Jeremiah 33
The Book of Jeremiah
܀ ܐܪܡܝܐ ܠܓ ܀
1 ܘܗܘܳܐ ܦܶܬܓܳܡܶܗ ܕܡܳܪܝܳܐ ܥܰܠ ܐܶܪܰܡܝܳܐ ܢܒܺܝܳܐ ܕܬܰܪܬܶܝܢ ܙܰܒܢܺܝ̈ܢ: ܟܰܕ ܟܠܶܐ ܗ̱ܘܳܐ ܥܕܰܟܺܝܠ ܒܕܳܪܰܬ ܡܰܛܰܪܬܳܐ: ܘܶܐܡܰܪ.
2 ܗܳܟܰܢܳܐ ܐܳܡܰܪ ܡܳܪܝܳܐ: ܕܥܰܒܕܳܟ ܘܓܰܒܠܳܟ ܘܰܐܬܩܢܳܟ ܡܳܪܝܳܐ ܫܡܶܗ.
3 ܩܪܺܝܢܝ ܘܶܐܥܢܶܝܟ: ܘܶܐܚܰܘܶܝܟ ܪܰܘܖ̈ܒܳܬܳܐ ܘܥܰܫܺܝ̈ܢܳܬܳܐ ܕܠܳܐ ܝܺܕܰܥܬܽܘܢ.
4 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ: ܥܰܠ ܒ̈ܳܬܶܐ ܕܰܩܪܺܝܬܳܐ ܗܳܕܶܐ: ܘܥܰܠ ܒ̈ܳܬܶܐ ܕܡܰܠ̈ܟܶܐ ܕܺܝܗܽܘܕܳܐ: ܕܰܥ̣ܩܰܪܘ ܐܶܢܽܘܢ ܓܰܝܳܣ̈ܶܐ ܒܚܰܪܒܳܐ.
5 ܕܶܐܬܰܘ ܠܡܶܬܟܰܬܳܫܽܘ ܥܰܡ ܟܰܠܕܳܝ̈ܶܐ: ܘܰܠܡܶܡܠܳܐ ܐܶܢܽܘܢ ܦܰܓܖ̈ܶܐ ܕܰܒܢܰܝ̈ܢܳܫܳܐ: ܕܩܰܛܠܶܬ ܒܪܽܘܓܙܝ ܘܰܒܚܶܡܬܝ: ܘܰܐܗܦܟܶ݀ܬ ܐܰܦܰܝ̈ ܡܶܢ ܩܪܺܝܬܳܐ ܗܳܕܶܐ: ܥܰܠ ܟܽܠܳܗ̇ ܒܺܝܫܬܳܐ ܕܰܥ̣ܒܰܕܘ ܩܕܳܡܝ.
6 ܗܳܐ ܡܰܣܶܩ ܐ̱ܢܳܐ ܠܳܗ̇ ܠܢܽܘܓܪܳܐ ܐܳܣܝܳܐ ܘܰܐܣܶܐ ܐܶܢܽܘܢ: ܘܶܐܓܠܶܐ ܠܗܽܘܢ ܫܒܺܝ̈ܠܶܐ ܕܰܫܠܳܡܳܐ ܘܕܗܰܝܡܳܢܽܘܬܳܐ.
7 ܘܰܐܗܦܶܟ ܫܒܺܝܬܳܐ ܕܺܝܗܽܘܕܳܐ: ܘܰܫܒܺܝܬܳܐ ܕܺܝܣܪܳܐܶܝܠ: ܘܶܐܒܢܶܐ ܐܶܢܽܘܢ ܐܰܝܟ ܕܡܶܢ ܩܕܺܝܡ: ܘܰܐܛܐܶܒ ܠܗܽܘܢ ܐܰܝܟ ܕܡܶܢ ܪܺܝܫܺܝܬܳܐ.
8 ܘܶܐܕܰܟܶܐ ܐܶܢܽܘܢ ܡܶܢ ܟܽܠܶܗ ܥܰܘܠܗܽܘܢ ܕܰܚ̣ܛܰܘ ܠܺܝ: ܘܶܐܫܒܽܘܩ ܠܟܽܠܗܽܘܢ ܚܰܘ̈ܒܰܝܗܽܘܢ ܕܰܚ̣ܛܰܘ ܠܺܝ ܘܕܰܐܥܠܺܝܘ ܒܺܝ.
