Jeremiah 5
The Book of Jeremiah
܀ ܐܪܡܝܐ ܗ ܀
1 ܐܶܬܟܰܪܟܘ ܒܫܽܘ̈ܩܶܝܗ̇ ܕܽܐܘܪܺܫܠܶܡ ܘܰܚܙܰܘ: ܘܕܰܥܘ: ܘܰܒܥܰܘ ܒܰܦ̈ܠܳܛܘܳܬܳܗ̇: ܐܶܢ ܬܶܫܟܚܽܘܢ ܓܰܒܪܳܐ: ܐܶܢ ܐܺܝܬ ܕܥܳܒܶܕ ܕܺܝܢܳܐ: ܘܒܳܥܶܐ ܗܰܝܡܳܢܽܘܬܳܐ: ܐܶܫܒܽܘܩ ܠܳܗ̇.
2 ܘܶܐܢ ܚܰܝ ܡܳܪܝܳܐ ܢܺܐܡܪܽܘܢ: ܫܰܪܺܝܪܳܐܺܝܬ ܒܕܰܓܳܠܽܘܬܳܐ ܝܳܡܶܝܢ.
3 ܡܳܪܝܳܐ ܥܰܝܢܰܝ̈ܟ ܥܰܠ ܗܰܝܡܳܢܽܘܬܳܐ: ܡܚܰܝܬ ܐܶܢܽܘܢ ܘܠܳܐ ܐܶܬܟܪܰܗܘ: ܓ̣ܰܡܰܪܬ ܐܶܢܽܘܢ ܘܠܳܐ ܨܒ̣ܰܘ ܠܰܡܩܰܒܳܠܽܘ ܡܰܪܕܽܘܬܳܐ: ܩܰܫ̣ܺܝܘ ܐܰܦܰܝ̈ܗܽܘܢ ܡܶܢ ܟܺܐܦܳܐ: ܘܠܳܐ ܨܒܰܘ ܠܰܡܬܳܒ.
4 ܘܶܐ̱ܢܳܐ ܐܶܡܪܶܬ ܡܶܛܽܠ ܕܡܶܣܟܺܢܺܝܢ ܐܶܢܽܘܢ ܣܛܰܘ: ܡܶܛܽܠ ܕܠܳܐ ܝܺܕܰܥܘ ܐܽܘܪܚܶܗ ܕܡܳܪܝܳܐ ܘܕܺܝܢܳܐ ܕܰܐܠܳܗܽܘܢ.
5 ܐܺܙܰܠ ܠܺܝ ܠܘܳܬ ܪܰܘܖ̈ܒܳܢܶܐ ܘܶܐܡܰܠܶܠ ܥܰܡܗܽܘܢ: ܡܶܛܽܠ ܕܗܶܢܽܘܢ ܝܺܕܰܥܘ ܐܽܘܪܚܶܗ ܕܡܳܪܝܳܐ: ܘܕܺܝܢܳܐ ܕܰܐܠܳܗܗܽܘܢ: ܫܰܪܺܝܪܳܐܺܝܬ ܟܽܠܗܽܘܢ ܐܰܟܚܕܳܐ: ܬܒܰܪܘ ܢܺܝܪܳܐ ܘܦ̣ܰܣܶܩܘ ܚܢܳܩ̈ܶܐ.
6 ܡܶܛܽܠ ܗܳܢܳܐ ܢܶܬܒܰܪ ܐܶܢܽܘܢ ܐܰܪܝܳܐ ܡܶܢ ܥܳܒܳܐ: ܘܕܺܐܒܰܝ̈ ܪܰܡܫܳܐ ܢܒܰܙܥܽܘܢ ܐܶܢܽܘܢ: ܢܶܡܪܳܐ ܢܶܟܡܶܢ ܥܰܠ ܩܽܘܖ̈ܺܝܗܽܘܢ: ܟܽܠ ܕܢܶܦܽܘܩ ܡܶܢܗܽܘܢ ܢܶܬܬܒܰܪ: ܡܶܛܽܠ ܕܰܣܓܺܝܘ ܚܰܘ̈ܒܰܝܗܽܘܢ ܘܰܥ̣ܫܶܢܘ ܕܠܳܐ ܢܬܽܘܒܽܘܢ.
