Jeremiah 40
The Book of Jeremiah
܀ ܐܪܡܝܐ ܡ ܀
1 ܦܶܬܓܳܡܳܐ ܕܰܗܘܳܐ ܥܰܠ ܐܶܪܰܡܝܳܐ ܡܶܢ ܩܕܳܡ ܡܳܪܝܳܐ: ܡܶܢ ܒܳܬܰܪ ܕܫܰܕܪܶܗ ܢܰܒܽܘܙܰܪܕܳܢ ܪܰܒ ܕܰܚ̈ܫܶܐ ܡܶܢ ܪܳܡܬܳܐ: ܟܰܕ ܕܰܒܪܶܗ ܟܰܕ ܐܰܣܺܝܪ ܒܫܺܫ̈ܠܳܬܳܐ: ܒܓܰܘ ܟܽܠܳܗ̇ ܫܒܺܝܬܳܐ ܕܽܐܘܪܺܫܠܶܡ ܘܕܺܝܗܽܘܕܳܐ ܕܶܐܫܬܒܺܝܘ ܠܒܳܒܶܠ.
2 ܘܕܰܒܪܶܗ ܪܰܒ ܕܰܚ̈ܫܶܐ ܠܶܐܪܰܡܝܳܐ: ܘܶܐܡܪ ܠܶܗ: ܡܳܪܝܳܐ ܐܰܠܳܗܳܟ ܐܶܡܰܪ: ܒܺܝܫܬܳܐ ܗܳܕܶܐ ܥܰܠ ܐܰܬܪܳܐ ܗܳܢܳܐ.
3 ܘܰܐܝܬܺܝ ܘܰܥܒܰܕ ܡܳܪܝܳܐ ܐܰܝܟ ܕܶܐܡܰܪ: ܥܰܠ ܕܰܚܛܰܝܬܽܘܢ ܠܡܳܪܝܳܐ: ܘܠܳܐ ܫܡܰܥܬܽܘܢ ܒܩܳܠܶܗ: ܗܘܳܐ ܠܟܽܘܢ ܦܶܬܓܳܡܳܐ ܗܳܢܳܐ.
4 ܠܳܟ ܕܶܝܢ ܗܳܐ ܫܪܺܝܬܳܟ ܝܰܘܡܳܢܳܐ ܡܶܢ ܫܺܫ̈ܠܳܬܳܐ ܕܒܺܐܝ̈ܕܰܝܟ: ܐܶܢ ܨܳܒܶܐ ܐܰܢ̱ܬ ܠܡܶܐܬܳܐ ܥܰܡܝ ܠܒܳܒܶܠ. ܬܳܐ: ܘܬܶܗܘܶܐ ܥܰܝ̈ܢܰܝ ܥܠܰܝܟ: ܘܶܐܢ ܠܳܐ ܨܳܒܶܐ ܐܰܢ̱ܬ ܠܡܶܐܬܳܐ ܥܰܡܝ ܠܒܳܒܶܠ: ܦܽܘܫ: ܗܳܐ ܟܽܠܳܗ̇ ܐܰܪܥܳܐ ܩܕܳܡܰܝܟ: ܟܰܪ ܕܛܳܒ ܘܟܰܪ ܕܫܰܦܺܝܪ ܒܥܰܝ̈ܢܰܝܟ ܠܡܺܐܙܰܠ: ܠܬܰܡܳܢ ܙܶܠ.
5 ܘܶܐܡܰܪ ܠܶܗ: ܐܶܢ ܦܳܐܶܫ ܐܰܢ̱ܬ ܬܶܒ ܠܘܳܬ ܓܰܕܠܝܳܐ ܒܰܪ ܐܰܚܺܝܩܰܡ: ܒܰܪ ܫܳܦܳܢ: ܒܓܰܘ ܥܰܡܳܐ: ܗܰܘ ܕܰܐܫܠܛܶܗ ܡܰܠܟܳܐ ܕܒܳܒܶܠ ܒܩܽܘܖ̈ܝܳܐ ܕܺܝܗܽܘܕܳܐ: ܐܰܘ ܟܰܪ ܕܫܰܦܺܝܪ ܒܥܰܝ̈ܢܰܝܟ ܠܡܺܐܙܰܠ: ܙܶܠ: ܘܝܰܗܒ ܠܶܗ ܢܰܒܽܘܙܰܪܕܳܢ ܡܰܘܗ̈ܒܳܬܳܐ ܒܽܐܘܪܚܳܐ: ܘܰܫܪܳܝܗܝ.
