Jeremiah 30
The Book of Jeremiah
܀ ܐܪܡܝܐ ܠ ܀
1 ܦܶܬܓܳܡܳܐ ܕܰܗܘܳܐ ܥܰܠ ܐܶܪܰܡܝܳܐ ܡܶܢ ܩܕܳܡ ܡܳܪܝܳܐ: ܘܶܐܡܰܪ.
2 ܗܳܟܰܢܳܐ ܐܳܡܰܪ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ: ܟܬܽܘܒ ܠܳܟ ܟܽܠܗܽܘܢ ܦܶܬܓܳܡ̈ܶܐ ܕܶܐܡܪܶܬ ܠܳܟ ܥܰܠ ܣܶܦܪܳܐ.
3 ܡܶܛܽܠ ܕܗܳܐ ܝܰܘ̈ܡܳܬܳܐ ܐܳܬܶܝܢ ܐܳܡܰܪ ܡܳܪܝܳܐ: ܘܰܐܗܦܶܟ ܫܒܺܝܬܳܐ ܕܥܰܡܝ ܝܺܣܪܳܐܶܝܠ: ܘܕܺܝܗܽܘܕܳܐ ܐܳܡܰܪ ܡܳܪܝܳܐ: ܘܰܐܗܦܶܟ ܐܶܢܽܘܢ ܠܰܐܪܥܳܐ ܕܝܶܗܒܶ݀ܬ ܠܰܐܒܳܗܰܝ̈ܗܽܘܢ: ܘܢܺܐܪܬܽܘܢܳܗ̇.
4 ܘܗܳܠܶܝܢ ܦܶܬܓܳܡ̈ܶܐ ܕܶܐܡܰܪ ܡܳܪܝܳܐ ܥܰܠ ܝܺܣܪܳܐܶܝܠ: ܘܥܰܠ ܝܺܗܽܘܕܳܐ.
5 ܗܳܟܰܢܳܐ ܐܳܡܰܪ ܡܳܪܝܳܐ: ܩܳܠܳܐ ܕܙܰܘܥܬܳܐ ܫܡܰܥܢ: ܕܶܚܠܬܳܐ ܘܠܰܝܬ ܫܠܳܡܳܐ.
6 ܫܰܐܶܠܘ ܘܰܚܙܰܘ ܐܶܢ ܝܳܠܶܕ ܕܶܟܪܳܐ܆ ܡܶܛܽܠ ܡܳܢܳܐ ܚܙܺܝ݀ܬ ܟܽܠ ܓܒܰܪ ܣܺܝ̈ܡܶܢ ܐܺܝܕܰܘ̈ܗܝ ܥܰܠ ܓܶܣܰܘ̈ܗܝ ܐܰܝܟ ܝܳܠܶܕܬܳܐ: ܘܶܐܬܗܦܶܟ̈ܝ ܟܽܠܗܶܝܢ ܐܰܦ̈ܶܐ ܠܝܰܩܕܳܢܳܐ.
7 ܘܳܝ ܕܪܰܒ ܗ̱ܘ ܝܰܘܡܳܐ ܗܰܘ ܘܠܰܝܬ ܐܰܟܘܳܬܶܗ: ܘܰܙܒܰܢ ܥܳܩܬܳܐ ܗ̱ܘ ܠܝܰܥܩܽܘܒ: ܘܡܶܢܗ ܢܶܬܦܪܶܩ.
8 ܘܢܶܗܘܶܐ ܒܝܰܘܡܳܐ ܗܰܘ ܐܳܡܰܪ ܡܳܪܝܳܐ ܨܒܰܐܬ: ܐܶܬܒܰܪ ܢܺܝܪܶܗ ܡܶܢ ܨܰܘܪܳܟ: ܘܰܚܢܳܩܰܝ̈ܟ ܐܶܦܰܣܶܩ: ܘܠܳܐ ܢܫܰܥܒܕܽܘܢ ܐܶܢܽܘܢ ܬܽܘܒ ܢܽܘܟܖ̈ܳܝܶܐ.
9 ܐܶܠܳܐ ܢܶܦܠܚܽܘܢ ܠܡܳܪܝܳܐ ܐܰܠܳܗܗܽܘܢ: ܘܰܠܕܰܘܺܝܕ ܡܰܠܟܗܽܘܢ ܕܰܐܩܺܝܡ ܠܗܽܘܢ.
