Jeremiah 6
The Book of Jeremiah
܀ ܐܪܡܝܐ ܘ ܀
1 ܓܳܙܘ ܒܢܰܝ̈ ܒܶܢܝܳܡܶܝܢ ܡܶܢ ܓܰܘ ܐܽܘܪܺܫܠܶܡ: ܘܰܒܩܳܠܳܐ ܩܪܰܘ ܫܺܝܦܽܘܪܳܐ: ܘܥܰܠ ܒܶܝܬ ܟܪܰܡ ܫ̣ܩܰܠܘ ܐܳܬܳܐ: ܡܶܛܽܠ ܕܒܺܝܫܬܳܐ ܡܰܝܬܶܐ ܐ̱ܢܳܐ ܡܶܢ ܓܰܪܒܝܳܐ ܘܰܬܒܳܪܳܐ ܪܰܒܳܐ.
2 ܠܰܡܥܰܕܰܢܬܳܐ ܘܠܰܡܦܰܢܰܩܬܳܐ ܕܡܺܝܬܝ ܒܰܪܬ ܨܶܗܝܽܘܢ.
3 ܥܠܶܝܗ̇ ܢܺܐܬܽܘܢ ܖ̈ܳܥܰܘܳܬܳܐ ܘܰܓܙܳܖ̈ܰܝܗܽܘܢ ܐܰܟܚܕܳܐ: ܘܢܶܩܫܽܘܢ ܥܠܶܝܗ̇ ܡܰܫܟܢܰܝ̈ܗܽܘܢ ܟܰܕ ܚܳܕܪܳܐ: ܘܢܶܪܥܽܘܢ ܓܒܰܪ ܠܓܰܒܶܗ.
4 ܛܰܝܶܒܘ ܥܠܶܝܗ̇ ܩܪܳܒܳܐ: ܘܶܐܡܰܪܘ ܩܽܘܡܘ ܢܶܣܰܩ ܒܛܰܗܪܳܐ: ܘܳܝ ܠܰܢ ܕܰܦܢܳܐ ܝܰܘܡܳܐ ܘܰܪܟܶܢܘ ܛܶܠܳܠܰܝ̈ ܪܰܡܫܳܐ.
5 ܩܽܘܡܘ ܢܶܣܰܩ ܥܠܶܝܗ̇ ܒܠܺܠܝܳܐ ܘܰܢܚܰܒܶܠ ܣܳܚܖ̈ܳܬܳܗ̇.
6 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ: ܦܣܽܘܩܘ ܩܰܝ̈ܣܶܝܗ̇: ܘܰܐܟܡܶܢܘ ܥܰܠ ܐܽܘܪܺܫܠܶܡ ܟܡܺܐܢ̈ܶܐ: ܗܳܝ ܩܪܺܝܬܳܐ ܕܶܐܬܦܰܩܕܰܬ. ܘܟܽܠܶܗ ܥܽܘܫܩܳܗ̇ ܒܓܰܘܳܗ̇.
7 ܐܰܝܟ ܕܟܳܢܶܫ ܓܽܘܒܳܐ ܡܰܘ̈ܗܝ: ܗܳܟܰܢܳܐ ܟܰܢܫܰܬ ܒܺܝܫܬܳܗ̇: ܚܛܽܘܦܝܳܐ ܘܒܶܙܬܳܐ ܡܶܫܬܡܰܥ ܒܳܗ̇ ܩܕܳܡ ܐܰܦܰܝ̈ ܐܰܡܺܝܢܳܐܺܝܬ.
8 ܒܟܺܐܒ̈ܶܐ ܘܒܡܰܚ̈ܘܳܬܳܐ ܐܶܬܪܕܳܝ ܐܽܘܪܺܫܠܶܡ: ܕܰܠܡܳܐ ܬܶܢܰܕ ܢܰܦܫܝ ܡܶܢܟܝ: ܕܰܠܡܳܐ ܐܶܥܒܕܶܟܝ ܠܚܽܘܪܒܳܐ ܐܰܝܟ ܐܰܪܥܳܐ ܕܠܳܐ ܐܶܬܝܰܬܒܰܬ.
