Jeremiah 36
The Book of Jeremiah
܀ ܐܪܡܝܐ ܠܘ ܀
1 ܘܰܗܘܳܐ ܒܫܰܢ̱ܬܳܐ ܪܒܺܝܥܳܝܬܳܐ ܕܝܽܘܝܰܩܺܝܡ ܒܰܪ ܝܽܘܫܺܝܳܐ ܡܰܠܟܳܐ ܕܺܝܗܽܘܕܳܐ: ܗܘܳܐ ܦܶܬܓܳܡܳܐ ܗܳܢܳܐ ܥܰܠ ܐܶܪܰܡܝܳܐ ܡܶܢ ܩܕܳܡ ܡܳܪܝܳܐ ܠܡܺܐܡܰܪ.
2 ܣܰܒ ܠܳܟ ܡܓܰܠܬܳܐ ܕܣܶܦܪܳܐ: ܘܰܟܬܽܘܒ ܥܠܶܝܗ̇ ܟܽܠܗܽܘܢ ܦܶܬܓܳܡ̈ܶܐ ܕܶܐܡܪܶܬ ܠܳܟ: ܥܰܠ ܝܺܣܪܳܐܶܝܠ: ܘܥܰܠ ܝܺܗܽܘܕܳܐ: ܘܥܰܠ ܟܽܠܗܽܘܢ ܥܰܡ̈ܡܶܐ: ܡܶܢ ܝܰܘܡܳܐ ܕܶܐܡܪܶܬ ܠܳܟ: ܡܶܢ ܝܰܘܡܰܘ̈ܗܝ ܕܝܽܘܫܺܝܳܐ ܘܰܥܕܰܡܳܐ ܠܝܰܘܡܳܢܳܐ.
3 ܛܳܟ ܢܶܫܡܥܽܘܢ ܕܒܶܝܬ ܝܺܗܽܘܕܳܐ: ܟܽܠܳܗ̇ ܒܺܝܫܬܳܐ ܕܡܶܬܚܰܫܰܒ ܐ̱ܢܳܐ ܠܡܶܥܒܰܕ ܠܗܽܘܢ: ܘܢܶܗܦܟܽܘܢ ܓܒܰܪ ܡܶܢ ܐܽܘܪܚܶܗ ܒܺܝܫܬܳܐ: ܘܶܐܫܒܽܘܩ ܠܚܰܘܒܰܝ̈ܗܽܘܢ ܘܠܰܚܛܳܗܰܝ̈ܗܽܘܢ.
4 ܘܰܩܪܳܐ ܐܶܪܰܡܝܳܐ ܠܒܰܪܽܘܟ ܒܰܪ ܢܺܪܝܳܐ: ܘܰܟܬܰܒ ܒܰܪܽܘܟ ܡܶܢ ܦܽܘܡܶܗ ܕܶܐܪܰܡܝܳܐ: ܟܽܠܗܽܘܢ ܦܶܬܓܳܡܰܘ̈ܗܝ ܕܡܳܪܝܳܐ ܕܶܐܡܰܪ ܠܶܗ ܥܰܠ ܡܓܰܠܬܳܐ ܕܣܶܦܪܳܐ.
5 ܘܰܦܩܰܕ ܐܶܪܰܡܝܳܐ ܠܒܰܪܽܘܟ ܒܰܪ ܢܺܪܝܳܐ ܘܶܐܡܰܪ ܠܶܗ: ܐܶܢܳܐ ܟܠܶܐ ܐ̱ܢܳܐ: ܘܠܳܐ ܡܶܫܟܰܚ ܐ̱ܢܳܐ ܕܶܐܥܽܘܠ ܠܒܶܝܬܗ ܕܡܳܪܝܳܐ.
