Jeremiah 51
The Book of Jeremiah
܀ ܐܪܡܝܐ ܢܐ ܀
1 ܗܳܟܰܢܳܐ ܐܳܡܰܪ ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ: ܗܳܐ ܡܕܺܝܠ ܐ̱ܢܳܐ ܥܰܠ ܒܳܒܶܠ ܘܥܰܠ ܥܳܡܽܘܖ̈ܶܝܗ̇: ܠܶܒܳܐ ܩܰܫܝܳܐ ܘܪܽܘܚܳܐ ܡܚܰܒܠܳܢܳܐ.
2 ܘܶܐܫܰܕܰܪ ܥܰܠ ܒܳܒܶܠ ܒܳܙܽܘ̈ܙܶܐ: ܘܢܶܒܙܽܘܢܳܗ̇ ܘܰܢܕܽܘܫܽܘܢ ܐܰܪܥܳܗ̇: ܘܢܶܬܟܰܢܫܽܘܢ ܥܠܶܝܗ̇ ܡܶܢ ܚܕܳܖ̈ܶܝܗ̇ ܒܝܰܘܡܳܐ ܕܒܺܝܫܬܳܐ.
3 ܠܳܐ ܢܶܫܠܶܐ ܡܰܢ ܕܫܳܕܶܐ ܒܩܶܫܬܳܐ: ܘܠܳܐ ܢܶܫܠܰܚ ܫܶܪܝܳܢܶܗ ܩܪܰܒܬܳܢܳܐ: ܘܠܳܐ ܬܚܽܘܣܽܘܢ ܥܰܠ ܓܰܕܽܘ̈ܕܶܝܗ̇: ܚܪܽܘܒܘ ܟܽܠܶܗ ܚܰܝܠܳܗ̇.
4 ܘܢܶܦܠܽܘܢ ܩܛܺܝ̈ܠܶܐ ܒܰܐܪܥܳܐ ܕܟܰܠܕܳܝ̈ܶܐ: ܘܕܰܡܡܰܚܶܝܢ ܒܫܽܘ̈ܩܶܝܗ̇.
5 ܡܶܛܽܠ ܕܠܳܐ ܐܰܪܡܶܠܘ ܝܺܣܪܳܐܶܝܠ ܘܺܝܗܽܘܕܳܐ ܡܶܢ ܐܰܠܳܗܗܽܘܢ: ܡܶܢ ܡܳܪܝܳܐ ܚܰܝܠܬܳܢܳܐ ܐܰܠܳܗܗܽܘܢ: ܡܶܛܽܠ ܕܰܐܪܥܗܽܘܢ ܐܶܬܡܰܠܝܰܬ ܥܰܘܠܳܐ ܩܕܳܡ ܩܰܕܺܝܫܳܐ ܕܺܝܣܪܳܐܶܝܠ.
6 ܥܪܽܘܩܘ ܡܶܢ ܓܰܘ ܒܳܒܶܠ: ܘܦܰܨܰܘ ܓܒܰܪ ܢܰܦܫܶܗ: ܠܳܐ ܬܶܒܠܥܽܘܢ ܒܰܚܛܳܗܶܝ̈ܗ̇: ܡܶܛܽܠ ܕܙܰܒܢܰܐ ܗ̱ܘ ܕܦܽܘܪܥܳܢܳܗ̇ ܡܶܢ ܡܳܪܝܳܐ: ܐܰܝܟ ܥܒܳܕܶܝ̈ܗ̇ ܗ̱ܘ̣ ܦܳܪܰܥ ܠܳܗ̇.
7 ܟܳܣܳܐ ܕܕܰܗܒܳܐ ܒܳܒܶܠ ܒܺܐܝܕܶܗ ܕܡܳܪܝܳܐ: ܕܡܰܪܘܶܐ ܠܟܽܠܳܗ̇ ܐܰܪܥܳܐ ܡܶܢ ܚܰܡܪܶܗ: ܐܶܫܬܺܝܘ ܟܽܠܗܽܘܢ ܥܰܡ̈ܡܶܐ ܘܶܐܬܛܰܪܰܦܘ.
8 ܡܶܢ ܫܶܠܝܳܐ ܢܶܦܠܰܬ ܒܳܒܶܠ ܘܶܐܬܒܰܙܰܬ: ܐܰܝܠܶܠܘ ܥܠܶܝܗ̇: ܣ̣ܰܒܘ ܣܰܡ̈ܡܳܢܶܐ ܠܟܺܐܒܶܝ̈ܗ̇: ܛܳܟ ܬܶܬܐܰܣܶܐ.
