Jeremiah 17
The Book of Jeremiah
܀ ܐܪܡܝܐ ܝܙ ܀
1 ܚܛܺܝܬܶܗ ܕܺܝܗܽܘܕܳܐ ܟܬܺܝܒܳܐ ܒܩܰܢܝܳܐ ܕܦܰܪܙܠܳܐ: ܘܰܒܛܶܦܪܳܐ ܕܫܳܡܺܝܪܳܐ: ܘܰܪܫܺܝܡܳܐ ܥܰܠ ܠܽܘܚ̈ܶܐ ܕܠܶܒܗܽܘܢ: ܘܥܰܠ ܩܰܖ̈ܢܳܬܳܐ ܕܡܰܕܒܚܰܝ̈ܗܽܘܢ.
2 ܡܳܐ ܕܡܶܬܕܰܟܪܺܝܢ ܒܠܶܒܗܽܘܢ ܡܰܕܒܚܰܝ̈ܗܽܘܢ ܘܕܶܚ̈ܠܳܬܗܽܘܢ: ܬܚܶܝܬ ܟܽܠ ܐܺܝܠܳܢ ܕܥܰܒܺܝܛ: ܘܥܰܠ ܟܽܠ ܪܳܡܬܳܐ ܕܪܳܡܳܐ: ܘܰܒܛܽܘܖ̈ܶܐ ܘܰܒܕܰܒܪܳܐ.
3 ܢܶܟܣܰܝ̈ܟ ܘܟܽܠܗܽܘܢ ܓܰܙܰܝ̈ـܟ: ܘܰܬܚܽܘܡܰܝ̈ܟ ܠܒܶܙܬܳܐ ܐܶܬܶܠ ܡܶܛܽܠ ܚܛܳܗܰܝ̈ـܟ.
4 ܘܰܐܥܒܪܳܟ ܡܶܢ ܝܳܪܬܽܘܬܳܐ ܕܝܶܗܒܶ݀ܬ ܠܳܟ: ܘܶܐܫܰܥܒܕܳܟ ܠܰܒܥܶܠܕܒܳܒܰܝ̈ـܟ ܒܰܐܪܥܳܐ ܕܠܳܐ ܝܳܕܰܥ ܐܰܢ̱ܬ: ܡܶܛܽܠ ܕܢܽܘܪܳܐ ܐܰܩܕܰܚܬܽܘܢ ܒܪܽܘܓܙܝ: ܥܕܰܡܳܐ ܠܥܳܠܰܡ ܬܺܐܩܰܕ.
5 ܗܳܟܰܢܳܐ ܐܳܡܰܪ ܡܳܪܝܳܐ: ܠܺܝܛ ܗ̱ܘ ܓܰܒܪܳܐ ܕܢܶܬܬܟܶܠ ܥܰܠ ܒܰܪܢܳܫܳܐ: ܘܢܶܥܒܶܕ ܒܰܪ ܒܶܣܪܳܐ ܕܪܳܥܶܗ: ܘܡܶܢ ܡܳܪܝܳܐ ܢܶܣܛܶܐ ܠܶܒܶܗ.
6 ܢܶܗܘܶܐ ܐܰܝܟ ܥܶܩܳܪܳܐ ܒܰܦܩܰܥܬܳܐ: ܘܠܳܐ ܢܶܚܙܶܐ ܟܰܕ ܬܺܐܬܶܐ ܛܳܒܬܳܐ: ܘܢܶܫܪܶܐ ܒܚܽܘܠܳܢ̈ܶܐ ܒܡܰܕܒܪܳܐ: ܒܰܐܪܥܳܐ ܡܳܠܰܚܬܳܐ ܕܠܳܐ ܐܶܬܝܰܬܒܰܬ.
7 ܒܪܺܝܟ ܗ̱ܘ ܓܰܒܪܳܐ ܕܢܶܬܬܟܶܠ ܥܰܠ ܡܳܪܝܳܐ: ܘܢܶܗܘܶܐ ܡܳܪܝܳܐ ܬܽܘܟܠܳܢܶܗ.