6 ܥܽܘܠ ܐܰܢ̱ܬ ܘܰܩܪܺܝ ܒܰܡܓܰܠܬܳܐ ܕܰܟܬܰܒܬ ܡܶܢ ܦܽܘܡܝ: ܦܶܬܓܳܡܰܘ̈ܗܝ ܕܡܳܪܝܳܐ ܩܕܳܡ ܥܰܡܳܐ ܒܒܶܝܬܗ ܕܡܳܪܝܳܐ: ܒܝܰܘܡܳܐ ܕܨܰܘܡܳܐ: ܘܳܐܦ ܩܕܳܡ ܟܽܠܶܗ ܥܰܡܳܐ ܕܺܝܗܽܘܕܳܐ ܕܳܐܬܶܝܢ ܡܶܢ ܩܽܘܖ̈ܺܝܗܽܘܢ ܬܶܩܪܶܐ ܐܶܢܽܘܢ.
7 ܛܳܟ ܬܶܦܶܠ ܒܳܥܽܘܬܗܽܘܢ ܩܕܳܡ ܡܳܪܝܳܐ: ܘܢܶܗܦܟܽܘܢ ܓܒܰܪ ܡܶܢ ܐܽܘܪܚܶܗ ܒܺܝܫܬܳܐ: ܘܢܶܫܠܶܐ ܡܳܪܝܳܐ ܡܶܢ ܒܺܝܫܬܳܐ ܕܶܐܡܰܪ ܥܠܰܝܗܽܘܢ: ܡܶܛܽܠ ܕܪܰܒ ܗܽܘ ܪܽܘܓܙܳܐ ܘܚܶܡܬܳܐ ܕܡܰܠܶܠ ܡܳܪܝܳܐ ܥܰܠ ܥܰܡܳܐ ܗܳܢܳܐ.
8 ܘܰܥܒܰܕ ܒܰܪܽܘܟ ܒܰܪ ܢܺܪܝܳܐ ܟܽܠ ܕܦܰܩܕܶܗ ܐܶܪܰܡܝܳܐ ܢܒܺܝܳܐ: ܠܡܶܩܪܳܐ ܒܣܶܦܪܳܐ ܦܶܬܓܳܡܰܘ̈ܗܝ ܕܡܳܪܝܳܐ ܒܒܰܝܬܶܗ ܕܡܳܪܝܳܐ.
9 ܘܰܗܘܳܐ ܒܫܰܢ̱ܬܳܐ ܚܡܺܝܫܳܝܬܳܐ ܕܝܽܘܝܰܩܺܝܡ ܒܪ ܝܽܘܫܺܝܳܐ ܡܰܠܟܳܐ ܕܺܝܗܽܘܕܳܐ: ܒܝܰܪܚܳܐ ܕܬܶܫܥܳܐ: ܓܙܰܪܘ ܨܰܘܡܳܐ ܩܕܳܡ ܡܳܪܝܳܐ ܟܽܠܶܗ ܥܰܡܳܐ ܕܒܽܐܘܪܺܫܠܶܡ: ܘܰܩܪܳܐ ܒܰܪܽܘܟ ܩܕܳܡ ܟܽܠܶܗ ܥܰܡܳܐ ܕܳܐܬܶܝܢ ܡܶܢ ܩܽܘܖ̈ܝܳܐ ܕܺܝܗܽܘܕܳܐ ܠܽܐܘܪܺܫܠܶܡ.
10 ܘܰܩܪܳܐ ܒܰܪܽܘܟ ܣܳܦܪܳܐ: ܦܶܬܓܳܡܰܘ̈ܗܝ ܕܡܳܪܝܳܐ ܕܶܐܡܰܪ ܐܶܪܰܡܝܳܐ ܢܒܺܝܳܐ ܒܒܰܝܬܶܗ ܕܡܳܪܝܳܐ: ܒܚܳܢܽܘܬܶܗ ܕܓܡܳܪܝܳܐ ܒܰܪ ܫܳܦܳܢ ܣܳܦܪܳܐ ܒܕܳܪܬܳܐ ܥܶܠܳܝܬܳܐ: ܒܡܰܥܠܳܢܳܐ ܕܬܰܪܥܳܐ ܚܰܕܬܳܐ ܕܒܰܝܬܶܗ ܕܡܳܪܝܳܐ: ܩܕܳܡ ܟܽܠܶܗ ܥܰܡܳܐ.
