Jeremiah 25
The Book of Jeremiah
܀ ܐܪܡܝܐ ܟܗ ܀
1 ܦܶܬܓܳܡܳܐ ܕܰܗܘܳܐ ܥܰܠ ܐܶܪܰܡܝܳܐ ܥܰܠ ܟܽܠܶܗ ܥܰܡܳܐ ܕܺܝܗܽܘܕܳܐ: ܒܫܰܢ̱ܬܳܐ ܪܒܺܝܥܳܝܬܳܐ ܕܝܽܘܝܰܩܺܝܡ ܒܰܪ ܝܽܘܫܺܝܳܐ ܡܰܠܟܳܐ ܕܺܝܗܽܘܕܳܐ: ܗܺܝ ܗܺܝ ܫܰܢ̱ܬܳܐ ܩܰܕܡܳܝܬܳܐ ܕܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ.
2 ܕܶܐܡܰܪ ܐܶܪܰܡܝܳܐ ܢܒܺܝܳܐ ܥܰܠ ܟܽܠܶܗ ܥܰܡܳܐ ܕܺܝܗܽܘܕܳܐ: ܘܥܰܠ ܟܽܠܗܽܘܢ ܥܰܡܽܘܖ̈ܶܝܗ̇ ܕܽܐܘܪܺܫܠܶܡ ܠܡܺܐܡܰܪ.
3 ܡܶܢ ܬܠܳܬܰܥܶܣܖ̈ܶܐ ܫܢܺܝ̈ܢ ܠܝܽܘܫܺܝܳܐ ܒܰܪ ܐܰܡܽܘܢ ܡܰܠܟܳܐ ܕܺܝܗܽܘܕܳܐ: ܘܰܥܕܰܡܳܐ ܠܝܰܘܡܳܐ ܗܳܢܳܐ: ܗܳܐ ܥܶܣܪܺܝܢ ܘܰܬܠܳܬ ܫܢܺܝ̈ܢ: ܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܘܶܐܡܪܶܬ ܠܟܽܘܢ: ܩܰܕܡܶ݀ܬ ܟܽܠܝܽܘܡ ܘܶܐܡܪܶܬ ܘܠܳܐ ܫܡܰܥܬܽܘܢ.
4 ܘܫܰܕܰܪ ܡܳܪܝܳܐ ܠܘܳܬܟܽܘܢ ܟܽܠܗܽܘܢ ܥܰܒܕܰܘ̈ܗܝ ܢܒܺܝ̈ܳܐ: ܘܠܳܐ ܐܰܪܟܶܢܬܽܘܢ ܐܶܕܢܟܽܘܢ ܠܡܫܡܰܥ.
5 ܘܰܠܡܺܐܡܰܪ ܬܽܘܒܘ ܓܒܰܪ ܡܶܢ ܐܽܘܪܚܶܗ ܒܺܝܫܬܳܐ: ܘܡܶܢ ܒܺܝܫܽܘܬ ܥܒܳܕܰܝ̈ܟܽܘܢ: ܘܬܶܒܘ ܒܰܐܪܥܳܐ ܕܝܰܗܒ ܡܳܪܝܳܐ ܠܟܽܘܢ ܘܠܰܐܒܳܗܰܝ̈ܟܽܘܢ: ܡܶܢ ܥܳܠܰܡ ܘܰܥܕܰܡܳܐ ܠܥܳܠܰܡ.
6 ܘܠܳܐ ܬܺܐܙܽܠܘܢ ܒܳܬܰܪ ܐܰܠܳܗ̈ܶܐ ܐ̱ܚܖ̈ܳܢܶܐ: ܠܡܶܦܠܰܚ ܐܶܢܽܘܢ ܘܰܠܡܶܣܓܰܕܪ ܠܗܽܘܢ: ܘܠܳܐ ܬܰܪܓܙܽܘܢܳܢܝ ܒܰܥܒܳܕ ܐܺܝܕܰܝ̈ܟܽܘܢ: ܕܠܳܐ ܐܰܒܐܶܫ ܠܟܽܘܢ.
7 ܘܠܳܐ ܫܡܰܥܬܽܘܢܳܢܝ ܐܳܡܰܪ ܡܳܪܝܳܐ: ܘܰܐܪܓܶܙܬܽܘܢܳܢܝ ܒܰܥܒܳܕ ܐܺܝܕܰܝ̈ܟܽܘܢ ܕܢܶܒܐܶܫ ܠܟܽܘܢ.
8 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܝܳܐ ܨܒܰܐܬ: ܥܰܠ ܕܠܳܐ ܫܡܰܥܬܽܘܢ ܦܶܬܓܳܡܰܝ̈.