8 ܢܶܗܘܶܐ ܐܰܝܟ ܐܺܝܠܳܢܳܐ ܕܰܢܨܺܝܒ ܥܰܠ ܡܰܝ̈ܳܐ: ܘܥܰܠ ܝܰܒܠܳܐ ܡܫܰܕܰܪ ܥܶܩܳܖ̈ܰܘܗܝ: ܘܠܳܐ ܢܶܕܚܰܠ ܟܰܕ ܢܺܐܬܶܐ ܚܽܘܡܳܐ: ܘܢܶܗܘܽܘܢ ܛܰܖ̈ܦܰܘܗܝ ܪܳܘܙܺܝܢ: ܘܰܒܫܰܢ̱ܬܳܐ ܕܰܒܨܺܝܪ ܒܳܗ̇ ܡܶܛܪܳܐ ܠܳܐ ܢܶܕܚܰܠ: ܘܠܳܐ ܢܶܬܒܰܨܰܪ ܡܶܢ ܕܰܠܡܶܥܒܰܕ ܦܺܐܖ̈ܶܐ.
9 ܥܰܫܺܝܢ ܠܶܒܳܐ ܡܶܢ ܟܽܠ ܐ̱ܢܳܫܰܐ ܗ̱ܘ: ܡܰܢܽܘ ܝܳܕܰܥ ܠܶܗ.
10 ܐܶܢܳܐ ܡܳܪܝܳܐ ܒܳܨܶܐ ܠܶܒܳܐ ܘܒܳܚܰܪ ܟܽܘܠܝ̈ܳܬܳܐ: ܘܝܳܗܶܒ ܠܓܰܒܪܳܐ ܐܰܝܟ ܐܽܘܖ̈ܚܳܬܶܗ: ܘܰܐܝܟ ܦܺܐܖ̈ܰܝ ܥܒܳܕܰܘ̈ܗܝ.
11 ܐܰܝܟ ܚܰܓܠܳܐ ܕܩܳܪܶܐ ܠܰܐܝܠܶܝܢ ܕܠܳܐ ܝܳܠܶܕ: ܗܳܟܰܢܳܐ ܡܰܢ ܕܩܳܢܶܐ ܥܽܘܬܪܳܐ ܕܠܳܐ ܒܕܺܝܢܳܐ: ܒܦܶܠܓܽܘܬ ܝܰܘ̈ܡܰܘܗܝ ܢܶܫܒܩܺܝܘܗܝ: ܘܚܰܪܬܶܗ ܬܶܗܘܶܐ ܡܨܰܥܪܳܐ.
12 ܟܽܘܪܣܝܳܐ ܕܺܐܝܩܳܪܳܐ ܐܶܬܬܪܺܝܡ ܡܶܢ ܠܽܘܩܕܰܡ܆ ܡܶܢ ܐܰܬܪܳܐ ܕܡܰܩܕܫܰܢ.
13 ܣܰܒܪܶܗ ܕܺܝܣܪܳܐܶܝܠ ܡܳܪܝܰܐ ܗ̱ܘ: ܟܽܠ ܕܫܰܒܩܽܘܟ ܢܶܒܗܬܗܽܘܢ: ܘܡܰܖ̈ܕܘܳܬܳܐ ܒܰܐܪܥܳܐ ܢܶܬܟܰܬܒܽܘܢ: ܡܶܛܽܠ ܕܰܫܒܰܩܘ ܠܡܳܪܝܳܐ ܡܰܒܽܘܥܳܐ ܕܡܰܝ̈ܳܐ ܚܰܝ̈ܶܐ.
14 ܐܰܣܳܢܝ ܡܳܪܝܳܐ ܘܶܐܬܰܐܣܶܐ: ܦܪܽܘܩܰܝܢܝ ܘܶܐܬܦܪܶܩ: ܡܶܛܽܠ ܕܬܶܫܒܽܘܚܬܝ ܐܰܢ̱ܬ ܗ̱ܘ.
15 ܗܳܐ ܗܶܢܽܘܢ ܐܳܡܪܺܝܢ ܠܺܝ: ܐܰܝܟܰܘ ܦܶܬܓܳܡܶܗ ܕܡܳܪܝܳܐ: ܢܺܐܬܶܐ ܗܳܫܳܐ.