11 ܘܰܫܡܰܥ ܡܺܝܟܳܐ ܒܰܪ ܓܡܳܪܝܳܐ: ܒܰܪ ܫܳܦܳܢ: ܟܽܠܗܽܘܢ ܦܶܬܓܳܡܰܘ̈ܗܝ ܕܡܳܪܝܳܐ ܡܶܢ ܣܶܦܪܳܐ.
12 ܘܰܢܚܶܬ ܡܶܢ ܒܶܝܬ ܡܰܠܟܳܐ ܠܚܳܢܽܘܬܶܗ ܕܣܳܦܪܳܐ: ܘܰܚܙܳܐ ܬܰܡܳܢ ܟܽܠܗܽܘܢ ܪܰܘܖ̈ܒܳܢܶܐ ܝܳܬܒܺܝܢ: ܐܶܠܺܝܫܡܰܥ ܣܳܦܪܳܐ: ܘܕܰܠܝܳܐ ܒܰܪ ܫܡܳܥܝܳܐ: ܘܰܐܠܺܝܬܰܢ ܒܰܪ ܥܰܒܟܽܘܪ: ܘܰܓܡܳܪܝܳܐ ܒܰܪ ܫܳܦܳܢ: ܘܨܶܕܰܩܝܳܐ ܒܰܪ ܚܰܢܰܢܝܳܐ: ܘܟܽܠܗܽܘܢ ܪܰܘܖ̈ܒܳܢܶܐ.
13 ܘܚܰܘܺܝ ܐܶܢܽܘܢ ܡܺܝܟܳܐ ܟܽܠܗܽܘܢ ܦܶܬܓܳܡܳܐ ܕܰܫܡܰܥ: ܟܰܕ ܩܪܳܐ ܒܰܪܽܘܟ ܣܳܦܪܳܐ ܒܶܐܕܢܰܘ̈ܗܝ ܕܥܰܡܳܐ.
14 ܘܫܰܕܰܪܘ ܟܽܠܗܽܘܢ ܪܰܘܖ̈ܒܳܢܶܐ ܠܘܳܬ ܒܰܪܽܘܟ: ܠܺܝܗܽܘܕܺܝ ܒܰܪ ܢܬܰܢܝܳܐ: ܒܰܪ ܫܠܰܡܝܳܐ: ܒܰܪ ܟܽܘܫܺܝ: ܘܶܐܡܰܪܘ ܠܶܗ: ܡܓܰܠܬܳܐ ܕܰܩܪܰܝܬ ܒܳܗ̇ ܩܕܳܡ ܥܰܡܳܐ: ܣܰܒܶܝܗ̇ ܒܺܐܝܕܳܟ ܘܬܳܐ: ܘܰܢܣܰܒ ܒܰܪܽܘܟ ܒܰܪ ܢܺܪܝܳܐ ܡܓܰܠܬܳܐ ܒܺܐܝܕܶܗ: ܘܶܐܬܳܐ ܠܘܳܬܗܽܘܢ.
15 ܘܶܐܡܰܪܘ ܠܶܗ ܪܰܘܖ̈ܒܳܢܶܐ: ܬܶܒ ܘܰܩܪܺܝܗ̇ ܩܕܳܡܰܝܢ: ܘܰܩܪܳܗ̇ ܒܰܪܽܘܟ ܩܕܳܡܝܗܽܘܢ.
16 ܘܟܰܕ ܫܡܰܥܘ ܦܶܬܓܳܡܰܘ̈ܗܝ ܬܘܰܗܘ ܓܒܰܪ ܥܰܠ ܚܰܒܪܶܗ: ܘܶܐܡܰܪܘ ܠܒܰܪܽܘܟ: ܡܚܰܘܶܝܢ ܚܢܰܢ ܠܡܰܠܟܳܐ ܟܽܠܗܽܘܢ ܦܶܬܓܳܡ̈ܶܐ ܗܳܠܶܝܢ.
