Jeremiah 31
The Book of Jeremiah
܀ ܐܪܡܝܐ ܠܐ ܀
1 ܒܙܰܒܢܳܐ ܗܰܘ ܐܳܡܰܪ ܡܳܪܝܳܐ: ܐܶܗܘܶܐ ܐܰܠܳܗܳܐ ܠܟܽܠܗܶܝܢ ܫܰܖ̈ܒܳܬܳܐ ܕܺܝܣܪܳܐܶܝܠ: ܘܗܶܢܽܘܢ ܢܶܗܘܽܘܢ ܠܺܝ ܥܰܡܳܐ.
2 ܗܳܟܰܢܳܐ ܐܳܡܰܪ ܡܳܪܝܳܐ: ܐܶܫܟܰܚ ܖ̈ܰܚܡܶܐ ܒܡܰܕܒܪܳܐ ܥܰܡܳܐ ܕܶܐܬܦܰܨܺܝ ܡܶܢ ܚܰܪܒܳܐ: ܐܶܙܰܠ ܒܫܶܒܝܳܐ ܝܺܣܪܳܐܶܝܠ.
3 ܡܶܢ ܪܽܘܚܩܳܐ ܡܳܪܝܳܐ ܐܶܬܚܙܺܝ ܠܺܝ: ܘܶܐܡܰܪ ܠܺܝ: ܪܶܚܡܬܳܐ ܕܥܳܠܡܳܐ ܪܚܶܡܬܶܟܝ: ܡܶܛܽܠ ܗܳܢܳܐ ܢܓܰܕܬܶܟܝ ܠܛܰܝܒܽܘܬܳܐ.
4 ܬܽܘܒ ܐܶܒܢܶܝܟܝ ܘܬܶܬܒܢܶܝܢ ܒܬܽܘܠܬܳܐ ܕܺܝܣܪܳܐܶܝܠ: ܬܽܘܒ ܬܶܨܛܰܒܬܺܝܢ ܒܬܰܨܒܺܝܬܳܐ: ܘܬܶܦܩܺܝܢ ܒܰܟܢܽܘܫܬܳܐ ܕܰܡܫܰܒܚܳܢ̈ܶܐ.
5 ܬܽܘܒ ܬܶܨܒܺܝܢ ܟܰܪܡܳܐ ܒܛܽܘܪܳܐ ܕܫܳܡܪܺܝܢ ܨܽܘܒܝ ܢܶܨܒܬܳܐ ܘܫܰܒܰܚܝ.
6 ܡܶܛܽܠ ܕܰܥܬܺܝܕ ܗ̱ܘ ܝܰܘܡܳܐ ܕܢܶܩܪܽܘܢ ܢܳܛܽܘܖ̈ܶܐ ܒܛܽܘܪܳܐ ܕܰܐܦܪܶܝܡ: ܘܢܺܐܡܪܽܘܢ: ܩܽܘܡܘ ܢܶܣܰܩ ܠܨܶܗܝܽܘܢ ܠܘܳܬ ܡܳܪܝܳܐ ܐܰܠܳܗܰܢ.
7 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ: ܫܰܒܰܚܘ ܕܒܶܝܬ ܝܰܥܩܽܘܒ ܒܚܰܕܽܘܬܳܐ: ܘܕܽܘܨܘ ܒܪܺܝܫ ܥܰܡ̈ܡܶܐ: ܐܰܫܡܰܥܘ ܘܫܰܒܰܚܘ: ܘܶܐܡܰܪܘ: ܦܪܽܘܩ ܡܳܪܝܳܐ ܠܥܰܡܳܟ ܠܫܰܪܟܶܗ ܕܺܝܣܪܳܐܶܝܠ.
8 ܗܳܐ ܡܰܝܬܶܐ ܐ̱ܢܳܐ ܠܗܽܘܢ ܡܶܢ ܐܰܪܥܳܐ ܕܓܰܪܒܝܳܐ: ܘܶܐܟܰܢܶܫ ܐܶܢܽܘܢ ܡܶܢ ܣܰܘ̈ܦܶܝܗ̇ ܕܰܐܪܥܳܐ: ܘܳܐܦ ܚܓܺܝܖ̈ܶܐ ܘܰܥܘܺܝܖ̈ܶܐ ܕܺܐܝܬ ܒܗܽܘܢ: ܘܰܕܒܰܛܢܳܐ ܘܰܕܝܳܠܕܳܐ ܐܰܟܚܕܳܐ: ܟܶܢܫܳܐ ܪܰܒܳܐ ܢܶܗܦܟܽܘܢ ܠܗܳܪܟܳܐ.
