Jeremiah 9
The Book of Jeremiah
܀ ܐܪܡܝܐ ܛ ܀
1 ܡܰܢ ܕܶܝܢ ܝܰܗܒ ܪܺܝܫܝ ܡܰܝ̈ܳܐ: ܘܥܰܝ̈ܢܰܝ ܡܰܒܽܘ̈ܥܶܐ ܕܕܶܡܥܬܳܐ: ܘܰܒܟܺܝ݀ܬ ܕܶܝܢ ܒܺܐܝܡܳܡܳܐ ܘܰܒܠܺܠܝܳܐ ܥܰܠ ܩܛܺܝ̈ܠܶܐ ܕܒܰܪܬ ܥܰܡܝ.
2 ܡܰܢ ܕܶܝܢ ܫܰܒܩܰܢܝ ܒܡܰܕܒܪܳܐ ܒܶܝܬ ܒܰܘܬܳܐ ܕܥܳܒܖ̈ܰܝ ܐܽܘܪܚܳܐ: ܘܫܶܒܩܶ݀ܬ ܠܥܰܡܝ ܘܶܐܙܶܠ̱ܬ ܠܺܝ ܡܶܢ ܠܘܳܬܗܽܘܢ: ܡܶܛܽܠ ܕܟܽܠܗܽܘܢ ܓܰܝܳܪܺܝܢ: ܘܰܟܢܽܘܫܬܳܐ ܐܶܢܽܘܢ ܕܕܰܓ̈ܳܠܶܐ.
3 ܘܰܫܕܰܘ ܠܶܫܳܢܗܽܘܢ ܐܰܝܟ ܕܰܒܩܶܫܬܗܽܘܢ: ܒܫܽܘܩܪܳܐ ܘܠܳܐ ܒܗܰܝܡܳܢܽܘܬܳܐ ܥܫܶܢܘ ܒܰܐܪܥܳܐ: ܡܶܛܽܠ ܕܡܶܢ ܒܺܝܫܬܳܐ ܠܒܺܝܫܬܳܐ ܢܦܰܩܘ: ܘܠܺܝ ܠܳܐ ܝܺܕܰܥܘ ܐܳܡܰܪ ܡܳܪܝܳܐ.
4 ܓܒܰܪ ܡܶܢ ܚܰܒܪܶܗ ܐܰܙܕܰܗܪܘ: ܘܥܰܠ ܟܽܠ ܐܳܚ ܠܳܐ ܬܶܬܰܟܠܽܘܢ: ܡܶܛܽܠ ܕܟܽܠ ܐܳܚ ܡܶܟܰܠ ܢܳܟܶܠ: ܘܟܽܠ ܪܳܚ̇ܡܳܐ ܒܢܶܟܠܳܐ ܡܗܰܠܶܟ.
5 ܘܰܓܒܰܪ ܒܚܰܒܪܶܗ ܡܕܰܓܠܺܝܢ: ܘܩܽܘܫܬܳܐ ܠܳܐ ܡܡܰܠܠܺܝܢ: ܐܰܠܶܦܘ ܠܶܫܳܢܗܽܘܢ ܠܰܡܡܰܠܳܠܽܘ ܫܽܘܩܪܳܐ: ܘܶܐܬܛܰܪܰܦܘ ܘܰܠܐܺܝܘ.
6 ܡܰܘܬܒܳܟ ܒܓܰܘ ܢܶܟܠܳܐ: ܒܢܶܟܠܗܽܘܢ ܠܳܐ ܨܒܰܘ ܠܡܶܕܥܰܢܝ ܐܳܡܰܪ ܡܳܪܝܳܐ.
7 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ: ܗܳܐ ܨܳܪܶܦ ܐ̱ܢܳܐ ܠܗܽܘܢ ܘܒܳܚܰܪ ܐ̱ܢܳܐ ܠܗܽܘܢ: ܡܶܛܽܠ ܕܰܐܝܟܰܢܳܐ ܐܶܥܒܶܕ ܡܶܢ ܩܕܳܡ ܒܰܪܬ ܥܰܡܝ.
8 ܐܰܝܟ ܓܶܐܪܳܐ ܫܢܺܝܢܳܐ ܠܶܫܳܢܗܽܘܢ: ܘܢܶܟܠܳܐ ܡܡܰܠܶܠ: ܒܦܽܘܡܶܗ ܫܠܳܡܳܐ ܓܒܰܪ ܥܰܡ ܚܰܒܪܶܗ ܡܡܰܠܶܠ: ܘܰܒܓܰܘܶܗ ܟܡܺܝܢ ܟܡܺܐܢܳܐ.
9 ܥܰܠ ܗܳܠܶܝܢ ܠܳܐ ܐܶܦܩܽܘܕ ܐܳܡܰܪ ܡܳܪܝܳܐ: ܘܰܒܥܰܡܳܐ ܕܗܳܟܰܢܳܐ ܠܳܐ ܬܶܬܢܰܩܰܡ ܢܰܦܫܝ.