9 ܐܰܣܺܝܢܳܗ̇ ܠܒܳܒܶܠ ܘܠܳܐ ܐܶܬܐܰܣܝܰܬ: ܢܶܫܒܩܺܝܗ̇ ܘܢܺܐܙܰܠ ܓܒܰܪ ܠܰܐܪܥܶܗ: ܡܶܛܽܠ ܕܰܩܪܶܒ ܥܕܰܡܳܐ ܠܰܫܡܰܝܳܐ ܕܺܝܢܳܗ̇: ܘܶܐܬܬܪܺܝܡ ܥܕܰܡܳܐ ܠܰܥܢܳܢ̈ܶܐ.
10 ܐܰܦܶܩ ܡܳܪܝܳܐ ܙܳܟܽܘܬܰܢ: ܬܰܘ ܢܶܫܬܰܥܶܐ ܒܨܶܗܝܽܘܢ ܥܒܳܕܰܘ̈ܗܝ ܕܡܳܪܝܳܐ ܐܰܠܳܗܰܢ.
11 ܟܰܢܶܫܘ ܫܳܠ̈ܛܶܐ: ܡܠܰܘ ܓܶܐܖ̈ܶܐ: ܐܰܕܺܝܠ ܡܳܪܝܳܐ ܪܽܘܚܳܐ ܕܡܰܠܟܳܐ ܕܡܳܕܰܝ: ܡܶܛܽܠ ܕܥܰܠ ܒܳܒܶܠ ܬܰܪܥܺܝܬܶܗ ܠܰܡܚܰܒܳܠܽܘܬܶܗ̇: ܡܶܛܽܠ ܕܦܽܘܪܥܳܢܶܗ ܗ̱ܘ ܕܡܳܪܝܳܐ: ܘܰܬܒܰܥܬܳܐ ܕܗܰܝܟܠܶܗ.
12 ܥܰܠ ܫܽܘܖ̈ܶܝܗ̇ ܕܒܳܒܶܠ ܫܩܽܘܠܘ ܐܳܬܳܐ: ܐܰܩܺܝܡܘ ܡܰܛܰܪܬܳܐ ܘܛܰܒܥܽܘܗ̇ ܒܡܰܝ̈ܳܐ: ܡܶܛܽܠ ܕܰܥܒܰܕ ܡܳܪܝܳܐ ܡܶܕܶܡ ܕܶܐܬܪܰܥܺܝ ܒܒܳܒܶܠ.
13 ܕܫܰܪܝܳܐ ܗ̱ܘܳܬ ܒܡܰܝ̈ܳܐ ܣܰܓܺܝ̈ܐܶܐ: ܣܰܓܺܝܐܺܝܢ ܓܰܙܰܝ̈ܟܝ: ܡܛܳܐ ܩܶܨܶܟܝ ܘܥܶܫܢܰܬ ܡܚܽܘܬܶܟܝ.
14 ܝܺܡܳܐ ܡܳܪܝܳܐ ܚܰܝܠܬܳܢܳܐ ܒܢܰܦܫܶܗ: ܕܶܐܡܠܶܝܟܝ ܐ̱ܢܳܫ̈ܳܐ ܐܰܝܟ ܩܰܡܨܳܐ: ܘܢܶܥܢܽܘܢ ܥܠܰܝܟܝ ܘܢܺܐܡܪܽܘܢ: ܗܳܘܳܝ ܗܳܘܳܝ.
15 ܡܳܪܝܳܐ ܥܒܰܕ ܐܰܪܥܳܐ ܒܚܰܝܠܶܗ: ܘܰܐܬܩܶܢ ܬܺܒܶܝܠ ܒܚܶܟܡܬܶܗ: ܘܰܒܣܽܘܟܠܶܗ ܡ̣ܬܰܚ ܫܡܰܝܳܐ.
16 ܝܳܗܶܒ ܩܳܠܳܐ ܕܰܪܓܽܘܫܝܳܐ ܕܡܰܝ̈ܳܐ ܒܰܫܡܰܝܳܐ: ܡܰܣܶܩ ܥܢܳܢ̈ܶܐ ܡܶܢ ܣܰܘ̈ܦܶܝܗ̇ ܕܰܐܪܥܳܐ: ܘܒܰܖ̈ܩܶܐ ܠܡܶܛܪܳܐ ܥܒܰܕ: ܡܰܦܶܩ ܖ̈ܽܘܚܶܐ ܡܶܢ ܐܰܘܨܖ̈ܰܘܗܝ.