17 ܘܰܠܒܰܪܽܘܟ ܫܰܐܠܽܘܗܝ ܘܶܐܡܰܪܘ ܠܶܗ: ܚܰܘܳܢ ܐܰܝܟܰܢܳܐ ܟ̣ܬܰܒܬ ܟܽܠܗܽܘܢ ܦܶܬܓܳܡ̈ܶܐ ܗܳܠܶܝܢ ܡܶܢ ܦܽܘܡܶܗ.
18 ܘܶܐܡܰܪ ܠܗܽܘܢ ܒܰܪܽܘܟ: ܡܶܢ ܦܽܘܡܶܗ ܐܳܡܰܪ ܗ̱ܘܳܐ ܠܺܝ ܐܶܪܡܰܝܳܐ ܟܽܠܗܽܘܢ ܦܶܬܓܳܡ̈ܶܐ ܗܳܠܶܝܢ: ܘܶܐܢܳܐ ܟܳܬܶܒ ܗܘܺܝ݀ܬ ܥܰܠ ܣܶܦܪܳܐ ܒܰܕܝܽܘܬܳܐ.
19 ܘܶܐܡܰܪܘ ܪܰܘܖ̈ܒܳܢܶܐ ܠܒܰܪܽܘܟ: ܙܶܠ ܘܶܐܬܛܰܫܳܐ ܐܰܢ̱ܬ ܘܶܐܪܡܰܝܳܐ: ܘܐ̱ܢܳܫ ܠܳܐ ܢܶܕܰܥ ܐܰܝܟܳܐ ܐܰܢ̱ܬܽܘܢ.
20 ܘܶܐܬܰܘ ܠܘܳܬ ܡܰܠܟܳܐ ܠܕܳܪܬܳܐ: ܘܰܡܓܰܠܬܳܐ ܣܳܡܽܘܗ̇ ܒܚܳܢܽܘܬܶܗ ܕܶܐܠܺܝܫܡܰܥ ܣܳܦܪܳܐ: ܘܚܰܘܺܝܘ ܩܕܳܡ ܡܰܠܟܳܐ ܟܽܠܗܽܘܢ ܦܶܬܓܳܡ̈ܶܐ ܗܳܠܶܝܢ.
21 ܘܫܰܕܰܪ ܡܰܠܟܳܐ ܠܝܰܗܽܘܕܺܝ ܕܢܰܝܬܶܝܗ̇ ܠܰܡܓܰܠܬܳܐ: ܘܢܰܣܒܳܗ̇ ܡܶܢ ܚܳܢܽܘܬܶܗ ܕܶܐܠܺܝܫܰܡܥ ܣܳܦܪܳܐ: ܘܩܳܪܳܗ̇ ܝܰܗܽܘܕܺܝ ܩܕܳܡ ܡܰܠܟܳܐ: ܘܰܩܕܳܡ ܟܽܠܗܽܘܢ ܪܰܘܖ̈ܒܳܢܶܐ ܕܩܳܝܡܺܝܢ ܩܕܳܡ ܡܰܠܟܳܐ.
22 ܘܡܰܠܟܳܐ ܝܳܬܶܒ ܗ̱ܘܳܐ ܒܶܝܬ ܣܰܬܘܳܐ ܒܝܰܪܚܳܐ ܕܬܶܫܥܳܐ: ܘܢܽܘܪܳܐ ܣܳܝܡܺܝܢ ܗ̱ܘܰܘ ܩܕܳܡܰܘܗܝ.
