Jeremiah 2
The Book of Jeremiah
܀ ܐܪܡܝܐ ܒ ܀
1 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ: ܠܡܺܐܡܰܪ.
2 ܙܶܠ ܘܰܐܟܪܶܙ ܒܶܐܕܢܰܝ̈ ܐܽܘܪܺܫܠܶܡ: ܘܶܐܡܰܪ: ܗܳܟܰܢܳܐ ܐܳܡܰܪ ܡܳܪܝܳܐ: ܐܶܬܕܟܪܶܬ ܠܶܟܝ ܛܰܝܒܽܘܬܳܐ ܕܛܰܠܝܽܘܬܶܟܝ: ܪܶܚܡܬܳܐ ܕܰܡܣܰܝܒܪܳܢܽܘܬܶܟܝ: ܕܗܰܠܶܟܬ ܒܳܬܰܪܝ ܒܡܰܕܒܪܳܐ: ܒܰܐܪܥܳܐ ܕܠܳܐ ܡܶܙܕܰܪܥܳܐ.
3 ܩܰܕܶܫ ܝܺܣܪܳܐܶܝܠ ܠܡܳܪܝܳܐ ܪܺܝܫ ܥܰܠ̈ܠܳܬܶܗ: ܟܽܠ ܐܳܟܽܘܠܰܝ̈ܗܽܘܢ ܢܶܬܚܰܝܒܽܘܢ. ܒܺܝܫܬܳܐ ܬܺܐܬܶܐ ܥܠܰܝܗܽܘܢ: ܐܳܡܰܪ ܡܳܪܝܳܐ.
4 ܫܡܰܥܘ ܦܶܬܓܳܡܶܗ ܕܡܳܪܝܳܐ ܒܰܝܬܶܗ ܕܝܰܥܩܽܘܒ: ܘܟܽܠܗܶܝܢ ܫܰܖ̈ܒܳܬܳܐ ܕܒܶܝܬ ܝܺܣܪܳܐܶܝܠ.
5 ܗܳܟܰܢܳܐ ܐܳܡܰܪ ܡܳܪܝܳܐ: ܡܳܢܰܘ ܥܰܘܠܳܐ ܕܶܐܫܟܰܚܘ ܒܺܝ ܐܰܒܳܗܰܝ̈ܟܽܘܢ ܕܰܐܪܚܶܩܘ ܡܶܢܝ: ܘܶܐܙܰܠܘ ܒܳܬܰܪ ܠܳܐ ܡܶܕܶܡ: ܘܡܶܕܶܡ ܠܳܐ ܝܺܬܰܪܘ.
6 ܘܠܳܐ ܐܶܡܰܪܘ ܐܰܝܟܰܘ ܡܳܪܝܳܐ ܕܰܐܣܩܰܢ ܡܶܢ ܐܰܪܥܳܐ ܕܡܶܨܪܶܝܢ: ܕܕܰܒܪܰܢ ܒܡܰܕܒܪܳܐ ܒܰܐܪܥܳܐ ܚܪܰܒܬܳܐ ܘܰܫܗܺܝܬܳܐ: ܒܰܐܪܥܳܐ ܨܳܕܺܝܬܳܐ ܕܛܶܠܳܠܰܝ̈ ܡܰܘܬܳܐ: ܒܰܐܪܥܳܐ ܕܠܳܐ ܥܒܰܪ ܒܳܗ̇ ܓܒܰܪ: ܘܠܳܐ ܝܺܬܶܒ ܒܰܪܢܳܫ ܬܰܡܳܢ.
7 ܘܰܐܝܬܺܝܬܟܽܘܢ ܠܰܐܪܥܳܐ ܕܟܰܪܡܠܳܐ: ܠܡܶܐܟܰܠ ܦܺܐܖ̈ܶܝܗ̇ ܘܛܳܒ̈ܳܬܳܗ̇. ܘܶܐܬܰܝܬܽܘܢ ܘܛܰܡܰܐܬܽܘܢ ܐܰܪܥܝ. ܘܝܳܪܬܽܘܬܝ ܣܳܡܬܽܘܢ ܠܛܰܢܦܽܘܬܳܐ.