17 ܫܛܳܐ ܟܠ ܒܰܪܢܳܫ ܡܶܢ ܝܺܕܰܥܬܳܐ: ܒܗܶܬܘ ܟܽܠ ܩܰܝܢܳܝ̈ܶܐ ܡܶܢ ܓܠܺܝܦ̈ܶܐ ܕܰܥ̣ܒܰܕܘ: ܡܶܛܽܠ ܕܕܰܓܳܠܽܘܬܳܐ ܢܣܰܟܘ ܘܠܰܝܬ ܒܗܽܘܢ ܪܽܘܚܳܐ.
18 ܠܳܐ ܡܶܕܶܡ ܐܶܢܽܘܢ: ܘܰܥܒܳܕ̈ܶܐ ܐܶܢܽܘܢ ܫܳܛܰܝ̈ܳܐ: ܒܙܰܒܢܳܐ ܕܡܶܬܦܰܩܕܺܝܢ ܢܺܐܒܕܽܘܢ.
19 ܠܳܐ ܐܰܝܟ ܕܗܳܠܶܝܢ ܡܢܳܬܶܗ ܕܝܰܥܩܽܘܒ: ܐܶܠܳܐ ܡܰܢ ܕܰܒܪܳܐ ܟܽܠ ܗܽܘܝܽܘ ܡܢܳܬܗܽܘܢ: ܘܫܰܒܛܳܐ ܕܝܳܪܬܽܘܬܗܽܘܢ ܡܳܪܝܳܐ ܚܰܝܠܬܳܢܳܐ ܫܡܶܗ.
20 ܛܰܝܶܒܘ ܠܺܝ ܡܳܐܢ̈ܶܐ ܕܰܩܪܳܒܳܐ: ܐܶܒܰܕܰܪ ܒܶܟܝ ܥܰܡ̈ܡܶܐ: ܘܶܐܚܰܒܶܠ ܒܶܟܝ ܡܰܠ̈ܟܘܳܬܳܐ.
21 ܘܶܐܒܰܕܰܪ ܒܶܟܝ ܖ̈ܟܫܳܐ ܘܖ̈ܳܟܒܰܝܗܽܘܢ.
22 ܘܶܐܒܰܕܰܪ ܒܶܟܝ ܡܰܖ̈ܟܒܳܬܳܐ ܘܖ̈ܳܟܒܰܝܗܶܝܢ: ܘܶܐܒܰܕܰܪ ܒܶܟܝ ܓܰܒܖ̈ܶܐ ܘܢܶܫ̈ܶܐ: ܘܶܐܒܰܕܰܪ ܒܶܟܝ ܣܳܒ̈ܶܐ ܘܰܥܠܰܝܡ̈ܶܐ: ܘܶܐܒܰܕܰܪ ܒܶܟܝ ܓܰܕܽܘ̈ܕܶܐ ܘܰܒܬܽܘ̈ܠܳܬܳܐ.
23 ܘܶܐܒܰܕܰܪ ܒܶܟܝ ܪܳܥܝܳܐ ܘܰܓܙܳܪܶܗ: ܘܶܐܒܰܕܰܪ ܒܶܟܝ ܐܰܟܳܪܳܐ ܘܦܰܕܳܢܶܗ: ܘܶܐܒܰܕܰܪ ܒܶܟܝ ܛܖ̈ܽܘܢܶܐ ܘܫܰܠܺܝܛܳܢ̈ܶܐ.
24 ܘܶܐܦܪܽܘܥ ܠܒܳܒܶܠ ܘܰܠܟܽܠܗܽܘܢ ܥܳܡܽܘܖ̈ܶܐ ܕܟܰܠܕܳܝ̈ܶܐ: ܟܽܠܳܗ̇ ܒܺܝܫܬܳܐ ܕܰܥܒܰܕܘ ܒܨܶܗܝܽܘܢ ܠܥܺܢܰܝ̈ܟܽܘܢ ܐܳܡܰܪ ܡܳܪܝܳܐ.
25 ܗܳܐ ܐܶܢܳܐ ܥܠܰܝܟ ܛܽܘܪܳܐ ܡܚܰܒܠܳܢܳܐ ܐܳܡܰܪ ܡܳܪܝܳܐ: ܕܚܰܒܶܠ ܠܟܽܠܳܗ̇ ܐܰܪܥܳܐ: ܘܰܐܪܺܝܡ ܐܺܝܕܝ ܥܠܰܝܟ: ܘܶܐܩܠܳܟ ܡܶܢ ܟܺܐܦܳܐ: ܘܶܐܥܒܕܳܟ ܠܛܽܘܪܳܐ ܝܰܩܺܝܕܳܐ.
