Jeremiah 23
The Book of Jeremiah
܀ ܐܪܡܝܐ ܟܓ ܀
1 ܐܳܘ ܖ̈ܳܥܰܘܳܬܳܐ ܕܡܰܘܒܕܺܝܢ ܘܰܡܒܰܕܪܺܝܢ ܥܳܢ̈ܳܐ ܕܡܰܪܥܺܝܬܝ ܐܳܡܰܪ ܡܳܪܝܳܐ.
2 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ: ܥܰܠ ܖ̈ܳܥܰܘܳܬܳܐ ܕܪܳܥܶܝܢ ܠܥܰܡܝ: ܐܰܢ̱ܬܽܘܢ ܒܰܕܰܪܬܽܘܢ ܠܥܳܢܝ̈: ܘܰܐܛܥܺܝܬܽܘܢ ܐܶܢܶܝܢ ܘܠܳܐ ܦܰܩܶܕܬܽܘܢ ܐܶܢܶܝܢ: ܗܳܐ ܦܳܩܶܕ ܐ̱ܢܳܐ ܥܠܰܝܟܽܘܢ: ܐܰܝܟ ܒܺܝܫܽܘܬ ܥܒܳܕܰܝ̈ܟܽܘܢ ܐܳܡܰܪ ܡܳܪܝܳܐ.
3 ܘܶܐ̱ܢܳܐ ܐܶܟܰܢܶܫ ܫܰܪܟܳܐ ܕܥܳܢܝ̈ ܡܶܢ ܟܽܠܗܽܘܢ ܐܰܬܖ̈ܰܘܳܬܳܐ ܕܒܰܕܪܶܬ ܐܶܢܽܘܢ ܠܬܰܡܳܢ: ܘܰܐܗܦܶܟ ܐܶܢܽܘܢ ܠܕܰܝܪܗܽܘܢ: ܘܢܶܟܒܪܽܘܢ ܘܢܶܣܓܽܘܢ.
4 ܘܰܐܩܺܝܡ ܥܠܰܝܗܽܘܢ ܖ̈ܳܥܰܘܳܬܳܐ ܘܢܶܪܥܽܘܢ ܐܶܢܽܘܢ: ܘܠܳܐ ܢܶܕܚܠܽܘܢ ܬܽܘܒ ܘܠܳܐ ܢܶܬܒܰܕܪܽܘܢ: ܘܠܳܐ ܢܶܛܥܽܘܢ ܐܳܡܰܪ ܡܳܪܝܳܐ.
5 ܗܳܐ ܝܰܘ̈ܡܳܬܳܐ ܐܳܬܶܝܢ ܐܳܡܰܪ ܡܳܪܝܳܐ: ܘܰܐܩܺܝܡ ܠܕܰܘܺܝܕ ܨܶܡܚܳܐ ܕܙܰܕܺܝܩܽܘܬܳܐ: ܘܢܰܡܠܶܟ ܒܡܰܠܟܽܘܬܳܐ ܘܢܶܣܬܰܟܰܠ: ܘܢܶܥܒܶܕ ܕܺܝܢܳܐ ܘܙܰܕܺܝܩܽܘܬܳܐ ܒܰܐܪܥܳܐ.
6 ܒܝܰܘܡܰܘ̈ܗܝ ܢܶܬܦܪܶܩ ܝܺܗܽܘܕܳܐ: ܘܺܝܣܪܳܐܶܝܠ ܢܶܫܪܶܐ ܒܫܶܠܝܳܐ: ܘܗܳܢܰܘ ܫܡܶܗ ܕܢܶܩܪܽܘܢܶܗ ܡܳܪܝܳܐ ܙܶܕܩܰܢ.
7 ܡܶܛܽܠ ܗܳܢܳܐ ܗܳܐ ܝܰܘ̈ܡܳܬܳܐ ܐܳܬܶܝܢ ܐܳܡܰܪ ܡܳܪܝܳܐ: ܘܠܳܐ ܢܶܬܶܐܡܰܪ ܬܽܘܒ ܚܰܝ ܗ̱ܘ ܡܳܪܝܳܐ ܕܰܐܣܶܩ ܠܰܕܒܶܝܬ ܝܺܣܪܳܐܶܝܠ ܡܶܢ ܐܰܪܥܳܐ ܕܡܶܨܪܶܝܢ.
