Jeremiah 7
The Book of Jeremiah
܀ ܐܪܡܝܐ ܙ ܀
1 ܦܶܬܓܳܡܳܐ ܕܰܗܘܳܐ ܥܰܠ ܐܶܪܰܡܝܳܐ ܡܶܢ ܩܕܳܡ ܡܳܪܝܳܐ: ܠܡܺܐܡܰܪ.
2 ܩܽܘܡ ܒܰܬܪܰܥ ܒܰܝܬܶܗ ܕܡܳܪܝܳܐ: ܘܰܩܪܺܝ ܬܰܡܳܢ ܦܶܬܓܳܡܳܐ ܗܳܢܳܐ: ܘܶܐܡܰܪ: ܫܡܰܥܘ ܦܶܬܓܳܡܶܗ ܕܡܳܪܝܳܐ ܟܽܠܗܽܘܢ ܕܒܶܝܬ ܝܺܗܽܘܕܳܐ: ܕܥܳܐܠܺܝܢ ܒܬܰܖ̈ܥܶܐ ܗܳܠܶܝܢ ܠܡܶܣܓܰܕ ܠܡܳܪܝܳܐ.
3 ܗܳܟܰܢܳܐ ܐܰܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܐܰܛܐܶܒܘ ܐܽܘܖ̈ܚܳܬܟܽܘܢ ܘܰܥܒܳܕܰܝ̈ܟܽܘܢ: ܘܰܐܫܪܶܝܟܽܘܢ ܒܰܐܬܪܳܐ ܗܳܢܳܐ.
4 ܘܠܳܐ ܬܶܬܰܟܠܽܘܢ ܠܟܽܘܢ ܥܰܠ ܦܶܬܓܳܡ̈ܶܐ ܕܫܽܘܩܪܳܐ: ܕܳܐܡܪܺܝܢ ܠܟܽܘܢ: ܗܰܝܟܠܶܗ ܕܡܳܪܝܳܐ: ܗܰܝܟܠܶܗ ܕܡܳܪܝܳܐ.
5 ܗܰܝܟܠܶܗ ܐܰܢ̱ܬܽܘܢ ܕܡܳܪܝܳܐ ܐܶܢ ܬܰܫܦܪܽܘܢ ܐܽܘܖ̈ܚܳܬܟܽܘܢ ܘܰܥܒܳܕܰܝ̈ܟܽܘܢ: ܘܶܐܢ ܬܶܥܒܕܽܘܢ ܕܺܝܢܳܐ ܒܶܝܬ ܓܰܒܪܳܐ ܠܚܰܒܪܶܗ.
6 ܘܰܠܥܳܡܽܘܖ̈ܶܐ ܘܰܠܝܰܬܡ̈ܶܐ ܘܠܰܐܖ̈ܡܠܳܬܳܐ: ܠܳܐ ܬܶܥܠܒܽܘܢ ܘܠܳܐ ܬܶܛܠܡܽܘܢ: ܘܰܕܡܳܐ ܙܰܟܳܝܳܐ ܠܳܐ ܬܶܐܫܕܽܘܢ ܒܰܐܬܪܳܐ ܗܳܢܳܐ: ܘܒܳܬܰܪ ܐܰܠܳܗ̈ܶܐ ܐ̱ܚܖ̈ܳܢܶܐ ܠܳܐ ܬܺܐܙܽܠܘܢ ܕܢܶܒܐܰܫ ܠܟܽܘܢ.
7 ܘܰܐܫܪܶܝܟܽܘܢ ܒܰܐܬܪܳܐ ܗܳܢܳܐ ܒܰܐܪܥܳܐ ܕܝܶܗܒܶ݀ܬ ܠܰܐܒܳܗܰܝ̈ܟܽܘܢ: ܡܶܢ ܥܳܠܰܡ ܘܰܥܕܰܡܳܐ ܠܥܳܠܰܡ.