7 ܥܰܠ ܐܰܝܕܳܐ ܐܶܫܒܽܘܩ ܠܶܟܝ: ܒܢܰܝ̈ܟܝ ܫܰܒܩܽܘܢܝ ܘܺܝܡ̣ܘ ܒܰܐܝܠܶܝܢ ܕܠܳܐ ܗܘܰܘ ܐܰܠܳܗ̈ܶܐ ܘܣܰܒܥܶ݀ܬ ܐܶܢܽܘܢ ܘܓܳܪܘ: ܘܒܶܝܬ ܙܳܢ̈ܝܳܬܳܐ ܐܶܬܟܰܬܰܫܘ.
8 ܐܰܝܟ ܖ̈ܰܟܫܳܐ ܐܽܘܫ̈ܢܶܐ ܥܳܗܖ̈ܶܐ ܗܘܰܘ: ܓܒܰܪ ܥܰܠ ܐܰܢ̱ܬܰܬ ܚܰܒܪܶܗ ܨܳܗܠܺܝܢ ܗܘܰܘ.
9 ܥܰܠ ܗܳܠܶܝܢ ܠܳܐ ܐܶܦܩܽܘܕ ܐܳܡܰܪ ܡܳܪܝܳܐ: ܘܰܒܥܰܡܳܐ ܕܗܳܟܰܢܳܐ ܠܳܐ ܬܶܬܢܰܩܰܡ ܢܰܦܫܝ.
10 ܣܰܩܘ ܒܫܽܘܖ̈ܶܝܗ̇ ܘܰܥܩܽܘܪܘ: ܘܰܓܡܽܘܪܝܳܐ ܠܳܐ ܬܶܥܒܕܽܘܢ: ܫܒܽܘܩܘ ܫܶܬܶܐܣܶܝ̈ܗ̇ ܡܶܛܽܠ ܕܰܕܡܳܪܝܳܐ ܐܶܢܶܝܢ.
11 ܡܶܛܽܠ ܕܰܡܕܰܓܳܠܽܘ ܕܰܓܶܠܘ ܒܺܝ ܒܢܰܝ̈ ܝܺܣܪܳܐܶܝܠ ܘܰܒܢܰܝ̈ ܝܺܗܽܘܕܳܐ. ܐܳܡܰܪ ܡܳܪܝܳܐ.
12 ܕܰܓܶܠܘ ܒܡܳܪܝܳܐ ܘܳܐܡܪܺܝܢ ܠܳܐ ܗܘܳܐ ܗܽܘ: ܠܳܐ ܬܺܐܬܶܐ ܥܠܰܝܢ ܒܺܝܫܬܳܐ: ܘܚܰܪܒܳܐ ܘܟܰܦܢܳܐ ܠܳܐ ܢܶܚܙܶܐ.
13 ܘܰܢܒܺܝ̈ܶܐ ܢܶܗܘܽܘܢ ܠܥܰܠܥܳܠܳܐ: ܘܰܐܝܠܶܝܢ ܕܡܶܠܬܳܐ ܠܰܝܬ ܠܗܽܘܢ: ܗܳܟܰܢܳܐ ܢܶܬܥܒܶܕ ܠܗܽܘܢ.
14 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ: ܚܠܳܦ ܕܡܰܠܶܠܬܽܘܢ ܡܶܠܬܳܐ ܗܳܕܶܐ: ܗܳܐ ܝܳܗܶܒ ܐ̱ܢܳܐ ܦܶܬܓܳܡܰܝ̈ ܒܦܽܘܡܳܟ ܢܽܘܪܳܐ: ܘܥܰܡܳܐ ܗܳܢܳܐ ܩܰܝ̈ܣܶܐ. ܘܬܶܐܟܽܘܠ ܐܶܢܽܘܢ.