26 ܘܠܳܐ ܢܶܣܒܽܘܢ ܡܶܢܟ ܟܺܐܦܳܐ ܠܙܳܘܺܝܬܳܐ: ܘܟܺܐܦܳܐ ܠܫܶܬܶܐܣܬܳܐ: ܐܶܠܳܐ ܠܚܽܘܪܒܳܐ ܠܥܳܠܰܡ ܬܶܗܘܶܐ ܐܳܡܰܪ ܡܳܪܝܳܐ.
27 ܫܩܽܘܠܘ ܐܳܬܳܐ ܒܰܐܪܥܳܐ: ܩܪܰܘ ܫܺܝܦܽܘܪܳܐ ܒܥܰܡ̈ܡܶܐ: ܛܰܝܶܒܘ ܥܠܶܝܗ̇ ܥܰܡ̈ܡܶܐ: ܐܰܫܡܰܥܘ ܥܠܶܝܗ̇ ܡܰܠ̈ܟܘܳܬܳܐ ܕܰܐܪܕܰܛ: ܘܕܰܐܪܡܶܢܝ: ܘܕܰܐܫܟܢܰܙ: ܦܩܽܘܕܘ ܥܠܶܝܗ̇ ܐܰܒܕܳܢܳܐ: ܐܰܣܶܩܘ ܖ̈ܟܫܳܐ ܐܰܝܟ ܙܳܚܠܳܐ.
28 ܛܰܝܶܒܘ ܥܠܶܝܗ̇ ܥܰܡ̈ܡܶܐ: ܠܡܰܠܟܳܐ ܕܡܳܕܰܝ ܘܰܠܚܺܐܖ̈ܰܘܗܝ: ܘܰܠܟܽܠܗܽܘܢ ܫܰܠܺܝܛܳܢܰܘ̈ܗܝ.
29 ܘܰܬܙܽܘܥ ܐܰܪܥܳܐ ܘܬܶܬܘܰܪ: ܡܶܛܽܠ ܕܩܳܡܰܬ ܥܰܠ ܒܳܒܶܠ ܡܰܚܫܰܒܬܶܗ: ܕܡܳܪܝܳܐ: ܠܡܰܚܪܳܒܽܘ ܐܰܪܥܳܐ ܕܒܳܒܶܠ ܡܶܢ ܒܠܰܝ ܕܝܳܬܶܒ.
30 ܣܳܦܘ ܓܰܒܖ̈ܶܐ ܕܒܳܒܶܠ ܠܡܶܬܟܰܬܳܫܽܘ ܥܰܡ ܝܳܬܒܰܝ̈ ܡܶܨܪܽܘܬ: ܐܶܬܬܰܒܪܰܬ ܓܰܢ̱ܒܳܪܽܘܬܗܽܘܢ ܘܰܗܘܰܘ ܐܰܝܟ ܢܶܫ̈ܶܐ: ܥܩܽܘܪܘ ܡܰܫܟܢܶܝ̈ܗ̇: ܬܰܒܰܪܘ ܬܰܖ̈ܥܶܝܗ̇.
31 ܕܪܳܗܶܛ ܠܽܘܩܒܰܠ ܕܪܳܗܶܛ ܢܶܪܗܰܛ: ܘܕܰܡܚܰܘܶܐ ܠܽܘܩܒܰܠ ܕܰܡܚܰܘܶܐ: ܠܰܡܚܰܘܳܝܽܘ ܠܡܰܠܟܳܐ ܕܒܳܒܶܠ: ܕܶܐܬܬܰܚܕܰܬ ܡܕܺܝܢ̱ܬܶܗ ܡܶܢ ܚܕܳܖ̈ܶܝܗ̇.
32 ܘܡܰܥܒܖ̈ܳܬܳܗ̇ ܐܶܬܬܚܶܕ̈ܝ: ܘܶܐܓܡܶܝ̈ܗ̇ ܝܺܩܶܕܘ ܒܢܽܘܪܳܐ. ܘܟܽܠܗܽܘܢ ܓܰܒܖ̈ܶܝܗ̇ ܩܖ̈ܰܒܬܳܢܶܐ ܐܶܬܕܰܠܰܚܘ.