8 ܘܗܳܐ ܐܰܢ̱ܬܽܘܢ ܡܶܬܬܰܟܠܺܝܢ ܥܰܠ ܦܶܬܓܳܡ̈ܶܐ ܕܫܽܘܩܪܳܐ ܕܠܳܐ ܡܰܘܬܪܺܝܢ.
9 ܓܰܢܳܒܺܝܢ ܐܢ̱ܬܽܘܢ: ܘܩܳܛܽܘܠܺܝܢ ܐܢ̱ܬܽܘܢ: ܘܓܰܝܳܪܺܝܢ ܐܢ̱ܬܽܘܢ: ܘܝܳܡܶܝܢ ܐܢ̱ܬܽܘܢ ܒܫܽܘܩܪܳܐ: ܘܣܳܝܡܺܝܢ ܐܢ̱ܬܽܘܢ ܒܶܣ̈ܡܶܐ ܠܒܰܥܠܳܐ: ܘܳܐܙܺܠܝܢ ܐܢ̱ܬܽܘܢ ܒܳܬܰܪ ܐܰܠܳܗ̈ܶܐ ܐ̱ܚܖ̈ܳܢܶܐ ܕܠܳܐ ܝܺܕܰܥܬܽܘܢ.
10 ܘܳܐܬܶܝܢ ܐܢ̱ܬܽܘܢ ܘܩܳܝܡܺܝܢ ܐܢ̱ܬܽܘܢ ܩܕܳܡܝ ܒܒܰܝܬܳܐ ܗܳܢܳܐ ܕܶܐܬܩܪܺܝ ܫܶܡܝ ܥܠܰܘܗܝ: ܘܳܐܡܪܺܝܬܽܘܢ ܦܰܨܳܢ: ܘܥܳܒܕܺܝܬܽܘܢ ܗܳܠܶܝܢ ܟܽܠܗܶܝܢ ܒܺܝ̈ܫܳܬܳܐ.
11 ܕܰܠܡܳܐ ܡܥܰܪܬܳܐ ܕܓܰܢܳܒ̈ܶܐ ܗܘܳܐ ܒܰܝܬܳܐ ܗܳܢܳܐ ܕܶܐܬܩܪܺܝ ܫܶܡܝ ܥܠܰܘܗܝ ܒܥܰܝ̈ܢܰܝܟܽܘܢ: ܘܳܐܦ ܐܶܢܳܐ ܗܳܐ ܚܙܺܝ݀ܬ ܐܳܡܰܪ ܡܳܪܝܳܐ.
12 ܡܶܛܽܠ ܗܳܢܳܐ ܙܶܠܘ ܠܰܐܬܪܝ ܕܰܒܫܺܝܠܽܘ ܕܰܐܫܪܺܝ݀ܬ ܫܶܡܝ ܬܰܡܳܢ ܒܩܰܕܡܳܝܬܳܐ: ܘܰܚܙܰܘ ܡܶܕܶܡ ܕܥܶܒܕܶܬ ܠܶܗ: ܡܶܛܽܠ ܒܺܝܫܽܘܬܶܗ ܕܥܰܡܝ ܝܺܣܪܳܐܶܝܠ.
13 ܘܗܳܫܳܐ ܚܠܳܦ ܕܰܥܒܰܕܬܽܘܢ ܥܒܳܕ̈ܶܐ ܗܳܠܶܝܢ ܟܽܠܗܽܘܢ ܐܳܡܰܪ ܡܳܪܝܳܐ: ܘܩܰܕܡܶ݀ܬ ܘܶܐܡܪܶܬ ܠܟܽܘܢ ܘܠܳܐ ܫܡܰܥܬܽܘܢ: ܘܰܩܪܺܝ݀ܬ ܠܟܽܘܢ ܘܠܳܐ ܥܢܰܝܬܽܘܢ.
