Jeremiah 20
The Book of Jeremiah
܀ ܐܪܡܝܐ ܟܟ ܀
1 ܘܰܫܡܰܥ ܦܶܫܚܽܘܪ ܒܰܪ ܐܰܡܳܪܝܳܐ ܟܳܗܢܳܐ: ܘܗܽܘ ܦܳܩܽܘܕܳܐ ܗ̱ܘܳܐ ܘܫܰܠܺܝܛܳܐ ܒܒܰܝܬܶܗ ܕܡܳܪܝܳܐ: ܠܶܐܪܰܡܝܳܐ ܢܒܺܝܳܐ ܟܰܕ ܡܶܬܢܰܒܶܐ ܦܶܬܓܳܡ̈ܶܐ ܗܳܠܶܝܢ.
2 ܘܰܡܚܳܝܗܝ ܦܶܫܚܽܘܪ ܠܶܐܪܰܡܝܳܐ ܢܒܺܝܳܐ: ܘܰܐܪܡܝܶܗ ܒܚܳܕܰܪܬܳܐ ܕܰܒܬܰܪܥܳܐ ܕܒܶܝܬ ܒܶܢܝܳܡܶܝܢ ܥܶܠܳܝܳܐ: ܕܰܒܒܰܝܬܶܗ ܕܡܳܪܝܳܐ.
3 ܘܰܗܘܳܐ ܠܒܳܬܰܪ ܝܰܘܡܳܐ: ܘܰܐܦܩܶܗ ܦܶܫܚܽܘܪ ܠܶܐܪܰܡܝܳܐ ܡܶܢ ܚܳܕܰܪܬܳܐ: ܘܶܐܡܰܪ ܠܶܗ ܐܶܪܰܡܝܳܐ: ܠܳܐ ܗ̱ܘܳܐ ܦܶܫܚܽܘܪ ܩ̣ܪܳܐ ܡܳܪܝܳܐ ܫܡܳܟ: ܐܶܠܳܐ ܬܰܘܬܳܒܳܐ ܘܚܳܕܽܘܪܳܐ.
4 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܝܳܐ: ܗܳܐ ܥܳܒܶܕ ܐ̱ܢܳܐ ܠܳܟ: ܬܰܘܬܳܒܳܐ ܠܳܟ ܘܰܠܟܽܠܗܽܘܢ ܖ̈ܳܚܡܰܝܟ: ܘܢܶܦܠܽܘܢ ܒܚܰܪܒܳܐ ܕܰܒܥܶܠܕܒܳܒܰܝ̈ܗܽܘܢ: ܘܥܰܝܢܰܝ̈ܟ ܢܶܚܙ̈ܝܳܢ: ܘܰܠܟܽܠܶܗ ܝܺܗܽܘܕܳܐ ܐܰܫܠܶܡ ܒܺܐܝܕܶܗ ܕܡܰܠܟܳܐ ܕܒܳܒܶܠ: ܘܢܶܫܒܶܐ ܐܶܢܽܘܢ ܠܒܳܒܶܠ: ܘܰܢܩܰܛܶܠ ܐܶܢܽܘܢ ܒܚܰܪܒܳܐ.
5 ܘܰܐܫܠܶܡ ܟܽܠܗܽܘܢ ܚܶܣܢܰܝ̈ ܩܪܺܝܬܳܐ ܗܳܕܶܐ: ܘܟܽܠܳܗ̇ ܠܶܐܘܬܳܗ̇: ܘܟܽܠܶܗ ܐܺܝܩܳܪܳܗ̇: ܘܟܽܠܗܽܘܢ ܓܰܙ̈ܶܐ ܕܡܰܠ̈ܟܶܐ ܕܺܝܗܽܘܕܳܐ: ܐܰܫܠܶܡ ܒܺܐܝܕܳܐ ܕܰܒܥܶܠܕܒܳܒܰܝ̈ܗܽܘܢ: ܘܢܶܫܒܽܘܢ ܐܶܢܽܘܢ: ܘܢܶܒܙܽܘܢ ܐܶܢܽܘܢ: ܘܢܰܘܒܠܽܘܢ ܐܶܢܽܘܢ ܠܒܳܒܶܠ.