8 ܟܳܗ̈ܢܶܐ ܠܳܐ ܐܶܡܰܪܘ ܐܰܝܟܰܘ ܡܳܪܝܳܐ. ܘܰܐܚܺܝܕܰܝ̈ ܢܳܡܽܘܣܳܐ ܠܳܐ ܝܰܕܥܽܘܢܝ. ܘܖ̈ܳܥܰܘܳܬܳܐ ܕܰܓܶܠܘ ܒܺܝ. ܘܰܢܒܺܝ̈ܶܐ ܐܶܬܢܰܒܺܝܘ ܒܒܰܥܠܳܐ. ܘܒܳܬܰܪ ܡܶܕܶܡ ܕܠܰܝܬ ܒܶܗ ܝܽܘܬܪܳܢ ܐܶܙܰܠܘ.
9 ܡܶܛܽܠ ܗܳܢܳܐ ܐܶܬܬܕܺܝܢ ܥܰܡܟܽܘܢ ܐܳܡܰܪ ܡܳܪܝܳܐ: ܘܥܰܡ ܒܢܰܝ̈ ܒܢܰܝ̈ܟܽܘܢ ܐܶܬܬܕܺܝܢ.
10 ܥܒܰܪܘ ܠܓܳܙܖ̈ܳܬܳܐ ܕܟܶܬܳܝ̈ܶܐ ܘܰܚܙܰܘ: ܘܰܠܩܶܕܰܪ ܫܰܕܰܪܘ: ܘܛܳܒ ܐܶܣܬܰܟܰܠܘ: ܘܰܚܙܰܘ ܐܶܢ ܗܘܳܬ ܐܰܝܟ ܗܳܕܶܐ.
11 ܡܚܰܠܦܺܝܢ ܥܰܡ̈ܡܶܐ ܐܰܠܳܗܰܝ̈ܗܽܘܢ ܐܰܝܠܶܝܢ ܕܠܳܐ ܗܘܰܘ ܐܰܠܳܗ̈ܶܐ ܘܥܰܡܝ ܚܰܠܶܦ ܐܺܝܩܳܪܶܗ ܒܰܕܠܳܐ ܝܽܘܬܪܳܢ.
12 ܬܡܰܗܘ ܫܡܰܝܳܐ ܥܰܠ ܗܳܕܶܐ: ܘܙܽܘܥܘ ܘܰܕܚܰܠܘ ܛܳܒ ܐܳܡܰܪ ܡܳܪܝܳܐ.
13 ܡܶܛܽܠ ܕܬܰܪܬܶܝܢ ܒܺܝ̈ܫܳܢ ܥܒܰܕܘ ܥܰܡܝ: ܠܺܝ ܫܒܰܩܘ ܡܰܒܽܘܥܳܐ ܕܡܰܝ̈ܳܐ ܚܰܝ̈ܶܐ: ܘܶܐܙܰܠܘ ܚܦܰܪܘ ܠܗܽܘܢ ܓܽܘ̈ܒܶܐ: ܓܽܘ̈ܒܶܐ ܖ̈ܥܺܝܥܶܐ ܕܠܳܐ ܡܶܫܟܚܺܝܢ ܠܡܶܩܒܳܐ ܒܗܽܘܢ ܡܰܝ̈ܳܐ.
14 ܆ ܕܰܠܡܳܐ ܥܰܒܕܰܐ ܗ̱ܘ ܝܺܣܪܳܐܶܝܠ: ܐܶܢ ܝܺܠܺܝܕ ܒܰܝܬܰܐ ܗ̱ܘ: ܡܶܛܽܠ ܡܳܢܳܐ ܗܘܳܐ ܠܒܶܙܬܳܐ.
15 ܥܠܰܘܗܝ ܢܢܰܗܡܽܘܢ ܐܰܖ̈ܝܰܘܳܬܳܐ: ܘܰܢܪܺܝܡܽܘܢ ܩܳܠܗܽܘܢ: ܘܢܶܥܒܕܽܘܢ ܐܰܪܥܶܗ ܠܚܽܘܪܒܳܐ: ܘܩܽܘܖ̈ܝܶܗ ܢܶܨ̈ܕܝܳܢ ܡܶܢ ܒܠܰܝ ܕܝܳܬܶܒ.
16 ܐܳܦ ܒܢܰܝ̈ ܡܰܦܰܣ ܘܬܰܚܦܺܝܣ: ܢܶܪܥܽܘܢܶܟܝ ܪܺܝܫܳܐ ܪܺܝܫܳܐ.