8 ܐܶܠܳܐ ܚܰܝ ܗ̱ܘ ܡܳܪܝܳܐ: ܕܢܰܣܶܩ ܘܢܰܝܬܶܐ ܠܰܒܢܰܝ̈ ܝܺܣܪܳܐܶܝܠ ܡܶܢ ܐܰܪܥܳܐ ܕܓܰܪܒܝܳܐ: ܘܡܶܢ ܟܽܠܗܽܘܢ ܐܰܬܖ̈ܰܘܳܬܳܐ ܕܶܐܬܒܰܕܰܪܘ ܒܗܽܘܢ: ܘܢܶܬܒܽܘܢ ܒܰܐܪܥܗܽܘܢ.
9 ܥܰܠ ܢܒܺܝ̈ܶܐ ܐܶܬܬܰܒܰܪ ܠܶܒܝ ܒܓܰܘܝ: ܘܙܳܥܘ ܟܽܠܗܽܘܢ ܓܰܖ̈ܡܰܝ: ܘܰܗܘܺܝ݀ܬ ܐܰܝܟ ܓܰܒܪܳܐ ܪܰܘܳܝܳܐ: ܘܰܐܝܟ ܓܰܒܪܳܐ ܕܥܰܒܪܶܗ ܚܰܡܪܶܗ: ܡܶܢ ܩܕܳܡ ܡܳܪܝܳܐ ܘܡܶܢ ܩܕܳܡ ܦܶܬܓܳܡܰܝ̈ ܩܽܘܕܫܶܗ.
10 ܡܶܛܽܠ ܕܓܰܝܳܖ̈ܶܐ ܘܚܳܛܽܘܦ̈ܶܐ ܐܶܬܡܰܠܝܰܬ ܐܰܪܥܳܐ: ܡܶܛܽܠ ܗܳܠܶܝܢ ܐܶܬܐܰܒܠܰܬ ܐܰܪܥܳܐ: ܘܺܝܒܶܫܘ ܕܰܝܖ̈ܶܐ ܕܡܰܕܒܪܳܐ: ܘܰܗܘܳܐ ܪܰܗܛܳܢܗܽܘܢ ܒܺܝܫ: ܘܰܒܓܰܢ̱ܒܳܪܽܘܬܗܽܘܢ ܠܳܐ ܐܰܟܫܰܪܘ.
11 ܡܶܛܽܠ ܕܳܐܦ ܢܒܺܝ̈ܶܐ ܘܳܐܦ ܟܳܗ̈ܢܶܐ ܐܶܬܚܰܢܰܦܘ: ܘܳܐܦ ܒܒܰܝܬܝ ܐܶܫܟܚܶ݀ܬ ܒܺܝܫܽܘܬܗܽܘܢ ܐܳܡܰܪ ܡܳܪܝܳܐ.
12 ܡܶܛܽܠ ܗܳܢܳܐ ܢܶܗܘ̈ܝܳܢ ܠܗܽܘܢ ܐܽܘܖ̈ܚܳܬܗܽܘܢ ܡܰܫܖ̈ܽܘܥܝܳܬܳܐ: ܘܰܠܚܶܫܽܘܟܳܐ ܢܶܬܕܚܽܘܢ ܘܢܶܦܠܽܘܢ ܒܗܶܝܢ: ܡܶܛܽܠ ܕܡܰܝܬܶܐ ܐ̱ܢܳܐ ܥܠܰܝܗܽܘܢ ܒܺܝܫܬܳܐ: ܫܰܢ̱ܬܳܐ ܕܦܽܘܩܕܳܢܗܽܘܢ ܐܳܡܰܪ ܡܳܪܝܳܐ.