6 ܘܰܐܢ̱ܬ ܦܶܫܚܽܘܪ ܘܟܽܠܗܽܘܢ ܐ̱ܢܳܫܰܝ̈ ܒܰܝܬܳܟ ܬܺܐܙܽܠܘܢ ܒܫܶܒܝܳܐ: ܘܰܠܒܳܒܶܠ ܬܺܐܙܰܠ: ܘܬܰܡܳܢ ܬܡܽܘܬ: ܘܬܰܡܳܢ ܬܶܬܩܒܰܪ: ܐܰܢ̱ܬ ܘܟܽܠܗܽܘܢ ܖ̈ܳܚܡܰܝܟ ܕܶܐܬܢܰܒܺܝܬ ܠܗܽܘܢ ܒܫܽܘܩܪܳܐ.
7 ܫܰܕܶܠܬܳܢܝ ܡܳܪܝܳܐ ܘܶܐܫܬܰܕܠܶܬ: ܚܣܰܢܬܳܢܝ ܘܰܙܟܰܝܬܳܢܝ: ܗܘܺܝܬ ܓܽܘܚܟܳܐ ܟܽܠܝܽܘܡ: ܘܟܽܠܗܽܘܢ ܡܡܰܝܩܺܝܢ ܒܺܝ.
8 ܘܒܰܙܒܰܢ ܕܰܡܡܰܠܶܠ ܗܘܺܝ݀ܬ ܘܡܰܙܥܶܩ: ܥܰܠ ܚܳܛܽܘܦ̈ܶܐ ܘܥܰܠ ܒܳܙܽܘ̈ܙܶܐ ܩܳܪܶܐ ܗܘܺܝ݀ܬ: ܡܶܛܽܠ ܕܰܗܘܳܐ ܠܺܝ ܦܶܬܓܳܡܶܗ ܕܡܳܪܝܳܐ ܠܚܶܣܕܳܐ ܘܰܠܡܽܘܝܳܩܳܐ ܟܽܠܝܽܘܡ.
9 ܘܶܐܡܪܶܬ ܕܠܳܐ ܐܶܕܟܪܺܝܘܗܝ: ܘܠܳܐ ܐܶܡܰܠܶܠ ܬܽܘܒ ܒܰܫܡܶܗ: ܘܰܗܘܳܐ ܒܠܶܒܝ ܐܰܝܟ ܢܽܘܪܳܐ ܕܝܳܩܕܳܐ ܘܚܳܒܳܐ ܒܓܰܖ̈ܡܰܝ: ܘܰܒܥܺܝ݀ܬ ܠܰܡܣܰܝܒܳܪܽܘ ܘܠܳܐ ܐܶܫܟܚܶ݀ܬ.
10 ܡܶܛܽܠ ܕܫܶܡܥܶ݀ܬ ܪܶܢܝܳܐ ܕܣܰܓܺܝ̈ܐܶܐ ܕܡܶܬܟܰܢܫܺܝܢ ܡܶܢ ܚܕܳܖ̈ܰܝ: ܘܳܐܡܪܺܝܢ ܟܽܠܗܽܘܢ ܕܫܳܐܠܺܝܢ ܒܰܫܠܳܡܝ ܒܦܽܘܡܗܽܘܢ: ܘܣܳܢܶܝܢ ܠܺܝ ܒܠܶܒܗܽܘܢ: ܚܰܘܰܐܗܝ ܠܰܢ ܘܰܢܩܽܘܡ ܥܠܰܘܗܝ: ܟܒܰܪ ܢܶܫܬܰܕܰܠ ܠܰܢ: ܘܢܶܬܒܰܥ ܥܝܳܪܬܰܢ ܡܶܢܗ.
