Jeremiah 27
The Book of Jeremiah
܀ ܐܪܡܝܐ ܟܙ ܀
1 ܒܪܺܝܫ ܡܰܠܟܽܘܬܳܐ ܕܨܶܕܰܩܝܳܐ ܒܰܪ ܝܽܘܫܺܝܳܐ ܡܰܠܟܳܐ ܕܺܝܗܽܘܕܳܐ: ܗܘܳܐ ܦܶܬܓܳܡܳܐ ܗܳܢܳܐ ܥܰܠ ܐܶܪܰܡܝܳܐ ܡܶܢ ܩܕܳܡ ܡܳܪܝܳܐ: ܘܶܐܡܰܪ.
2 ܗܳܟܰܢܳܐ ܐܶܡܰܪ ܠܺܝ ܡܳܪܝܳܐ: ܥܒܶܕ ܠܳܟ ܢܺܝܪܳܐ ܘܰܚܢܳܩ̈ܶܐ: ܘܰܐܪܡܳܐ ܐܶܢܽܘܢ ܒܨܰܘܪܳܟ.
3 ܘܫܰܕܰܪ ܐܶܢܽܘܢ ܠܡܰܠܟܳܐ ܕܰܐܕܽܘܡ: ܘܰܠܡܰܠܟܳܐ ܕܡܽܘܐܳܒ: ܘܰܠܡܰܠܟܳܐ ܕܰܒܢܰܝ̈ ܥܰܡܽܘܢ: ܘܰܠܡܰܠܟܳܐ ܕܨܽܘܪ: ܘܰܠܡܰܠܟܳܐ ܕܨܰܝܕܳܢ: ܒܺܐܝܕܳܐ ܕܺܐܝܙ̈ܓܰܕܶܐ ܕܳܐܬܶܝܢ ܠܽܐܘܪܺܫܠܶܡ ܠܘܳܬ ܨܶܕܰܩܝܳܐ ܡܰܠܟܳܐ ܕܺܝܗܽܘܕܳܐ.
4 ܘܦܰܩܶܕ ܐܶܢܽܘܢ ܕܢܺܐܡܪܽܘܢ ܠܡܳܖ̈ܰܝܗܽܘܢ: ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܗܳܟܰܢܳܐ ܬܺܐܡܪܽܘܢ ܠܡܳܖ̈ܰܝܟܽܘܢ.
5 ܐܶܢܳܐ ܥܶܒܕܶܬ ܐܰܪܥܳܐ ܘܰܒܢܰܝ̈ܢܳܫܳܐ: ܘܰܒܥܺܝܪܳܐ ܕܥܰܠ ܐܰܦܰܝ̈ ܐܰܪܥܳܐ: ܒܚܰܝܠܝ ܪܰܒܳܐ ܘܰܕܪܳܥܝ ܪܳܡܳܐ: ܘܝܰܗܒܬܳܗ̇ ܠܡܶܢ ܕܰܫܦܰܪ ܒܥܰܝ̈ܢܰܝ.
6 ܘܗܳܫܳܐ ܐܶܢܳܐ ܝܶܗܒܶ݀ܬ ܟܽܠܗܶܝܢ ܐܰܖ̈ܥܳܬܳܐ ܗܳܠܶܝܢ: ܠܡܶܦܠܰܚ ܠܰܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ ܥܰܒܕܝ ܘܠܡܶܦܠܚܶܗ.
7 ܘܢܶܦܠܚܽܘܢܶܗ ܥܰܡ̈ܡܶܐ ܠܶܗ ܘܠܰܒܪܶܗ ܘܰܠܒܰܪ ܒܪܶܗ: ܥܕܰܡܳܐ ܕܢܶܡܛܶܐ ܙܰܒܢܳܐ ܕܰܐܪܥܶܗ ܐܳܦ ܕܺܝܠܶܗ: ܘܢܶܦܠܚܽܘܢܶܗ ܥܰܡ̈ܡܶܐ ܣܰܓܺܝ̈ܐܶܐ ܘܡܰܠ̈ܟܶܐ ܪܰܘܖ̈ܒܶܐ.
8 ܘܥܰܡܳܐ ܘܡܰܠܟܽܘܬܳܐ ܕܠܳܐ ܢܶܦܠܚܽܘܢܶܗ ܠܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ: ܘܡܰܢ ܕܠܳܐ ܢܰܥܶܠ ܨܰܘܪܶܗ ܒܢܺܝܪܶܗ ܕܡܰܠܟܳܐ ܕܒܳܒܶܠ: ܒܚܰܪܒܳܐ ܘܰܒܟܰܦܢܳܐ ܘܰܒܡܰܘܬܳܢܳܐ ܐܶܦܩܽܘܕ ܥܰܠ ܥܰܡܳܐ ܗܰܘ ܐܳܡܰܪ ܡܳܪܝܳܐ: ܥܕܰܡܳܐ ܕܰܐܫܠܶܡ ܐܶܢܽܘܢ ܒܺܐܝܕܶܗ.