33 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܒܰܪܬ ܒܳܒܶܠ ܐܰܝܟ ܐܶܕܪܳܐ ܕܰܡ̣ܛܳܐ ܙܒܰܢ ܕܪܳܟܬܶܗ: ܥܰܕ ܩܰܠܺܝܠ ܘܰܡ̣ܛܳܐ ܩܛܳܦܳܗ̇.
34 ܐܶܡܪܰܬ ܐܽܘܪܺܫܠܶܡ: ܐܰܟܠܰܢܝ ܘܒܰܙܰܢܝ ܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ: ܐܰܩܺܝܡܰܢܝ ܐܰܝܟ ܡܳܐܢܳܐ ܣܪܺܝܩܳܐ: ܒܰܠܥܰܢܝ ܐܰܝܟ ܬܰܢܺܝܢܳܐ: ܡ̣ܠܳܐ ܟܰܪܣܶܗ ܡܶܢ ܥܽܘܕܳܢܝ ܘܰܐܛܥܝܰܢܝ.
35 ܒܶܙܰܬܝ ܘܩܶܢܝܳܢܝ ܠܒܳܒܶܠ ܐܶܫܬܒܺܝܘ: ܘܕܶܡܝ ܥܰܠ ܥܳܡܽܘܖ̈ܶܐ ܕܟܰܠܕܳܝ̈ܶܐ ܬܺܐܡܰܪ ܐܽܘܪܺܫܠܶܡ.
36 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܝܳܐ: ܗܳܐ ܕܳܐܶܢ ܐ̱ܢܳܐ ܕܺܝܢܶܟܝ: ܘܡܶܬܢܰܩܰܡ ܐ̱ܢܳܐ ܢܩܰܡܬܶܟܝ: ܘܰܐܚܪܶܒ ܝܰܡܳܐ ܕܒܳܒܶܠ: ܘܰܐܘܒܶܫ ܡܰܒܽܘܥܰܘ̈ܗܝ.
37 ܘܬܶܗܘܶܐ ܒܳܒܶܠ ܚܰܪܒܬܳܐ: ܡܰܥܡܪܳܐ ܠܝܳܪܽܘܖ̈ܶܐ: ܘܰܠܬܶܡܗܳܐ ܘܰܠܡܰܫܪܽܘܩܺܝܬܳܐ ܡܶܢ ܒܠܰܝ ܕܝܳܬܶܒ ܒܳܗ̇.
38 ܐܰܝܟ ܐܰܖ̈ܝܰܘܳܬܳܐ ܢܢܰܗܡܽܘܢ: ܘܢܶܥܪܽܘܢ ܐܰܝܟ ܓܖ̈ܰܝܳܐ ܕܰܐܖ̈ܝܰܘܳܬܳܐ.
39 ܒܚܶܡܬܳܐ ܐܶܥܒܶܕ ܡܰܫܬܰܝܗܽܘܢ: ܘܰܐܪܘܶܐ ܐܶܢܽܘܢ ܘܢܶܬܬܰܒܪܽܘܢ: ܘܢܶܕܡܟܽܘܢ ܫܶܢܬܳܐ ܠܥܳܠܰܡ: ܘܠܳܐ ܢܶܬܬܥܺܝܪܽܘܢ ܐܳܡܰܪ ܡܳܪܝܳܐ.
40 ܘܰܐܫܠܶܡ ܐܶܢܽܘܢ ܐܰܝܟ ܡܦܰܛܡ̈ܶܐ ܠܩܶܛܠܳܐ: ܘܰܐܝܟ ܕܶܟܖ̈ܶܐ ܘܰܓ̈ܕܰܝܳܐ ܠܢܶܟܣܬܳܐ.
41 ܐܰܝܟܰܢܳܐ ܐܶܬܬܰܚܕܰܬ ܐܰܪܺܫܟܳܝܬܳܐ ܬܶܫܒܽܘܚܬܳܐ ܕܟܽܠܳܗ̇ ܐܰܪܥܳܐ: ܐܰܝܟܰܢܳܐ ܗܘܳܬ ܠܬܶܡܗܳܐ ܒܳܒܶܠ ܒܥܰܡ̈ܡܶܐ.
42 ܣܠܶܩ ܥܰܠ ܒܳܒܶܠ ܝܰܡܳܐ ܘܰܒܣܽܘܓܳܐܐ ܕܓܰܠܠܰܘ̈ܗܝ ܐܶܬܟܰܣܝܰܬ.
