Jeremiah 21
The Book of Jeremiah
܀ ܐܪܡܝܐ ܟܐ ܀
1 ܦܶܬܓܳܡܳܐ ܕܰܗܘܳܐ ܥܰܠ ܐܶܪܰܡܝܳܐ ܡܶܢ ܩܕܳܡ ܡܳܪܝܳܐ: ܟܰܕ ܫܰܕܰܪ ܠܘܳܬܶܗ ܨܶܕܰܩܝܳܐ ܡܰܠܟܳܐ: ܠܦܶܫܚܽܘܪ ܒܰܪ ܡܠܰܟܝܳܐ: ܘܠܰܨܦܰܢܝܳܐ ܒܰܪ ܡܥܰܣܝܳܐ ܟܳܗܢܳܐ: ܠܡܺܐܡܰܪ.
2 ܒܥܺܝ ܥܠܰܝܢ ܡܶܢ ܩܕܳܡ ܡܳܪܝܳܐ: ܡܶܛܽܠ ܕܰܢܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ ܡܶܬܟܰܬܰܫ ܥܰܡܰܢ: ܛܳܟ ܢܶܥܒܶܕ ܥܰܡܰܢ ܡܳܪܝܳܐ ܐܰܝܟ ܟܽܠܗܶܝܢ ܬܶܕܡܖ̈ܳܬܶܗ: ܘܢܶܦܪܩܺܝܘܗܝ ܡܶܢܢ.
3 ܘܶܐܡܰܪ ܠܗܽܘܢ ܐܶܪܰܡܝܳܐ: ܗܳܟܰܢܳܐ ܬܺܐܡܪܽܘܢ ܠܨܶܕܰܩܝܳܐ ܡܰܠܟܳܐ.
4 ܗܳܟܰܢܳܐ ܐܳܡܰܪ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ: ܗܳܐ ܡܰܗܦܶܟ ܐ̱ܢܳܐ ܡܳܐܢܰܝ̈ ܩܪܳܒܳܐ ܕܒܺܐܝܕܰܝ̈ܟܽܘܢ ܕܡܶܬܟܰܬܫܺܝܢ ܐܢ̱ܬܽܘܢ ܒܗܽܘܢ ܥܰܡ ܡܰܠܟܳܐ ܕܒܳܒܶܠ: ܘܥܰܡ ܟܰܠܕܳܝ̈ܶܐ ܕܰܟܪܺܝܟܺܝܢ ܠܟܽܘܢ ܠܒܰܪ ܡܶܢ ܩܪܺܝܬܳܐ: ܘܶܐܟܰܢܶܫ ܐܶܢܽܘܢ ܠܓܰܘ ܩܪܺܝܬܳܐ ܗܳܕܶܐ.
5 ܘܶܐܬܟܰܬܰܫ ܐܶܢܳܐ ܥܰܡܟܽܘܢ: ܒܺܐܝܕܳܐ ܬܰܩܺܝܦܬܳܐ ܘܒܰܕܪܳܥܳܐ ܪܳܡܳܐ: ܒܪܽܘܓܙܳܐ ܘܰܒܚܶܡܬܳܐ.
6 ܘܰܒܪܽܘܓܙܳܐ ܪܰܒܳܐ ܐܶܡܚܶܐ ܠܝܳܬܒܰܝ̈ ܩܪܺܝܬܳܐ ܗܳܕܶܐ: ܒܢܰܝ̈ܢܳܫܳܐ ܘܰܒܥܺܝܪܳܐ ܒܡܰܘܬܳܐ ܪܰܒܳܐ ܢܡܽܘܬܽܘܢ.
7 ܘܒܳܬܪܟܶܢ ܐܳܡܰܪ ܡܳܪܝܳܐ: ܐܰܫܠܡܺܝܘܗܝ ܠܨܶܕܰܩܝܳܐ ܡܰܠܟܳܐ ܕܺܝܗܽܘܕܳܐ ܘܰܠܥܰܒܕܰܘ̈ܗܝ: ܘܰܠܥܰܡܳܐ ܕܶܐܫܬܚܰܪ ܒܰܩܪܺܝܬܳܐ ܗܳܕܶܐ: ܡܶܢ ܚܰܪܒܳܐ: ܘܡܶܢ ܟܰܦܢܳܐ: ܘܡܶܢ ܡܰܘܬܳܢܳܐ: ܐܰܫܠܶܡ ܒܺܐܝܕܳܐ ܕܰܢܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ: ܘܒܺܐܝܕܳܐ ܕܰܐܝܠܶܝܢ ܕܒܳܥܶܝܢ ܢܰܦܫܗܽܘܢ: ܘܢܶܡܚܶܐ ܐܶܢܽܘܢ ܒܦܽܘܡܳܐ ܕܚܰܪܒܳܐ: ܘܠܳܐ ܢܚܽܘܣ ܥܠܰܝܗܽܘܢ: ܘܠܳܐ ܢܪܰܚܶܦ ܘܠܳܐ ܢܪܰܚܶܡ ܥܠܰܝܗܽܘܢ.