9 ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ: ܡܶܬܒܰܥܳܪܽܘ ܢܶܬܒܰܥܪܽܘܢ: ܐܰܝܟ ܓܶܦܬܳܐ ܫܰܪܟܶܗ ܕܺܝܣܪܳܐܶܝܠ: ܐܰܗܦܶܟ ܐܺܝܕܳܟ ܐܰܝܟ ܩܳܛܽܘܦܳܐ ܥܰܠ ܒܽܘܟܪܳܐ.
10 ܠܡܰܢ ܐܺܡܰܪ ܘܶܐܣܰܗܶܕ ܕܢܶܫܡܥܽܘܢ: ܗܳܐ ܐܶܕܢܰܝ̈ܗܽܘܢ ܥܽܘܖ̈ܠܳܢ: ܘܠܳܐ ܡܶܫܟܚܺܝܢ ܠܰܡܨܳܬ: ܗܳܐ ܦܶܬܓܳܡܶܗ ܕܡܳܪܝܳܐ ܗܘܳܐ ܠܗܽܘܢ ܠܚܶܣܕܳܐ ܘܠܳܐ ܨܳܒܶܝܢ ܒܶܗ.
11 ܘܰܐܢ̱ܬܝ ܚܶܡܬܶܗ ܕܡܳܪܝܳܐ ܐܶܬܡܠܺܝܬܝ: ܘܰܠܐܺܝܬܝ: ܐܰܟܺܝܠܝ ܘܰܐܫܽܘܕܝ ܥܰܠ ܛܠܳܝ̈ܶܐ ܒܫܽܘ̈ܩܶܐ: ܘܥܰܠ ܟܢܽܘ̈ܫܳܬܳܐ ܕܓܰܕܽܘ̈ܕܶܐ ܐܰܟܚܕܳܐ: ܡܶܛܽܠ ܕܳܐܦ ܓܰܒܖ̈ܶܐ ܥܰܡ ܢܶܫ̈ܶܐ ܢܶܬܬܰܚܕܽܘܢ: ܘܣܳܒܳܐ ܥܰܡ ܛܠܶܐ ܝܰܘ̈ܡܳܬܳܐ.
12 ܢܶܬܝܰܗܒܽܘܢ ܒܳܬܰܝ̈ܗܽܘܢ ܠܐ̱ܚܖ̈ܳܢܶܐ: ܘܚܰܩ̈ܠܳܬܳܐ ܘܢܶܫ̈ܶܐ ܐܰܟܚܕܳܐ: ܡܶܛܽܠ ܕܰܡܪܺܝܡ ܐ̱ܢܳܐ ܐܺܝܕܝ ܥܰܠ ܥܳܡܽܘܖ̈ܶܝܗ̇ ܕܰܐܪܥܳܐ ܐܳܡܰܪ ܡܳܪܝܳܐ.
13 ܡܶܛܽܠ ܕܡܶܢ ܙܥܽܘܪܗܽܘܢ ܘܰܥܕܰܡܳܐ ܠܪܰܒܗܽܘܢ: ܟܽܠܗܽܘܢ ܢܳܟܠܺܝܢ ܢܶܟܠܳܐ: ܘܡܶܢ ܢܒܺܝ̈ܶܐ ܕܰܓ̈ܳܠܶܐ ܘܰܥܕܰܡܳܐ ܠܟܳܗܢܳܐ: ܟܽܠܗܽܘܢ ܥܳܒܕܺܝܢ ܫܽܘܩܪܳܐ.
14 ܘܡܰܐܣܶܝܢ ܬܒܳܪܳܗ̇ ܕܒܰܪܬ ܥܰܡܝ ܒܒܶܙܚܳܐ: ܘܳܐܡܪܺܝܢ: ܫܠܳܡܳܐ: ܫܠܳܡܳܐ: ܘܠܰܝܬ ܫܠܳܡܳܐ.
15 ܒـ̣ܗܶܬܘ ܡܶܛܽܠ ܕܛܰܢܦܽܘܬܳܐ ܥ̣ܒܰܕܘ: ܘܒܰܗܺܝ̈ܬܳܐ ܠܳܐ ܒܳܗܬܺܝܢ: ܘܰܠܡܶܬܬܟܳܣܽܘ ܠܳܐ ܝܳܕܥܺܝܢ: ܡܶܛܽܠ ܗܳܢܳܐ ܢܶܦܠܽܘܢ ܥܰܡ ܢܳܦ̈ܠܶܐ: ܘܰܒܙܰܒܢܳܐ ܕܡܶܬܦܰܩܕܺܝܢ ܢܶܣܬܰܚܦܽܘܢ ܐܳܡܰܪ ܡܳܪܝܳܐ.