17 ܗܳܐ ܗܳܟܰܢܳܐ ܢܶܬܥܒܶܕ ܠܶܟܝ: ܥܰܠ ܕܰܫܒܰܩܬܝ ܠܡܳܪܝܳܐ ܐܰܠܳܗܶܟܝ ܒܙܰܒܢܳܐ ܕܰܡܕܰܒܰܪ ܗ̱ܘܳܐ ܠܶܟܝ ܒܽܐܘܪܚܳܐ.
18 ܘܗܳܫܳܐ ܡܳܐ ܠܶܟܝ ܠܡܺܐܙܰܠ ܠܽܐܘܪܚܳܐ ܕܡܶܨܪܶܝܢ ܠܡܶܫܬܳܐ ܡܰܝ̈ܳܐ ܕܫܺܝܚܽܘܪ: ܘܡܳܐ ܠܶܟܝ ܠܡܺܐܙܰܠ ܠܽܐܘܪܚܳܐ ܕܳܐܬܽܘܪ: ܠܡܶܫܬܳܐ ܡܰܝ̈ܳܐ ܕܢܰܗܪܳܐ.
19 ܬܶܪܕܶܝܟܝ ܒܺܝܫܬܶܟܝ: ܘܰܬܝܳܒܽܘܬܶܟܝ ܬܰܟܣܶܟܝ. ܘܕܰܥܝ ܘܰܚܙܳܝ ܕܒܺܝܫ ܘܡܰܪܺܝܪ: ܥܰܠ ܕܰܫܒܰܩܬܝ ܠܡܳܪܝܳܐ ܐܰܠܳܗܶܟܝ ܘܠܳܐ ܕܚܶܠܬܝ ܡܶܢܝ: ܐܳܡܰܪ ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ.
20 ܡܶܛܽܠ ܕܡܶܢ ܥܳܠܰܡ ܬܶܒܪܶܬ ܢܺܝܪܶܟܝ. ܘܦܰܣܩܶ݀ܬ ܚܢܳܩܰܝ̈ܟܝ. ܘܶܐܡܰܪܬܝ ܕܬܽܘܒ ܠܰܐܠܳܗ ܐ̱ܚܪܺܝܢ ܠܳܐ ܐܶܦܠܽܘܚ. ܘܗܳܐ ܥܰܠ ܟܽܠ ܪܳܡܬܳܐ ܕܪܳܡܳܐ: ܘܰܬܚܶܝܬ ܟܽܠ ܐܺܝܠܳܢ ܕܥܰܒܺܝܛ: ܐܰܢ̱ܬܝ ܛܳܥܝܳܐ ܘܰܡܙܰܢܝܳܐ.
21 ܘܶܐ̱ܢܳܐ ܢܨܰܒܬܶܟܝ ܫܰܒܽܘܩܳܐ ܕܟܽܠܶܗ ܙܰܪܥܳܐ ܕܩܽܘܫܬܳܐ. ܘܰܐܝܟܰܢܳܐ ܐܶܬܗܦܶܟܬܝ ܥܠܰܝ: ܘܰܡܪܰܕܬܝ ܐܰܝܟ ܓܦܶܬܳܐ ܢܽܘܟܪܳܝܬܳܐ.
22 ܘܶܐܢ ܬܶܬܚܰܘܪܺܝܢ ܒܢܶܬܪܳܐ: ܘܬܰܣܓܶܝܢ ܠܶܟܝ ܟܶܒܪܺܝܬܳܐ: ܟܬܰܡܘ ܠܗܽܘܢ ܒܶܟܝ ܚܛܳܗܰܝ̈ܟܝ ܩܕܳܡܝ ܐܳܡܰܪ ܡܳܪܝܳܐ ܐܰܠܳܗܳܐ.
23 ܐܰܝܟܰܢܳܐ ܬܺܐܡܪܺܝܢ ܕܠܳܐ ܐܶܬܛܰܡܐܶܬ: ܘܒܳܬܰܪ ܒܰܥܠܳܐ ܠܳܐ ܐܶܙܶܠ̱ܬ. ܚܙܳܝ ܐܽܘܖ̈ܚܳܬܶܟܝ ܒܢܰܚ̈ܠܶܐ: ܘܕܰܥܝ ܡܳܢܳܐ ܥܒܰܕܬܝ: ܐܰܪܺܝܡܬܝ ܒܩܳܠܶܟܝ ܡܥܰܩܡܰܬ ܐܽܘܖ̈ܚܳܬܳܐ.