6 ܘܶܐܬܳܐ ܐܶܪܰܡܝܳܐ ܠܘܳܬ ܓܰܕܠܝܳܐ ܒܰܪ ܐܰܚܺܝܩܰܡ: ܒܰܪ ܫܳܦܳܢ: ܠܡܰܨܦܝܳܐ: ܘܺܝܬܶܒ ܠܘܳܬܶܗ ܒܓܰܘ ܥܰܡܳܐ ܕܶܐܫܬܚܰܪܘ ܒܰܐܪܥܳܐ.
7 ܘܰܫܡܰܥܘ ܟܽܠܗܽܘܢ ܖ̈ܰܒܰܝ ܚܰܝ̈ܠܶܐ ܕܰܒܩܽܘܖ̈ܝܳܐ: ܗܳܢܽܘܢ ܘܓܰܒܖ̈ܶܐ ܕܥܰܡܗܽܘܢ: ܕܰܐܫܠܶܛ ܡܰܠܟܳܐ ܕܒܳܒܶܠ ܠܓܰܕܠܝܳܐ ܒܰܪ ܐܰܚܺܝܩܰܡ ܒܰܐܪܥܳܐ: ܘܕܰܐܫܠܶܡ ܠܶܗ ܓܰܒܖ̈ܶܐ ܘܢܶܫ̈ܶܐ ܘܰܛܠܳܝ̈ܶܐ: ܘܡܶܢ ܡܶܣܟܺܢ̈ܶܐ ܕܰܐܪܥܳܐ ܐܰܝܠܶܝܢ ܕܠܳܐ ܐܶܫܬܒܺܝܘ ܠܒܳܒܶܠ.
8 ܘܶܐܬܰܘ ܠܘܳܬ ܓܰܕܠܝܳܐ ܠܡܰܨܦܝܳܐ: ܐܺܫܡܳܥܺܝܠ ܒܰܪ ܢܰܬܢܝܳܐ: ܘܝܽܘܚܰܢܳܢ: ܘܝܽܘܢܳܬܳܢ: ܒܢܰܝ̈ ܩܽܘܪܰܚ: ܘܫܰܪܝܳܐ ܒܰܪ ܬܢܰܚܡܶܬ: ܘܰܒܢܰܝ̈ ܥܺܝܦܺܝ ܕܡܶܢ ܢܛܽܘܦܰܬ: ܘܺܝܙܰܢܝܳܐ ܒܰܪ ܡܰܥܟܳܬ: ܗܶܢܽܘܢ ܘܓܰܒܖ̈ܰܝܗܽܘܢ.
9 ܘܺܝܡܳܐ ܠܗܽܘܢ ܓܰܕܠܝܳܐ ܒܰܪ ܐܰܚܺܝܩܰܡ: ܒܰܪ ܫܳܦܳܢ: ܘܰܠܓܰܒܖ̈ܶܐ ܕܥܰܡܗܽܘܢ: ܘܶܐܡܰܪ: ܠܳܐ ܬܶܕܚܠܽܘܢ ܠܡܶܦܠܰܚ ܠܟܰܠܕܳܝ̈ܶܐ: ܬܶܒܘ ܒܰܐܪܥܳܐ: ܘܰܦܠܽܘܚܘ ܠܡܰܠܟܳܐ ܕܒܳܒܶܠ ܘܢܶܛܐܰܒ ܠܟܽܘܢ.
10 ܘܶܐܢܳܐ ܗܳܐ ܝܳܬܶܒ ܐ̱ܢܳܐ ܒܡܰܨܦܝܳܐ: ܠܰܡܩܳܡ ܩܕܳܡ ܟܰܠܕܳܝ̈ܶܐ ܕܳܐܬܶܝܢ ܥܠܰܝܢ: ܘܰܐܢ̱ܬܽܘܢ ܚܡܽܘܠܘ ܥܒܽܘܪܳܐ: ܘܚܰܡܪܳܐ ܘܡܶܫܚܳܐ: ܘܶܐܒܳܐ ܕܩܰܝܛܳܐ: ܘܰܐܪܡܰܘ ܒܡܳܐܢܰܝ̈ܟܽܘܢ: ܘܬܶܒ ܒܩܽܘܖ̈ܺܝܟܽܘܢ ܕܶܐܚܰܕܬܽܘܢ.