9 ܘܰܐܢ̱ܬܽܘܢ ܠܳܐ ܬܶܫܡܥܽܘܢ ܠܰܢܒܺܝܰܝ̈ܟܽܘܢ ܕܰܓ̈ܳܠܶܐ: ܘܰܠܩܳܨܽܘܡܰܝ̈ܟܽܘܢ: ܘܰܠܚܳܠܡܰܝ̈ܟܽܘܢ: ܘܰܠܢܳܚܫܰܝ̈ܟܽܘܢ: ܘܰܠܚܰܖ̈ܳܫܰܝܟܽܘܢ: ܕܗܶܢܽܘܢ ܐܳܡܪܺܝܢ ܠܟܽܘܢ ܠܳܐ ܬܶܦܠܚܽܘܢ ܠܡܰܠܟܳܐ ܕܒܳܒܶܠ.
10 ܡܶܛܽܠ ܕܫܽܘܩܪܳܐ ܗܶܢܽܘܢ ܡܶܬܢܰܒܶܝܢ ܠܟܽܘܢ: ܕܶܐܕܚܽܘܩܟܽܘܢ ܡܶܢ ܐܰܪܥܟܽܘܢ: ܕܶܐܕܚܽܘܩܟܽܘܢ ܘܬܺܐܒܕܽܘܢ.
11 ܘܥܰܡܳܐ ܕܢܰܥܶܠ ܨܰܘܪܶܗ ܒܢܺܝܪܳܐ ܕܡܰܠܟܳܐ ܕܒܳܒܶܠ: ܘܢܶܦܠܚܺܝܘܗܝ: ܢܶܫܒܩܺܝܘܗܝ ܒܰܐܪܥܶܗ ܐܳܡܰܪ ܡܳܪܝܳܐ: ܘܢܶܦܠܚܺܝܗ̇: ܘܢܶܬܶܒ ܒܳܗ̇.
12 ܘܰܠܨܶܕܰܩܝܳܐ ܡܰܠܟܳܐ ܕܺܝܗܽܘܕܳܐ ܐܶܡܪܶܬ ܐܰܝܟ ܟܽܠܗܽܘܢ ܦܶܬܓܳܡ̈ܶܐ ܗܳܠܶܝܢ: ܘܶܐܡܪܶܬ ܐܰܥܶܠܘ ܨܰܘܪܟܽܘܢ ܒܢܺܝܪܶܗ ܕܡܰܠܟܳܐ ܕܒܳܒܶܠ: ܘܦܽܘܠܚܽܘܗܝ ܠܶܗ ܘܰܠܥܰܡܶܗ: ܘܰܚܝܰܘ.
13 ܘܠܳܐ ܬܡܽܘܬܽܘܢ: ܐܰܢ̱ܬ ܘܥܰܡܳܟ ܒܚܰܪܒܳܐ ܘܰܒܟܰܦܢܳܐ ܘܰܒܡܰܘܬܳܢܳܐ: ܐܰܝܟ ܕܶܐܡܰܪ ܡܳܪܝܳܐ ܥܰܠ ܥܰܡܳܐ ܕܠܳܐ ܢܶܦܠܽܘܚ ܠܡܰܠܟܳܐ ܕܒܳܒܶܠ.
14 ܘܰܐܢ̱ܬܽܘܢ ܠܳܐ ܬܶܫܡܥܽܘܢ ܠܦܶܬܓܳܡ̈ܶܐ ܕܰܢܒܺܝ̈ܶܐ ܕܰܓ̈ܳܠܶܐ: ܕܳܐܡܪܺܝܢ ܠܟܽܘܢ ܠܳܐ ܬܶܦܠܚܽܘܢ ܠܡܰܠܟܳܐ ܕܒܳܒܶܠ: ܡܶܛܽܠ ܕܫܽܘܩܪܳܐ ܗܶܢܽܘܢ ܡܶܬܢܰܒܶܝܢ ܠܟܽܘܢ.
15 ܠܳܐ ܫܰܕܪܶܬ ܐܶܢܽܘܢ ܐܳܡܰܪ ܡܳܪܝܳܐ: ܘܗܶܢܽܘܢ ܡܶܬܢܰܒܶܝܢ ܒܫܶܡܝ ܒܫܽܘܩܪܳܐ: ܕܶܐܕܚܽܘܩܟܽܘܢ ܘܬܺܐܒܕܽܘܢ ܐܰܢ̱ܬܽܘܢ ܘܰܢܒܺܝ̈ܶܐ ܕܡܶܬܢܰܒܶܝܢ ܠܟܽܘܢ.