24 ܐܰܝܟ ܥܪܳܕܳܐ ܕܡܶܬܝܰܠܰܦ ܒܡܰܕܒܪܳܐ ܒܨܶܒܝܳܢܰܝ̈ ܢܰܦܫܶܗ: ܣܳܩܬܝ ܪܽܘܚܳܐ ܐܰܝܟ ܝܳܪܽܘܪܳܐ. ܡܶܢ ܢܰܗܦܟܺܝܗ̇. ܟܽܠ ܡܶܢ ܕܒܳܥܶܐ ܠܳܗ̇ ܠܳܐ ܢܶܬܛܰܪܰܦ: ܒܽܐܘܖ̈ܚܳܬܳܗ̇ ܢܶܫܟܚܺܝܗ̇.
25 ܟܠܳܝ ܖ̈ܶܓܠܰܝܟܝ ܡܶܢ ܚܶܦܝܳܝܽܘܬܳܐ: ܘܓܰܓܰܪܬܶܟܝ ܡܶܢ ܨܶܗܝܳܐ. ܘܶܐܡܰܪܬܝ ܐܶܬܚܰܝܠܶܬ ܠܳܐ ܨܳܒܝܳܐ ܐ̱ܢܳܐ. ܡܶܛܽܠ ܕܪܶܚܡܶܬ ܢܽܘܟܖ̈ܳܝܶܐ: ܘܒܳܬܰܪܗܽܘܢ ܐܺܙܰܠ.
26 ܐܰܝܟ ܒܶܗܬܰܬ ܓܰܢܳܒܳܐ ܟܰܪ ܕܡܶܫܬܟܰܚ: ܗܳܟܰܢܳܐ ܒܗܶܬܘ ܒܢܰܝ̈ ܝܺܣܪܳܐܶܝܠ: ܗܶܢܽܘܢ ܘܡܰܠܟܰܝ̈ܗܽܘܢ: ܘܪܰܘܖ̈ܒܳܢܰܝܗܽܘܢ: ܘܟܳܗܢܰܝ̈ܗܽܘܢ ܘܰܢܒܺܝܰܝ̈ܗܽܘܢ.
27 ܕܳܐܡܪܺܝܢ ܠܩܰܝܣܳܐ ܐܰܒܽܘܢ ܐܰܢ̱ܬ: ܘܰܠܟܺܐܦܳܐ ܕܰܐܢ̱ܬܝ ܝܺܠܶܕܬܺܝܢ. ܡܶܛܽܠ ܕܰܐܦܢܺܝܘ ܠܺܝ ܩܕܳܠܗܽܘܢ: ܘܠܳܐ ܐܰܦܰܝ̈ܗܽܘܢ. ܘܰܒܙܰܒܢܳܐ ܕܒܺܝܫܽܘܬܗܽܘܢ ܐܳܡܪܺܝܢ: ܩܽܘܡ ܥܰܕܰܪܰܝܢ ܘܰܦܪܽܘܩܰܝܢ.
28 ܘܰܐܝܟܳܐ ܐܶܢܽܘܢ ܐܰܠܳܗܰܝ̈ܟ ܕܰܥܒܰܕܬ ܠܳܟ: ܢܩܽܘܡܽܘܢ ܘܢܶܦܪܩܽܘܢܳܟ ܒܰܙܒܰܢ ܒܺܝܫܬܳܟ. ܡܶܛܽܠ ܕܰܐܝܟ ܡܶܢܝܳܢܳܐ ܕܩܽܘܖ̈ܝܳܝܟ ܗܘܰܘ ܐܰܠܳܗܰܝ̈ܟ ܝܺܗܽܘܕܳܐ.
29 ܠܡܳܢܳܐ ܕܳܝܢܺܝܢ ܐܢ̱ܬܽܘܢ ܥܰܡܝ ܟܽܠܟܽܘܢ ܕܰܓܶܠܬܽܘܢ ܒܺܝ: ܐܳܡܰܪ ܡܳܪܝܳܐ.