15 ܗܳܐ ܡܰܝܬܶܐ ܐ̱ܢܳܐ ܥܠܰܝܟܽܘܢ ܒܶܝܬ ܝܺܣܪܳܐܶܝܠ: ܥܰܡܳܐ ܡܶܢ ܪܽܘܚܩܳܐ ܐܳܡܰܪ ܡܳܪܝܳܐ: ܥܰܡܰܐ ܗ̱ܘ ܥܰܫܺܝܢܳܐ: ܥܰܡܰܐ ܗ̱ܘ ܡܶܢ ܥܳܠܡܳܐ: ܥܰܡܳܐ ܕܠܳܐ ܬܶܕܰܥ ܠܶܫܳܢܶܗ: ܘܠܳܐ ܬܶܫܡܰܥ ܡܶܕܶܡ ܕܰܡܡܰܠܶܠ.
16 ܓܰܓܖ̈ܳܬܶܗ ܐܰܝܟ ܩܰܒܖ̈ܶܐ ܦܬܺܝ̈ܚܳܢ: ܘܟܽܠܗܽܘܢ ܓܰܢ̱ܒܳܪܺܝܢ.
17 ܢܶܐܟܽܘܠ ܚܨܳܕܳܟ ܘܠܰܚܡܳܟ: ܢܶܐܟܽܘܠ ܒܢܰܝ̈ܟ ܘܰܒ̈ܢܳܬܳܟ: ܢܶܐܟܽܘܠ ܥܳܢ̈ܳܟ ܘܬܰܘܖ̈ܰܝܟ: ܢܶܐܟܽܘܠ ܓܽܘܦ̈ܢܰܝܟ ܘܬܺܐܢܰܝ̈ܟ: ܢܡܰܣܟܶܢ ܩܽܘܖ̈ܝܳܐ ܕܬܽܘܩܦܳܟ ܕܰܐܢ̱ܬ ܬܟܺܝܠ ܥܠܰܝܗܶܝܢ ܒܚܰܪܒܳܐ.
18 ܘܳܐܦ ܒܝܰܘ̈ܡܳܬܳܐ ܗܳܢܽܘܢ ܐܳܡܰܪ ܡܳܪܝܳܐ ܠܳܐ ܐܰܣܺܝܦܟܽܘܢ.
19 ܘܢܶܗܘܶܐ ܟܰܕ ܬܺܐܡܪܽܘܢ ܡܶܛܽܠ ܡܳܢܳܐ ܥܒܰܕ ܠܰܢ ܡܳܪܝܳܐ ܐܰܠܳܗܰܢ ܗܳܠܶܝܢ ܟܽܠܗܶܝܢ: ܬܺܐܡܰܪ ܠܗܽܘܢ: ܗܳܟܰܢܳܐ ܐܳܡܰܪ ܡܳܪܝܳܐ: ܥܰܠ ܕܰܫܒܰܩܬܽܘܢܳܢܝ ܘܰܦܠܰܚܬܽܘܢ ܠܰܐܠܳܗ̈ܶܐ ܢܽܘܟܖ̈ܳܝܶܐ ܒܰܐܪܥܟܽܘܢ: ܗܳܟܰܢܳܐ ܬܶܦܠܚܽܘܢ ܠܢܽܘܟܖ̈ܳܝܶܐ ܒܰܐܪܥܳܐ ܕܠܳܐ ܕܺܝܠܟܽܘܢ.
20 ܚܰܘܰܘ ܗܳܕܶܐ ܒܒܶܝܬ ܝܰܥܩܽܘܒ: ܘܰܐܫܡܥܽܘܗ̇ ܒܺܝܗܽܘܕܳܐ: ܘܶܐܡܰܪܘ.
21 ܫܡܰܥܘ ܗܳܕܶܐ ܥܰܡܳܐ ܣܰܟܠܳܐ ܕܠܰܝܬ ܒܶܗ ܠܶܒܳܐ: ܕܥܰܝ̈ܢܶܐ ܐܺܝܬ ܠܗܽܘܢ ܘܠܳܐ ܚܳܙܶܝܢ: ܘܶܐܕܢ̈ܶܐ ܐܺܝܬ ܠܗܽܘܢ ܘܠܳܐ ܫܳܡܥܺܝܢ.