11 ܘܳܐܦ ܟܽܠܗܽܘܢ ܝܽܘ̈ܕܳܝܶܐ ܕܺܐܝܬ ܒܰܐܕܽܘܡ: ܘܰܒܡܽܘܐܳܒ: ܒܰܒܢܰܝ̈ ܥܰܡܽܘܢ: ܘܰܒܟܽܠܗܶܝܢ ܐܰܖ̈ܥܳܬܳܐ: ܫܡܰܥܘ ܕܰܫܒܰܩ ܡܰܠܟܳܐ ܕܒܳܒܶܠ ܫܰܪܟܳܢܳܐ ܠܝܽܘ̈ܕܳܝܶܐ: ܘܕܰܐܫܠܶܛ ܥܠܰܝܗܽܘܢ ܠܓܰܕܠܝܳܐ ܒܰܪ ܐܰܚܺܝܩܰܡ: ܒܰܪ ܫܳܦܳܢ.
12 ܘܰܗܦܰܟܘ ܟܽܠܗܽܘܢ ܝܽܘ̈ܕܳܝܶܐ: ܡܶܢ ܟܽܠܗܽܘܢ ܐܰܬܖ̈ܰܘܳܬܳܐ ܕܶܐܬܒܰܕܰܪܘ ܬܰܡܳܢ: ܘܶܐܬܰܘ ܠܰܐܪܥܳܐ ܕܺܝܗܽܘܕܳܐ ܠܘܳܬ ܓܰܕܠܝܳܐ ܠܡܰܨܦܝܳܐ: ܘܰܚܡܰܠܘ ܚܰܡܪܳܐ ܘܥܰܠ̈ܠܳܬܳܐ ܕܩܰܝܛܳܐ ܣܽܘܓܳܐܐ ܕܛܳܒ.
13 ܘܝܽܘܚܰܢܳܢ ܒܰܪ ܩܽܘܪܰܚ ܘܟܽܠܗܽܘܢ ܖ̈ܰܒܰܝ ܚܰܝ̈ܠܶܐ ܕܰܒܩܽܘܖ̈ܝܳܐ: ܐܶܬܰܘ ܠܘܳܬ ܓܰܕܠܝܳܐ ܠܡܰܨܦܝܳܐ.
14 ܘܶܐܡܰܪܘ ܠܶܗ: ܠܳܐ ܝܳܕܰܥ ܐܰܢ̱ܬ ܕܒܰܠܥܺܝܣܺܝ ܡܰܠܟܳܐ ܕܰܒܢܰܝ̈ ܥܰܡܽܘܢ: ܫܰܕܰܪ ܠܺܐܫܡܳܥܺܝܠ ܒܰܪ ܢܰܬܢܝܳܐ ܠܡܶܩܛܠܳܟ: ܘܠܳܐ ܗܰܝܡܶܢ ܐܶܢܽܘܢ ܓܰܕܠܝܳܐ ܒܰܪ ܐܰܚܺܝܩܰܡ.
15 ܘܝܽܘܚܰܢܳܢ ܒܰܪ ܩܽܘܪܰܚ ܐܶܡܰܪ ܠܓܰܕܠܝܳܐ ܡܛܰܫܝܳܐܺܝܬ ܒܡܰܨܦܝܳܐ: ܐܺܙܶܠ ܐܶܩܛܠܺܝܘܗܝ ܠܺܐܫܡܳܥܺܝܠ ܒܰܪ ܢܰܬܢܝܳܐ: ܘܐ̱ܢܳܫ ܠܳܐ ܢܶܕܰܥ: ܕܰܠܡܳܐ ܢܶܩܛܠܳܟ: ܘܢܶܬܒܰܕܪܽܘܢ ܟܽܠܗܽܘܢ ܕܒܶܝܬ ܝܺܗܽܘܕܳܐ ܕܡܶܬܟܰܢܫܺܝܢ ܠܘܳܬܳܟ: ܘܢܺܐܒܰܕ ܫܰܪܟܳܢܳܐ ܕܝܽܘܕܳܝ̈ܶܐ.
16 ܘܶܐܡܰܪ ܓܰܕܠܝܳܐ ܒܰܪ ܐܰܚܺܝܩܰܡ ܠܝܽܘܚܰܢܳܢ ܒܰܪ ܩܽܘܪܰܚ: ܠܳܐ ܬܶܥܒܶܕ ܦܶܬܓܳܡܳܐ ܗܳܢܳܐ: ܡܶܛܽܠ ܕܕܰܓܳܠܽܘܬܳܐ ܡ̣ܰܠܶܠܬ ܥܰܠ ܐܺܫܡܳܥܺܝܠ.