10 ܥܰܠ ܛܽܘܖ̈ܶܐ ܫܩܽܘܠܘ ܒܟܳܬܳܐ ܐܘܠܺܝܬܳܐ: ܘܥܰܠ ܕܰܝܖ̈ܶܐ ܕܡܰܕܒܪܳܐ ܐܽܘܠܺܝܬܳܐ: ܕܰܨܕܰܝ̈ ܡܶܢ ܒܠܰܝ ܐ̱ܢܳܫ ܕܥܳܒܰܪ: ܘܠܳܐ ܫܡܰܥܘ ܩܳܠܳܐ ܕܩܶܢܝܳܢܳܐ. ܡܶܢ ܦܳܪܰܚܬܳܐ ܕܰܫܡܰܝܳܐ ܘܰܥܕܰܡܳܐ ܠܰܒܥܺܝܪܳܐ ܐܶܬܒܰܕܰܪܘ ܘܶܐܙܰܠܘ.
11 ܘܶܐܥܒܕܺܝܗ̇ ܠܽܐܘܪܺܫܠܶܡ ܚܰܪܒܬܳܐ ܡܰܥܡܪܳܐ ܠܝܳܪܽܘܖ̈ܶܐ: ܘܩܽܘܖ̈ܝܳܐ ܕܺܝܗܽܘܕܳܐ ܐܶܬܶܠ ܠܚܽܘܪܒܳܐ ܡܶܢ ܒܠܰܝ ܕܝܳܬܶܒ.
12 ܡܰܢܽܘ ܓܰܒܪܳܐ ܕܚܰܟܺܝܡ ܢܶܣܬܰܟܰܠ ܗܳܕܶܐ: ܘܰܕܡܶܠܰܬ ܦܽܘܡܶܗ ܕܡܳܪܝܳܐ ܥܠܰܘܗܝ ܢܚܰܘܶܝܗ̇: ܥܰܠ ܡܳܢܳܐ ܐܶܒܕܰܬ ܐܰܪܥܳܐ: ܘܨܶܕܝܰܬ ܐܰܝܟ ܡܰܕܒܪܳܐ ܡܶܢ ܒܠܰܝ ܕܥܳܒܰܪ.
13 ܘܶܐܡܰܪ ܡܳܪܝܳܐ: ܥܰܠ ܕܰܫܒܰܩܘ ܢܳܡܽܘܣܝ ܕܝܶܗܒܶܬ ܠܗܽܘܢ ܘܠܰܐܒܳܗܰܝ̈ܗܽܘܢ: ܘܠܳܐ ܫܡܰܥܘ ܒܩܳܠܝ ܘܠܳܐ ܗܰܠܶܟܘ ܒܶܗ.
14 ܘܶܐܙܰܠܘ ܒܳܬܰܪ ܨܶܒܝܳܢܰܝ̈ ܠܶܒܗܽܘܢ ܒܺܝܫܳܐ: ܘܒܳܬܰܪ ܦܬܰܟܖ̈ܶܐ ܕܰܐܠܶܦܘ ܐܶܢܽܘܢ ܐܰܒܳܗܰܝ̈ܗܽܘܢ.
15 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܗܳܐ ܡܰܘܟܶܠ ܐ̱ܢܳܐ ܠܗܽܘܢ ܠܥܰܡܳܐ ܗܳܢܳܐ ܡܪܳܖ̈ܶܐ: ܘܰܐܫܩܶܐ ܐܶܢܽܘܢ ܡܰܝ̈ܳܐ ܡܰܪܺܝܖ̈ܶܐ.
16 ܘܶܐܒܰܕܰܪ ܐܶܢܽܘܢ ܒܥܰܡ̈ܡܶܐ ܕܠܳܐ ܝܺܕܰܥܘ ܐܶܢܽܘܢ ܗܶܢܽܘܢ ܘܰܐܒܳܗܰܝ̈ܗܽܘܢ: ܘܶܐܫܰܕܰܪ ܒܳܬܪܗܽܘܢ ܚܰܪܒܳܐ ܥܕܰܡܳܐ ܕܶܐܓܰܡܰܪ ܐܶܢܽܘܢ.
17 ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ: ܩܪܰܘ ܠܰܐܠܳܝ̈ܳܬܳܐ: ܘܢܺܐܬܝ̈ܳܢ: ܘܥܰܠ ܚܰܟܺܝ̈ܡܳܬܳܐ ܫܰܕܰܪܘ: ܘܢܺܐܬܝ̈ܳܢ.
18 ܘܢܶܣܬܰܖ̈ܗܒܳܢ ܘܢܶܫܩ̈ܠܳܢ ܥܠܰܝܢ ܐܽܘܠ̈ܝܳܬܳܐ: ܘܢܰܚ̈ܬܳܢ ܥܰܝ̈ܢܰܝܢ ܕܶܡ̈ܥܶܐ: ܘܒܳܒ̈ܳܬܰܢ ܢܰܖ̈ܕܝܳܢ ܡܰܝ̈ܳܐ.