22 ܡܶܢܝ ܠܳܐ ܬܶܕܚܠܽܘܢ ܐܳܡܰܪ ܡܳܪܝܳܐ: ܘܡܶܢ ܩܕܳܡܝ ܠܳܐ ܬܙܽܘܥܽܘܢ: ܕܣܳܡܶ݀ܬ ܚܳܠܳܐ ܬܚܽܘܡܳܐ ܠܝܰܡܳܐ: ܢܳܡܽܘܣܳܐ ܠܥܳܠܰܡ ܘܠܳܐ ܥܳܒܰܪ ܠܶܗ: ܘܡܶܬܟܰܬܰܫ ܘܠܳܐ ܡܶܫܟܰܚ: ܘܡܶܬܬܪܺܝܡܺܝܢ ܓܰܠܰܘ̈ܗܝ ܘܠܳܐ ܥܳܒܪܺܝܢ ܠܶܗ.
23 ܘܰܠܥܰܡܳܐ ܗܳܢܳܐ: ܗܘܳܐ ܠܶܒܳܐ ܡܳܪܽܘܕܳܐ ܘܰܡܡܰܪܡܪܳܢܳܐ: ܣܛܰܘ ܘܶܐܙܰܠܘ.
24 ܘܠܳܐ ܐܶܡܰܪܘ ܒܠܶܒܗܽܘܢ ܢܶܕܚܰܠ ܠܡܳܪܝܳܐ ܐܰܠܳܗܰܢ: ܕܝܳܗܶܒ ܡܶܛܪܳܐ ܒܟܺܝܪܳܝܳܐ ܘܰܠܩܺܝܫܳܝܳܐ ܒܙܰܒܢܶܗ: ܘܥܰܠ̈ܠܳܬܳܐ ܕܩܰܝܛܳܐ ܠܣܰܬܘܳܐ ܢܛܰܪ ܠܰܢ.
25 ܚܰܘ̈ܒܰܝܟܽܘܢ ܨܠܰܘ ܥܠܰܝܟܽܘܢ ܗܳܠܶܝܢ: ܘܰܚܛܳܗܰܝ̈ܟܽܘܢ ܟܠܰܘ ܛܳܒܬܳܐ ܡܶܢܟܽܘܢ.
27 ܘܰܐܝܟ ܩܠܽܘܒܝܳܐ ܕܰܡܠܶܐ ܦܳܪܰܚܬܳܐ: ܗܳܟܰܢܳܐ ܒܳܬܰܝ̈ܗܽܘܢ ܡܠܶܝܢ ܢܶܟܠܳܐ.
28 ܡܶܛܽܠ ܗܳܢܳܐ ܝܺܪܶܒܘ ܘܰܥܬܰܪܘ ܘܰܥ̣ܒܰܪܘ ܥܰܠ ܕܺܝܢܳܐ: ܕܺܝܢܳܐ ܠܳܐ ܕܳܢ̣ܘ: ܘܕܺܝܢܳܐ ܕܝܰܬܡ̈ܶܐ ܠܳܐ ܬܰܪܶܨܘ: ܘܕܺܝܢܳܐ ܕܒܳܝ̈ܫܶܐ ܠܳܐ ܕܳܢ̣ܘ.
29 ܥܰܠ ܗܳܠܶܝܢ ܠܳܐ ܐܶܦܩܽܘܕ ܐܳܡܰܪ ܡܳܪܝܳܐ: ܘܰܒܥܰܡܳܐ ܕܗܳܟܰܢܳܐ ܠܳܐ ܬܶܬܢܰܩܡ ܢܰܦܫܝ.
30 ܬܶܡܗܳܐ ܘܫܳܛܝܽܘܬܳܐ ܗܘܳܐ ܒܰܐܪܥܳܐ.
31 ܢܒܺܝ̈ܶܐ ܐܶܬܢܰܒܺܝܘ ܫܽܘܩܪܳܐ: ܘܟܳܗ̈ܢܶܐ ܐܶܚܰܕܘ ܐܺܝܕܰܝ̈ܗܽܘܢ: ܘܥܰܡܝ ܪܚܶܡܘ ܗܳܟܰܢܳܐ: ܘܡܳܢܳܐ ܬܶܥܒܕܽܘܢ ܠܚܰܪܬܳܐ.