Jeremiah 22
The Book of Jeremiah
܀ ܐܪܡܝܐ ܟܒ ܀
1 ܗܳܟܰܢܳܐ ܐܳܡܰܪ ܡܳܪܝܳܐ: ܚܽܘܬ ܠܒܶܝܬ ܡܰܠܟܳܐ ܕܺܝܗܽܘܕܳܐ: ܘܡܰܠܶܠ ܬܰܡܳܢ ܦܶܬܓܳܡܳܐ ܗܳܢܳܐ: ܘܶܐܡܰܪ.
2 ܫܡܰܥ ܦܶܬܓܳܡܶܗ ܕܡܳܪܝܳܐ ܡܰܠܟܳܐ ܕܺܝܗܽܘܕܳܐ ܕܝܳܬܶܒ ܥܰܠ ܟܽܘܪܣܝܶܗ ܕܕܰܘܺܝܕ: ܐܰܢ̱ܬ ܘܥܰܒܕܰܝ̈ـܟ ܘܥܰܡܳܟ ܕܥܳܐܠܺܝܢ ܒܬܰܖ̈ܥܶܐ ܗܳܠܶܝܢ.
3 ܗܳܟܰܢܳܐ ܐܳܡܰܪ ܡܳܪܝܳܐ: ܥܒܶܕܘ ܕܺܝܢܳܐ ܘܙܰܕܺܝܩܽܘܬܳܐ: ܘܦܰܨܰܘ ܠܰܛܠܺܝܡܳܐ ܡܶܢ ܡܰܢ ܕܛܳܠܶܡ ܠܶܗ: ܘܰܠܥܳܡܽܘܖ̈ܶܐ ܘܰܠܝܰܬܡ̈ܶܐ ܘܠܰܐܖ̈ܡܠܳܬܳܐ: ܠܳܐ ܬܶܥܠܒܽܘܢ ܘܠܳܐ ܬܶܛܠܡܽܘܢ: ܘܰܕܡܳܐ ܙܰܟܳܝܳܐ ܠܳܐ ܬܶܐܫܕܽܘܢ ܒܰܐܬܪܳܐ ܗܳܢܳܐ.
4 ܘܶܐܢ ܡܶܥܒܰܕ ܬܶܥܒܕܽܘܢ ܦܶܬܓܳܡܳܐ ܗܳܢܳܐ: ܢܶܥܠܽܘܢ ܒܬܰܖ̈ܥܰܘܗܝ ܕܒܰܝܬܳܐ ܗܳܢܳܐ: ܡܰܠ̈ܟܶܐ ܘܪܰܘܖ̈ܒܳܢܶܐ ܕܝܳܬܒܺܝܢ ܥܰܠ ܟܽܘܪܣܝܶܗ ܕܕܰܘܺܝܕ: ܟܰܕ ܪܟܺܝܒܺܝܢ ܒܡܰܖ̈ܟܒܳܬܳܐ ܘܰܒܖ̈ܰܟܫܳܐ: ܗܽܘ ܘܥܰܒܕܰܘ̈ܗܝ ܘܥܰܡܶܗ.
5 ܘܶܐܢ ܠܳܐ ܬܶܫܡܥܽܘܢ ܦܶܬܓܳܡܳܐ ܗܳܢܳܐ: ܒܺܝ ܝܺܡܺܝ݀ܬ ܐܳܡܰܪ ܡܳܪܝܳܐ: ܕܰܠܚܽܘܪܒܳܐ ܢܶܗܘܶܐ ܒܰܝܬܳܐ ܗܳܢܳܐ.
6 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ: ܥܰܠ ܒܶܝܬ ܡܰܠܟܳܐ ܕܺܝܗܽܘܕܳܐ: ܓܶܠܥܳܕ ܐܰܢ̱ܬ ܗ̱ܘ ܪܺܝܫ ܠܶܒܢܳܢ: ܐܶܠܳܐ ܐܶܥܒܕܳܟ ܡܰܕܒܪܳܐ ܐܰܝܟ ܩܽܘܖ̈ܝܳܐ ܕܠܳܐ ܐܶܬܝܰܬܰܒ̈ܝ.
7 ܘܶܐܛܰܝܶܒ ܥܠܰܝܟ ܡܚܰܒܠܳܢ̈ܶܐ: ܓܰܒܪܳܐ ܘܢܳܪܓܶܗ ܒܺܐܝܕܶܗ: ܘܢܶܦܣܩܽܘܢ ܓܒܰܝ̈ܳܐ ܕܰܐܖ̈ܙܰܝܟ ܘܢܰܪܡܽܘܢ ܒܢܽܘܪܳܐ.