10 ܘܰܐܢ̱ܬ ܠܳܐ ܬܶܕܚܰܠ ܥܰܒܕܝ ܝܰܥܩܽܘܒ ܐܳܡܰܪ ܡܳܪܝܳܐ: ܘܠܳܐ ܬܶܬܒܰܪ ܝܺܣܪܳܐܶܝܠ: ܕܗܳܐ ܦܳܪܶܩ ܐ̱ܢܳܐ ܠܳܟ ܡܶܢ ܪܽܘܚܩܳܐ: ܘܰܠܙܰܪܥܳܟ ܡܶܢ ܐܰܪܥܳܐ ܕܰܫܒܺܝܬܗܽܘܢ: ܘܢܶܬܶܒ ܝܰܥܩܽܘܒ ܘܢܶܫܠܶܐ ܘܢܶܫܟܰܬ ܘܢܶܬܬܢܺܝܚ: ܘܠܳܐ ܢܶܗܘܶܐ ܠܶܗ ܡܰܗܪܳܢܳܐ.
11 ܘܰܐܢ̱ܬ ܠܳܐ ܬܶܕܚܰܠ ܥܰܒܕܝ ܝܰܥܩܽܘܒ ܐܳܡܰܪ ܡܳܪܝܳܐ: ܡܶܛܽܠ ܕܥܰܡܳܟ ܐ̱ܢܳܐ ܠܡܶܦܪܩܳܟ ܐܳܡܰܪ ܡܳܪܝܳܐ: ܡܶܛܽܠ ܕܶܐܥܒܶܕ ܓܡܽܘܪܝܳܐ ܒܟܽܠܗܽܘܢ ܥܰܡ̈ܡܶܐ ܕܒܰܕܰܪܬܳܟ ܬܰܡܳܢ: ܘܠܳܟ ܠܳܐ ܐܶܥܒܶܕ ܓܡܽܘܪܝܳܐ: ܘܶܐܪܕܶܝܟ ܒܕܺܝܢܳܐ ܘܰܡܙܰܟܳܝܽܘ ܠܳܐ ܐܶܙܰܟܶܝܟ.
12 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ: ܟܳܐܶܒ ܗ̱ܘ ܬܒܳܪܶܟܝ: ܘܚܰܣܺܝܢܳܐ ܗ̱ܝ ܡܚܽܘܬܶܟܝ.
13 ܘܠܰܝܬ ܕܕܳܐܶܢ ܕܺܝܢܶܟܝ: ܕܰܢܥܰܕܪܶܟܝ ܘܢܰܐܣܶܝܟܝ.
14 ܟܽܠܗܽܘܢ ܖ̈ܳܚܡܰܝܟܝ ܛܥܰܐܟܝ: ܘܢܰܦܫܶܟܝ ܒܳܥܶܝܢ. ܡܶܛܽܠ ܕܰܡܚܽܘܬܳܐ ܕܰܒܥܶܠܕܒܳܒ̈ܶܐ ܡܚܺܝܬܶܟܝ: ܘܡܰܪܕܽܘܬܳܐ ܬܰܩܺܝܦܬܳܐ: ܥܰܠ ܕܰܣܓܺܝܘ ܚܰܘܒܰܝ̈ܟܝ: ܘܰܥܫܶܢܘ ܚܛܳܗܰܝ̈ܟܝ ܕܠܳܐ ܬܬܽܘܒܺܝܢ.
15 ܡܳܢܳܐ ܡܰܝܠܠܰܬܝ ܥܰܠ ܬܒܳܪܶܟܝ. ܟܳܐܶܒ ܗ̱ܘ ܟܺܐܒܶܟܝ: ܥܰܠ ܣܽܘܓܰܐܬ ܚܰܘܒܰܝ̈ܟܝ: ܘܕܰܥܫܶܢܘ ܚܛܳܗܰܝ̈ܟܝ: ܥܶܒܕܶܬ ܠܶܟܝ ܗܳܠܶܝܢ.
16 ܡܶܛܽܠ ܗܳܢܳܐ ܟܽܠ ܐܳܟܽܘܠܰܝ̈ܟܝ ܢܶܬܰܐܟܠܽܘܢ: ܘܟܽܠܗܽܘܢ ܒܥܶܠܕܒܳܒܰܝ̈ܟܝ ܒܫܶܒܝܳܐ ܢܺܐܙܽܠܘܢ: ܘܢܶܗܘܽܘܢ ܕܳܝܽܘܫܰܝ̈ܟܝ ܠܰܕܝܳܫܳܐ: ܘܟܽܠܗܽܘܢ ܒܳܙܽܘܙܰܝ̈ܟܝ ܐܶܬܶܠ ܠܒܶܙܬܳܐ.