14 ܐܶܥܒܕܺܝܘܗܝ ܠܒܰܝܬܳܐ ܗܳܢܳܐ ܕܶܐܬܩܪܺܝ ܫܶܡܝ ܥܠܰܘܗܝ ܕܰܐܢ̱ܬܽܘܢ ܬܟܺܝܠܺܝܢ ܥܠܰܘܗܝ: ܘܠܰܩܪܺܝܬܳܐ ܗܳܕܶܐ ܕܝܶܗܒܶ݀ܬ ܠܟܽܘܢ ܘܠܰܐܒܳܗܰܝ̈ܟܽܘܢ: ܐܰܝܟ ܕܥܶܒܕܶܬ ܠܫܺܝܠܽܘ.
15 ܘܶܐܫܕܶܝܟܽܘܢ ܡܶܢ ܩܕܳܡ ܐܰܦܰܝ̈: ܐܰܝܟ ܕܰܫܕܺܝ݀ܬ ܠܟܽܠܗܽܘܢ ܐܰܚܰܝ̈ܟܽܘܢ ܠܟܽܠܶܗ ܙܰܪܥܶܗ ܕܰܐܦܪܶܝܡ.
16 ܘܰܐܢ̱ܬ ܠܳܐ ܬܨܰܠܶܐ ܥܰܠ ܥܰܡܳܐ ܗܳܢܳܐ: ܘܠܳܐ ܬܶܒܥܶܐ ܥܠܰܝܗܽܘܢ: ܘܠܳܐ ܬܶܒܥܶܐ ܡܶܢܝ: ܡܶܛܽܠ ܕܠܳܐ ܫܳܡܰܥ ܐ̱ܢܳܐ ܠܳܟ.
17 ܠܳܐ ܚܳܙܶܐ ܐܰܢ̱ܬ ܡܶܕܶܡ ܕܥܳܒ݁ܕܺܝܢ ܒܩܽܘܖ̈ܝܳܐ ܕܺܝܗܽܘܕܳܐ ܘܰܒܫܽܘ̈ܩܶܝܗ̇ ܕܽܐܘܪܺܫܠܶܡ.
18 ܒܢܰܝ̈ܳܐ ܡܠܰܩܛܺܝܢ ܩܰܝ̈ܣܶܐ: ܘܰܐܒܳܗ̈ܶܐ ܡܰܘܩܕܺܝܢ ܢܽܘܪܳܐ: ܘܢܶܫ̈ܶܐ ܠܳܝ̈ܫܳܢ ܠܰܝܫܳܐ: ܠܡܶܥܒܰܕ ܙܽܘܬܖ̈ܶܐ ܠܦܽܘܠܚܳܢ ܫܡܰܝܳܐ: ܘܠܰܡܢܰܩܳܝܽܘ ܢܽܘܩܳܝ̈ܶܐ ܠܰܐܠܳܗ̈ܶܐ ܐ̱ܚܖ̈ܳܢܶܐ ܕܢܰܪܓܙܽܘܢܳܢܝ.
19 ܠܳܐ ܗ̱ܘܳܐ ܠܺܝ ܡܰܪܓܙܺܝܢ ܐܳܡܰܪ ܡܳܪܝܳܐ: ܐܶܠܳܐ ܠܢܰܦܫܗܽܘܢ ܕܢܶܒ̈ܗܬܳܢ ܐܰܦܰܝ̈ܗܽܘܢ.
20 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܝܳܐ ܐܰܠܳܗܳܐ: ܗܳܐ ܪܽܘܓܙܝ ܘܚܶܡܬܝ ܡܶܬܬܢܺܝܚܺܝܢ ܥܰܠ ܐܰܬܪܳܐ ܗܳܢܳܐ: ܥܰܠ ܒܢܰܝ̈ܢܳܫܳܐ ܘܥܰܠ ܒܥܺܝܪܳܐ: ܘܥܰܠ ܐܺܝ̈ܠܳܢܶܐ ܕܕܰܒܪܳܐ ܘܥܰܠ ܦܺܐܖ̈ܶܐ ܕܰܐܪܥܳܐ: ܘܬܰܘܩܶܕ ܘܠܳܐ ܬܶܕܥܰܟ.
