠܺܝܥܳܙܳܪ ܟܳܗܢܳܐ ܠܓܰܒܖ̈ܶܐ ܕܚܰܝܠܳܐ ܕܶܐܬܰܘ ܡܶܢ ܩܪܳܒܳܐ. ܗܳܢܳܐ ܦܽܘܩܕܳܢܳܐ ܕܢܳܡܽܘܣܳܐ ܕܦܰܩܶܕ ܡܳܪܝܳܐ ܠܡܽܘܫܶܐ.
22 ܒܪܰܡ ܕܶܝܢ ܕܰܗܒܳܐ. ܘܣܺܐܡܳܐ. ܘܰܢܳܚܫܳܐ. ܘܦܰܪܙܠܳܐ. ܘܰܐܢܟܳܐ. ܘܰܐܒܳܪܳܐ.
23 ܘܟܽܠ ܡܶܕܶܡ ܕܥܳܐܶܠ ܠܟܽܘܪܳܐ. ܐܰܥܒܪܽܘܗܝ ܒܢܽܘܪܳܐ. ܘܢܶܬܕܰܟܶܐ. ܘܡܰܝ̈ܳܐ ܕܰܪܣܳܣܳܐ ܪܽܘܣܘ ܥܠܰܘܗܝ. ܘܟܽܠ ܕܠܳܐ ܥܳܒܰܪ ܒܢܽܘܪܳܐ ܐܰܥܡܕܽܘܗܝ ܒܡܰܝ̈ܳܐ.
24 ܘܚܰܠܶܠܘ ܡܳܐܢܰܝ̈ܟܽܘܢ ܒܝܰܘܡܳܐ ܕܫܰܒܥܳܐ ܘܬܶܬܕܰܟܽܘܢ. ܘܒܳܬܰܪܟܶܢ ܬܶܥܠܽܘܢ ܠܡܰܫܪܺܝܬܳܐ.
25 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.
26 ܩܰܒܶܠ ܚܽܘܫܒܳܢܳܐ ܕܰܕܒܳܪܬܳܐ. ܘܕܰܫܒܺܝܬܳܐ ܕܰܒܢܰܝ̈ܢܳܫܳܐ. ܘܕܰܒܥܺܝܪܳܐ. ܐܰܢ̱ܬ ܘܶܐܠܺܝܥܳܙܳܪ ܟܳܗܢܳܐ. ܘܖ̈ܺܝܫܰܝ ܐܰܒܳܗ̈ܳܬܳܐ ܕܰܟܢܽܘܫܬܳܐ.
27 ܘܦܰܠܶܓܘ ܕܒܳܪܬܳܐ ܒܶܝܬ ܓܰܒܖ̈ܶܐ ܥܳܒ̈ܕܰܝ ܩܪܳܒܳܐ ܕܰܢܦܰܩܘ ܒܚܰܝܠܳܐ. ܘܒܶܝܬ ܟܽܠܳܗ̇ ܟܢܽܘܫܬܳܐ.
28 ܘܰܦܪܽܘܫܘ ܡܰܟܣܳܐ ܠܡܳܪܝܳܐ ܡܶܢ ܓܰܒܖ̈ܶܐ ܥܳܒ̈ܕܰܝ ܩܪܳܒܳܐ ܕܰܢܦܰܩܘ ܒܚܰܝܠܳܐ ܡܶܢ ܟܽܠܳܗ̇ ܟܢܽܘܫܬܳܐ. ܚܕܳܐ ܢܰܦܫܳܐ ܡܶܢ ܚܰܡܫܺܝܢ ܡܶܢ ܒܢܰܝ̈ܢܳܫܳܐ. ܘܡܶܢ ܬܰܘܖ̈ܶܐ. ܘܡܶܢ ܚܶܡܖ̈ܳܐ. ܘܡܶܢ ܥܳܢ̈ܳܐ.