16 ܘܰܠܟܳܗ̈ܢܶܐ ܘܠܟܽܠܶܗ ܥܰܡܳܐ ܗܳܢܳܐ: ܗܳܟܰܢܳܐ ܐܳܡܰܪ ܡܳܪܝܳܐ ܠܳܐ ܬܶܫܡܥܗܽܘܢ ܠܦܶܬܓܳܡ̈ܶܐ ܕܰܢܒܺܝܰܝ̈ܟܽܘܢ ܕܡܶܬܢܰܒܶܝܢ ܠܟܽܘܢ: ܘܳܐܡܪܺܝܢ: ܗܳܐ ܡܳܐܢ̈ܶܐ ܕܒܰܝܬܶܗ ܕܡܳܪܝܳܐ ܗܳܦܟܺܝܢ ܡܶܢ ܒܳܒܶܠ ܒܰܥܓܰܠ. ܡܶܛܽܠ ܕܫܽܘܩܪܳܐ ܗܶܢܽܘܢ ܡܶܬܢܰܒܶܝܢ ܠܟܽܘܢ.
17 ܠܳܐ ܬܶܫܡܥܽܘܢ ܐܶܢܽܘܢ ܐܳܡܰܪ ܡܳܪܝܳܐ: ܦܠܽܘܚܘ ܠܡܰܠܟܳܐ ܕܒܳܒܶܠ: ܘܰܚܝܰܘ: ܘܠܳܐ ܬܶܗܘܶܐ ܩܪܺܝܬܳܐ ܗܳܕܶܐ ܚܰܪܒܬܳܐ.
18 ܘܶܐܢ ܢܒܺܝ̈ܶܐ ܐܶܢܽܘܢ ܘܺܐܝܬ ܦܶܬܓܳܡܶܗ ܕܡܳܪܝܳܐ ܒܗܽܘܢ: ܢܶܒܥܽܘܢ ܡܶܢ ܡܳܪܝܳܐ ܚܰܝܠܬܳܢܳܐ: ܕܠܳܐ ܢܺܐܙܽܠܘܢ ܡܳܐܢ̈ܶܐ ܕܶܐܫܬܚܰܪܘ ܒܒܰܝܬܶܗ ܕܡܳܪܝܳܐ: ܘܰܒܒܶܝܬ ܡܰܠܟܳܐ ܕܺܝܗܽܘܕܳܐ ܘܒܽܐܘܪܺܫܠܶܡ ܠܒܳܒܶܠ.
19 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܥܰܠ ܥܰܡܽܘ̈ܕܶܐ: ܘܥܰܠ ܝܰܡܳܐ: ܘܥܰܠ ܡܰܓܣ̈ܶܐ: ܘܥܰܠ ܫܰܪܟܳܐ ܕܡܳܐܢ̈ܶܐ ܕܶܐܫܬܚܰܪܘ ܒܰܩܪܺܝܬܳܐ ܗܳܕܶܐ.
20 ܕܠܳܐ ܢ̣ܣܰܒ ܐܶܢܽܘܢ ܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ: ܟܰܕ ܫ̣ܒܳܐ ܠܝܽܘܟܰܢܝܳܐ ܒܰܪ ܝܽܘܝܰܩܺܝܡ ܡܰܠܟܳܐ ܕܺܝܗܽܘܕܳܐ ܡܶܢ ܐܽܘܪܺܫܠܶܡ ܠܒܳܒܶܠ: ܘܰܠܟܽܠܗܽܘܢ ܪܰܘܖ̈ܒܳܢܶܐ ܕܺܝܗܽܘܕܳܐ ܘܕܽܐܘܪܺܫܠܶܡ.
21 ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܥܰܠ ܡܳܐܢ̈ܶܐ ܕܶܐܫܬܚܰܪܘ ܒܒܰܝܬܶܗ ܕܡܳܪܝܳܐ: ܘܰܒܒܶܝܬ ܡܰܠܟܳܐ ܕܺܝܗܽܘܕܳܐ: ܘܕܽܐܘܪܺܫܠܶܡ.
22 ܠܒܳܒܶܠ ܢܺܐܙܽܠܘܢ: ܘܬܰܡܳܢ ܢܶܗܘܽܘܢ ܥܕܰܡܳܐ ܠܝܰܘܡܳܐ ܕܶܐܦܩܽܘܕ ܐܶܢܽܘܢ ܐܳܡܰܪ ܡܳܪܝܳܐ: ܘܰܐܣܶܩ ܐܶܢܽܘܢ ܘܰܐܗܦܶܟ ܐܶܢܽܘܢ ܠܰܐܬܪܳܐ ܗܳܢܳܐ.