8 ܘܢܶܥܒܪܽܘܢ ܥܰܡ̈ܡܶܐ ܣܰܓܺܝ̈ܐܶܐ ܥܰܠ ܩܪܺܝܬܳܐ ܗܳܕܶܐ ܪܰܒܬܳܐ: ܘܢܺܐܡܪܽܘܢ ܓܒܰܪ ܠܚܰܒܪܶܗ: ܥܰܠ ܡܳܢܳܐ ܥ̣ܒܰܕ ܡܳܪܝܳܐ ܗܳܟܰܢܳܐ ܠܰܩܪܺܝܬܳܐ ܗܳܕܶܐ ܪܰܒܬܳܐ.
9 ܘܢܺܐܡܪܽܘܢ ܥܰܠ ܕܰܫ̣ܒܰܩܘ ܩܝܳܡܶܗ ܕܡܳܪܝܳܐ ܐܰܠܳܗܗܽܘܢ: ܘܰܣܓܶܕܘ ܠܰܐܠܳܗ̈ܶܐ ܐ̱ܚܖ̈ܳܢܶܐ ܘܰܦ̣ܠܰܚܘ ܐܶܢܽܘܢ.
10 ܠܳܐ ܬܶܒܟܽܘܢ ܥܰܠ ܡܺܝܬܳܐ: ܘܠܳܐ ܬܢܽܘܕܽܘܢ ܥܠܰܘܗܝ: ܡܶܒܟܳܐ ܒܟܰܘ ܥܰܠ ܡܰܢ ܕܶܐܙܰܠ ܘܬܽܘܒ ܠܳܐ ܗܳܦܶܟ: ܘܠܳܐ ܚܳܙܶܐ ܐܰܪܥܳܐ ܕܶܐܬܺܝܠܶܕ ܒܳܗ̇.
11 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ: ܥܰܠ ܫܳܠܽܘܡ ܒܰܪ ܝܽܘܫܺܝܳܐ ܕܰܐܡܠܶܟ ܚܠܳܦ ܝܽܘܫܺܝܳܐ ܐܰܒܽܘܗܝ: ܕܰܢ̣ܦܰܩ ܡܶܢ ܐܰܬܪܳܐ ܗܳܢܳܐ: ܠܳܐ ܢܶܗܦܽܘܟ ܠܬܰܡܳܢ ܬܽܘܒ.
12 ܐܶܠܳܐ ܒܰܐܬܪܳܐ ܕܶܐܫܬܒܺܝ ܬܰܡܳܢ ܢܡܽܘܬ: ܘܰܐܪܥܳܐ ܗܳܕܶܐ ܬܽܘܒ ܠܳܐ ܢܶܚܙܶܐ.
13 ܘܳܝ ܠܰܕܒܳܢܶܐ: ܒܰܝܬܶܗ ܕܠܳܐ ܒܙܶܕܩܳܐ: ܘܥܶܠܳܝ̈ܳܬܶܗ ܕܠܳܐ ܒܕܺܝܢܳܐ: ܚܰܒܪܶܗ ܦܳܠܰܚ ܠܶܗ ܡܰܓܳܢ: ܘܰܐܓܪܶܗ ܠܳܐ ܝܳܗܶܒ ܠܶܗ.
14 ܕܳܐܡܰܪ ܐܶܒܢܶܐ ܠܺܝ ܒ̈ܳܬܶܐ ܕܡܽܘܫ̈ܚܳܬܳܐ: ܘܥܶܠܳܝ̈ܳܬܳܐ ܡܖ̈ܰܘܚܳܬܳܐ: ܘܦܳܬܰܚ ܠܗܶܝܢ ܟܰܘ̈ܶܐ: ܘܰܡܛܰܠܶܠ ܠܗܶܝܢ ܒܰܐܖ̈ܙܶܐ: ܘܨܳܐܰܪ ܠܗܶܝܢ ܨܽܘܖ̈ܳܬܳܐ.