13 ܘܒܰܢ̈ܒܝܰܝ ܫܳܡܪܺܝܢ ܚܙܺܝ݀ܬ ܕܰܓܳܠܽܘܬܳܐ: ܐܶܬܢܰܒܺܝܘ ܒܒܰܥܠܳܐ ܘܰܐܛܥܺܝܘ ܥܰܡܝ ܝܺܣܪܳܐܶܝܠ.
14 ܘܒܰܢ̈ܒܝܰܝ ܐܽܘܪܺܫܠܶܡ ܚܙܺܝ݀ܬ ܫܳܛܝܽܘܬܳܐ: ܓܰܝܳܪܺܝܢ ܘܰܡܗܰܠܟܺܝܢ ܒܫܽܘܩܪܳܐ: ܘܰܡܚܰܡܣܢܺܝܢ ܐܺܝܕܰܝ̈ܗܽܘܢ ܡܶܢ ܖ̈ܳܚܡܰܝܗܽܘܢ: ܕܠܳܐ ܢܶܗܦܟܽܘܢ ܓܒܰܪ ܡܶܢ ܐܽܘܪܚܶܗ ܒܺܝܫܬܳܐ: ܘܰܗܘܰܘ ܠܺܝ ܟܽܠܗܽܘܢ ܐܰܝܟ ܣܕܽܘܡ: ܘܝܰܬܳܒܶܝ̈ܗ̇ ܐܰܝܟ ܥܳܡܽܘܪܳܐ.
15 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܝܳܐ ܨܒܰܐܬ ܥܰܠ ܢܒܺܝ̈ܶܐ: ܗܳܐ ܡܰܘܟܶܠ ܐ̱ܢܳܐ ܠܗܽܘܢ ܡܪܳܖ̈ܶܐ: ܘܰܐܫܩܶܐ ܐܶܢܽܘܢ ܡܰܝ̈ܳܐ ܡܰܪܺܝܖ̈ܶܐ: ܡܶܛܽܠ ܕܡܶܢ ܠܘܳܬ ܢܒܺܝ̈ܶܐ ܕܽܐܘܪܺܫܠܶܡ ܢܶܦܩܰܬ ܚܰܢܦܽܘܬܳܐ ܒܟܽܠܳܗ̇ ܐܰܪܥܳܐ.
16 ܗܳܟܰܢܳܐ ܐܳܡܰܪ ܡܳܪܝܳܐ ܨܒܰܐܬ: ܠܳܐ ܬܶܫܡܥܽܘܢ ܠܦܶܬܓܳܡ̈ܶܐ ܕܰܢܒܺܝ̈ܶܐ ܕܰܓ̈ܳܠܶܐ: ܕܡܶܬܢܰܒܶܝܢ ܠܟܽܘܢ ܘܡܰܛܥܶܝܢ ܠܟܽܘܢ: ܚܶܙܘܰܐ ܗ̱ܘ ܕܠܶܒܗܽܘܢ ܡܡܰܠܠܺܝܢ: ܘܠܳܐ ܗ̱ܘܳܐ ܡܶܢ ܦܽܘܡ ܡܳܪܝܳܐ.
17 ܘܳܐܡܪܺܝܢ ܠܰܐܝܠܶܝܢ ܕܡܰܪܓܙܺܝܢ: ܒܦܶܬܓܳܡܶܗ ܕܡܳܪܝܳܐ ܫܠܳܡܳܐ ܢܶܗܘܶܐ ܠܟܽܘܢ: ܘܟܽܠ ܕܰܡܗܰܠܶܟ ܒܨܶܒܝܳܢܳܐ ܕܠܶܒܶܗ ܐܳܡܪܺܝܢ ܠܶܗ: ܠܳܐ ܬܺܐܬܶܐ ܥܠܰܝܟܽܘܢ ܒܺܝܫܬܳܐ.
