Jeremiah 10
The Book of Jeremiah
܀ ܐܪܡܝܐ ܝ ܀
1 ܫܡܰܥܘ ܦܶܬܓܳܡܳܐ ܕܶܐܡܰܪ ܡܳܪܝܳܐ ܥܠܰܝܟܽܘܢ ܕܒܶܝܬ ܝܺܣܪܳܐܶܝܠ.
2 ܗܳܟܰܢܳܐ ܐܳܡܰܪ ܡܳܪܝܳܐ: ܐܽܘܪܚܳܐ ܕܥܰܡ̈ܡܶܐ ܠܳܐ ܬܺܐܠܦܽܘܢ: ܘܡܶܢ ܐܳܬܘ̈ܳܬܳܐ ܕܰܫܡܰܝܳܐ ܠܳܐ ܬܶܕܚܠܽܘܢ: ܡܶܛܽܠ ܕܥܰܡ̈ܡܶܐ ܗ̱ܘ̣ ܕܳܚܠܺܝܢ ܡܶܢܗܶܝܢ.
3 ܡܶܛܽܠ ܕܕܶܚ̈ܠܳܬܳܐ ܕܥܰܡ̈ܡܶܐ ܠܳܐ ܡܶܕܶܡ ܐܶܢܶܝܢ: ܡܶܛܽܠ ܕܩܰܝܣܳܐ ܡܶܢ ܥܳܒܳܐ ܦܣܺܝܩ: ܥܒܳܕ ܐܺܝܕܰܝ̈ ܢܰܓܳܪܳܐ ܒܥܶܫܦܳܐ.
4 ܒܟܶܣܦܳܐ ܘܰܒܕܰܗܒܳܐ ܩܪܺܝܡܺܝܢ: ܒܩܰܦ̈ܠܽܘܛܶܐ ܘܰܒܨܶܨ̈ܶܐ ܡܫܰܪܪܺܝܢ ܠܗܽܘܢ ܕܠܳܐ ܢܶܬܦܰܪܩܽܘܢ.
5 ܐܰܝܟ ܕܶܩ̈ܠܶܐ ܙܩܺܝܦܺܝܢ ܘܠܳܐ ܡܡܰܠܠܺܝܢ: ܡܶܫܩܰܠ ܫܳܩܠܺܝܢ ܠܗܽܘܢ ܡܶܛܽܠ ܕܠܳܐ ܡܗܰܠܟܺܝܢ. ܠܳܐ ܬܶܕܚܠܽܘܢ ܡܶܢܗܽܘܢ: ܡܶܛܽܠ ܕܠܳܐ ܡܰܒܐܫܺܝܢ ܐܳܦܠܳܐ ܡܰܛܐܒܺܝܢ.
6 ܠܰܝܬ ܐܰܟܘܳܬܳܟ ܡܳܪܝܳܐ: ܕܪܰܒ ܐܰܢ̱ܬ ܘܪܰܒ ܫܡܳܟ ܒܓܰܢ̱ܒܳܪܽܘܬܳܐ.
7 ܡܰܢ ܠܳܐ ܢܶܕܚܰܠ ܠܳܟ ܡܰܠܟܳܐ ܕܟܽܠܗܽܘܢ ܥܳܠ̈ܡܶܐ: ܕܠܳܟ ܗ̱ܘ ܝܳܐܝܳܐ ܡܰܠܟܽܘܬܳܐ: ܡܶܛܽܠ ܕܰܒܟܽܠܗܽܘܢ ܚܰܟܺܝ̈ܡܶܐ ܕܥܰܡ̈ܡܶܐ: ܘܰܒܟܽܠܳܗ̇ ܡܰܠܟܽܘܬܗܽܘܢ ܠܰܝܬ ܐܰܟܘܳܬܳܟ.
8 ܘܰܐܟܚܕܳܐ ܢܺܐܒܕܽܘܢ ܘܰܢܣܽܘܦܽܘܢ ܝܽܘܠܦܳܢ̈ܶܐ ܣܖ̈ܺܝܩܶܐ ܕܕܶܚ̈ܠܳܬܳܐ ܕܩܰܝܣܳܐ.