9 ܒܰܒܟܳܬܳܐ ܢܺܐܙܽܠܘܢ: ܘܰܒܬܰܚܢܰܢܬܳܐ ܢܺܐܬܽܘܢ: ܐܶܕܰܒܰܪ ܐܶܢܽܘܢ ܥܰܠ ܫܒܺܝ̈ܠܶܐ ܕܡܰܝ̈ܳܐ: ܒܽܐܘܖ̈ܚܳܬܳܐ ܬܖ̈ܺܝܨܳܬܳܐ ܕܠܳܐ ܢܶܬܬܰܩܠܽܘܢ ܒܗܶܝܢ: ܡܶܛܽܠ ܕܰܗܘܺܝ݀ܬ ܠܺܝܣܪܳܐܶܝܠ ܠܰܐܒܳܐ: ܘܰܐܦܪܶܝܡ ܗܘܳܐ ܒܽܘܟܪܝ.
10 ܫܡܰܥܘ ܦܶܬܓܳܡܶܗ ܕܡܳܪܝܳܐ ܥܰܡܶܗ: ܘܚܰܘܰܘ ܒܓܳܙܖ̈ܳܬܳܐ ܖ̈ܰܚܺܝܩܳܬܳܐ: ܘܶܐܡܰܪܘ: ܡܰܢ ܕܒܰܕܪܶܗ ܠܺܝܣܪܳܐܶܝܠ ܢܟܰܢܫܺܝܘܗܝ: ܘܰܢܢܰܛܪܺܝܘܗܝ ܐܰܝܟ ܪܳܥܝܳܐ ܠܰܓܙܳܪܶܗ.
11 ܡܶܛܽܠ ܕܰܦܪܰܩ ܡܳܪܝܳܐ ܠܝܰܥܩܽܘܒ ܥܰܒܕܶܗ: ܘܦܰܨܝܶܗ ܡܶܢ ܐܺܝܕܰܝ̈ ܡܰܢ ܕܥܰܫܺܝܢ ܡܶܢܗ.
12 ܘܢܺܐܬܽܘܢ ܘܰܢܫܰܒܚܽܘܢ ܒܪܰܘܡܳܗ̇ ܕܨܶܗܝܽܘܢ: ܘܢܶܬܒܰܣܡܽܘܢ ܡܶܢ ܛܳܒ̈ܳܬܶܗ ܕܡܳܪܝܳܐ: ܡܶܢ ܥܒܽܘܪܳܐ: ܘܡܶܢ ܚܰܡܪܳܐ: ܘܡܶܢ ܡܶܫܚܳܐ: ܘܡܶܢ ܒܢܰܝ̈ ܥܳܢ̈ܳܐ: ܘܬܰܘܖ̈ܶܐ: ܘܬܶܗܘܶܐ ܢܰܦܫܗܽܘܢ ܐܰܝܟ ܓܰܢܰܬ ܫܶܩܝܳܐ: ܘܠܳܐ ܢܰܘܣܦܽܘܢ ܬܽܘܒ ܠܡܶܣܬܰܪܳܩܽܘ.
13 ܗܳܝܕܶܝܢ ܬܶܚܕܶܐ ܒܬܽܘܠܬܳܐ ܒܚܰܕܽܘܬܳܐ: ܘܓܰܕܽܘ̈ܕܶܐ ܘܣܳܒ̈ܶܐ ܐܰܟܚܕܳܐ ܢܶܚܕܽܘܢ. ܘܰܐܗܦܶܟ ܐܶܒܠܗܽܘܢ ܠܚܰܕܽܘܬܳܐ: ܘܶܐܒܰܝܰܐ ܐܶܢܽܘܢ ܘܶܐܚܰܕܶܐ ܐܶܢܽܘܢ ܡܶܢ ܕܽܘܘܳܢܗܽܘܢ.