43 ܗܘܰܝ̈ ܩܽܘܖ̈ܝܳܗ̇ ܠܬܶܡܗܳܐ: ܐܰܝܟ ܐܰܪܥܳܐ ܚܰܪܒܬܳܐ ܘܨܳܕܺܝܬܳܐ: ܠܳܐ ܢܶܬܶܒ ܒܗܶܝܢ ܓܒܰܪ: ܘܠܳܐ ܢܶܥܡܰܪ ܒܗܶܝܢ ܒܰܪܢܳܫ.
44 ܘܶܐܦܩܽܘܕ ܥܰܠ ܒܺܝܠ ܒܒܳܒܶܠ: ܘܰܐܦܶܩ ܙܽܘܬܖ̈ܰܘܗܝ ܡܶܢ ܦܽܘܡܶܗ: ܘܠܳܐ ܢܶܕܚܠܽܘܢ ܠܶܗ ܬܽܘܒ ܥܰܡ̈ܡܶܐ: ܘܳܐܦ ܫܽܘܖ̈ܶܝܗ̇ ܕܒܳܒܶܠ ܖ̈ܘܺܝܚܶܐ ܢܶܦܠܽܘܢ.
45 ܦܽܘܩܘ ܡܶܢ ܓܰܘܳܗ̇ ܥܰܡܝ: ܘܦܰܠܶܛܘ ܓܒܰܪ ܢܰܦܫܶܗ: ܡܶܢ ܚܶܡܬܳܐ ܕܪܽܘܓܙܶܗ ܕܡܳܪܝܳܐ.
46 ܕܰܠܡܳܐ ܢܶܬܬܒܰܪ ܠܶܒܟܽܘܢ: ܘܬܶܕܚܠܽܘܢ ܡܶܢ ܛܶܒܳܐ ܕܡܶܫܬܡܰܥ ܒܰܐܪܥܳܐ: ܘܢܺܐܬܶܐ ܒܳܗ̇ ܒܫܰܢ̱ܬܳܐ ܗܳܝ ܛܶܒܳܐ: ܘܒܳܬܪܳܗ̇ ܕܫܰܢ̱ܬܳܐ ܛܶܒܳܐ ܐ̱ܚܪܺܢܳܐ: ܘܢܶܗܘܶܐ ܚܛܽܘܦܝܳܐ ܒܰܐܪܥܳܐ: ܘܰܢܩܽܘܡ ܫܰܠܺܝܛܳܐ ܥܰܠ ܫܰܠܺܝܛܳܐ.
47 ܡܶܛܽܠ ܗܳܢܳܐ ܗܳܐ ܝܰܘ̈ܡܳܬܳܐ ܐܳܬܶܝܢ ܐܳܡܰܪ ܡܳܪܝܳܐ: ܘܶܐܦܩܽܘܕ ܥܰܠ ܓܠܺܝ̈ܦܺܝܗ̇ ܕܒܳܒܶܠ: ܘܟܽܠܳܗ̇ ܐܰܪܥܳܐ ܬܺܐܒܰܕ: ܘܟܽܠܗܽܘܢ ܩܛܺܝܠܶܝ̈ܗ̇ ܢܶܦܠܽܘܢ ܒܓܰܘܳܗ̇.
48 ܘܢܶܚܕܽܘܢ ܥܰܠ ܒܳܒܶܠ ܫܡܰܝܳܐ ܘܰܐܪܥܳܐ ܘܟܽܠ ܕܰܒܗܽܘܢ: ܡܶܛܽܠ ܕܡܶܢ ܓܰܪܒܝܳܐ ܢܺܐܬܽܘܢ ܥܠܶܝܗ̇: ܒܳܙܽܘ̈ܙܶܐ ܐܳܡܰܪ ܡܳܪܝܳܐ.
49 ܘܳܐܦ ܒܒܳܒܶܠ ܢܶܦܠܽܘܢ ܩܛܺܝ̈ܠܶܐ ܕܺܝܣܪܳܐܶܝܠ: ܘܳܐܦ ܡܶܢ ܒܳܒܶܠ ܢܶܦܠܽܘܢ ܩܛܺܝ̈ܠܶܐ ܒܟܽܠܳܗ̇ ܐܰܪܥܳܐ.