18 ܡܰܢܽܘ ܓܶܝܪ ܩܳܡ ܒܐ̱ܪܳܙܶܗ ܕܡܳܪܝܳܐ: ܘܰܚܙܳܝܗܝ ܘܰܫ̣ܡܰܥ ܦܶܬܓܳܡܶܗ: ܐܰܘ ܡܰܢܽܘ ܨܳܬ ܦܶܬܓܳܡܶܗ ܘܫܰܡܥܶܗ.
19 ܗܳܐ ܣܽܘܥܪܳܢܶܗ ܕܡܳܪܝܳܐ ܒܪܽܘܓܙܳܐ ܢܳܦܶܩ: ܘܣܽܘܥܪܳܢܳܐ ܡܶܬܓܰܘܙܰܠ: ܥܰܠ ܪܺܝܫܳܐ ܕܖ̈ܰܫܺܝܥܶܐ ܢܶܬܬܢܺܝܚ.
20 ܠܳܐ ܬܶܗܦܽܘܟ ܚܶܡܬܳܐ ܕܪܽܘܓܙܶܗ ܕܡܳܪܝܳܐ ܥܕܰܡܳܐ ܕܢܶܥܒܶܕ: ܘܰܥܕܰܡܳܐ ܕܰܢܩܺܝܡ ܬܰܪܥܺܝܬܳܐ ܕܠܶܒܶܗ: ܒܰܐ̱ܚܪܳܝܰܬ ܝܰܘ̈ܡܳܬܳܐ ܬܶܬܒܰܝܢܽܘܢ ܒܶܗ.
21 ܠܳܐ ܫܰܕܪܶܬ ܠܰܢܒܺܝ̈ܶܐ ܘܗܶܢܽܘܢ ܐܶܙܰܠܘ: ܘܠܳܐ ܐܶܡܪܶܬ ܠܗܽܘܢ ܘܗܶܢܽܘܢ ܐܶܬܢܰܒܺܝܘ.
22 ܘܠܳܐ ܩܳܡܘ ܒܐ̱ܖ̈ܳܙܰܝ: ܘܰܐܫܡܰܥܘ ܦܶܬܓܳܡܰܝ̈ ܠܥܰܡܝ: ܘܰܐܬܺܝܒܘ ܐܶܢܽܘܢ ܡܶܢ ܐܽܘܖ̈ܚܳܬܗܽܘܢ ܒܺܝ̈ܫܳܬܳܐ: ܘܡܶܢ ܒܺܝܫܽܘܬ ܥܒܳܕܰܝ̈ܗܽܘܢ.
23 ܐܰܠܳܗܳܐ ܐ̱ܢܳܐ ܕܡܶܢ ܩܽܘܪܒܳܐ ܐܳܡܰܪ ܡܳܪܝܳܐ: ܘܠܳܐ ܗܘܺܝ݀ܬ ܐܰܠܳܗܳܐ ܕܡܶܢ ܪܽܘܚܩܳܐ.
24 ܐܶܢ ܢܶܛܫܶܐ ܓܰܒܪܳܐ ܒܛܽܘܫܝܰܝ: ܐܶܢܳܐ ܚܳܙܶܐ ܐ̱ܢܳܐ ܠܶܗ ܐܳܡܰܪ ܡܳܪܝܳܐ ܚܰܝܠܬܳܢܳܐ.
25 ܫܶܡܥܶ݀ܬ ܡܶܕܶܡ ܕܶܐܡܰܪܘ ܢܒܺܝ̈ܶܐ ܕܡܶܬܢܰܒܶܝܢ ܒܫܶܡܝ ܒܕܰܓܳܠܽܘܬܳܐ: ܘܳܐܡܪܺܝܢ ܚܶܠܡܳܐ ܚܶܠܡܶ݀ܬ.
26 ܥܕܰܡܳܐ ܠܶܐܡܰܬܝ ܐܺܝܬ ܒܦܽܘܡܗܽܘܢ ܕܰܢܒܺܝ̈ܶܐ ܕܰܓ̈ܳܠܶܐ ܢܒܺܝܰܘ̈ܳܬܳܐ ܕܰܓܳܠ̈ܳܬܳܐ: ܢܒܺܝܰܘ̈ܳܬܳܐ ܕܢܶܟܠܳܐ ܕܠܶܒܗܽܘܢ.