14 ܘܰܐܪܘܶܐ ܢܰܦܫܳܐ ܕܟܳܗ̈ܢܶܐ ܕܽܘܗܳܢܳܐ: ܘܥܰܡܝ ܡܶܢ ܛܽܘܒܝ ܢܶܣܒܥܽܘܢ ܐܳܡܰܪ ܡܳܪܝܳܐ.
15 ܗܳܟܰܢܳܐ ܐܳܡܰܪ ܡܳܪܝܳܐ: ܩܳܠܳܐ ܒܪܳܡܬܳܐ ܐܶܫܬܡܰܥ: ܐܶܠܝܳܐ ܘܰܒܟܳܬܳܐ ܡܰܪܺܝܪܬܳܐ: ܪܳܚܶܝܠ ܒܳܟܝܳܐ ܥܰܠ ܒܢܶܝ̈ܗ̇: ܘܠܳܐ ܨܳܒܝܳܐ ܠܡܶܬܒܰܝܳܐܽܘ ܡܶܛܽܠ ܕܠܰܝܬ ܐܶܢܽܘܢ.
16 ܗܳܟܰܢܳܐ ܐܳܡܰܪ ܡܳܪܝܳܐ: ܟܠܳܝ ܩܳܠܶܟܝ ܡܶܢ ܒܶܟܝܳܐ: ܘܥܰܝ̈ܢܰܝܟܝ ܡܶܢ ܕܶܡܥܬܳܐ: ܡܶܛܽܠ ܕܺܐܝܬ ܐܰܓܪܳܐ ܠܕܶܡܥܰܝ̈ܟܝ ܐܳܡܰܪ ܡܳܪܝܳܐ: ܘܢܶܗܦܟܽܘܢ ܡܶܢ ܐܰܪܥܳܐ ܕܰܒܥܶܠܕܒܳܒ̈ܶܐ.
17 ܘܺܐܝܬ ܣܰܒܪܳܐ ܠܚܰܪܬܶܟܝ ܐܳܡܰܪ ܡܳܪܝܳܐ: ܘܢܶܗܦܟܽܘܢ ܒܢܰܝ̈ܳܐ ܠܰܬܚܽܘܡܗܽܘܢ.
18 ܡܶܫܡܰܥ ܫܶܡܥܶ݀ܬ ܠܰܐܦܪܶܝܡ ܕܶܐܠܳܐ: ܘܳܐܡܰܪ: ܪܕܰܝܬܳܢܝ ܡܳܪܝܳܐ ܘܶܐܬܪܕܺܝ݀ܬ: ܐܰܝܟ ܥܶܓܠܳܐ ܗܘܺܝ݀ܬ ܕܠܳܐ ܡܟܰܒܰܫ: ܐܰܬܺܝܒܰܝܢܝ ܘܶܐܬܽܘܒ: ܡܶܛܽܠ ܕܰܐܢ̱ܬ ܗ̱ܘ ܡܳܪܝܳܐ ܐܰܠܳܗܝ.
19 ܡܶܛܽܠ ܕܡܶܢ ܒܳܬܰܪ ܕܬܳܒܶ݀ܬ ܐܶܬܒܰܝܐܶܬ: ܘܡܶܢ ܒܳܬܰܪ ܕܝܶܕܥܶ݀ܬ ܐܶܬܬܢܺܝܚܶ݀ܬ: ܒܶܗܬܶܬ ܘܳܐܦ ܐܶܬܬܰܟܣܶ݀ܬ: ܕܩܰܒܠܶܬ ܚܶܣܕܳܐ ܕܛܰܠܝܽܘܬܝ.
20 ܒܪܳܐ ܗ̱ܘ ܠܺܝ ܝܰܩܺܝܪܳܐ ܐܰܦܪܶܝܡ: ܘܝܰܠܕܳܐ ܚܰܒܺܝܒܳܐ: ܡܶܛܽܠ ܕܰܒܙܰܒܢܳܐ ܕܰܡܡܰܠܶܠ ܐ̱ܢܳܐ ܒܶܗ ܡܶܬܕܟܰܪ ܐ̱ܢܳܐ ܠܶܗ: ܡܶܛܽܠ ܗܳܢܳܐ ܗܘܰܘ ܖ̈ܰܚܡܰܝ ܥܠܰܘܗܝ: ܘܶܐܪܰܚܶܡ ܥܠܰܘܗܝ ܐܳܡܰܪ ܡܳܪܝܳܐ.