29 ܘܡܶܢ ܦܳܠܓܽܘܬܗܽܘܢ ܣܰܒ. ܘܗܰܒ ܠܶܐܠܺܝܥܳܙܳܪ ܟܳܗܢܳܐ ܦܽܘܪܫܳܢܶܗ ܕܡܳܪܝܳܐ.
30 ܘܡܶܢ ܦܳܠܓܽܘܬܳܐ ܕܰܒܢܰܝ̈ ܝܺܣܪܳܐܶܝܠ. ܣܰܒ ܚܰܕ ܡܶܢ ܚܰܡܫܺܝܢ ܡܶܢ ܐ̱ܢܳܫ̈ܳܐ. ܘܡܶܢ ܬܰܘܖ̈ܶܐ. ܘܡܶܢ ܚܶܡܖ̈ܳܐ. ܘܡܶܢ ܟܽܠܶܗ ܒܥܺܝܪܳܐ. ܘܗܰܒ ܐܶܢܽܘܢ ܠܠܶܘ̈ܳܝܶܐ ܕܢܳܛܪܺܝܢ ܡܰܛܰܪܬܳܐ ܕܡܰܫܟܢܶܗ ܕܡܳܪܝܳܐ.
31 ܘܰܥܒܰܕܘ ܡܽܘܫܶܐ ܘܶܐܠܺܝܥܳܙܳܪ ܟܳܗܢܳܐ. ܐܰܝܟ ܕܦܰܩܶܕ ܡܳܪܝܳܐ ܠܡܽܘܫܶܐ.
32 ܘܰܗܘܳܬ ܕܒܳܪܬܳܐ ܘܰܫܒܺܝܬܳܐ ܕܒܰܙܘ ܥܰܡܳܐ ܘܚܰܝܠܳܐ. ܥܳܢ̈ܳܐ ܫܶܬܡܳܐܐ ܘܫܰܒܥܺܝܢ ܘܚܰܡܫܳܐ ܐܰܠܦܺܝ̈ܢ.
33 ܘܬܰܘܖ̈ܶܐ ܫܰܒܥܺܝܢ ܘܰܬܪܶܝܢ ܐܰܠܦܺܝ̈ܢ.
34 ܘܚܶܡܖ̈ܳܐ ܫܬܺܝܢ ܘܚܰܕ ܐܰܠܦܺܝ̈ܢ.
35 ܘܢܰܦ̈ܫܳܬܳܐ ܕܐ̱ܢܳܫ̈ܳܐ ܡܶܢ ܢܶܫ̈ܶܐ ܕܠܳܐ ܝܺܕܰܥܝ̈ ܡܰܕܡܟܳܐ ܕܕܶܟܖ̈ܶܐ. ܟܽܠܗܶܝܢ ܢܰܦ̈ܫܳܬܳܐ ܬܠܳܬܺܝܢ ܘܰܬܪܶܝܢ ܐܰܠܦܺܝ̈ܢ.
36 ܘܰܗܘܳܬ ܦܳܠܓܽܘܬܳܐ ܒܰܡܢܳܬܳܐ ܕܰܐܝܠܶܝܢ ܕܰܢܦܰܩܘ ܒܚܰܝܠܳܐ. ܥܳܢ̈ܳܐ ܬܠܳܬܡܳܐܐ ܘܰܬܠܳܬܺܝܢ ܘܫܰܒܥܳܐ ܐܰܠܦܺܝ̈ܢ ܘܚܰܡܶܫܡܳܐܐ.
37 ܘܰܗܘܳܐ ܡܰܟܣܳܐ ܠܡܳܪܝܳܐ ܡܶܢ ܥܳܢ̈ܳܐ. ܫܬܳܐ ܐܰܠܦܺܝ̈ܢ ܘܰܫܒܰܥܡܳܐܐ ܘܚܰܡܫܺܝܢ.
38 ܘܬܰܘܖ̈ܶܐ ܬܠܳܬܺܝܢ ܘܶܫܬܳܐ ܐܰܠܦܺܝ̈ܢ. ܘܡܰܟܣܗܽܘܢ ܠܡܳܪܝܳܐ ܫܒܰܥܡܳܐܐ ܘܥܶܣܪܺܝܢ.