9 ܣܺܐܡܳܐ ܛܳܒܳܐ ܡܶܢ ܬܰܪܫܺܝܫ ܐܳܬܶܐ: ܘܕܰܗܒܳܐ ܡܶܢ ܐܰܘܦܺܝܪ: ܒܰܕ ܢܰܓܳܪܳܐ ܘܺܐܝܕܰܝ̈ ܩܰܝܢܳܝܳܐ: ܬܶܟܠܬܳܐ ܘܰܐܪܓܘܳܢܳܐ ܠܒܽܘܫܗܽܘܢ: ܙܩܽܘܪܳܐ ܕܚܰܟܺܝ̈ܡܶܐ.
10 ܘܡܳܪܝܳܐ ܐܰܠܳܗܳܐ ܕܩܽܘܫܬܳܐ܆ ܗܽܘܝܽܘ ܐܰܠܳܗܳܐ ܕܚܰܝ̈ܶܐ: ܘܡܰܠܟܳܐ ܕܥܳܠ̈ܡܶܐ: ܡܶܢ ܪܽܘܓܙܳܐ ܙܳܝܥܳܐ ܐܰܪܥܳܐ: ܘܠܳܐ ܡܚܰܡܣܢܺܝܢ ܥܰܡ̈ܡܶܐ ܪܽܘܓܙܳܐ.
11 ܗܳܟܰܢܳܐ ܐܶܡܰܪ ܠܗܽܘܢ: ܐܰܠܳܗ̈ܶܐ ܕܰܫܡܰܝܳܐ ܘܰܐܪܥܳܐ ܠܳܐ ܥܒܰܕܘ: ܢܺܐܒܕܽܘܢ ܡܶܢ ܐܰܪܥܳܐ: ܘܡܶܢ ܬܚܶܝܬ ܫܡܰܝܳܐ ܗܳܠܶܝܢ.
12 ܡܳܪܝܳܐ ܥ̣ܒܰܕ ܐܰܪܥܳܐ ܒܚܰܝܠܶܗ: ܘܰܐܬܩܶܢ ܬܶܒܺܝܠ ܒܚܶܟܡܬܶܗ: ܘܰܒܬܰܪܥܺܝܬܶܗ ܡܬܰܚ ܫܡܰܝܳܐ.
13 ܝܳܗܶܒ ܩܳܠܳܐ ܕܰܪܓܽܘܫܝܳܐ ܕܡܰܝ̈ܳܐ ܒܰܫܡܰܝܳܐ: ܡܰܣܶܩ ܥܢܳܢ̈ܶܐ ܡܶܢ ܣܰܘ̈ܦܶܝܗ̇ ܕܰܐܪܥܳܐ: ܘܒܰܖ̈ܩܶܐ ܠܡܶܛܪܳܐ ܥ̣ܒܰܕ: ܡܰܦܶܩ ܖ̈ܘܚܶܐ ܡܶܢ ܐܰܘܨܖ̈ܰܘܗܝ.
14 ܫ̣ܛܳܐ ܟܽܠ ܒܰܪܢܳܫܳܐ ܡܶܢ ܝܺܕܰܥܬܳܐ: ܒܗܶܬܘ ܟܽܠ ܥܳܒܕܰܝ̈ ܕܰܗܒܳܐ ܡܶܢ ܓܠܺܝ̈ܦܶܐ ܕܰܥܒܰܕܘ: ܡܶܛܽܠ ܕܫܽܘܩܪܳܐ ܢܣܰܟܘ: ܘܪܽܘܚܳܐ ܠܰܝܬ ܒܗܽܘܢ.
15 ܠܳܐ ܡܶܕܶܡ ܐܶܢܽܘܢ: ܘܰܥܒܳܕ̈ܶܐ ܐܶܢܽܘܢ ܫܳܛܰܝ̈ܳܐ: ܒܙܰܒܢܳܐ ܕܡܶܬܦܰܩܕܺܝܢ ܢܺܐܒܕܽܘܢ.
16 ܠܳܐ ܐܰܝܟ ܕܗܳܠܶܝܢ ܡܢܳܬܶܗ ܕܝܰܥܩܽܘܒ: ܡܶܛܽܠ ܕܡܰܢ ܕܰܒܪܳܐ ܟܽܠ: ܗܽܘܝܽܘ ܡܶܢܬܗܽܘܢ: ܘܺܝܣܪܳܐܶܝܠ ܫܰܒܛܳܐ ܕܝܳܪܬܽܘܬܶܗ: ܡܳܪܝܳܐ ܚܰܝܠܬܳܢܳܐ ܫܡܶܗ.