21 ܐܰܩܺܝܡܝ ܠܶܟܝ ܐܳܬܳܐ ܘܬܶܒܝ ܒܡܰܕܒܪܳܐ: ܗܰܒܝ ܠܶܒܶܟܝ ܠܽܐܘܪܚܳܐ ܬܪܺܝܨܬܳܐ: ܬܽܘܒܝ ܒܬܽܘܠܬܳܐ ܕܺܝܣܪܳܐܶܝܠ ܐܳܡܰܪ ܡܳܪܝܳܐ: ܘܬܶܒܝ ܒܩܽܘܖ̈ܰܝܝܟܝ ܗܳܠܶܝܢ.
22 ܥܕܰܡܳܐ ܠܶܐܡܰܬܝ ܡܶܬܦܰܠܓܳܐ ܐܰܢ̱ܬܝ ܒܰܪܬܳܐ ܬܰܝܳܒܬܳܐ: ܡܶܛܽܠ ܕܒܳܪܶܐ ܡܳܪܝܳܐ ܚܕܰܬܳܐ ܒܰܐܪܥܳܐ: ܢܶܩܒܬܳܐ ܬܚܰܒܶܒ ܓܰܒܪܳܐ.
23 ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܡܶܟܺܝܠ ܢܺܐܡܪܽܘܢ ܦܶܬܓܳܡܳܐ ܗܳܢܳܐ ܒܰܐܪܥܳܐ ܕܺܝܗܽܘܕܳܐ: ܘܰܒܩܽܘܖ̈ܝܳܗ̇: ܡܳܐ ܕܡܰܗܦܶܟ ܐ̱ܢܳܐ ܫܒܺܝܬܗܽܘܢ: ܢܒܰܪܟܳܟ ܡܳܪܝܳܐ ܕܰܝܪܳܐ ܙܰܕܺܝܩܳܐ ܛܽܘܪܳܐ ܩܰܕܺܝܫܳܐ.
24 ܘܢܶܬܒܽܘܢ ܒܳܗ̇ ܝܺܗܽܘܕܳܐ: ܘܟܽܠܗܶܝܢ ܩܽܘܖ̈ܝܳܗ̇ ܐܰܟܚܕܳܐ: ܐܰܟܳܖ̈ܶܐ ܘܖ̈ܳܥܝܰܝ ܓܙܳܖ̈ܶܐ.
25 ܡܶܛܽܠ ܕܰܐܪܘܺܝ݀ܬ ܢܰܦܫܳܐ ܕܨܶܗܝܳܐ: ܘܟܽܠ ܢܰܦܫܳܐ ܕܟܰܦܢܳܐ ܣܰܒܥܶܬ.
26 ܡܶܛܽܠ ܗܳܢܳܐ ܐܶܬܬܥܺܝܪܶܬ ܘܰܚܙܺܝ݀ܬ: ܘܫܶܢܰܬܝ ܒܶܣܡܰܬ ܠܺܝ.
27 ܗܳܐ ܝܰܘ̈ܡܳܬܳܐ ܐܳܬܶܝܢ ܐܳܡܰܪ ܡܳܪܝܳܐ: ܘܶܐܙܪܽܘܥ ܠܰܕܒܶܝܬ ܝܺܣܪܳܐܶܝܠ: ܘܠܰܕܒܶܝܬ ܝܺܗܽܘܕܳܐ: ܙܰܪܥܳܐ ܕܰܒܢܰܝ̈ ܐ̱ܢܳܫܳܐ: ܘܙܰܪܥܳܐ ܕܰܒܥܺܝܪܳܐ.
28 ܘܰܐܝܟ ܕܶܐܬܪܰܥܺܝ݀ܬ ܥܠܰܝܗܽܘܢ ܠܡܶܥܩܰܪ ܐܶܢܽܘܢ: ܘܰܠܡܶܣܬܰܪ: ܘܠܰܡܣܰܚܳܦܽܘ: ܘܰܠܡܰܘܒܳܕܽܘ: ܘܰܠܡܰܒܐܳܫܽܘ: ܗܳܟܰܢܳܐ ܐܶܥܗܰܕ ܥܠܰܝܗܽܘܢ ܠܡܶܒܢܳܐ ܘܰܠܡܶܨܰܒ ܐܳܡܰܪ ܡܳܪܝܳܐ.
