Jeremiah 18
The Book of Jeremiah
܀ ܐܪܡܝܐ ܝܚ ܀
1 ܦܶܬܓܳܡܳܐ ܕܰܗܘܳܐ ܥܰܠ ܐܶܪܰܡܝܳܐ ܡܶܢ ܩܕܳܡ ܡܳܪܝܳܐ: ܠܡܺܐܡܰܪ.
2 ܩܽܘܡ ܚܽܘܬ ܠܒܶܝܬ ܦܰܚܳܪܳܐ: ܘܬܰܡܳܢ ܐܰܫܡܥܳܟ ܦܶܬܓܳܡܰܝ̈.
3 ܘܢܶܚܬܶܬ ܠܒܶܝܬ ܦܰܚܳܪܳܐ ܐܰܝܟ ܦܶܬܓܳܡܶܗ ܕܡܳܪܝܳܐ: ܘܗܳܐ ܗܽܘ ܥܳܒܶܕ ܥܒܳܕܳܐ ܥܰܠ ܣܰܕܳܢܳܐ.
4 ܘܶܐܬܚܰܒܰܠ ܗ̱ܘܳܐ ܡܳܐܢܳܐ ܕܛܺܝܢܳܐ ܕܥܳܒ݁ܶܕ ܗ̱ܘܳܐ ܒܺܐܝܕܶܗ ܕܦܰܚܳܪܳܐ: ܘܰܗܦܰܟ ܘܥܰܒܕܶܗ ܡܳܐܢܳܐ ܐ̱ܚܪܺܢܳܐ ܐܰܝܟ ܕܰܨܒܳܐ.
5 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ: ܠܡܺܐܡܰܪ.
6 ܐܰܝܟ ܦܰܚܳܪܳܐ ܗܳܢܳܐ ܠܳܐ ܡܶܫܟܰܚ ܐ̱ܢܳܐ ܕܶܐܥܒܶܕ ܠܟܽܘܢ ܒܶܝܬ ܝܺܣܪܳܐܶܝܠ: ܐܳܡܰܪ ܡܳܪܝܳܐ: ܗܳܐ ܐܰܝܟ ܛܺܝܢܳܐ ܒܺܐܝܕܰܝ̈ ܦܰܚܳܪܳܐ: ܗܳܟܰܢܳܐ ܐܰܢ̱ܬܽܘܢ ܒܺܐܝܕܰܝ̈ ܒܶܝܬ ܝܺܣܪܳܐܶܝܠ.
7 ܐܶܢ ܡܶܢ ܫܶܠܝܳܐ ܐܺܡܰܪ ܥܰܠ ܥܰܡܳܐ ܘܥܰܠ ܡܰܠܟܽܘܬܳܐ: ܠܡܶܥܩܰܪ ܘܰܠܡܶܣܬܰܪ: ܘܠܰܡܣܰܚܳܦܽܘ ܘܰܠܡܰܘܒܳܕܽܘ.
8 ܘܰܢܬܽܘܒ ܥܰܡܳܐ ܗܰܘ ܡܶܢ ܒܺܝܫܬܶܗ: ܐܰܗܦܶܟ ܡܶܢܗ ܒܺܝܫܬܳܐ ܕܶܐܬܚܰܫܒܶ݀ܬ ܠܡܶܥܒܰܕ ܠܶܗ.
9 ܘܶܐܢ ܐܺܡܰܪ ܥܰܠ ܥܰܡܳܐ ܘܥܰܠ ܡܰܠܟܽܘܬܳܐ ܠܡܶܒܢܳܐ ܘܰܠܡܶܨܰܒ.
10 ܘܢܶܥܒܶܕ ܕܒܺܝܫ ܩܕܳܡܝ: ܘܠܳܐ ܢܶܫܡܰܥ ܒܩܳܠܝ: ܐܰܗܦܶܟ ܡܶܢܶܗ ܛܳܒܬܳܐ ܕܶܐܡܪܶܬ ܠܡܰܛܐܳܒܽܘ ܠܶܗ.