9 ܘܬܶܗܘܶܐ ܠܺܝ ܠܰܫܡܳܐ ܘܰܠܒܽܘܣܳܡܳܐ: ܘܰܠܚܰܕܽܘܬܳܐ ܘܰܠܫܽܘܒܗܳܪܳܐ ܒܟܽܠܗܽܘܢ ܥܰܡ̈ܡܶܐ ܕܰܐܪܥܳܐ: ܘܢܶܫܡܥܽܘܢ ܟܽܠܳܗ̇ ܛܳܒܬܳܐ ܕܥܳܒܶܕ ܐ̱ܢܳܐ ܥܰܡܗܽܘܢ: ܘܢܶܕܚܠܽܘܢ ܘܢܶܪܓܙܽܘܢ ܥܰܠ ܟܽܠܳܗ̇ ܛܳܒܬܳܐ: ܘܥܰܠ ܟܽܠܶܗ ܫܠܳܡܳܐ ܕܥܳܒܶܕ ܐ̱ܢܳܐ ܠܗܽܘܢ.
10 ܗܳܟܰܢܳܐ ܐܳܡܰܪ ܡܳܪܝܳܐ: ܬܽܘܒ ܢܶܫܬܡܰܥ ܒܰܐܬܪܳܐ ܗܳܢܳܐ: ܕܳܐܡܪܺܝܢ ܐܢ̱ܬܽܘܢ ܚܪܶܒ ܗ̱ܘ ܡܶܢ ܒܠܰܝ ܐ̱ܢܳܫܳܐ ܘܡܶܢ ܒܠܰܝ ܒܥܺܝܪܳܐ: ܒܩܽܘܖ̈ܝܳܐ ܕܺܝܗܽܘܕܳܐ: ܘܰܒܫܽܘ̈ܩܝܶܗ̇ ܕܽܐܘܪܺܫܠܶܡ: ܕܚܰܪܒܺܝܢ ܡܶܢ ܒܠܰܝ ܐ̱ܢܳܫܳܐ: ܘܡܶܢ ܒܠܰܝ ܕܝܳܬܶܒ ܘܡܶܢ ܒܠܰܝ ܒܥܺܝܪܳܐ.
11 ܩܳܠܳܐ ܕܰܕܝܳܨܳܐ ܘܩܳܠܳܐ ܕܚܰܕܽܘܬܳܐ: ܩܳܠܳܐ ܕܚܰܬܢܳܐ: ܘܩܳܠܳܐ ܕܟܰܠܬܳܐ: ܩܳܠܳܐ ܕܳܐܡܪܺܝܢ ܐܰܘܕܰܘ ܠܡܳܪܝܳܐ ܚܰܝܠܬܳܢܳܐ: ܕܛܳܒ ܗ̱ܘ ܡܳܪܝܳܐ ܘܒܰܣܺܝܡ ܗ̱ܘ̣: ܘܠܥܳܠܰܡ ܛܰܝܒܽܘܬܶܗ: ܘܡܰܝܬܶܝܢ ܬܰܘܕܺܝܬܳܐ ܠܒܰܝܬܶܗ ܕܡܳܪܝܳܐ: ܡܶܛܽܠ ܕܰܐܗܦܶܟ ܫܒܺܝܬܶܗ ܕܰܐܪܥܳܐ ܐܰܝܟ ܕܰܒܩܰܕܡܳܝܬܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ.
12 ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܡܶܟܺܝܠ ܢܶܗܘܶܐ ܒܰܐܬܪܳܐ ܗܳܢܳܐ: ܕܰܚܪܶܒ ܡܶܢ ܒܢܰܝ̈ܢܳܫܳܐ ܘܰܥܕܰܡܳܐ ܠܰܒܥܺܝܪܳܐ ܘܒܟܽܠܗܶܝܢ ܩܽܘܖ̈ܝܶܗ: ܕܰܝܖ̈ܶܐ ܕܖ̈ܳܥܰܘܳܬܳܐ ܘܡܰܪܒܥܳܐ ܕܥܳܢ̈ܳܐ.