39 ܘܚܶܡܖ̈ܳܐ ܬܠܳܬܺܝܢ ܐܰܠܦܺܝ̈ܢ ܘܚܰܡܶܫܡܳܐܐ. ܘܡܰܟܣܗܽܘܢ ܠܡܳܪܝܳܐ ܫܶܬܡܳܐܐ ܘܥܶܣܪܳܐ.
40 ܘܢܰܦ̈ܫܳܬܳܐ ܕܐ̱ܢܳܫ̈ܳܐ ܫܬܳܬܰܥܣܰܪ ܐܰܠܦܺܝ̈ܢ. ܘܡܰܟܣܗܽܘܢ ܠܡܳܪܝܳܐ ܬܠܳܬܡܳܐܐ ܘܥܶܣܪܺܝܢ ܢܰܦ̈ܫܳܢ.
41 ܘܝܰܗܒ ܡܽܘܫܶܐ ܡܰܟܣܳܐ ܕܦܽܘܪܫܳܢܳܐ ܕܡܳܪܝܳܐ ܠܶܐܠܺܝܥܳܙܳܪ ܟܳܗܢܳܐ. ܐܰܝܟ ܕܦܰܩܶܕ ܡܳܪܝܳܐ ܠܡܽܘܫܶܐ.
42 ܡܶܢ ܦܳܠܓܽܘܬܳܐ ܕܰܒܢܰܝ̈ ܝܺܣܪܳܐܶܝܠ. ܕܦܰܠܶܓ ܠܗܽܘܢ ܡܽܘܫܶܐ ܡܶܢ ܓܰܒܖ̈ܶܐ ܕܰܢܦܰܩܘ ܒܚܰܝܠܳܐ.
43 ܘܰܗܘܳܬ ܦܳܠܓܽܘܬܳܐ ܕܰܟܢܽܘܫܬܳܐ ܡܶܢ ܥܳܢ̈ܳܐ. ܬܠܳܬܡܳܐܐ ܘܰܬܠܳܬܺܝܢ ܘܫܰܒܥܳܐ ܐܰܠܦܺܝ̈ܢ ܘܚܰܡܶܫ ܡܳܐܐ.
44 ܘܬܰܘܖ̈ܶܐ ܬܠܳܬܺܝܢ ܘܶܫܬܳܐ ܐܰܠܦܺܝ̈ܢ.
45 ܘܚܶܡܖ̈ܳܐ ܬܠܳܬܺܝܢ ܐܰܠܦܺܝ̈ܢ ܘܚܰܡܶܫܡܳܐܐ.
46 ܘܢܰܦ̈ܫܳܬܳܐ ܕܐ̱ܢܳܫ̈ܳܐ ܫܬܳܬܰܥܣܰܪ ܐܰܠܦܺܝ̈ܢ.
47 ܘܰܢܣܰܒ ܡܽܘܫܶܐ ܡܶܢ ܦܳܠܓܽܘܬܳܐ ܕܰܒܢܰܝ̈ ܝܺܣܪܳܐܶܝܠ. ܚܰܕ ܡܶܢ ܚܰܡܫܺܝܢ ܡܶܢ ܒܢܰܝ̈ܢܳܫܳܐ ܘܡܶܢ ܒܥܺܝܪܳܐ. ܘܝܰܗܒ ܐܶܢܽܘܢ ܠܠܶܘ̈ܳܝܶܐ ܕܢܳܛܪܺܝܢ ܡܰܛܰܪܬܳܐ ܕܡܰܫܟܢܶܗ ܕܡܳܪܝܳܐ. ܐܰܝܟ ܕܦܰܩܶܕ ܡܳܪܝܳܐ ܠܡܽܘܫܶܐ.