17 ܟܰܢܶܫܝ ܡܶܢ ܐܰܪܥܳܐ ܨܰܥܪܶܝܟܝ ܝܳܬܒܰܬ ܒܽܐܘܠܨܳܢܳܐ.
18 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ: ܗܳܐ ܡܥܰܪܩܶܠ ܐ̱ܢܳܐ ܠܥܳܡܽܘܖ̈ܶܝܗ̇ ܕܰܐܪܥܳܐ ܗܳܕܶܐ ܒܙܰܒܢܳܐ ܗܳܢܳܐ: ܕܢܶܒܥܽܘܢܳܢܝ ܘܢܶܫܟܚܽܘܢܳܢܝ.
19 ܘܳܝ ܠܺܝ ܥܰܠ ܬܒܳܪܝ: ܟܳܝܒܳܐ ܗ̱ܝ ܡܚܽܘܬܝ: ܘܶܐ̱ܢܳܐ ܐܶܡܪܶܬ ܗܳܢܰܘ ܟܺܐܒܝ ܐܶܣܰܝܒܪܺܝܘܗܝ.
20 ܡܰܫܟܰܢܝ ܐܶܬܒܙܶܙ: ܘܟܽܠܗܽܘܢ ܛܽܘܢܒܰܘ̈ܗܝ ܐܶܬܦܰܣܰܩܘ: ܒܢܰܝ̈ ܢܦܰܩܘ ܡܶܢܝ ܘܠܰܝܬ ܐܶܢܽܘܢ: ܠܰܝܬ ܕܢܳܩܶܫ ܬܽܘܒ ܡܰܫܟܰܢܝ ܘܰܢܩܺܝܡ ܝܳܖ̈ܺܝܥܳܬܝ.
21 ܡܶܛܽܠ ܕܰܫܛܰܘ ܖ̈ܳܥܰܘܳܬܳܐ: ܘܰܠܡܳܪܝܳܐ ܠܳܐ ܒܥܰܘ. ܡܶܛܽܠ ܕܠܳܐ ܐܰܟܫܰܪܘ: ܟܽܠܳܗ̇ ܡܰܪܥܺܝܬܗܽܘܢ ܐܶܬܒܰܕܪܰܬ.
22 ܩܳܠܳܐ ܕܰܫܡܽܘܥܬܳܐ ܗܳܐ ܐܶܬܳܐ: ܘܙܰܘܥܳܐ ܪܰܒܳܐ ܡܶܢ ܐܰܪܥܳܐ ܕܓܰܪܒܝܳܐ: ܠܡܶܥܒܰܕ ܩܽܘܖ̈ܝܳܐ ܕܺܝܗܽܘܕܳܐ ܠܚܽܘܪܒܳܐ ܡܰܥܡܪܳܐ ܠܝܳܪܽܘܖ̈ܶܐ.
23 ܝܳܕܰܥ ܐ̱ܢܳܐ ܕܽܐܘܖ̈ܚܳܬܶܗ ܕܡܳܪܝܳܐ ܠܳܐ ܗܘܰܝ̈ ܐܰܝܟ ܕܒܰܪܢܳܫܳܐ: ܘܠܳܐ ܐܰܝܟ ܓܰܒܪܳܐ ܕܳܐܙܶܠ ܘܡܰܬܩܶܢ ܨܒܽܘܬܶܗ.
24 ܪܕܺܝܢܝ ܡܳܪܝܳܐ ܒܕܺܝܢܳܐ ܘܠܳܐ ܒܪܽܘܓܙܳܟ: ܕܰܠܡܳܐ ܬܰܙܥܪܰܢܝ.
25 ܐܰܫܽܘܕ ܚܶܡܬܳܟ ܥܰܠ ܥܰܡ̈ܡܶܐ ܕܠܳܐ ܝܰܕܥܽܘܟ: ܘܥܰܠ ܫܰܖ̈ܒܳܬܳܐ ܕܒܰܫܡܳܟ ܠܳܐ ܩܖ̈ܰܝ: ܕܰܐܟܠܽܘܗܝ ܠܝܰܥܩܽܘܒ: ܐܰܟܠܽܘܗܝ ܘܓܰܡܪܽܘܗܝ: ܘܕܰܝܪܶܗ ܐܰܚܪܶܒܘ.