11 ܘܗܳܫܳܐ ܐܶܡܰܪ ܠܓܰܒܖ̈ܶܐ ܕܺܝܗܽܘܕܳܐ: ܘܰܠܥܳܡܽܘܖ̈ܶܝܗ̇ ܕܽܐܘܪܺܫܠܶܡ: ܗܳܟܰܢܳܐ ܐܳܡܰܪ ܡܳܪܝܳܐ: ܗܳܐ ܒܳܪܶܐ ܐ̱ܢܳܐ ܥܠܰܝܟܽܘܢ ܒܺܝܫܬܳܐ: ܘܡܶܬܚܰܫܰܒ ܐ̱ܢܳܐ ܥܠܰܝܟܽܘܢ ܡܰܚܫܰܒܬܳܐ: ܬܽܘܒܘ ܘܶܐܬܦܢܰܘ ܓܒܰܪ ܡܶܢ ܐܽܘܪܚܶܗ ܒܺܝܫܬܳܐ: ܘܰܐܛܐܶܒܘ ܐܽܘܖ̈ܚܳܬܟܽܘܢ ܘܰܥܒܳܕܰܝ̈ܟܽܘܢ.
12 ܘܶܐܡܰܪܘ ܗܶܢܽܘܢ ܢܶܬܚܰܝܰܠ: ܘܒܳܬܰܪ ܡܰܚ̈ܫܒܳܬܰܢ ܢܺܐܙܰܠ: ܘܐ̱ܢܳܫ ܨܶܒܝܳܢܰܝ̈ ܠܶܒܶܗ ܒܺܝܫܳܐ ܢܶܥܒܶܕ.
13 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܝܳܐ: ܫܰܐܶܠܘ ܒܶܝܬ ܥܰܡ̈ܡܶܐ ܡܰܢܽܘ ܥ̣ܒܰܕ ܐܰܝܟ ܗܳܠܶܝܢ: ܫܳܛܝܽܘܬܳܐ ܪܰܒܬܳܐ ܥܶܒ̣ܕܰܬ ܒܬܽܘܠܬܳܐ ܕܺܝܣܪܳܐܶܝܠ.
14 ܐܶܢ ܥܳܢܶܕ ܡܶܢ ܛܽܘܪ ܬܕܰܝ̈ܳܐ ܬܰܠܓܳܐ ܘܡܶܢ ܠܶܒܢܳܢ: ܘܶܐܢ ܡܶܬܟܠܶܝܢ ܡܰܝ̈ܳܐ ܩܰܪܺܝܖ̈ܶܐ ܢܽܘܟܖ̈ܳܝܶܐ ܕܪܳܕܶܝܢ.
15 ܡܶܛܽܠ ܕܰܛܥܰܐܢܝ ܥܰܡܝ: ܘܠܰܣܪܺܝܩܽܘܬܳܐ ܣ̣ܳܡܘ ܒܶܣ̈ܡܶܐ: ܘܶܐܬܬܩܶܠܘ ܒܽܐܘܖ̈ܚܳܬܗܽܘܢ ܒܰܫܒܺܝ̈ܠܶܐ ܕܥܳܠܰܡ: ܠܡܺܐܙܰܠ ܒܰܫܒܺܝ̈ܠܶܐ ܒܽܐܘܪܚܳܐ ܕܠܳܐ ܕܪܺܝܫܳܐ.
16 ܠܡܶܥܒܰܕ ܐܰܪܥܗܽܘܢ ܠܬܶܡܗܳܐ ܘܰܠܡܰܫܪܽܘܩܺܝܬܳܐ ܠܥܳܠܰܡ: ܘܟܽܠ ܕܢܶܥܒܰܪ ܥܠܶܝܗ̇: ܢܶܬܡܰܗ ܘܰܢܢܺܝܕ ܒܪܺܝܫܶܗ.
17 ܐܰܝܟ ܪܽܘܚܳܐ ܕܫܰܘܒܳܐ: ܐܶܒܰܕܰܪ ܐܶܢܽܘܢ ܩܕܳܡ ܒܥܶܠ̈ܕܒܳܒܶܐ: ܩܕܳܠܳܐ ܘܠܳܐ ܐܰܦ̈ܶܐ ܐܶܚܰܘܶܐ ܐܶܢܽܘܢ ܒܝܰܘܡܳܐ ܕܥܳܩܰܬܗܽܘܢ.