27 ܕܡܶܬܚܰܫܒܺܝܢ ܠܡܰܛܥܳܝܽܘ ܒܫܶܡܝ ܠܥܰܡܝ: ܒܚܶܠܡܰܝ̈ܗܽܘܢ ܕܡܶܫܬܰܥܶܝܢ ܓܒܰܪ ܠܚܰܒܪܶܗ: ܐܰܝܟ ܕܰܛܥܰܘ ܐܰܒܳܗܰܝ̈ܗܽܘܢ ܫܶܡܝ ܘܰܦܠܰܚܘ ܠܒܰܥܠܳܐ.
28 ܢܒܺܝܳܐ ܕܚܳܙܶܐ ܚܶܠܡܳܐ ܢܶܫܬܰܥܶܐ ܚܶܠܡܳܐ: ܘܰܕܦܶܬܓܳܡܰܝ̈ ܥܰܡܶܗ ܢܡܰܠܶܠ ܦܶܬܓܳܡܰܝ̈ ܒܩܽܘܫܬܳܐ: ܠܡܳܢܳܐ ܚܳܠܛܺܝܢ ܐܢ̱ܬܽܘܢ ܬܶܒܢܳܐ ܒܰܥܒܽܘܪܳܐ ܐܳܡܰܪ ܡܳܪܝܳܐ.
29 ܗܳܐ ܦܶܬܓܳܡܰܝ̈ ܐܰܝܟ ܢܽܘܪܳܐ ܢܳܦܩܺܝܢ ܐܳܡܰܪ ܡܳܪܝܳܐ: ܘܰܐܝܟ ܦܰܪܙܠܳܐ ܕܓܳܙܰܪ ܟܺܐܦܳܐ.
30 ܡܶܛܽܠ ܗܳܢܳܐ ܗܳܐ ܐܶܢܳܐ ܥܰܠ ܢܒܺܝ̈ܶܐ ܐܳܡܰܪ ܡܳܪܝܳܐ: ܕܰܡܓܰܢܒܺܝܢ ܦܶܬܓܳܡܰܝ̈ ܐ̱ܢܳܫ ܡܶܢ ܚܰܒܪܶܗ.
31 ܗܳܐ ܐܶܢܳܐ ܥܰܠ ܢܒܺܝ̈ܶܐ ܐܳܡܰܪ ܡܳܪܝܳܐ: ܕܰܡܗܰܦܟܺܝܢ ܠܶܫܳܢܰܝ̈ܗܽܘܢ ܘܳܐܡܪܺܝܢ ܡܳܪܝܳܐ ܐܶܡܰܪ ܗܳܟܰܢܳܐ.
32 ܗܳܐ ܐܶܢܳܐ ܥܰܠ ܢܒܺܝ̈ܶܐ ܕܚܳܙܶܝܢ ܚܶܠ̈ܡܶܐ ܕܰܓ̈ܳܠܶܐ ܐܳܡܰܪ ܡܳܪܝܳܐ: ܘܡܶܫܬܰܥܶܝܢ ܠܗܽܘܢ: ܘܡܰܛܥܶܝܢ ܠܥܰܡܝ ܒܕܰܓܳܠܽܘܬܗܽܘܢ ܘܰܒܦܰܚܙܽܘܬܗܽܘܢ: ܘܶܐ̱ܢܳܐ ܠܳܐ ܦܰܩܕܶܬ ܐܶܢܽܘܢ ܘܠܳܐ ܫܰܕܪܶܬ ܐܶܢܽܘܢ: ܘܡܶܕܶܡ ܠܳܐ ܡܰܘܬܪܺܝܢ ܠܥܰܡܳܐ ܗܳܢܳܐ.