19 ܡܶܛܽܠ ܩܳܠܳܐ ܕܽܐܘܠܺܝܬܳܐ ܐܶܫܬܡܰܥ ܡܶܢ ܨܶܗܝܽܘܢ: ܕܳܐܡܰܪ ܐܰܝܟܰܢܳܐ ܐܶܬܒܙܶܙܢ: ܒܗܶܬܢ ܛܳܒ ܛܳܒ: ܕܰܫܒܰܩܢ ܐܰܪܥܳܐ ܘܰܢܦܰܠܘ ܡܰܫ̈ܟܢܰܝܢ.
20 ܡܶܛܽܠ ܗܳܢܳܐ ܫܡܰܥܶܝ̈ܢ ܢܶܫ̈ܶܐ ܦܶܬܓܳܡܶܗ ܕܡܳܪܝܳܐ: ܘܰܢܩܰܒ̈ܠܳܢ ܐܶܕܢܰܝ̈ܟܶܝܢ ܡܶܠܰܬ ܦܽܘܡܶܗ: ܘܰܐܠܶܦܶܝ̈ܢ ܒܢܳܬܟܶܝ̈ܢ ܐܽܘܠܝ̈ܳܬܳܐ: ܘܰܐܢ̱ܬܬܳܐ ܠܰܚܒܰܪܬܳܗ̇ ܩܺܝܢܬܳܐ.
21 ܡܶܛܽܠ ܕܰܣܠܶܩ ܡܰܘܬܳܐ ܠܟܰܘܰܝ̈ܢ܆ܘܥ̣ܰܠ ܒܣܳܚܖ̈ܳܬܰܢ: ܠܡܰܘܒܳܕܽܘ ܛܠܳܝ̈ܶܐ ܡܶܢ ܫܽܘ̈ܩܶܐ: ܘܰܥܠܰܝ̈ܡܶܐ ܡܶܢ ܦܳܠܰܛܘ̈ܳܬܳܐ.
22 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ: ܢܶܦ̈ܠܳܢ ܫܠܰܕܰܝ̈ܗܽܘܢ ܕܰܒܢܰܝ̈ܢܳܫܳܐ ܐܰܝܟ ܙܶܒܠܳܐ ܥܰܠ ܐܰܦܰܝ̈ ܚܰܩܠܳܐ: ܘܰܐܝܟ ܥܡܺܝܪܳܐ ܒܳܬܰܪ ܚܳܨܽܘܕܳܐ: ܘܠܰܝܬ ܡܟܰܢܫܳܢܳܐ.
23 ܗܳܟܰܢܳܐ ܐܳܡܰܪ ܡܳܪܝܳܐ: ܠܳܐ ܢܶܫܬܰܒܗܰܪ ܚܰܟܺܝܡܳܐ ܒܚܶܟܡܬܶܗ: ܘܠܳܐ ܢܶܫܬܰܒܗܰܪ ܓܰܢ̱ܒܳܪܳܐ ܒܓܰܢ̱ܒܳܪܽܘܬܶܗ: ܘܠܳܐ ܢܶܫܬܰܒܗܰܪ ܥܰܬܺܝܪܳܐ ܒܥܽܘܬܪܶܗ.
24 ܐܶܠܳܐ ܒܗܳܕܶܐ ܢܶܫܬܰܒܗܰܪ ܡܰܢ ܕܡܶܫܬܰܒܗܰܪ: ܡܰܢ ܕܡܶܣܬܰܟܰܠ ܘܝܳܕܰܥ ܠܺܝ ܕܶܐܢܳܐ ܐ̱ܢܳܐ ܡܳܪܝܳܐ: ܥܳܒܶܕ ܛܰܝܒܽܘܬܳܐ ܘܕܺܝܢܳܐ ܘܙܰܕܺܝܩܽܘܬܳܐ ܒܰܐܪܥܳܐ: ܘܰܒܗܳܠܶܝܢ ܨܒܺܝܬ ܐܳܡܰܪ ܡܳܪܝܳܐ.
25 ܗܳܐ ܝܰܘ̈ܡܳܬܳܐ ܐܳܬܶܝܢ ܐܳܡܰܪ ܡܳܪܝܳܐ: ܘܶܐܦܩܽܘܕ ܥܰܠ ܟܠ ܕܓܳܙܰܪ ܒܥܽܘܪܠܽܘܬܳܐ.
26 ܥܰܠ ܡܶܨܖ̈ܳܝܶܐ: ܘܥܰܠ ܝܽܘܕܳܝ̈ܶܐ: ܘܥܰܠ ܐܰܕܽܘܡ ܘܥܰܠ ܒܢܰܝ̈ ܥܰܡܽܘܢ: ܘܥܰܠ ܡܽܘܐܳܒ ܘܥܰܠ ܟܠ ܩܨܺܝܨܰܝ̈ ܦܰܐܬܳܐ ܕܝܳܬܒܺܝܢ ܒܡܰܕܒܪܳܐ: ܡܶܛܽܠ ܕܟܽܠܗܽܘܢ ܥܰܡ̈ܡܶܐ ܥܽܘܪܠܺܝܢ ܒܒܶܣܪܗܽܘܢ: ܘܟܽܠܗܽܘܢ ܕܒܶܝܬ ܝܺܣܪܳܐܶܝܠ ܥܽܘܪܠܺܝܢ ܒܠܶܒܗܽܘܢ.