18 ܘܶܐܡܰܪܘ ܬܰܘ ܢܶܬܚܰܫܰܒ ܡܰܚܫܰܒܬܳܐ ܥܰܠ ܐܶܪܰܡܝܳܐ: ܕܠܳܐ ܢܺܐܒܰܕ ܢܳܡܽܘܣܳܐ ܡܶܢ ܟܳܗ̈ܢܶܐ: ܘܬܰܪܥܺܝܬܳܐ ܡܶܢ ܚܰܟܺܝ̈ܡܶܐ: ܘܡܶܠܬܳܐ ܡܶܢ ܢܒܺܝ̈ܶܐ: ܬܰܘ ܢܶܡܚܶܝܘܗܝ ܒܠܶܫܳܢܶܗ: ܘܠܳܐ ܢܨܽܘܬ ܟܽܠܗܽܘܢ ܦܶܬܓܳܡܰܘ̈ܗܝ.
19 ܨܽܘܬܰܝܢܝ ܡܳܪܝܳܐ ܘܰܫܡܰܥ ܩܳܠ ܥܽܘܠܒܳܢܝ.
20 ܐܶܬܦܪܰܥ ܒܺܝܫܬܳܐ ܚܠܳܦ ܛܳܒܬܳܐ: ܕܰܚ̣ܦܰܪܘ ܓܽܘܡܳܨܳܐ ܠܢܰܦܫܝ: ܐܶܬܕܰܟܪ ܕܩܳܡܶܬ ܩܕܳܡܰܝܟ ܘܡܰܠܠܶ݀ܬ ܥܠܰܝܗܽܘܢ ܛܳܒܬܳܐ: ܠܡܰܗܦܳܟܽܘ ܚܶܡܬܳܟ ܡܶܢܗܽܘܢ.
21 ܡܶܛܽܠ ܗܳܢܳܐ ܗܰܒ ܒܢܰܝ̈ܗܽܘܢ ܠܟܰܦܢܳܐ: ܘܰܐܫܠܶܡ ܐܶܢܽܘܢ ܠܺܐܝܕܰܝ̈ ܚܰܪܒܳܐ: ܢܶܗܘ̈ܝܳܢ ܢܶܫܰܝ̈ܗܽܘܢ ܡܓܰܙ̈ܝܳܢ ܘܰܐܖ̈ܡܠܳܢ: ܘܓܰܒܖ̈ܰܝܗܽܘܢ ܢܶܗܘܽܘܢ ܩܛܺܝܠܰܝ̈ ܡܰܘܬܳܐ: ܘܰܥܠܰܝܡܰܝ̈ܗܽܘܢ ܩܛܺܝܠܰܝ̈ ܚܰܪܒܳܐ ܒܰܩܪܒܳܐ.
22 ܬܶܫܬܡܰܥ ܝܺܠܶܠܬܳܐ ܡܶܢ ܒܳܬܰܝ̈ܗܽܘܢ: ܟܰܕ ܬܰܝܬܶܐ ܥܠܰܝܗܽܘܢ ܓܰܝܣܳܐ ܡܶܢ ܫܶܠܝܳܐ: ܡܶܛܽܠ ܕܰܚܦܰܪܘ ܓܽܘܡܳܨܳܐ ܠܢܰܦܫܝ ܠܡܶܐܚܕܰܢܝ: ܘܦܰܚ̈ܶܐ ܛܡܰܪܘ ܠܖ̈ܶܓܠܰܝ.
23 ܘܰܐܢ̱ܬ ܡܳܪܝܳܐ ܝܳܕܰܥ ܐܰܢ̱ܬ ܟܽܠ ܕܶܐܬܪܰܥܺܝܘ ܥܠܰܝ ܠܡܰܘܬܳܐ: ܠܳܐ ܬܚܰܣܶܐ ܥܰܠ ܥܰܘܠܗܽܘܢ: ܘܰܚܛܳܗܰܝ̈ܗܽܘܢ ܡܶܢ ܩܕܳܡܝܟ ܠܳܐ ܬܶܥܛܶܐ: ܢܶܗܘܽܘܢ ܪܡܶܝܢ ܩܕܳܡܝܟ: ܘܒܰܙܒܰܢ ܪܽܘܓܙܳܟ ܥܒܶܕ ܒܗܽܘܢ.