Jeremiah 12
The Book of Jeremiah
܀ ܐܪܡܝܐ ܝܒ ܀
1 ܙܰܕܺܝܩ ܐܰܢ̱ܬ ܡܳܪܝܳܐ ܕܶܐܕܽܘܢ ܥܰܡܳܟ: ܒܪܰܡ ܕܺܝܢܳܐ ܡܡܰܠܶܠ ܐ̱ܢܳܐ ܩܕܳܡܰܝܟ: ܡܶܛܽܠ ܡܳܢܳܐ ܐܽܘܪܚܶܗ ܕܪܰܫܺܝܥܳܐ ܡܰܨܠܚܳܐ: ܘܟܰܗܺܝܢܺܝܢ ܟܽܠܗܽܘܢ ܫܰܩܳܖ̈ܶܐ.
2 ܢܨܰܒܬ ܐܶܢܽܘܢ: ܘܰܐܫܰܪܘ ܥܶܩܳܖ̈ܰܝܗܽܘܢ: ܩܢܰܘ ܘܳܐܦ ܥܒܰܕܘ ܦܺܐܖ̈ܶܐ: ܩܰܪܺܝܒ ܐܰܢ̱ܬ ܒܦܽܘܡܗܽܘܢ: ܘܪܰܚܺܝܩ ܐܰܢ̱ܬ ܡܶܢ ܟܽܘܠ̈ܝܳܬܗܽܘܢ.
3 ܘܰܐܢ̱ܬ ܡܳܪܝܳܐ ܝܺܕܰܥܬܳܢܝ ܘܰܚܙܰܝܬܳܢܝ. ܘܰܒܚܰܪܬ ܠܶܒܝ ܩܕܳܡܰܝܟ: ܛܰܝܶܒ ܐܶܢܽܘܢ ܐܰܝܟ ܥܳܢ̈ܳܐ ܠܢܶܟܣܬܳܐ: ܘܙܰܡܶܢ ܐܶܢܽܘܢ ܠܝܽܘܡ ܩܶܛܠܳܐ.
4 ܥܕܰܡܳܐ ܠܶܐܡܰܬܝ ܬܶܬܐܒܶܠ ܐܰܪܥܳܐ: ܘܥܶܣܒܳܐ ܟܽܠܶܗ ܕܚܰܩܠܳܐ ܝܺܒܶܫ: ܡܶܢ ܒܺܝܫܬܳܐ ܕܥܳܡܽܘܖ̈ܶܝܗ̇: ܣܳܦܰܬ ܒܥܺܝܪܳܐ ܘܦܳܪܰܚܬܳܐ: ܕܶܐܡܰܪܘ ܠܳܐ ܢܶܚܙܶܐ ܚܰܪܬܰܢ.
5 ܗܳܐ ܥܰܡ ܖ̈ܶܓܠܳܝܶܐ ܪܗܶܛ݀ܬ ܘܰܐܠܐܝܽܘܟ: ܘܰܐܝܟܰܢܳܐ ܡܶܬܚܪܶܐ ܐܰܢ̱ܬ ܥܰܡ ܖ̈ܰܟܫܳܐ: ܘܒܰܐܪܥܳܐ ܕܰܫܠܳܡܳܐ ܬܟܺܝܠ ܐܰܢ̱ܬ: ܘܰܐܝܟܰܢܳܐ ܥܳܒܰܪ ܐܰܢ̱ܬ ܒܥܽܘܫܢܶܗ ܕܝܽܘܪܕܢܳܢ.
6 ܡܶܛܽܠ ܕܳܐܦ ܐܰܚܰܝ̈ܟ ܘܒܶܝܬ ܐܰܒܽܘܟ: ܐܳܦ ܗܶܢܽܘܢ ܕܰܓܶܠܘ ܒܳܟ: ܐܳܦ ܗܶܢܽܘܢ ܐܶܡܰܪܘ ܒܳܬܪܳܟ ܡ̈ܶܠܶܐ: ܠܳܐ ܬܗܰܝܡܶܢ ܐܶܢܽܘܢ ܟܰܕ ܢܡܰܠܠܽܘܢ ܥܠܰܝܟ ܛܳܒܬܳܐ.
7 ܫܶܒܩܶ݀ܬ ܒܰܝܬܝ: ܫܶܒܩܶ݀ܬ ܝܳܪܬܽܘܬܝ: ܝܶܗܒܶ݀ܬ ܚܰܒܺܝܒܰܬ ܢܰܦܫܝ ܒܺܐܝܕܳܐ ܕܰܒܥܶܠܕܒܳܒܶܝ̈ܗ̇.
8 ܗܘܳܬ ܠܺܝ ܝܳܪܬܽܘܬܝ ܐܰܝܟ ܐܰܪܝܳܐ ܒܥܳܒܳܐ: ܐܰܪܺܝܡܰܬ ܥܠܰܝ ܒܩܳܠܳܗ̇: ܡܶܛܽܠ ܗܳܢܳܐ ܣܢܺܝܬܳܗ̇.