8 ܘܰܠܥܰܡܳܐ ܗܳܢܳܐ ܐܶܡܰܪ: ܗܰܟܰܢܳܐ ܐܳܡܰܪ ܡܳܪܝܳܐ: ܗܳܐ ܝܳܗܶܒ ܐ̱ܢܳܐ ܩܕܳܡܝܟܽܘܢ ܐܽܘܪܚܳܐ ܕܚܰܝ̈ܶܐ ܐܘܪܚܳܐ ܕܡܰܘܬܳܐ.
9 ܡܰܢ ܕܝܳܬܶܒ ܒܰܩܪܺܝܬܳܐ ܗܳܕܶܐ: ܢܡܽܘܬ ܒܚܰܪܒܳܐ: ܘܰܒܟܰܦܢܳܐ: ܘܰܒܡܰܘܬܳܢܳܐ: ܘܡܰܢ ܕܢܳܦܶܩ ܠܘܳܬ ܟܰܠܕܳܝ̈ܶܐ ܕܰܟܪܺܝܟܺܝܢ ܠܟܽܘܢ: ܚܳܝܶܐ ܘܰܡܫܰܘܙܶܒ ܢܰܦܫܶܗ.
10 ܡܶܛܽܠ ܕܣܳܡܶ݀ܬ ܐܰܦܰܝ̈ ܒܰܩܪܺܝܬܳܐ ܗܳܕܶܐ ܠܒܺܝܫܬܳܐ ܘܠܳܐ ܠܛܳܒܬܳܐ ܐܳܡܰܪ ܡܳܪܝܳܐ: ܘܒܺܐܝܕܶܗ ܕܡܰܠܟܳܐ ܕܒܳܒܶܠ ܬܶܫܬܠܶܡ: ܘܢܰܘܩܕܺܝܗ̇ ܒܢܽܘܪܳܐ.
11 ܘܰܠܒܶܝܬ ܡܰܠܟܳܐ ܕܺܝܗܽܘܕܳܐ: ܫܡܰܥܘ ܦܶܬܓܳܡܶܗ ܕܡܳܪܝܳܐ ܕܒܶܝܬ ܕܰܘܺܝܕ: ܗܳܟܰܢܳܐ ܐܳܡܰܪ ܡܳܪܝܳܐ.
12 ܕܽܘܢܘ ܒܨܰܦܪܳܐ ܕܺܝܢܳܐ: ܘܦܰܨܰܘ ܠܰܛܠܺܝܡܳܐ ܡܶܢ ܡܰܢ ܕܛܳܠܶܡ ܠܶܗ: ܕܰܠܡܳܐ ܬܶܦܽܘܩ ܐܰܝܟ ܢܽܘܪܳܐ ܚܶܡܬܝ: ܘܬܰܘܩܶܕ ܘܠܰܝܬ ܕܰܡܕܰܥܶܟ: ܡܶܛܽܠ ܒܺܝܫܽܘܬܳܐ ܕܰܥܒܳܕܰܝ̈ܟܽܘܢ.
13 ܗܳܐ ܐܶܢܳܐ ܥܠܰܝܟܝ ܝܳܬܒܰܬ ܒܥܽܘܡܩܳܐ: ܥܰܡܺܝܩܰܬ ܦܩܰܥܬܳܐ ܐܳܡܰܪ ܡܳܪܝܳܐ: ܕܳܐܡܪܺܝܢ ܡܰܢ ܢܺܐܬܶܐ ܥܠܰܝܢ. ܘܡܰܢܽܘ ܢܶܥܽܘܠ ܠܡܰܥܡܪܰܢ.
14 ܐܶܦܩܽܘܕ ܥܠܰܝܟܽܘܢ ܐܰܝܟ ܦܺܐܖ̈ܰܝ ܥܒܳܕܰܝ̈ܟܽܘܢ ܐܳܡܰܪ ܡܳܪܝܳܐ: ܘܶܐܫܒܽܘܩ ܢܽܘܪܳܐ ܒܩܽܘܖ̈ܝܳܗ̇: ܘܬܶܐܟܽܘܠ ܟܽܠܗܽܘܢ ܚܕܳܖ̈ܶܝܗ̇.