13 ܒܩܽܘܖ̈ܝܳܐ ܕܛܽܘܖ̈ܶܐ: ܘܒܩܽܘܖ̈ܝܳܐ ܕܦܰܩ̈ܥܳܬܳܐ: ܘܰܒܩܽܘܖ̈ܝܳܐ ܕܬܰܝܡܢܳܐ: ܘܒܰܐܪܥܳܐ ܕܒܶܢܝܳܡܶܝܢ: ܘܒܰܚܕܖ̈ܶܝܗ̇ ܕܽܐܘܪܺܫܠܶܡ: ܘܰܒܩܽܘܖ̈ܝܳܐ ܕܺܝܗܽܘܕܳܐ: ܡܶܟܺܝܠ ܬܶܥܒܰܪ ܥܳܢ̈ܳܐ ܥܰܠ ܐܺܝܕܰܝ̈ ܡܰܢܳܝܳܐ ܐܳܡܰܪ ܡܳܪܝܳܐ.
14 ܗܳܐ ܝܰܘ̈ܡܳܬܳܐ ܐܳܬܶܝܢ ܐܳܡܰܪ ܡܳܪܝܳܐ: ܘܰܐܩܺܝܡ ܦܶܬܓܳܡ̈ܶܐ ܛܳܒ̈ܶܐ ܕܶܐܡܪܶܬ ܥܰܠ ܕܒܶܝܬ ܝܺܣܪܳܐܶܝܠ ܘܥܰܠ ܕܒܶܝܬ ܝܺܗܽܘܕܳܐ ܐܳܡܰܪ ܡܳܪܝܳܐ.
15 ܒܝܰܘ̈ܡܳܬܳܐ ܗܳܢܽܘܢ ܘܰܒܙܰܒܢܳܐ ܗܰܘ: ܐܰܨܡܰܚ ܠܕܰܘܺܝܕ ܨܶܡܚܳܐ ܕܙܰܕܺܝܩܽܘܬܳܐ: ܘܢܰܡܠܶܟ ܒܡܰܠܟܽܘܬܳܐ: ܘܢܶܣܬܰܟܰܠ: ܘܢܶܥܒܰܕ ܕܺܝܢܳܐ ܘܙܰܕܺܝܩܽܘܬܳܐ ܒܰܐܪܥܳܐ.
16 ܒܝܰܘ̈ܡܳܬܳܐ ܗܳܢܽܘܢ ܢܶܬܦܪܶܩ ܝܺܗܽܘܕܳܐ: ܐܘܪܺܫܠܶܡ ܬܶܫܪܶܐ ܒܫܶܠܝܳܐ: ܘܗܳܢܰܘ ܫܡܶܗ ܕܢܶܩܪܽܘܢܶܗ: ܡܳܪܝܳܐ ܙܶܕܩܰܢ.
17 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ: ܠܳܐ ܢܶܥܢܰܕ ܠܕܰܘܺܝܕ ܒܪܳܐ ܕܝܳܬܶܒ ܥܰܠ ܟܽܘܪܣܝܳܐ ܕܒܶܝܬ ܝܺܣܪܳܐܶܝܠ.
18 ܘܰܠܟܳܗ̈ܢܶܐ ܘܰܠܠܶܘܳܝ̈ܶܐ: ܠܳܐ ܢܶܥܢܰܕ ܓܰܒܪܳܐ ܡܶܢ ܩܕܳܡܝ: ܕܡܰܣܶܩ ܥܠܳܬܳܐ ܘܥܳܒܶܕ ܕܶܒܚܬܳܐ: ܘܣܳܐܶܡ ܒܶܣ̈ܡܶܐ ܟܽܠܗܽܘܢ ܝܰܘ̈ܡܳܬܳܐ.
19 ܘܰܗܘܳܐ ܦܶܬܓܳܡܶܗ ܕܡܳܪܝܳܐ ܥܰܠ ܐܶܪܰܡܝܳܐ ܠܡܺܐܡܰܪ.