48 ܘܰܩܪܶܒܘ ܠܘܳܬ ܡܽܘܫܶܐ ܓܰܒܖ̈ܶܐ ܕܰܦܩܺܝܕܺܝܢ ܥܰܠ ܐܰܠܦ̈ܶܐ ܕܚܰܝܠܳܐ. ܖ̈ܺܝܫܰܝ ܐܰܠܦ̈ܶܐ. ܘܖ̈ܺܝܫܰܝ ܡܰܐܘ̈ܳܬܳܐ.
49 ܘܶܐܡܰܪܘ ܠܡܽܘܫܶܐ. ܥܰܒܕܰܝ̈ܟ ܩܰܒܶܠܘ ܚܽܘܫܒܳܢܳܐ ܕܓܰܒܖ̈ܶܐ ܕܚܰܝܠܳܐ ܥܳܒܕܰܝ̈ ܩܪܳܒܳܐ ܕܥܰܡܰܢ. ܘܠܳܐ ܛܥܳܐ ܡܶܢܰܢ ܓܒܰܪ.
50 ܘܩܰܪܒܢ ܩܽܘܪܒܳܢܶܗ ܕܡܳܪܝܳܐ. ܓܰܒܪܳܐ ܕܶܐܫܟܰܚ ܡܳܐܢ̈ܶܐ ܕܕܰܗܒܳܐ. ܐܰܩ̈ܠܳܢܶܐ. ܘܫܶܐܖ̈ܶܐ. ܘܥܶܙ̈ܩܳܬܳܐ. ܘܰܩ̈ܕܳܫܶܐ. ܘܗܰܡܢܺܝ̈ܟܶܐ. ܕܰܢܚܰܣܶܐ ܥܰܠ ܢܰܦ̈ܫܳܬܰܢ ܩܕܳܡ ܡܳܪܝܳܐ.
51 ܘܰܢܣܰܒ ܡܽܘܫܶܐ ܘܶܐܠܺܝܥܳܙܳܪ ܟܳܗܢܳܐ ܕܰܗܒܳܐ ܡܶܢܗܽܘܢ. ܟܽܠܗܽܘܢ ܡܳܐܢ̈ܶܐ ܕܰܥܒܳܕܳܐ.
52 ܘܰܗܘܳܐ ܟܽܠܶܗ ܕܰܗܒܳܐ ܕܦܽܘܪܫܳܢܳܐ ܕܰܐܦܪܶܫܘ ܠܡܳܪܝܳܐ. ܫܬܳܬܰܥܣܰܪ ܐܰܠܦܺܝ̈ܢ ܘܰܫܒܰܥ ܡܳܐܐ ܘܚܰܡܫܺܝܢ ܡܰܬܩ̈ܳܠܺܝܢ. ܡܶܢ ܖ̈ܺܝܫܰܝ ܐܰܠܦ̈ܶܐ. ܘܡܶܢ ܖ̈ܺܝܫܰܝ ܡܰܐܘ̈ܳܬܳܐ.
53 ܓܰܒܖ̈ܶܐ ܕܶܝܢ ܕܚܰܝܠܳܐ. ܒܰܙܘ ܠܗܽܘܢ ܐ̱ܢܳܫ ܠܢܰܦܫܶܗ.
54 ܘܰܢܣܰܒ ܡܽܘܫܶܐ ܘܶܐܠܺܝܥܳܙܳܪ ܟܳܗܢܳܐ. ܕܰܗܒܳܐ ܡܶܢ ܖ̈ܺܝܫܰܝ ܐܰܠܦ̈ܶܐ. ܘܡܶܢ ܖ̈ܺܝܫܰܝ ܡܰܐܘ̈ܳܬܳܐ. ܘܰܐܝܬܝܽܘܗܝ ܠܡܰܫܟܰܢ ܙܰܒܢܳܐ. ܕܽܘܟܪܳܢܳܐ ܠܰܒܢܰܝ̈ ܝܺܣܪܳܐܶܝܠ ܩܕܳܡ ܡܳܪܝܳܐ.