16 ܘܶܐ̱ܢܳܐ ܒܒܺܝܫܬܳܐ ܠܳܐ ܦܳܫܶ݀ܬ ܡܶܢܟ: ܐܰܢ̱ܬ ܝܳܕܰܥ ܐܰܢ̱ܬ ܕܝܰܘܡܶܗ ܕܒܰܪܢܳܫܳܐ ܠܳܐ ܪܶܓܶ݀ܬ: ܘܡܶܕܶܡ ܕܰܢܦܰܩ ܡܶܢ ܣܶܦ̈ܘܳܬܝ ܩܕܳܡ ܐܰܦܰܝ̈ܟ ܗܘܳܐ.
17 ܠܳܐ ܬܶܗܘܶܐ ܠܺܝ ܠܰܬܒܳܪܳܐ: ܐܶܠܳܐ ܐܰܓܶܢ ܥܠܰܝ ܒܝܰܘܡܳܐ ܒܺܝܫܳܐ.
18 ܢܶܒܗܬܗܽܘܢ ܖ̈ܳܕܘܦܰܝ ܘܠܳܐ ܐܶܒܗܰܬ ܐܶܢܳܐ: ܢܶܬܬܒܪܽܘܢ ܗܶܢܽܘܢ ܘܠܳܐ ܐܶܬܬܒܰܪ ܐܶܢܳܐ: ܐܰܝܬܳܐ ܥܠܰܝܗܽܘܢ ܝܰܘܡܳܐ ܕܒܺܝܫܬܳܐ: ܘܚܰܕ ܬܪܶܝܢ ܬܒܳܪܳܐ ܬܒܰܪ ܐܶܢܽܘܢ.
19 ܗܳܟܰܢܳܐ ܐܶܡܰܪ ܠܺܝ ܡܳܪܝܳܐ ܙܶܠ ܩܽܘܡ ܒܬܰܪܥܳܐ ܕܰܒܢܰܝ̈ ܥܰܡܳܐ: ܕܥܳܐܠܺܝܢ ܒܶܗ ܡܰܠ̈ܟܶܐ ܕܺܝܗܽܘܕܳܐ ܘܰܕܢܳܦܩܺܝܢ ܒܶܗ: ܘܰܒܟܽܠܗܽܘܢ ܬܰܖ̈ܥܶܝܗ̇ ܕܽܐܘܪܺܫܠܶܡ.
20 ܘܶܐܡܰܪ ܠܗܽܘܢ: ܫܡܰܥܘ ܦܶܬܓܳܡܶܗ ܕܡܳܪܝܳܐ ܡܰܠ̈ܟܶܐ ܕܺܝܗܽܘܕܳܐ: ܘܟܽܠܶܗ ܒܶܝܬ ܝܺܗܽܘܕܳܐ: ܘܟܽܠܗܽܘܢ ܥܳܡܽܘܖ̈ܶܝܗ̇ ܕܽܐܘܪܺܫܠܶܡ: ܕܥܳܐܠܺܝܢ ܒܬܰܖ̈ܥܶܐ ܗܳܠܶܝܢ.
21 ܗܳܟܰܢܳܐ ܐܳܡܰܪ ܡܳܪܝܳܐ: ܐܶܙܕܰܗܪܘ ܒܢܰܦܫܟܽܘܢ: ܘܠܳܐ ܬܶܫܩܠܽܘܢ ܫܩܽܘܠܬܳܐ ܒܝܰܘܡܳܐ ܕܫܰܒܬܳܐ: ܘܬܰܥܠܽܘܢ ܒܬܰܖ̈ܶܥܝܗ̇ ܕܽܐܘܪܺܫܠܶܡ.
22 ܘܠܳܐ ܬܰܦܩܽܘܢ ܫܩܽܘܠܬܳܐ ܡܶܢ ܒܳܬܰܝ̈ܟܽܘܢ ܒܝܰܘܡܳܐ ܕܫܰܒܬܳܐ: ܘܟܽܠ ܥܒܳܕ ܠܳܐ ܬܶܥܒܕܽܘܢ: ܘܰܬܩܰܕܫܽܘܢ ܝܰܘܡܳܐ ܕܫܰܒܬܳܐ: ܐܰܝܟ ܕܦܰܩܕܶܬ ܠܰܐܒܳܗܰܝ̈ܟܽܘܢ.