11 ܘܡܳܪܝܳܐ ܥܰܡܝ ܐܰܝܟ ܓܰܢ̱ܒܳܪܳܐ ܥܰܫܺܝܢܳܐ: ܡܶܛܽܠ ܗܳܢܳܐ ܟܽܠܗܽܘܢ ܖ̈ܳܕܽܘܦܰܝ ܢܶܒܗܬܽܘܢ ܘܠܳܐ ܢܶܫܬܰܟܚܽܘܢ: ܒܗܶܬܘ ܛܳܒ ܡܶܛܽܠ ܕܠܳܐ ܐܶܣܬܰܟܰܠܘ: ܒܶܗܬܬܳܐ ܕܥܳܠܰܡ ܕܠܳܐ ܡܶܬܛܰܥܝܳܐ.
12 ܘܡܳܪܝܳܐ ܚܰܝܠܬܳܢܳܐ ܒܳܚܰܪ ܙܶܕܩܳܐ: ܚܳܙܶܐ ܟܽܘܠ̈ܝܳܬܳܐ ܘܠܶܒܳܐ: ܐܶܚܙܶܐ ܦܽܘܪܥܳܢܳܟ ܡܶܢܗܽܘܢ: ܡܶܛܽܠ ܕܠܳܟ ܓܠܺܝ݀ܬ ܕܺܝ̈ܢܰܝ.
13 ܫܰܒܰܚܘ ܠܡܳܪܝܳܐ ܫܰܒܰܚܘ ܠܡܳܪܝܳܐ: ܕܦܰܨܺܝ ܢܰܦܫܶܗ ܕܡܶܣܟܺܢܳܐ ܡܶܢ ܐܺܝܕܳܐ ܕܡܰܒܐܫܳܢ̈ܶܐ.
14 ܠܺܝܛ ܗ̱ܘ ܝܰܘܡܳܐ ܕܶܐܬܝܰܠܕܶܬ ܒܶܗ: ܝܰܘܡܳܐ ܕܺܝܠܶܕܬܰܢܝ ܐܶܡܝ ܠܳܐ ܢܶܗܘܶܐ ܒܪܺܝܟ.
15 ܠܺܝܛ ܗ̱ܘ ܓܰܒܪܳܐ ܕܣܰܒܰܪ ܠܳܐܒܝ: ܘܶܐܡܰܪ ܠܶܗ ܕܶܐܬܺܝܠܶܕ ܠܳܟ ܒܪܳܐ ܕܶܟܪܳܐ: ܘܰܣܒܰܪ ܕܰܡܚܰܕܳܝܽܘ ܚܰܕܝܶܗ.
16 ܢܶܗܘܶܐ ܓܰܒܪܳܐ ܗܰܘ ܐܰܝܟ ܩܽܘܖ̈ܝܳܐ ܕܰܗܦܰܟ ܡܳܪܝܳܐ: ܘܠܳܐ ܐܶܬܪܰܥܺܝ ܠܗܶܝܢ: ܢܶܫܡܰܥ ܝܺܠܶܠܬܳܐ ܒܨܰܦܪܳܐ: ܘܝܽܘܒܳܒܳܐ ܒܛܰܗܪܳܐ.
17 ܕܠܳܐ ܐܰܡܺܝܬܰܢܝ ܒܡܰܪܒܥܳܐ: ܘܰܗܘܳܬ ܠܺܝ ܕܶܝܢ ܐܶܡܝ ܩܰܒܪܳܐ: ܘܰܒܡܰܪܒܥܳܐ ܒܰܛܢܽܘܬܝ ܠܥܳܠܰܡ.
18 ܠܡܳܢܳܐ ܢܶܦܩܶ݀ܬ ܡܶܢ ܡܰܪܒܥܳܐ: ܠܡܶܚܙܳܐ ܥܰܡܠܳܐ ܘܕܽܘܘܳܢܳܐ: ܘܰܓܡܰܪܘ ܒܒܶܗܬܬܳܐ ܝܰܘ̈ܡܰܝ.