23 ܘܟܰܕ ܩܪܳܐ ܝܰܗܽܘܕܺܝ ܬܠܳܬ ܦܶܨܝ̈ܢ ܘܰܐܪܒܰܥ: ܨܪܳܗ̇ ܒܰܙܡܺܠܝܳܐ ܕܣܳܦܪܳܐ: ܘܰܫܕܳܗ̇ ܒܓܽܘܡܖ̈ܶܐ ܕܢܽܘܪܳܐ: ܘܝܶܩܕܰܬ ܟܽܠܳܗ̇ ܡܓܰܠܬܳܐ ܒܢܽܘܪܳܐ ܕܥܰܠ ܩܳܡܺܝܢܳܐ.
24 ܘܠܳܐ ܕܚܶܠܘ ܘܠܳܐ ܨܰܪܺܝܘ ܠܒܽܘܫܰܝ̈ܗܽܘܢ ܡܰܠܟܳܐ ܘܟܽܠܗܽܘܢ ܥܰܒܕܰܘ̈ܗܝ: ܟܰܕ ܫ̣ܡܰܥܘ ܟܽܠܗܽܘܢ ܦܶܬܓܳܡ̈ܶܐ ܗܳܠܶܝܢ.
25 ܘܳܐܦ ܐܰܠܺܝܬܳܢ: ܘܰܓܡܳܪܝܳܐ: ܘܕܰܠܝܳܐ: ܒܥܰܘ ܡܶܢ ܡܰܠܟܳܐ ܕܠܳܐ ܢܰܘܩܕܺܝܗ̇ ܠܰܡܓܰܠܬܳܐ ܒܢܽܘܪܳܐ ܘܠܳܐ ܫܡܰܥ ܐܶܢܽܘܢ.
26 ܘܰܦܩܰܕ ܡܰܠܟܳܐ ܠܺܝܪܰܚܡܐܶܝܠ ܒܰܪ ܡܰܠܟܳܐ: ܘܰܠܫܰܪܝܳܐ ܒܰܪ ܥܰܙܪܳܐܶܝܠ: ܘܠܰܫܠܰܡܝܳܐ ܒܰܪ ܥܰܒܕܐܶܝܠ: ܠܡܶܐܚܰܕ ܠܶܐܪܰܡܝܳܐ ܢܒܺܝܳܐ ܘܰܠܒܰܪܽܘܟ ܣܳܦܪܳܐ: ܘܛܰܫܺܝ ܐܶܢܽܘܢ ܡܳܪܝܳܐ.
27 ܘܰܗܘܳܐ ܦܶܬܓܳܡܶܗ ܕܡܳܪܝܳܐ ܥܰܠ ܐܶܪܰܡܝܳܐ ܢܒܺܝܳܐ: ܡܶܢ ܒܳܬܰܪ ܕܰܐܘܩܶܕ ܡܰܠܟܳܐ ܡܓܰܠܬܳܐ: ܘܦܶܬܓܳܡ̈ܶܐ ܕܰܟܬܰܒ ܒܰܪܽܘܟ ܡܶܢ ܦܽܘܡܶܗ ܕܶܐܪܰܡܝܳܐ ܠܡܺܐܡܰܪ.
28 ܗܦܽܘܟ ܣܰܒ ܠܳܟ ܡܓܰܠܬܳܐ ܐ̱ܚܺܪܬܳܐ: ܘܰܟܬܽܘܒ ܥܠܶܝܗ̇ ܟܽܠܗܽܘܢ ܦܶܬܓܳܡ̈ܶܐ ܩܰܕܡܰܝ̈ܳܐ: ܕܺܐܝܬ ܗ̱ܘܰܘ ܥܰܠ ܡܓܰܠܬܳܐ ܕܰܐܘܩܶܕ ܝܽܘܝܰܩܺܝܡ ܡܰܠܟܳܐ ܕܺܝܗܽܘܕܳܐ ܒܢܽܘܪܳܐ.