29 ܒܝܰܘ̈ܡܳܬܳܐ ܗܳܢܽܘܢ: ܠܳܐ ܢܺܐܡܪܽܘܢ ܬܽܘܒ ܐܰܒܳܗ̈ܶܐ ܐܶܟܰܠܘ ܒܶܣܖ̈ܶܐ: ܘܫܶܢ̈ܶܐ ܕܰܒܢܰܝ̈ܳܐ ܩܰܗ̈ܝܳܢ.
30 ܐܶܠܳܐ ܐ̱ܢܳܫ ܒܰܚܛܳܗܰܘ̈ܗܝ ܢܡܽܘܬ: ܟܽܠ ܒܰܪܢܳܫܳܐ ܕܳܐܟܶܠ ܒܶܣܖ̈ܶܐ: ܫܶܢܰܘ̈ܗܝ ܕܺܝܠܶܗ ܢܶܩܗ̈ܝܳܢ.
31 ܗܳܐ ܝܰܘ̈ܡܳܬܳܐ ܐܳܬܶܝܢ ܐܳܡܰܪ ܡܳܪܝܳܐ: ܘܰܐܩܺܝܡ ܠܰܕܒܶܝܬ ܝܺܣܪܳܐܶܝܠ: ܘܠܰܕܒܶܝܬ ܝܺܗܽܘܕܳܐ ܕܺܝܰܬܺܩܺܐ ܚܕܰܬܳܐ.
32 ܠܳܐ ܐܰܝܟ ܗܳܝ ܕܺܝܰܬܺܩܺܐ ܕܰܐܩܺܝܡܶ݀ܬ ܥܰܡ ܐܰܒܳܗܰܝ̈ܗܽܘܢ: ܒܝܰܘܡܳܐ ܕܶܐܚܕܶܬ ܒܺܐܝܕܗܽܘܢ ܘܰܐܦܩܶ݀ܬ ܐܶܢܽܘܢ ܡܶܢ ܐܰܪܥܳܐ ܕܡܶܨܪܶܝܢ: ܡܶܛܽܠ ܕܗܶܢܽܘܢ ܒܰܛܶܠܘ ܕܺܝܰܬܺܩܺܐ ܕܺܝܠܝ: ܘܳܐܦ ܐܶܢܳܐ ܒܣܺܝܬ ܒܗܽܘܢ ܐܳܡܰܪ ܡܳܪܝܳܐ.
33 ܐܶܠܳܐ ܗܳܕܶܐ ܕܺܝܰܬܺܩܺܐ ܕܶܐܣܺܝܡ ܠܰܕܒܶܝܬ ܝܺܣܪܳܐܶܝܠ: ܒܳܬܰܪ ܝܰܘ̈ܡܳܬܳܐ ܗܳܢܽܘܢ ܐܳܡܰܪ ܡܳܪܝܳܐ: ܐܶܬܠܺܝܘܗܝ ܠܢܳܡܽܘܣܝ ܒܓܰܘܗܽܘܢ: ܘܥܰܠ ܠܶܒܰܘ̈ܳܬܗܽܘܢ ܐܶܟܬܒܺܝܘܗܝ: ܘܶܐܗܘܶܐ ܠܗܽܘܢ ܐܰܠܳܗܳܐ: ܘܗܶܢܽܘܢ ܢܶܗܘܽܘܢ ܠܺܝ ܥܰܡܳܐ.
34 ܘܠܳܐ ܢܰܠܦܽܘܢ ܬܽܘܒ ܓܒܰܪ ܠܰܐܚܽܘܗܝ: ܘܰܓܒܰܪ ܠܚܰܒܪܶܗ: ܘܢܺܐܡܪܽܘܢ ܕܕܰܥܘ ܠܡܳܪܝܳܐ: ܡܶܛܽܠ ܕܟܽܠܗܽܘܢ ܢܶܕܥܽܘܢܳܢܝ: ܡܶܢ ܙܥܽܘܪܗܽܘܢ ܘܰܥܕܰܡܳܐ ܠܩܰܫܺܝܫܗܽܘܢ ܐܳܡܰܪ ܡܳܪܝܳܐ: ܡܶܛܽܠ ܕܶܐܫܒܽܘܩ ܠܚܰܘܒܰܝ̈ܗܽܘܢ: ܘܰܚܛܳܗܰܝ̈ܗܽܘܢ ܬܽܘܒ ܠܳܐ ܐܶܬܕܟܰܪ.