20 ܗܳܟܰܢܳܐ ܐܳܡܰܪ ܡܳܪܝܳܐ: ܐܶܢ ܡܶܫܟܚܺܝܢ ܐܢ̱ܬܽܘܢ ܠܰܡܒܰܛܳܠܽܘ ܕܽܘܒܳܖ̈ܰܝ ܕܺܐܝܡܳܡܳܐ: ܘܕܽܘܒܳܖ̈ܰܝ ܕܠܺܠܝܳܐ: ܕܠܳܐ ܢܶܗܘܶܐ ܐܺܝܡܳܡܳܐ ܘܠܺܠܝܳܐ ܒܙܰܒܢܗܽܘܢ.
21 ܐܳܦ ܩܝܳܡܝ ܕܡܶܠܟܶ݀ܬ ܠܕܰܘܺܝܕ ܥܰܒܕܝ ܢܶܬܒܰܛܰܠ: ܕܠܳܐ ܢܶܗܘܶܐ ܠܶܗ ܒܪܳܐ ܕܢܰܡܠܶܟ ܥܰܠ ܟܽܘܪܣܝܶܗ: ܘܰܠܟܳܗ̈ܢܶܐ ܘܰܠܠܶܘܳܝ̈ܶܐ ܡܫܰܡܫܳܢܰܝ̈.
22 ܐܰܝܟ ܕܠܳܐ ܡܶܬܡܢܶܐ ܚܰܝܠܳܐ ܕܰܫܡܰܝܳܐ: ܘܠܳܐ ܡܶܬܬܟܺܝܠ ܚܳܠܳܐ ܕܝܰܡܳܐ: ܗܳܟܰܢܳܐ ܐܰܣܓܶܐ ܙܰܪܥܶܗ ܕܕܰܘܺܝܕ ܥܰܒܕܝ: ܘܰܕܠܶܘܳܝ̈ܶܐ ܕܰܡܫܰܡܫܺܝܢ ܠܺܝ.
23 ܘܰܗܘܳܐ ܦܶܬܓܳܡܶܗ ܕܡܳܪܝܳܐ ܥܰܠ ܐܶܪܰܡܝܳܐ ܠܡܺܐܡܰܪ.
24 ܠܳܐ ܚܳܙܶܐ ܐܰܢ̱ܬ ܡܶܕܶܡ ܕܳܐܡܪܺܝܢ ܥܰܡܳܐ: ܕܬܰܪܬܶܝܢ ܫܰܖ̈ܒܳܢ ܕܰܓܒܳܐ ܡܳܪܝܳܐ ܐܰܣܠܺܝ ܐܶܢܶܝܢ: ܘܰܠܥܰܡܝ ܡܰܪܓܙܺܝܢ ܕܠܳܐ ܢܶܗܘܶܐ ܥܰܡܳܐ ܩܕܳܡܝ.
25 ܗܳܟܰܢܳܐ ܐܳܡܰܪ ܡܳܪܝܳܐ: ܐܶܢ ܠܳܐ ܗܘܳܐ ܩܝܳܡܝ ܕܺܐܝܡܳܡܳܐ ܘܰܕܠܺܠܝܳܐ: ܘܢܳܡܽܘܣ̈ܶܐ ܕܰܫܡܰܝܳܐ ܘܰܐܪܥܳܐ ܠܳܐ ܣܳܡܶ݀ܬ.
26 ܐܳܦ ܙܰܪܥܶܗ ܕܝܰܥܩܽܘܒ ܘܰܕܕܰܘܺܝܕ ܥܰܒܕܝ ܐܰܣܠܶܐ: ܕܶܐܣܰܒ ܡܶܢ ܙܰܪܥܶܗ ܫܰܠܺܝܛܳܐ: ܥܰܠ ܒܰܝܬܶܗ ܕܰܐܒܪܳܗܳܡ ܘܕܺܐܝܣܚܳܩ ܘܰܕܝܰܥܩܽܘܒ: ܟܰܕ ܐܰܗܦܶܟ ܫܒܺܝܬܗܽܘܢ ܘܶܐܪܰܚܶܡ ܥܠܰܝܗܽܘܢ.