29 ܘܰܠܝܽܘܝܰܩܺܝܡ ܡܰܠܟܳܐ ܕܺܝܗܽܘܕܳܐ ܬܺܐܡܰܪ: ܗܳܟܰܢܳܐ ܐܳܡܰܪ ܡܳܪܝܳܐ: ܐܰܢ̱ܬ ܐܰܘܩܶܕܬ ܡܓܰܠܬܳܐ ܗܳܕܶܐ: ܘܶܐܡܰܪܬ: ܡܶܛܽܠ ܡܳܢܳܐ ܟܶܬܒܶ݀ܬ ܥܠܶܝܗ̇: ܕܢܺܐܬܶܐ ܡܰܠܟܳܐ ܕܒܳܒܶܠ ܘܢܰܚܪܒܺܝܗ̇ ܠܰܐܪܥܳܐ ܗܳܕܶܐ: ܘܰܢܒܰܛܶܠ ܡܶܢܳܗ̇ ܒܢܰܝ̈ܢܳܫܳܐ ܘܰܒܥܺܝܪܳܐ.
30 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܝܳܐ ܥܰܠ ܝܽܘܝܰܩܺܝܡ ܡܰܠܟܳܐ ܕܺܝܗܽܘܕܳܐ: ܠܳܐ ܢܶܗܘܶܐ ܠܶܗ ܓܰܒܪܳܐ ܕܝܳܬܶܒ ܥܰܠ ܟܽܘܪܣܝܶܗ ܕܕܰܘܺܝܕ: ܘܰܫܠܰܕܶܗ ܬܶܗܘܶܐ ܪܰܡܝܳܐ ܒܫܰܘܒܳܐ ܒܺܐܝܡܳܡܳܐ: ܘܒܰܓܠܺܝܕܳܐ ܒܠܺܠܝܳܐ.
31 ܘܶܐܦܩܽܘܕ ܥܠܰܘܗܝ: ܘܥܰܠ ܙܰܪܥܶܗ: ܘܥܰܠ ܥܰܒܕܰܘ̈ܗܝ ܥܰܘܠܗܽܘܢ: ܘܰܐܝܬܶܐ ܥܠܰܝܗܽܘܢ ܘܥܰܠ ܟܽܠܗܽܘܢ ܥܳܡܽܘܖ̈ܶܝܗ̇ ܕܽܐܘܪܺܫܠܶܡ: ܘܥܰܠ ܐ̱ܢܳܫ̈ܳܐ ܕܺܝܗܽܘܕܳܐ: ܟܽܠܳܗ̇ ܒܺܝܫܬܳܐ ܕܶܐܡܪܶܬ ܥܠܰܝܗܽܘܢ: ܥܰܠ ܕܠܳܐ ܫܡܰܥܘ ܒܩܳܠܝ.
32 ܘܶܐܪܰܡܝܳܐ ܢܣܰܒ ܡܓܰܠܬܳܐ ܐ̱ܚܺܪܬܳܐ: ܘܝܰܗܒܳܗ̇ ܠܒܰܪܽܘܟ ܒܰܪ ܢܺܪܝܳܐ ܣܳܦܪܳܐ: ܘܰܟܬܰܒ ܥܠܶܝܗ̇ ܡܶܢ ܦܽܘܡܶܗ ܕܶܐܪܰܡܝܳܐ: ܟܽܠܗܽܘܢ ܦܶܬܓܳܡ̈ܶܐ ܕܰܟܬܺܝܒܺܝܢ ܗ̱ܘܰܘ ܒܣܶܦܪܳܐ: ܕܰܐܘܩܶܕ ܝܽܘܝܰܩܺܝܡ ܡܰܠܟܳܐ ܕܺܝܗܽܘܕܳܐ ܒܢܽܘܪܳܐ: ܘܬܽܘܒ ܐܰܘܣܶܦ ܥܠܰܝܗܽܘܢ ܦܶܬܓܳܡ̈ܶܐ ܕܣܰܓܺܝ̈ܐܺܝܢ ܐܰܟܘܳܬܗܽܘܢ.