50 ܐܰܝܠܶܝܢ ܕܶܐܬܦܰܠܰܛܘ ܡܶܢ ܚܰܪܒܳܐ: ܙܶܠܘ ܘܠܳܐ ܬܩܽܘܡܽܘܢ: ܐܶܬܕܰܟܪܘ ܡܶܢ ܪܽܘܚܩܳܐ ܠܡܳܪܝܳܐ: ܐܘܪܺܫܠܶܡ ܬܶܣܰܩ ܥܰܠ ܠܶܒܟܽܘܢ.
51 ܘܢܺܐܡܪܽܘܢ ܕܒܶܝܬ ܝܺܣܪܳܐܶܝܠ ܒܗܶܬܢ ܛܳܒ: ܡܶܛܽܠ ܕܰܫܡܰܥܢ ܚܶܣܕܳܐ: ܘܟܰܣܝܰܬ ܒܶܗܬܬܳܐ ܠܰܐܦܰܝ̈ܢ: ܡܶܛܽܠ ܕܥ̣ܰܠܘ ܢܽܘܟܖ̈ܳܝܶܐ ܠܡܰܩܕܫܶܗ ܕܡܳܪܝܳܐ.
52 ܡܶܛܽܠ ܗܳܢܳܐ ܗܳܐ ܝܰܘ̈ܡܳܬܳܐ ܐܳܬܶܝܢ ܐܳܡܰܪ ܡܳܪܝܳܐ: ܘܶܐܦܩܽܘܕ ܥܰܠ ܒܳܒܶܠ ܘܥܰܠ ܓܠܺܝ̈ܦܶܝܗ̇: ܘܰܒܟܽܠܳܗ̇ ܐܰܪܥܳܐ ܢܶܦܠܽܘܢ ܩܛܺܝ̈ܠܶܝܗ̇.
53 ܐܶܢ ܬܶܣܰܩ ܒܳܒܶܠ ܠܰܫܡܰܝܳܐ: ܘܶܐܢ ܬܣܺܝܡ ܒܪܰܘܡܳܐ ܥܽܘܫܢܳܗ̇: ܡܶܢ ܩܕܳܡܝ ܢܺܐܬܽܘܢ ܥܠܶܝܗ̇ ܒܳܙܽܘ̈ܙܶܐ ܐܳܡܰܪ ܡܳܪܝܳܐ.
54 ܩܳܠܳܐ ܕܺܝܠܶܠܬܳܐ ܡܶܢ ܒܳܒܶܠ: ܘܰܬܒܳܪܳܐ ܪܰܒܳܐ ܡܶܢ ܐܰܪܥܳܐ: ܕܟܰܠܕܳܝ̈ܶܐ.
55 ܡܶܛܽܠ ܕܒܰܙ ܡܳܪܝܳܐ ܠܒܳܒܶܠ: ܘܰܐܘܒܶܕ ܡܶܢܳܗ̇ ܒܢܰܝ̈ ܐ̱ܢܳܫܳܐ ܘܰܒܥܺܝܪܳܐ: ܩܳܠܳܐ ܪܰܒܳܐ ܐܰܝܟ ܡܰܝ̈ܳܐ ܣܰܓܺܝ̈ܐܶܐ ܕܳܐܙܶܠ ܩܳܠܗܽܘܢ.
56 ܡܶܛܽܠ ܕܶܐܬܰܘ ܥܰܠ ܒܳܒܶܠ ܒܳܙܽܘ̈ܙܶܐ: ܘܶܐܬܬܚܶܕܘ ܓܰܢ̱ܒܳܖ̈ܶܝܗ̇ ܘܶܐܬܬܒܰܖ̈ܝ ܩܶܫ̈ܬܳܬܗܽܘܢ: ܡܶܛܽܠ ܕܰܐܠܳܗܳܐ ܦܳܪܽܘܥܳܐ ܡܳܪܝܳܐ: ܡܶܦܪܰܥ ܢܶܦܪܽܘܥ ܐܶܢܽܘܢ.
57 ܘܰܐܪܘܶܐ ܪܰܘܖ̈ܒܳܢܶܝܗ̇ ܘܚܰܟܺܝ̈ܡܶܝܗ̇: ܚܺܐܖ̈ܶܝܗ̇ ܘܫܰܠܺܝ̈ܛܳܢܶܝܗ̇ ܘܓܰܢ̱ܒܳܖ̈ܶܝܗ̇: ܘܢܶܕܡܟܽܘܢ ܫܶܢܬܳܐ ܠܥܳܠܰܡ ܘܠܳܐ ܢܶܬܬܥܺܝܪܽܘܢ: ܐܳܡܰܪ ܡܰܠܟܳܐ ܡܳܪܝܳܐ ܚܰܝܠܬܳܢܳܐ ܫܡܶܗ.