15 ܡܰܡܠܶܟ ܐܰܢ̱ܬ: ܘܡܶܬܚܰܕܶܐ ܒܰܐܖ̈ܙܶܐ: ܐܰܒܽܘܟ ܐܶܟܰܠ ܘܶܐܫܬܺܝ: ܘܰܥܒܰܕ ܕܺܝܢܳܐ ܘܙܰܕܺܝܩܽܘܬܳܐ: ܡܶܛܽܠ ܗܳܢܳܐ ܐܰܛܐܒܶ݀ܬ ܠܶܗ.
16 ܕܳܢ ܕܺܝܢܳܐ ܕܡܶܣ̈ܟܺܢܶܐ ܘܰܕܒܳܝ̈ܫܶܐ: ܘܰܥ̣ܒܰܕ ܕܫܰܦܺܝܪ: ܡܰܢ ܕܗܳܠܶܝܢ ܥܳܒܶܕ: ܝܳܕܰܥ ܠܺܝ ܐܳܡܰܪ ܡܳܪܝܳܐ.
17 ܕܺܝܠܳܟ ܕܶܝܢ ܥܰܝܢܰܝ̈ܟ ܘܠܶܒܳܟ: ܠܰܝܬ ܥܰܠ ܡܶܕܶܡ ܐ̱ܚܪܺܝܢ: ܐܶܠܳܐ ܥܰܠ ܩܶܢܝܳܢܳܟ: ܘܥܰܠ ܕܡܳܐ ܙܰܟܳܝܳܐ ܠܡܶܐܫܰܕ: ܘܥܰܠ ܥܫܽܘܩܝܳܐ: ܘܥܰܠ ܛܠܽܘܡܝܳܐ ܠܡܶܥܒܰܕ.
18 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ: ܥܰܠ ܝܽܘܝܰܩܺܝܡ ܒܰܪ ܝܽܘܫܺܝܳܐ ܡܰܠܟܳܐ ܕܺܝܗܽܘܕܳܐ: ܠܳܐ ܢܰܪܩܕܽܘܢ ܥܠܰܘܗܝ: ܘܠܳܐ ܢܺܐܡܪܽܘܢ: ܘܳܝ ܐܳܚܝ: ܘܳܝ ܐܳܚܝ: ܘܠܳܐ ܢܰܪܩܕܽܘܢ ܥܠܰܘܗܝ: ܘܳܝ ܡܳܪܳܐ: ܘܳܝ ܡܳܪܳܐ.
19 ܩܒܽܘܪܰܬ ܚܡܳܪ ܢܶܬܩܒܰܪ ܘܢܶܓܪܽܘܢ ܘܢܶܫܕܽܘܢܶܗ ܠܗܰܠ ܡܶܢ ܬܰܖ̈ܥܶܝܗ̇ ܕܽܐܘܪܺܫܠܶܡ.
20 ܣܰܩܝ ܠܶܠܒܢܳܢ ܘܰܐܙܥܶܩܝ: ܘܰܒܡܰܬܢܺܝܢ ܐܰܪܺܝܡܝ ܩܳܠܶܟܝ: ܘܰܐܙܥܶܩܝ ܡܶܢ ܥܶܒܖ̈ܰܝ ܝܰܡܳܐ: ܕܶܐܬܬܒܰܪܘ ܟܽܠܗܽܘܢ ܖ̈ܳܚܡܰܝܟܝ.
21 ܘܶܐܡܪܶܬ ܠܶܟܝ ܒܟܰܗܺܝܢܽܘܬܶܟܝ: ܘܶܐܡܰܪܬܝ ܕܠܳܐ ܐܶܫܡܰܥ: ܗܳܕܳܐ ܗ̱ܝ ܐܽܘܪܚܶܟܝ: ܡܶܢ ܛܰܠܝܽܘܬܶܟܝ: ܘܠܳܐ ܫܡܰܥܬܝ ܒܩܳܠܝ.
22 ܠܟܽܠܗܽܘܢ ܖ̈ܳܥܰܘܳܬܶܟܝ ܬܶܪܥܶܐ ܐܶܢܽܘܢ ܪܽܘܚܳܐ: ܘܖ̈ܳܚܡܰܝܟܝ ܒܫܶܒܝܳܐ ܢܺܐܙܽܠܘܢ: ܘܗܳܝܕܶܝܢ ܬܶܒܗܬܺܝܢ ܘܬܶܬܰܟܣܺܝܢ ܡܶܢ ܟܽܠܗܶܝܢ ܒܺܝ̈ܫܳܬܶܟܝ.