33 ܘܟܰܕ ܢܫܰܐܠܳܟ ܥܰܡܳܐ ܗܳܢܳܐ: ܐܰܘ ܢܒܺܝܳܐ: ܐܰܘ ܟܳܗܢܳܐ: ܘܢܺܐܡܰܪ ܠܳܟ ܡܳܢܰܘ ܦܶܬܓܳܡܶܗ ܕܡܳܪܝܳܐ: ܐܶܡܰܪ ܠܗܽܘܢ ܐܰܢ̱ܬ: ܗܳܢܰܘ ܦܶܬܓܳܡܶܗ ܕܡܳܪܝܳܐ: ܕܶܐܥܩܽܘܪܟܽܘܢ ܐܳܡܰܪ ܡܳܪܝܳܐ.
34 ܘܰܢܒܺܝܳܐ: ܐܰܘ ܟܳܗܢܳܐ: ܐܰܘ ܥܰܡܳܐ: ܕܢܺܐܡܰܪ ܦܶܬܓܳܡܶܗ ܕܡܳܪܝܳܐ: ܐܶܦܩܽܘܕ ܥܰܠ ܓܰܒܪܳܐ ܗܰܘ ܘܥܰܠ ܒܰܝܬܶܗ.
35 ܗܳܟܰܢܳܐ ܬܺܐܡܪܽܘܢ ܓܒܰܪ ܠܚܰܒܪܶܗ ܘܰܓܒܰܪ ܠܰܐܚܽܘܗܝ: ܡܳܢܳܐ ܥ̣ܢܳܐ ܡܳܪܝܳܐ ܘܡܳܢܳܐ ܡܰܠܶܠ ܡܳܪܝܳܐ.
36 ܘܦܶܬܓܳܡܶܗ ܕܡܳܪܝܳܐ ܠܳܐ ܬܶܬܕܰܟܪܽܘܢ ܬܽܘܒ: ܡܶܛܽܠ ܕܦܶܬܓܳܡܳܐ ܢܶܗܘܶܐ ܠܓܰܒܪܳܐ ܢܒܺܝܽܘܬܶܗ: ܘܗܳܦܟܺܝܢ ܐܰܢ̱ܬܽܘܢ ܦܶܬܓܳܡܰܘ̈ܗܝ ܕܰܐܠܳܗܳܐ ܚܰܝܳܐ ܡܳܪܝܳܐ ܚܰܝܠܬܳܢܳܐ ܐܰܠܳܗܰܢ.
37 ܗܳܟܰܢܳܐ ܬܺܐܡܪܽܘܢ ܠܓܰܒܪܳܐ: ܡܳܢܳܐ ܥܢܳܟ ܡܳܪܝܳܐ ܘܡܳܢܳܐ ܡܰܠܶܠ ܡܳܪܝܳܐ.
38 ܘܶܐܢ ܦܶܬܓܳܡܶܗ ܕܡܳܪܝܳܐ ܬܺܐܡܪܽܘܢ: ܗܳܟܰܢܳܐ ܐܳܡܰܪ ܡܳܪܝܳܐ: ܥܰܠ ܕܶܐܡܰܪܬܽܘܢ ܦܶܬܓܳܡܳܐ ܗܳܢܳܐ: ܘܫܶܠܚܶ݀ܬ ܠܟܽܘܢ ܕܠܳܐ ܬܺܐܡܪܽܘܢ.
39 ܡܶܛܽܠ ܗܳܢܳܐ ܐܶܫܩܽܘܠܟܽܘܢ ܡܶܫܩܰܠ ܘܶܐܫܕܶܝܟܽܘܢ: ܘܠܰܩܪܺܝܬܳܐ ܕܝܶܗ̱ܒܶ݀ܬ ܠܟܽܘܢ ܘܠܰܐܒܳܗܰܝ̈ܟܽܘܢ ܡܶܢ ܩܕܳܡ ܐܰܦܰܝ̈.
40 ܘܶܐܬܶܠ ܥܠܰܝܟܽܘܢ ܚܶܣܕܳܐ ܕܥܳܠܰܡ: ܘܒܶܗܬܬܳܐ ܕܰܠܥܳܠܰܡ ܕܠܳܐ ܡܶܬܛܰܥܝܐ.