58 ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ: ܫܽܘܖ̈ܶܝܗ̇ ܕܒܳܒܶܠ ܖ̈ܘܺܝܚܶܐ ܡܶܬܥܩܳܪܽܘ ܢܶܬܥܰܩܪܽܘܢ: ܘܬܰܖ̈ܥܶܝܗ̇ ܖ̈ܳܡܶܐ ܒܢܽܘܪܳܐ ܢܺܐܩܕܽܘܢ: ܘܢܶܠܐܽܘܢ ܥܰܡ̈ܡܶܐ ܣܪܺܝܩܳܐܺܝܬ: ܘܶܐܡ̈ܘܳܬܳܐ ܒܢܽܘܪܳܐ ܢܶܬܛܰܖ̈ܦܳܢ.
59 ܦܶܬܓܳܡܳܐ ܕܦܰܩܶܕ ܐܶܪܰܡܝܳܐ ܢܒܺܝܳܐ: ܠܫܶܪܝܳܐ ܒܰܪ ܢܶܪܝܳܐ ܒܰܪ ܡܥܰܣܝܳܐ: ܟܰܕ ܐܶܙܰܠ ܥܰܡ ܨܶܕܰܩܝܳܐ ܡܰܠܟܳܐ ܕܺܝܗܽܘܕܳܐ ܠܒܳܒܶܠ: ܒܰܫܢܰܬ ܚܕܰܥܶܣܖ̈ܶܐ ܕܡܰܠܟܽܘܬܶܗ: ܘܫܶܪܝܳܐ ܪܰܒ ܡܰܫܪܺܝܬܳܐ ܗ̱ܘܳܐ.
60 ܘܰܟܬܰܒ ܐܶܪܰܡܝܳܐ ܟܽܠܳܗ̇ ܒܺܝܫܬܳܐ ܕܳܐܬܝܳܐ ܥܰܠ ܒܳܒܶܠ ܒܣܶܦܪܳܐ ܚܰܕ: ܡ̈ܶܠܶܐ ܗܳܠܶܝܢ ܕܰܟܬܺܝ̈ܒܳܢ ܥܰܠ ܒܳܒܶܠ.
61 ܘܶܐܡܰܪ ܐܶܪܰܡܝܳܐ ܠܫܶܪܝܳܐ: ܡܳܐ ܕܥ̣ܰܠܬ ܠܓܰܘ ܒܳܒܶܠ: ܩܪܺܝ ܘܰܚܙܺܝ ܟܽܠܗܽܘܢ ܦܶܬܓܳܡ̈ܶܐ ܗܳܠܶܝܢ.
62 ܘܶܐܡܰܪ ܡܳܪܝܳܐ: ܐܰܢ̱ܬ ܐܶܡ̣ܰܪܬ ܥܰܠ ܐܰܬܪܳܐ ܗܳܢܳܐ ܠܡܰܘܒܳܕܽܘܬܶܗ: ܕܠܳܐ ܢܶܗܘܶܐ ܒܶܗ ܕܝܳܬܶܒ ܡܶܢ ܒܢܰܝ̈ܢܳܫܳܐ ܘܰܥܕܰܡܳܐ ܠܰܒܥܺܝܪܳܐ: ܡܶܛܽܠ ܕܰܠܚܽܘܪܒܳܐ ܠܥܳܠܰܡ ܢܶܗܘܶܐ.
63 ܘܡܳܐ ܕܫ̣ܰܠܶܡܬ ܠܡܶܩܪܳܐ ܒܣܶܦܪܳܐ ܗܳܢܳܐ: ܩܛܽܘܪ ܒܶܗ ܟܺܐܦܳܐ ܘܰܫܕܺܝܘܗܝ ܒܰܦܪܳܬ.
64 ܘܶܐܡܰܪ ܗܳܟܰܢܳܐ ܬܶܦܶܠ ܒܳܒܶܠ ܘܠܳܐ ܬܩܽܘܡ: ܡܶܢ ܩܕܳܡ ܒܺܝܫܬܳܐ ܕܡܰܝܬܶܐ ܐ̱ܢܳܐ ܥܠܰܝܗܽܘܢ ܘܢܶܬܛܰܪܦܽܘܢ. ܥܕܰܡܳܐ ܠܗܳܪܟܳܐ ܦܶܬܓܳܡܰܘ̈ܗܝ ܕܶܐܪܰܡܝܳܐ.