23 ܝܳܬܒܰܬ ܒܠܶܒܢܳܢ: ܡܰܩܢܰܬ ܒܰܐܖ̈ܙܶܐ: ܡܳܢܳܐ ܡܶܬܬܰܢܚܳܐ ܐܰܢ̱ܬܝ ܟܰܕ ܢܺܐܬܽܘܢ ܥܠܰܝܟܝ ܚܶܒ̈ܠܶܐ ܘܙܰܘܥܬܳܐ ܐܰܝܟ ܕܝܳܠܶܕܬܳܐ.
24 ܚܰܝ ܐ̱ܢܳܐ ܐܳܡܰܪ ܡܳܪܝܳܐ ܐܰܠܳܗܳܐ: ܐܶܢ ܢܶܗܘܶܐ ܝܽܘܟܰܢܝܳܐ ܒܰܪ ܝܽܘܝܰܩܺܝܡ ܡܰܠܟܳܐ ܕܺܝܗܽܘܕܳܐ: ܚܳܬܡܳܐ ܥܰܠ ܐܺܝܕܝ ܕܝܰܡܺܝܢܳܐ: ܐܶܠܳܐ ܡܶܢ ܬܰܡܳܢ ܐܶܥܩܪܳܟ.
25 ܘܰܐܫܠܡܳܟ ܒܝܰܕ ܐ̱ܢܳܫ̈ܳܐ ܐܰܝܠܶܝܢ ܕܒܳܥܶܝܢ ܢܰܦܫܳܟ ܘܒܺܐܝܕܳܐ ܕܰܐܝܠܶܝܢ ܕܕܳܚܶܠ ܐܰܢ̱ܬ ܡܶܢ ܩܕܳܡܝܗܽܘܢ: ܒܺܐܝܕܳܐ ܕܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ: ܘܒܺܐܝܕܳܐ ܕܟܰܠܕܳܝ̈ܶܐ.
26 ܘܶܐܫܕܶܝܟ ܠܳܟ ܘܠܶܐܡܳܟ ܕܺܝܠܶܕܬܳܟ: ܠܰܐܪܥܳܐ ܐ̱ܚܪܺܬܳܐ ܕܠܳܐ ܐܶܬܺܝܠܶܕܬܽܘܢ ܬܰܡܳܢ: ܘܬܰܡܳܢ ܬܡܽܘܬܽܘܢ.
27 ܘܠܰܐܪܥܳܐ ܕܣܳܒܖ̈ܳܢ ܢܰܦ̈ܫܳܬܟܽܘܢ ܠܡܶܗܦܰܟ ܠܬܰܡܳܢ: ܠܳܐ ܬܶܗܦܟܽܘܢ.
28 ܒܨܺܝܪܳܐ ܘܫܺܝܛܳܐ ܓܰܒܪܳܐ ܗܳܢܳܐ ܝܽܘܟܰܢܝܳܐ: ܐܰܝܟ ܡܳܐܢܳܐ ܕܠܰܝܬ ܒܶܗ ܚܰܫܚܽܘ: ܡܶܛܽܠ ܗܳܢܳܐ ܐܶܫܬܩܶܠ ܗܽܘ ܘܙܰܪܥܶܗ: ܘܶܐܫܬܕܺܝܘ ܠܰܐܪܥܳܐ: ܕܠܳܐ ܝܳܕܥܺܝܢ.
29 ܐܰܪܥܳܐ: ܐܰܪܥܳܐ: ܐܰܪܥܳܐ: ܫܡܰܥܝ ܦܶܬܓܳܡܶܗ ܕܡܳܪܝܳܐ.
30 ܗܳܟܰܢܳܐ ܐܳܡܰܪ ܡܳܪܝܳܐ: ܟܽܘܬܒܽܘܗܝ ܠܓܰܒܪܳܐ ܗܳܢܳܐ ܡܰܟܪܙܳܐ ܕܠܳܐ ܒܢܺܝ̈ܢ: ܡܶܛܽܠ ܕܓܰܒܪܳܐ ܒܝܰܘ̈ܡܳܬܶܗ: ܠܳܐ ܢܰܨܠܰܚ ܡܶܢ ܙܰܪܥܶܗ ܓܰܒܪܳܐ ܕܝܳܬܶܒ ܥܰܠ ܟܽܘܪܣܝܶܗ ܕܕܰܘܺܝܕ: ܘܡܶܫܬܰܠܰܛ ܬܽܘܒ ܒܺܝܗܽܘܕܳܐ.