23 ܘܠܳܐ ܫܡܰܥܘ: ܘܠܳܐ ܐܰܪܟܶܢܘ ܐܶܕܢܗܽܘܢ ܠܡܶܫܡܰܥ: ܘܩܰܫܺܝܘ ܩܕܳܠܗܽܘܢ ܕܠܳܐ ܢܶܫܡܥܽܘܢ: ܘܠܳܐ ܢܩܰܒܠܽܘܢ ܡܰܪܕܽܘܬܳܐ.
24 ܘܶܐܢ ܡܶܫܡܰܥ ܬܶܫܡܥܽܘܢܳܢܝ ܐܳܡܰܪ ܡܳܪܝܳܐ: ܕܠܳܐ ܬܰܥܠܽܘܢ ܫܩܽܘܠܬܳܐ ܒܬܰܖ̈ܥܶܝܗ̇ ܕܰܩܪܺܝܬܳܐ ܗܳܕܶܐ ܒܝܰܘܡܳܐ ܕܫܰܒܬܳܐ: ܘܰܬܩܰܕܫܽܘܢ ܝܰܘܡܳܐ ܕܫܰܒܬܳܐ: ܘܠܳܐ ܬܶܥܒܕܽܘܢ ܒܶܗ ܟܽܠ ܥܒܳܕ.
25 ܢܶܥܠܽܘܢ ܒܬܰܖ̈ܥܶܝܗ̇ ܕܰܩܪܺܝܬܳܐ ܗܳܕܶܐ: ܡܰܠ̈ܟܶܐ ܘܪܰܘܖ̈ܒܳܢܶܐ ܕܝܳܬܒܺܝܢ ܥܰܠ ܟܽܘܪܣܝܶܗ ܕܕܰܘܺܝܕ: ܟܰܕ ܪܟܺܝܒܺܝܢ ܒܡܰܖ̈ܟܒܳܬܳܐ ܘܰܒܖ̈ܟܫܳܐ: ܗܶܢܽܘܢ ܘܪܰܘܖ̈ܒܳܢܰܝܗܽܘܢ: ܘܓܰܒܖ̈ܶܐ ܕܺܝܗܽܘܕܳܐ: ܘܥܳܡܽܘܖ̈ܶܝܗ̇ ܕܽܐܘܪܺܫܠܶܡ: ܘܬܶܬܶܒ ܩܪܺܝܬܳܐ ܗܳܕܶܐ ܠܥܳܠܰܡ.
26 ܘܢܺܐܬܽܘܢ ܡܶܢ ܩܽܘܖ̈ܝܳܐ ܕܺܝܗܽܘܕܳܐ ܡܶܢ ܚܕܳܖ̈ܰܝ ܐܽܘܪܺܫܠܶܡ: ܘܡܶܢ ܐܰܪܥܳܐ ܕܒܶܢܝܳܡܶܝܢ ܘܡܶܢ ܦܩܰܥܬܳܐ: ܘܡܶܢ ܛܽܘܖ̈ܶܐ ܘܡܶܢ ܬܰܝܡܢܳܐ: ܕܡܰܝܬܶܝܢ ܕܶܒ̈ܚܶܐ ܘܩܽܘܖ̈ܒܳܢܶܐ ܘܰܠܒܽܘܢܬܳܐ: ܘܡܰܝܬܶܝܢ ܬܰܘܕܺܝܬܳܐ ܠܒܰܝܬܶܗ ܕܡܳܪܝܳܐ.
27 ܘܶܐܢ ܠܳܐ ܬܶܫܡܥܽܘܢܳܢܝ ܠܰܡܩܰܕܳܫܽܘ ܝܰܘܡܳܐ ܕܫܰܒܬܳܐ: ܕܠܳܐ ܬܶܫܩܠܽܘܢ ܫܩܽܘܠܬܳܐ ܘܬܶܥܠܽܘܢ ܒܬܰܖ̈ܥܶܝܗ̇ ܕܽܐܘܪܺܫܠܶܡ ܒܝܰܘܡܳܐ ܕܫܰܒܬܳܐ: ܐܶܫܒܽܘܩ ܢܽܘܪܳܐ ܒܬܰܖ̈ܥܶܝܗ̇: ܘܬܶܐܟܽܘܠ ܣܳܚܖ̈ܳܬܳܗ̇ ܕܽܐܘܪܺܫܠܶܡ ܘܠܳܐ ܬܶܕܥܰܟ.