16 ܗܳܟܰܢܳܐ ܐܳܡܰܪ ܡܳܪܝܳܐ: ܩܽܘܡܘ ܥܰܠ ܐܽܘܖ̈ܚܳܬܳܐ: ܘܰܚܙܰܘ: ܘܫܰܐܶܠܘ ܥܰܠ ܫܒܺܝ̈ܠܰܝ ܥܳܠܡܳܐ: ܘܰܚܙܰܘ ܐܰܝܕܳܐ ܐܽܘܪܚܳܐ ܫܰܦܺܝܪܳܐ ܙܶܠܘ ܒܳܗ̇: ܘܶܐܫܟܰܚܘ ܢܝܳܚܳܐ ܠܢܰܦ̈ܫܳܬܟܽܘܢ: ܘܶܐܡܰܪܬܽܘܢ ܠܳܐ ܐܳܙܺܠܝܢܰܢ.
17 ܘܰܐܩܺܝܡܶ݀ܬ ܥܠܰܝܟܽܘܢ ܕܰܘ̈ܩܶܐ ܕܬܶܫܡܥܽܘܢ ܠܩܳܠ ܫܺܝܦܽܘܪܳܐ: ܘܳܐܡܪܺܝܢ ܐܢ̱ܬܽܘܢ ܠܳܐ ܫܳܡܥܺܝܢܰܢ.
18 ܡܶܛܽܠ ܗܳܢܳܐ ܫܡܰܥܘ ܥܰܡ̈ܡܶܐ. ܘܕܰܥܝ ܥܺܕܬܳܐ ܕܰܒܗܽܘܢ.
19 ܫܡܰܥܝ ܐܰܪܥܳܐ: ܗܳܐ ܡܰܝܬܶܐ ܐ̱ܢܳܐ ܒܺܝܫܬܳܐ ܥܰܠ ܥܰܡܳܐ ܗܳܢܳܐ ܐܰܝܟ ܦܺܐܖ̈ܰܝ ܡܰܚܫ̈ܒܳܬܗܽܘܢ: ܕܰܠܦܶܬܓܳܡܰܝ̈ ܠܳܐ ܫ̣ܡܰܥܘ: ܘܰܠܢܳܡܽܘܣܝ ܐܰܣܠܺܝܘ.
20 ܠܡܳܢܳܐ ܗܳܘܝܳܐ ܠܺܝ ܠܒܽܘܢܬܳܐ ܕܡܰܝܬܶܝܢ ܐܢ̱ܬܽܘܢ ܡܶܢ ܫܰܒܳܐ: ܘܩܰܢܝܳܐ ܕܒܶܣܡܳܐ ܡܶܢ ܐܰܪܥܳܐ ܪܰܚܺܝܩܬܳܐ: ܒܰܥ̈ܠܰܘܳܬܟܽܘܢ ܠܳܐ ܨܒܺܝܬ: ܘܕܶܒܚܰܝ̈ܟܽܘܢ ܠܳܐ ܒ̣ܣܶܡܘ ܠܺܝ.
21 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܝܳܐ: ܗܳܐ ܝܳܗܶܒ ܐ̱ܢܳܐ ܠܥܰܡܳܐ ܗܳܢܳܐ ܬܽܘܩ̈ܠܳܬܳܐ: ܘܢܶܬܬܰܩܠܽܘܢ ܒܗܶܝܢ ܐܰܒܳܗ̈ܶܐ ܘܰܒܢܰܝ̈ܳܐ ܐܰܟܚܕܳܐ: ܘܰܫܒܳܒܳܐ ܘܪܳܚܡܶܗ ܢܺܐܒܕܽܘܢ.
22 ܗܳܟܰܢܳܐ ܐܳܡܰܪ ܡܳܪܝܳܐ: ܗܳܐ ܥܰܡܳܐ ܐܳܬܶܐ ܡܶܢ ܐܰܪܥܳܐ ܕܓܰܪܒܝܳܐ: ܘܥܰܡܳܐ ܪܰܒܳܐ ܢܕܽܘܠ ܡܶܢ ܣܰܘ̈ܦܶܝܗ̇ ܕܰܐܪܥܳܐ.