17 ܡܶܛܽܠ ܕܰܐܣܶܩ ܠܶܟܝ ܐܳܣܝܽܘܬܳܐ: ܘܡܶܢ ܡܚܽܘܬܶܟܝ ܐܰܣܶܝܟܝ ܐܳܡܰܪ ܡܳܪܝܳܐ: ܡܶܛܽܠ ܕܰܕܚܺܝܩܬܳܐ ܩܪܰܐܟܝ: ܨܶܗܝܽܘܢ ܗܳܝ ܕܬܳܒܽܘܥܳܐ ܠܰܝܬ ܠܳܗ̇.
18 ܗܳܟܰܢܳܐ ܐܳܡܰܪ ܡܳܪܝܳܐ: ܗܳܐ ܡܰܗܦܶܟ ܐ̱ܢܳܐ ܫܒܺܝܬܳܐ ܕܡܰܫܟܢܶܗ ܕܝܰܥܩܽܘܒ: ܘܥܳܒܶܕ ܐ̱ܢܳܐ ܠܶܗ ܐܰܝܟ ܕܡܶܢ ܩܕܺܝܡ: ܘܥܰܠ ܡܰܫܟܢܰܘ̈ܗܝ ܐܶܪܰܚܶܡ: ܘܬܶܬܒܢܶܐ ܩܪܺܝܬܳܐ ܥܰܠ ܬܶܠܠܳܗ̇: ܘܢܰܘܣܳܐ ܒܙܶܕܩܶܗ ܢܶܬܩܰܢ.
19 ܘܬܶܦܽܘܩ ܡܶܢܗܽܘܢ ܬܰܘܕܺܝܬܳܐ: ܘܩܳܠܳܐ ܕܰܡܫܰܒܚܳܢ̈ܶܐ: ܘܰܐܣܓܶܐ ܐܶܢܽܘܢ ܘܠܳܐ ܢܶܙܥܪܽܘܢ: ܘܰܐܥܫܶܢ ܐܶܢܽܘܢ ܘܠܳܐ ܢܶܒܨܪܽܘܢ.
20 ܘܢܶܗܘܽܘܢ ܒܢܰܝ̈ܗܽܘܢ ܐܰܝܟ ܕܡܶܢ ܩܕܺܝܡ: ܘܥܺܕܬܗܽܘܢ ܩܕܳܡܝ ܬܶܬܩܰܢ: ܘܶܐܦܩܽܘܕ ܥܰܠ ܟܽܠܗܽܘܢ ܐܳܠܽܘܨܰܝ̈ܗܽܘܢ.
21 ܘܢܶܗܘܶܐ ܡܰܠܟܗܽܘܢ ܡܶܢܗܽܘܢ: ܘܫܰܠܺܝܛܗܽܘܢ ܡܶܢ ܒܰܝܢܳܬܗܽܘܢ ܢܶܦܽܘܩ: ܘܶܐܩܰܪܒܺܝܘܗܝ ܘܢܶܬܩܰܪܰܒ ܠܘܳܬܝ: ܡܶܛܽܠ ܕܰܐܦܢܶܐ ܠܶܒܶܗ ܐܳܡܰܪ ܡܳܪܝܳܐ.
22 ܘܬܶܗܘܢ ܠܺܝ ܥܰܡܳܐ܆ ܘܶܐ̱ܢܳܐ ܐܶܗܘܶܐ ܠܟܽܘܢ ܐܰܠܳܗܳܐ.
23 ܡܰܢܽܘ ܓܶܝܪ ܐܰܦܢܺܝ ܠܶܒܶܗ ܠܕܶܚܠܰܬܝ ܘܶܐ̱ܢܳܐ ܕܚܰܩܬܶܗ ܐܳܡܰܪ ܡܳܪܝܳܐ ܚܰܝܠܬܳܢܳܐ. ܗܳܐ ܥܰܠܥܳܠܶܗ ܒܚܶܡܬܳܐ ܢܳܦܩܳܐ: ܘܥܰܠܥܳܠܳܐ ܡܶܬܓܰܘܙܠܳܐ: ܥܰܠ ܪܺܝܫܳܐ ܕܖ̈ܰܫܺܝܥܶܐ ܬܶܬܢܺܝܚ.
24 ܠܳܐ ܬܶܗܦܽܘܟ ܚܶܡܬܳܐ ܕܪܽܘܓܙܶܗ ܕܡܳܪܝܳܐ ܥܕܰܡܳܐ ܕܢܶܥܒܶܕ: ܘܰܥܕܰܡܳܐ ܕܰܢܩܺܝܡ ܬܰܪܥܺܝܬܳܐ ܕܠܶܒܶܗ: ܒܰܐ̱ܚܪܳܝܰܬ ܝܰܘ̈ܡܳܬܳܐ ܬܶܬܒܰܝܢܽܘܢ ܒܶܗ.