9 ܛܰܝܪܳܐ ܡܨܰܝܰܪܬܳܐ ܗܘܳܬ ܠܺܝ ܝܳܪܬܽܘܬܝ: ܘܛܰܝܪܳܐ ܚܳܕܪܳܐ ܠܳܗ̇: ܙܶܠܘ ܟܰܢܶܫܘ ܟܽܠܳܗ̇ ܚܰܝܘܬܳܐ ܕܕܰܒܪܳܐ ܐܰܝܬܰܘ ܠܡܶܐܟܠܳܗ̇.
10 ܖ̈ܳܥܰܘܳܬܳܐ ܣܶܓܺܝ̈ܐܶܐ ܚܰܒܶܠܘ ܟܰܪܡܝ: ܕܳܫܘ ܦܳܠܓܽܘܬܝ: ܥ̣ܒܰܕܘ ܦܳܠܓܽܘܬܳܐ: ܕܪܶܓܰܬܝ ܐܰܝܟ ܡܰܕܒܪܳܐ ܚܰܪܒܳܐ.
11 ܐܰܨܕܺܝܘ ܘܰܐܚܪܒܽܘܗ̇: ܐܶܬܐܰܒܠܰܬ ܥܠܰܝ ܚܰܪܒܬܳܐ: ܨܶܕܝܰܬ ܟܽܠܳܗ̇ ܐܰܪܥܳܐ: ܡܶܛܽܠ ܕܠܰܝܬ ܐ̱ܢܳܫ ܕܡܰܝܬܶܐ ܥܰܠ ܒܳܠܶܗ.
12 ܥܰܠ ܟܽܠܗܽܘܢ ܫܒܺܝ̈ܠܶܐ ܕܡܰܕܒܪܳܐ ܐܶܬܰܘ ܒܳܙܽܘ̈ܙܶܐ: ܡܶܛܽܠ ܕܚܰܪܒܶܗ ܕܡܳܪܝܳܐ ܐܳܟܠܳܐ: ܡܶܢ ܣܰܘ̈ܦܶܝܗ̇ ܕܰܐܪܥܳܐ ܘܰܥܕܰܡܳܐ ܠܣܰܘ̈ܦܶܝܗ̇ ܕܰܐܪܥܳܐ: ܘܠܰܝܬ ܫܠܳܡܳܐ ܠܟܠ ܒܣܰܪ.
13 ܙܪܽܘܥܘ ܚ̈ܶܛܶܐ ܘܰܚܨܽܘܕܘ ܟܽܘ̈ܒܶܐ: ܘܰܠܐܰܘ ܘܡܶܕܶܡ ܠܳܐ ܡܰܘܬܪܺܝܢ ܐܢ̱ܬܽܘܢ: ܘܰܒ̣ܗܰܬܘ ܡܶܢ ܥܰܠ̈ܠܳܬܟܽܘܢ: ܡܶܛܽܠ ܚܶܡܬܳܐ ܕܪܽܘܓܙܶܗ ܕܡܳܪܝܳܐ.
14 ܗܳܟܰܢܳܐ ܐܳܡܰܪ ܡܳܪܝܳܐ: ܥܰܠ ܟܽܠܗܽܘܢ ܫܒܳܒܰܝ̈ ܖ̈ܳܥܰܘܳܬܳܐ: ܕܰܩܪܶܒܘ ܒܝܳܪܬܽܘܬܳܐ ܕܰܐܘܪܬܶܬ ܠܥܰܡܝ ܝܺܣܪܳܐܶܝܠ: ܗܳܐ ܥܳܩܰܪ ܐ̱ܢܳܐ ܠܗܽܘܢ ܡܶܢ ܐܰܬܪܗܽܘܢ: ܘܠܰܕܒܶܝܬ ܝܺܗܽܘܕܳܐ ܐܶܥܩܽܘܪ ܡܶܢ ܒܰܝܢܳܬܗܽܘܢ.
15 ܘܡܶܢ ܒܳܬܰܪ ܕܶܐܥܩܽܘܪ ܐܶܢܽܘܢ: ܐܶܬܽܘܒ ܘܶܐܪܰܚܶܡ ܥܠܰܝܗܽܘܢ: ܘܰܐܗܦܶܟ ܐܶܢܽܘܢ ܓܒܰܪ ܠܝܳܪܬܽܘܬܶܗ: ܘܰܓܒܰܪ ܠܰܐܪܥܶܗ.
16 ܘܶܐܢ ܢܰܠܦܽܘܢ ܐܽܘܖ̈ܚܳܬܝ ܠܥܰܡܝ: ܕܢܺܐܡܽܘܢ ܒܫܶܡܝ ܚܰܝ ܗ̱ܘ̣ ܡܳܪܝܳܐ: ܐܰܝܟ ܕܰܐܠܶܦܘ ܐܶܢܽܘܢ ܕܢܺܐܡܽܘܢ ܒܒܰܥܠܳܐ: ܢܶܬܒܽܘܢ ܒܓܰܘ ܥܰܡܝ.
17 ܘܶܐܢ ܠܳܐ ܢܶܫܡܥܽܘܢ ܐܶܥܩܪܺܝܘܗܝ ܠܥܰܡܳܐ ܗܳܢܳܐ ܡܶܥܩܰܪ: ܘܡܰܘܒܳܕܽܘ ܐܰܘܒܕܺܝܘܗܝ ܐܳܡܰܪ ܡܳܪܝܳܐ.