23 ܒܩܶܫ̈ܬܳܬܳܐ ܘܰܒܢܰܝܙܟ̈ܶܐ ܡܙܰܝܢܺܝܢ: ܒܺܝܫܺܝܢ ܐܶܢܽܘܢ ܘܠܳܐ ܡܪܰܚܡܳܢܺܝܢ: ܘܩܳܠܗܽܘܢ ܐܰܝܟ ܝܰܡܳܐ ܕܡܶܬܟܬܶܫ: ܘܥܰܠ ܖ̈ܰܟܫܳܐ ܪܟܺܝܒܺܝܢ: ܘܰܡܛܰܝܒܺܝܢ ܐܰܝܟ ܓܰܢ̱ܒܳܖ̈ܶܐ ܠܰܩܪܳܒܳܐ: ܥܠܰܝܟܝ ܒܰܪܬ ܨܶܗܝܽܘܢ.
24 ܫـ̣ܡܰܥܢ ܫܶܡܥܗܽܘܢ ܘܶܐܬܖ̈ܰܦܺܝ ܐܺܝܕܰܝ̈ܢ: ܘܥܳܩܬܳܐ ܐܶܚܰܕܬܰܢ: ܘܚܶܒ̈ܠܶܐ ܐܰܝܟ ܕܝܳܠܶܕܬܳܐ.
25 ܠܳܐ ܬܶܦܩܽܘܢ ܠܚܰܩܠܳܐ: ܘܒܽܐܘܪܚܳܐ ܠܳܐ ܬܺܐܙܽܠܘܢ: ܡܶܛܽܠ ܚܰܪܒܳܐ ܕܰܒܥܶܠܕܒܳܒ̈ܶܐ ܕܰܟܪܺܝܟܳܐ ܡܶܢ ܚܕܳܖ̈ܰܝܟܝ ܒܰܪܬ ܥܰܡܝ.
26 ܐܬܶܟܰܒܢܝ ܣܰܩ̈ܶܐ ܘܶܐܬܬܦܺܝܠܝ ܒܩܶܛܡܳܐ: ܐܶܒܠܳܐ ܐܰܝܟ ܕܥܰܠ ܝܺܚܺܝܕܳܐ ܥܒܶܕܝ ܠܶܟܝ: ܘܡܰܪܩܽܘܕܬܳܐ ܡܰܪܺܝܪܬܳܐ: ܡܶܛܽܠ ܕܡܶܢ ܫܶܠܝܳܐ ܢܺܐܬܽܘܢ ܥܠܰܝܟܝ ܒܳܙܽܘ̈ܙܶܐ.
27 ܒܳܚܽܘܪܳܐ ܝܰܗܒܬܳܟ ܒܥܰܡܝ ܥܰܫܺܝܢܳܐ: ܕܬܶܕܰܥ ܘܰܬܒܰܚܶܢ ܐܽܘܖ̈ܚܳܬܗܽܘܢ.
28 ܟܽܠܗܽܘܢ ܫܰܠܺܝܛܳܢܰܝ̈ܗܽܘܢ ܡܳܪܽܘܕܺܝܢ: ܘܰܡܗܰܠܟܺܝܢ ܒܢܶܟܠܳܐ: ܘܰܐܝܟ ܢܚܳܫܳܐ ܘܦܰܪܙܠܳܐ ܟܽܠܗܽܘܢ ܡܚܰܒܠܳܢܺܝܢ.
29 ܓܰܪܕܺܝ ܡܰܦܽܘܚܳܐ ܡܶܢ ܢܽܘܪܗܽܘܢ: ܘܰܐܒܳܪܳܐ: ܘܰܣܪܺܝܩܳܐܺܝܬ ܨܳܪܶܦ ܨܳܪܽܘܦܳܐ: ܘܒܺܝܫܬܗܽܘܢ ܠܳܐ ܓܳܡܪܳܐ.
30 ܟܶܣܦܳܐ ܡܰܣܠܝܳܐ ܩ̣ܪܰܘ ܐܶܢܽܘܢ: ܡܶܛܽܠ ܕܰܐܣܠܺܝ ܐܶܢܽܘܢ ܡܳܪܝܳܐ.