21 ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܥܠܰܘ̈ܳܬܗܽܘܢ ܐܰܘܣܶܦܘ ܥܰܠ ܕܶܒܚܰܝ̈ܗܽܘܢ: ܘܶܐܟܰܠܘ ܒܶܣܪܳܐ ܕܠܳܐ ܐܶܡܪܶܬ ܠܰܐܒܳܗܰܝ̈ܗܽܘܢ.
22 ܘܠܳܐ ܦܰܩܕܶܬ ܐܶܢܽܘܢ ܒܝܰܘܡܳܐ ܕܰܐܣܩܶ݀ܬ ܐܶܢܽܘܢ ܡܶܢ ܐܰܪܥܳܐ ܕܡܶܨܪܶܝܢ: ܠܳܐ ܥܰܠ ܥܠܳܬܳܐ: ܘܠܳܐ ܥܰܠ ܕܶܒܚ̈ܶܐ.
23 ܐܶܠܳܐ ܐܶܢܳܐ ܗܳܢܳܐ ܦܶܬܓܳܡܳܐ ܦܶܩܕܶܬ ܐܶܢܽܘܢ: ܘܶܐܡܪܶܬ ܫܡܰܥܘ ܒܩܳܠܝ: ܘܶܐܗܘܶܐ ܠܟܽܘܢ ܐܰܠܳܗܳܐ: ܘܰܐܢ̱ܬܽܘܢ ܬܶܗܘܢ ܠܺܝ ܥܰܡܳܐ: ܘܗܰܠܶܟܘ ܒܟܽܠܳܗ̇ ܐܽܘܪܚܳܐ ܕܰܡܦܰܩܶܕ ܐ̱ܢܳܐ ܠܟܽܘܢ ܕܢܶܛܐܰܒ ܠܟܽܘܢ.
24 ܘܠܳܐ ܫܡܰܥܘ: ܘܠܳܐ ܐܪܟܶܢܘ ܐܶܕܢܗܽܘܢ ܠܡܶܫܡܰܥ: ܐܶܠܳܐ ܐܶܙܰܠܘ ܒܳܬܰܪ ܬܰܖ̈ܥܝܳܬܗܽܘܢ: ܘܒܳܬܰܪ ܨܶܒܝܳܢܰܝ̈ ܠܶܒܗܽܘܢ ܒܺܝܫܳܐ: ܘܰܗܦܰܟܘ ܠܒܶܣܬܰܪܗܽܘܢ ܘܠܳܐ ܠܰܩܕܳܡܝܗܽܘܢ.
25 ܡܶܢ ܝܰܘܡܳܐ ܕܰܢ̣ܦܰܩܘ ܐܰܒܳܗܰܝ̈ܗܽܘܢ ܡܶܢ ܐܰܪܥܳܐ ܕܡܶܨܪܶܝܢ ܘܰܥܕܰܡܳܐ ܠܝܰܘܡܳܢܳܐ: ܘܫܰܕܪܶܬ ܠܘܳܬܗܽܘܢ ܟܽܠܗܽܘܢ ܥܰܒ̈ܕܰܝ ܢܒܺܝ̈ܶܐ ܒܟܽܠܝܽܘܡ.
26 ܩܰܕܡܶ݀ܬ ܘܫܰܕܪܶܬ ܘܠܳܐ ܫܡܰܥܘ܆ ܘܠܳܐ ܐܰܪܟܶܢܘ ܐܶܕܢܗܽܘܢ ܠܘܳܬܝ: ܘܩܰܫܺܝܘ ܩܕܳܠܗܽܘܢ ܛܳܒ ܡܶܢ ܐܰܒܳܗܰܝ̈ܗܽܘܢ.
27 ܘܬܺܐܡܰܪ ܠܗܽܘܢ ܗܳܠܶܝܢ ܟܽܠܗܽܘܢ ܦܶܬܓܳܡ̈ܶܐ ܘܠܳܐ ܢܶܫܡܥܽܘܢܳܟ: ܘܩܳܪܶܐ ܐܰܢ̱ܬ ܠܗܽܘܢ ܘܠܳܐ ܥܳܢܶܝܢ ܠܳܟ.