35 ܗܳܟܰܢܳܐ ܐܳܡܰܪ ܡܳܪܝܳܐ: ܕܝܳܗܶܒ ܫܶܡܫܳܐ ܠܢܽܘܗܪܳܐ ܕܺܐܝܡܳܡܳܐ: ܘܕܽܘܒܳܪܳܐ ܕܣܰܗܪܳܐ ܘܰܕܟܰܘܟ̈ܒܶܐ ܠܢܽܘܗܪܳܐ ܕܠܺܠܝܳܐ: ܕܟܳܐܶܐ ܒܝܰܡܳܐ ܘܫܳܠܶܝܢ ܓܰܠܠܰܘ̈ܗܝ: ܡܳܪܝܳܐ ܚܰܝܠܬܳܢܳܐ ܫܡܶܗ.
36 ܐܶܢ ܢܶܥܒܕܽܘܢ ܕܽܘܒܳܖ̈ܶܐ ܗܳܠܶܝܢ ܡܶܢ ܩܕܳܡܝ ܐܳܡܰܪ ܡܳܪܝܳܐ: ܘܳܐܦ ܙܰܪܥܳܐ ܕܺܝܣܪܳܐܶܝܠ ܢܶܒܛܠܽܘܢ: ܕܠܳܐ ܢܶܗܘܽܘܢ ܥܰܡܳܐ ܩܕܳܡܝ ܟܽܠܗܽܘܢ ܝܰܘ̈ܡܳܬܳܐ.
37 ܗܳܟܰܢܳܐ ܐܳܡܰܪ ܡܳܪܝܳܐ: ܐܶܢ ܢܶܬܡܰܫܚܽܘܢ ܫܡܰܝܳܐ ܡܶܢ ܠܥܶܠ: ܘܢܶܬܒ̈ܰܕܩܳܢ ܫܶܬܶܐܣܶܝ̈ܗ̇ ܕܰܐܪܥܳܐ ܡܶܢ ܠܬܰܚܬ: ܐܳܦ ܐܶܢܳܐ ܐܰܣܠܶܐ ܠܟܽܠܶܗ ܙܰܪܥܶܗ ܕܺܝܣܪܳܐܶܝܠ: ܥܰܠ ܟܽܠ ܡܶܕܶܡ ܕܰܥܒܰܕܘ ܐܳܡܰܪ ܡܳܪܝܳܐ.
38 ܗܳܐ ܝܰܘ̈ܡܳܬܳܐ ܐܳܬܶܝܢ ܐܳܡܰܪ ܡܳܪܝܳܐ: ܘܬܶܬܒܢܶܐ ܩܪܺܝܬܳܐ ܠܡܳܪܝܳܐ܆ ܡܶܢ ܡܰܓܕܠܳܐ ܕܰܚܢܳܢܳܐܶܝܠ: ܥܕܰܡܳܐ ܠܬܰܪܥܳܐ ܕܙܳܘܺܝܬܳܐ.
39 ܘܢܶܦܽܘܩ ܬܽܘܒ ܚܽܘܛܳܐ ܕܰܡܫܽܘܚܬܳܐ ܠܩܽܘܒܠܶܗ: ܥܰܠ ܪܳܡܬܳܐ ܕܰܓܪܳܒ: ܘܢܶܬܟܪܶܟ ܠܪܳܡܬܳܐ.
40 ܘܟܽܠܶܗ ܥܽܘܡܩܳܐ ܕܫܳܕܶܝܢ ܒܶܗ ܦܶܪܬܳܐ ܘܩܶܛܡܳܐ: ܥܕܰܡܳܐ ܠܢܰܚܠܳܐ ܕܩܶܕܪܽܘܢ: ܘܰܥܕܰܡܳܐ ܠܙܳܘܺܝܬܳܐ ܕܬܰܪܥܳܐ ܕܖ̈ܰܟܫܳܐ ܡܰܕܢܚܳܝܳܐ ܩܽܘܕܫܳܐ ܠܡܳܪܝܳܐ: ܠܳܐ ܢܶܬܥܩܰܪ ܘܠܳܐ ܢܶܣܬܚܶܦ ܬܽܘܒ ܠܥܳܠܰܡ.