Jeremiah 1
The Book of Jeremiah
܀ ܐܪܡܝܐ ܐ ܀
1 ܦܶܬܓܳܡܰܘ̈ܗܝ ܕܶܐܪܰܡܝܳܐ ܒܰܪ ܚܶܠܰܩܝܳܐ: ܡܶܢ ܟܳܗܢܳܐ ܕܒܰܥܢܳܬܽܘܬ ܕܒܰܐܪܥܳܐ ܕܒܶܢܝܳܡܶܝܢ.
2 ܕܰܗܘܳܐ ܦܶܬܓܳܡܶܗ ܕܡܳܪܝܳܐ ܥܠܰܘܗܝ: ܒܝܰܘܡܰܘ̈ܗܝ ܕܝܽܘܫܺܝܳܐ ܒܰܪ ܐܰܡܽܘܢ ܡܰܠܟܳܐ ܕܺܝܗܽܘܕܳܐ: ܒܰܬܠܳܬܰܥܶܣܖ̈ܶܐ ܫܢܺܝ̈ܢ ܠܡܰܠܟܽܘܬܶܗ.
3 ܘܰܗܘܳܐ ܒܝܰܘܡܰܘ̈ܗܝ ܕܝܽܘܝܰܩܺܝܡ ܒܰܪ ܝܽܘܫܺܝܳܐ ܡܰܠܟܳܐ ܕܺܝܗܽܘܕܳܐ: ܥܕܰܡܳܐ ܕܰܫܠܶܡ ܚܕܰܥܶܣܖ̈ܶܐ ܫܢܺܝ̈ܢ ܠܨܶܕܩܝܳܐ ܒܰܪ ܝܽܘܫܺܝܳܐ ܡܰܠܟܳܐ ܕܺܝܗܽܘܕܳܐ: ܥܕܰܡܳܐ ܕܶܐܫܬܰܒܝܰܬ ܐܽܘܪܺܫܠܶܡ ܒܝܰܪܚܳܐ ܚܡܺܝܫܳܝܳܐ.
4 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
5 ܥܰܕܠܳܐ ܐܶܨܽܘܪܳܟ ܒܟܰܪܣܳܐ ܝܺܕܰܥܬܳܟ: ܘܥܰܕܠܳܐ ܬܶܦܽܘܩ ܡܶܢ ܡܰܪܒܥܳܐ ܩܰܕܶܫܬܳܟ: ܘܰܢܒܺܝܳܐ ܠܥܰܡ̈ܡܶܐ ܝܰܗܒܬܳܟ.
6 ܘܶܐܡܪܶܬ ܒܒܳܥܽܘ ܡܳܪܝܳܐ ܐܰܠܳܗܳܐ: ܗܳܐ ܠܳܐ ܝܳܕܰܥ ܐ̱ܢܳܐ ܠܰܡܡܰܠܳܠܽܘ ܡܶܛܽܠ ܕܰܛܠܶܐ ܐ̱ܢܳܐ.
7 ܘܶܐܡܰܪ ܠܺܝ ܡܳܪܝܳܐ: ܠܳܐ ܬܺܐܡܰܪ ܕܰܛܠܶܐ ܐ̱ܢܳܐ: ܡܶܛܽܠ ܕܥܰܠ ܟܠ ܕܶܐܫܰܕܪܳܟ ܬܺܐܙܰܠ: ܘܟܽܠ ܕܶܐܦܰܩܕܳܟ ܬܡܰܠܶܠ.
8 ܠܳܐ ܬܶܕܚܰܠ ܡܶܢ ܩܕܳܡܰܝܗܽܘܢ: ܡܶܛܽܠ ܕܥܰܡܳܟ ܐ̱ܢܳܐ ܠܰܡܦܰܨܳܝܽܘܬܳܟ. ܐܳܡܰܪ ܡܳܪܝܳܐ.
9 ܘܰܐܘܫܶܛ ܡܳܪܝܳܐ ܐܺܝܕܶܗ ܘܰܩܪܶܒ ܠܦܽܘܡܝ. ܘܶܐܡܰܪ ܠܺܝ ܡܳܪܝܳܐ: ܗܳܐ ܝܶܗܒܶܬ ܦܶܬܓܳܡܰܝ̈ ܒܦܽܘܡܳܟ.
10 ܚܙܺܝ ܕܰܐܫܠܶܛܬܳܟ ܝܰܘܡܳܢܳܐ: ܥܰܠ ܥܰܡ̈ܡܶܐ ܘܥܰܠ ܡܰܠܟ̈ܘܳܬܳܐ: ܠܡܶܥܩܰܪ: ܘܰܠܡܶܣܬܰܪ: ܘܠܰܡܣܰܚܳܦܽܘ: ܘܰܠܡܰܘܒܳܕܽܘ ܘܰܠܡܶܒܢܳܐ: ܘܰܠܡܶܨܰܒ.
11 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ: ܡܳܢܳܐ ܚܙܰܝܬ ܐܶܪܰܡܝܳܐ. ܘܶܐܡܪܶܬ ܚܽܘܛܪܳܐ ܕܠܽܘܙܳܐ ܚܳܙܶܐ ܐ̱ܢܳܐ.