28 ܐܶܒܕܰܬ ܗܰܝܡܳܢܽܘܬܳܐ: ܘܓܳܙܰܬ ܡܶܢ ܦܽܘܡܗܽܘܢ.
29 ܓܽܘܙܝ ܣܰܥܪܶܟܝ ܘܰܫܕܳܝ: ܘܰܫܩܽܘܠܝ ܥܰܠ ܫܒܺܝ̈ܠܶܐ ܐܽܘܠܺܝܬܳܐ ܕܰܪܓܶܙ ܡܳܪܝܳܐ ܘܫܰܒܩܶܗ ܠܕܳܪܳܐ ܥܳܒܽܘܪܳܐ.
30 ܡܶܛܽܠ ܕܰܥܒܰܕܘ ܒܢܰܝ̈ ܝܺܗܽܘܕܳܐ ܕܒܺܝܫ ܩܕܳܡܝ ܐܳܡܰܪ ܡܳܪܝܳܐ: ܘܣܳܡܘ ܛܰܢܦܽܘܬܗܽܘܢ ܒܒܰܝܬܳܐ ܕܶܐܬܩܪܺܝ ܫܶܡܝ ܥܠܰܘܗܝ ܘܛܰܢܦܽܘܗܝ.
31 ܘܰܒ̣ܢܰܘ ܥܠܰܘ̈ܳܬܳܐ ܒܬܰܦܰܬ ܕܰܒܢܰܚܠܳܐ ܕܒܰܪܗܳܢܽܘܡ: ܠܡܰܘܩܳܕܽܘ ܒܢܰܝ̈ܗܽܘܢ ܘܰܒܢ̈ܳܬܗܽܘܢ ܒܢܽܘܪܳܐ: ܕܠܳܐ ܦܰܩܕܶܬ ܐܶܢܽܘܢ ܘܠܳܐ ܣܶܠܩܰܬ ܥܰܠ ܠܶܒܝ.
32 ܡܶܛܽܠ ܗܳܢܳܐ ܗܳܐ ܝܰܘ̈ܡܳܬܳܐ ܐܳܬܶܝܢ ܐܳܡܰܪ ܡܳܪܝܳܐ: ܘܠܳܐ ܢܶܬܶܐܡܰܪ ܬܽܘܒ ܬܰܦܰܬ ܘܢܰܚܠܳܐ ܕܒܰܪܗܳܢܽܘܡ: ܐܶܠܳܐ ܐܶܢ ܢܰܚܠܳܐ ܕܰܩܛܺܝ̈ܠܶܐ܆ ܘܢܶܩܒܪܽܘܢ ܒܬܰܦܰܬ ܡܶܢ ܒܠܰܝ ܐܰܬܪܳܐ.
33 ܘܢܶܗ̈ܘܝܳܢ ܫܠܰܕܰܝ̈ܗܽܘܢ ܕܥܰܡܳܐ ܗܳܢܳܐ ܡܶܐܟܽܘܠܬܳܐ: ܠܦܳܪܰܚܬܳܐ ܕܰܫܡܰܝܳܐ: ܘܰܠܚܰܝܽܘܬܳܐ ܕܰܐܪܥܳܐ: ܘܠܰܝܬ ܡܦܰܨܝܳܢܳܐ.
34 ܘܶܐܒܰܛܶܠ ܡܶܢ ܩܽܘܖ̈ܝܳܐ ܕܺܝܗܽܘܕܳܐ: ܘܡܶܢ ܫܽܘ̈ܩܶܝܗ̇ ܕܽܐܘܪܺܫܠܶܡ: ܩܳܠܳܐ ܕܰܕܝܳܨܳܐ: ܘܩܳܠܳܐ ܕܚܰܕܽܘܬܳܐ: ܩܳܠܳܐ ܕܚܰܬܢܳܐ: ܘܩܳܠܳܐ ܕܟܰܠܬܳܐ: ܡܶܛܽܠ ܕܰܠܚܽܘܪܒܳܐ ܬܶܗܘܶܐ ܟܽܠܳܗ̇ ܐܰܪܥܳܐ.