30 ܣܪܺܝܩܳܐܺܝܬ ܡܚܺܝܬ ܠܰܒܢܰܝ̈ܟܽܘܢ. ܘܡܰܪܕܽܘܬܳܐ ܠܳܐ ܩܰܒܶܠܘ. ܐܶܟܠܰܬ ܚܰܪܒܳܐ ܠܰܢܒܺܝܰܝ̈ܟܽܘܢ: ܐܰܝܟ ܐܰܪܝܳܐ ܡܚܰܒܠܳܢܳܐ.
31 ܐܰܢ̱ܬܽܘܢ ܕܳܪܳܐ ܫܡܰܥܘ ܦܶܬܓܳܡܶܗ ܕܡܳܪܝܳܐ: ܕܰܠܡܳܐ ܡܰܕܒܪܳܐ ܗܘܺܝ݀ܬ ܠܺܝܣܪܳܐܶܝܠ: ܐܰܘ ܐܰܝܟ ܐܰܪܝܳܐ ܚܰܪܒܬܳܐ: ܡܶܛܽܠ ܡܳܢܳܐ ܐܶܡܰܪ ܥܰܡܝ: ܢܚܶܬܢ ܠܳܐ ܢܺܐܬܶܐ ܬܽܘܒ ܠܘܳܬܳܟ.
32 ܕܰܠܡܳܐ ܛܳܥܝܳܐ ܒܬܽܘܠܬܳܐ ܥܽܘܕܳܢܳܗ̇: ܘܟܰܠܬܳܐ ܬܰܨܒܺܝܬܳܗ̇: ܥܰܡܝ ܕܶܝܢ ܛܥܰܐܢܝ ܝܰܘ̈ܡܳܬܳܐ ܕܠܰܝܬ ܠܗܽܘܢ ܡܶܢܝܳܢ.
33 ܡܳܢܳܐ ܬܽܘܒ ܡܰܬܩܢܰܬܝ ܐܽܘܖ̈ܚܳܬܶܟܝ ܠܡܶܒܥܳܐ ܪܶܚܡܬܳܐ: ܕܗܳܐ ܐܳܦ ܒܺܝܫܬܳܐ ܝܺܠܶܦܬܝ ܒܽܐܘܖ̈ܚܳܬܶܟܝ.
34 ܘܳܐܦ ܒܺܐܝܕܰܝ̈ܟܝ ܐܶܫܬܟܰܚ ܕܡܳܐ ܕܢܰܦ̈ܫܳܬܳܐ ܡܶܣ̈ܟܺܢܶܐ ܙܰܟܳܝ̈ܶܐ: ܠܳܐ ܗ̱ܘܳܐ ܒܦܽܘܠܫܬܳܐ ܐܶܫܟܰܚܬܝ ܐܶܢܽܘܢ: ܐܶܠܳܐ ܬܚܶܝܬ ܟܽܠ ܐܺܝܠܳܢ.
35 ܘܶܐܡܰܪܬܝ ܕܰܡܚܰܣܝܳܐ ܐ̱ܢܳܐ: ܡܶܛܽܠ ܗܳܢܳܐ ܐܰܗܦܶܟ ܪܽܘܓܙܶܗ ܡܶܢܝ: ܗܳܐ ܕܳܐܶܢ ܐ̱ܢܳܐ ܠܶܟܝ ܥܰܠ ܕܶܐܡܰܪܬܝ ܕܠܳܐ ܚܛܺܝ݀ܬ.
36 ܡܳܢܳܐ ܡܶܙܕܰܠܠܰܬܝ ܛܳܒ ܠܡܶܬܢܳܐ ܐܽܘܖ̈ܚܳܬܶܟܝ: ܐܳܦ ܡܶܢ ܡܶܨܪܶܝܢ ܬܶܒܗܬܺܝܢ ܐܰܝܟ ܕܰܒܗܶܬܬܝ ܡܶܢ ܐܳܬܽܘܪ.
37 ܐܳܦ ܡܶܢ ܠܘܳܬ ܗܳܢܳܐ ܬܶܦܩܺܝܢ ܟܰܕ ܐܺܝܕܰܝ̈ܟܝ ܥܰܠ ܪܺܝܫܶܟܝ: ܕܰܪܓܶܙ ܡܳܪܝܳܐ ܥܰܠ ܡܰܬܟܠܳܢܰܝ̈ܟܝ: ܘܠܳܐ ܬܰܨܠܚܺܝܢ ܒܗܽܘܢ.