12 ܘܶܐܡܰܪ ܠܺܝ ܡܳܪܝܳܐ ܫܰܦܺܝܪ ܚܙܰܝܬ: ܡܶܛܽܠ ܕܰܡܣܰܪܗܶܒ ܐ̱ܢܳܐ ܥܰܠ ܦܶܬܓܳܡܝ ܠܡܶܥܒܕܶܗ.
13 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܕܬܰܪܬܶܝܢ ܙܰܒܢܺܝ̈ܢ: ܘܶܐܡܰܪ: ܡܳܢܳܐ ܚܳܙܶܐ ܐܰܢܬ: ܘܶܐܡܪܶܬ ܩܰܕܣܳܐ ܕܰܬܦܶܐ ܚܳܙܶܐ ܐ̱ܢܳܐ: ܘܰܐܦܰܘ̈ܗܝ ܡܶܢ ܐܰܦܰܝ̈ ܓܰܪܒܝܳܐ.
14 ܘܶܐܡܰܪ ܠܺܝ ܡܳܪܝܳܐ: ܡܶܢ ܓܰܪܒܝܳܐ ܬܶܬܦܬܰܚ ܒܺܝܫܬܳܐ ܥܰܠ ܟܽܠܗܽܘܢ ܝܳܬܒܰܝ̈ ܐܰܪܥܳܐ.
15 ܡܶܛܽܠ ܕܗܳܐ ܡܫܰܕܰܪ ܐ̱ܢܳܐ: ܘܩܳܪܶܐ ܐ̱ܢܳܐ ܠܟܽܠܗܶܝܢ ܫܰܖ̈ܒܳܬܳܐ ܕܡܰܠܟ̈ܘܳܬܳܐ ܕܓܰܪܒܝܳܐ ܐܳܡܰܪ ܡܳܪܝܳܐ. ܘܢܺܐܬܽܘܢ ܘܢܰܪܡܽܘܢ ܓܒܰܪ ܟܽܘܪܣܝܶܗ: ܒܡܰܥܠܳܢܳܐ ܕܬܰܖ̈ܥܶܐ ܕܽܐܘܪܺܫܠܶܡ: ܘܥܰܠ ܟܽܠܗܽܘܢ ܫܽܘܖ̈ܝܶܗ̇ ܟܰܕ ܚܳܕܪܳܐ: ܘܥܰܠ ܟܽܠܗܶܝܢ ܩܽܘܖ̈ܝܳܐ ܕܺܝܗܽܘܕܳܐ.
16 ܘܶܐܡܰܠܶܠ ܕܺܝܢܰܝ̈ ܥܰܡܗܽܘܢ: ܡܶܛܽܠ ܟܽܠܗܶܝܢ ܒܺܝ̈ܫܳܬܗܽܘܢ: ܕܫܰܒܩܽܘܢܝ ܘܣܳܡܘ ܒܶܣ̈ܡܶܐ ܠܰܐܠܳܗ̈ܶܐ ܐ̱ܚܖ̈ܳܢܶܐ: ܘܰܣܓܶܕܘ ܠܰܥܒܳܕ ܐܺܝܕܰܝ̈ܗܽܘܢ.
17 ܘܰܐܢ̱ܬ ܐܰܣܽܘܪ ܚܰܨܰܝ̈ܟ: ܘܩܽܘܡ ܐܶܡܰܪ ܠܗܽܘܢ ܟܽܠܡܶܕܶܡ ܕܰܡܦܰܩܶܕ ܐ̱ܢܳܐ ܠܳܟ. ܠܳܐ ܬܶܕܚܰܠ ܡܶܢܗܽܘܢ: ܕܰܠܡܳܐ ܐܶܬܒܪܳܟ ܩܕܳܡܰܝܗܽܘܢ.
18 ܘܶܐ̱ܢܳܐ ܗܳܐ ܥܒܰܕܬܳܟ ܐܰܝܟ ܩܪܺܝܬܳܐ ܬܰܩܺܝܦܬܳܐ: ܘܰܐܝܟ ܥܰܡܽܘܕܳܐ ܕܦܰܪܙܠܳܐ: ܘܰܐܝܟ ܫܽܘܪܳܐ ܕܰܢܚܳܫܳܐ ܥܰܠ ܟܽܠܳܗ̇ ܐܰܪܥܳܐ: ܥܰܠ ܡܰܠ̈ܟܶܐ ܕܺܝܗܽܘܕܳܐ ܘܥܰܠ ܪܰܘܖ̈ܒܳܢܰܝܗܽܘܢ: ܘܥܰܠ ܟܳܗܢܰܝ̈ܗܽܘܢ: ܘܥܰܠ ܢܒܺܝܰܝ̈ܗܽܘܢ: ܘܥܰܠ ܟܽܠܶܗ ܥܰܡܳܐ ܕܰܐܪܥܳܐ.
19 ܘܢܶܬܟܰܬܫܽܘܢ ܥܰܡܳܟ: ܘܠܳܐ ܢܶܙܟܽܘܢܳܟ: ܡܶܛܽܠ ܕܥܰܡܳܟ ܐ̱ܢܳܐ ܠܰܡܦܰܨܳܝܽܘܬܳܟ: ܐܳܡܰܪ ܡܳܪܝܳܐ.