9 ܗܳܐ ܡܫܰܕܰܪ ܐ̱ܢܳܐ ܘܕܳܒܰܪ ܐ̱ܢܳܐ ܠܟܽܠܗܶܝܢ ܫܰܖ̈ܒܳܬܳܐ ܕܡܰܠ̈ܟܘܳܬܳܐ ܕܓܰܪܒܝܳܐ ܐܳܡܰܪ ܡܳܪܝܳܐ: ܘܰܠܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ ܥܰܒܕܝ: ܘܰܐܝܬܶܐ ܐܶܢܽܘܢ ܥܰܠ ܐܰܪܥܳܐ ܗܳܕܶܐ ܘܥܰܠ ܥܳܡܽܘܖ̈ܶܝܗ̇: ܘܥܰܠ ܟܽܠܗܽܘܢ ܥܰܡ̈ܡܶܐ ܗܳܠܶܝܢ ܕܒܰܚܕܳܖ̈ܶܝܗ̇: ܘܶܐܚܪܽܘܒ ܐܶܢܽܘܢ: ܘܶܐܥܒܶܕ ܐܶܢܽܘܢ ܠܬܶܡܗܳܐ ܘܰܠܡܰܫܪܽܘܩܺܝܬܳܐ: ܘܰܠܚܽܘܪܒܳܐ ܠܥܳܠܰܡ.
10 ܘܰܐܘܒܶܕ ܡܶܢܗܽܘܢ ܩܳܠܳܐ ܕܰܕܝܳܨܳܐ: ܘܩܳܠܳܐ ܕܚܰܕܽܘܬܳܐ: ܩܳܠܳܐ ܕܚܰܬܢܳܐ ܘܩܳܠܳܐ ܕܟܰܠܬܳܐ: ܩܳܠܳܐ ܕܪܰܚܝܳܐ: ܘܢܽܘܗܪܳܐ ܕܰܫܪܳܓܳܐ.
11 ܘܬܶܗܘܶܐ ܐܰܪܥܳܐ ܗܳܕܶܐ ܟܽܠܗ̇ ܠܚܽܘܪܒܳܐ ܘܰܠܬܶܡܗܳܐ: ܘܢܶܦܠܚܽܘܢ ܥܰܡ̈ܡܶܐ ܗܳܠܶܝܢ ܠܡܰܠܟܳܐ ܕܒܳܒܶܠ ܫܰܒܥܺܝܢ ܫܢܺܝ̈ܢ.
12 ܘܡܳܐ ܕܰܫܠܶܡ̈ܝ ܫܰܒܥܺܝܢ ܫܢܺܝ̈ܢ: ܐܶܦܩܽܘܕ ܥܰܠ ܡܰܠܟܳܐ ܕܒܳܒܶܠ ܘܥܰܠ ܥܰܡܶܗ ܚܰܘ̈ܒܰܝܗܽܘܢ ܐܳܡܰܪ ܡܳܪܝܳܐ: ܘܥܰܠ ܐܰܪܥܳܐ ܕܟܰܠܕܳܝ̈ܶܐ: ܘܶܐܥܒܕܺܝܗ̇ ܠܬܶܡܗܳܐ ܠܥܳܠܰܡ.
13 ܘܰܐܝܬܶܐ ܥܰܠ ܐܰܪܥܳܐ ܗܳܝ: ܟܽܠܗܽܘܢ ܦܶܬܓܳܡ̈ܶܐ ܕܶܐܡܪܶܬ ܥܠܶܝܗ̇: ܟܽܠ ܡܶܕܶܡ ܕܰܟܬܺܝܒ ܒܣܶܦܪܳܐ ܗܳܢܳܐ: ܕܶܐܬܢܰܒܺܝ ܐܶܪܰܡܝܳܐ ܥܰܠ ܟܽܠܗܽܘܢ ܥܰܡ̈ܡܶܐ.
14 ܡܶܛܽܠ ܕܫܰܥܒܶܕܘ ܐܶܢܽܘܢ ܐܳܦ ܠܗܽܘܢ: ܥܰܡ̈ܡܶܐ ܣܰܓܺܝ̈ܐܶܐ: ܘܡܰܠ̈ܟܶܐ ܪܰܘܖ̈ܒܶܐ: ܘܶܐܦܪܽܘܥ ܐܶܢܽܘܢ ܐܰܝܟ ܦܶܥܠܗܽܘܢ: ܘܰܐܝܟ ܥܒܳܕܳܐ ܕܺܐܝܕܰܝ̈ܗܽܘܢ.
15 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܣܰܒ ܟܳܣܳܐ ܕܚܰܡܪܳܐ ܕܚܶܡܬܳܐ ܗܳܕܶܐ ܡܶܢ ܐܺܝܕܝ: ܘܰܐܫܩܳܝܗܝ ܠܟܽܠܗܽܘܢ ܥܰܡ̈ܡܶܐ ܐܰܝܠܶܝܢ ܕܰܡܫܰܕܰܪ ܐ̱ܢܳܐ ܠܳܟ ܥܠܰܝܗܽܘܢ.
16 ܘܢܶܫܬܽܘܢ ܘܢܶܬܘܪܽܘܢ: ܘܢܶܬܛܰܪܦܽܘܢ: ܡܶܢ ܩܕܳܡ ܚܰܪܒܳܐ ܕܰܡܫܰܕܰܪ ܐ̱ܢܳܐ ܒܰܝܢܳܬܗܽܘܢ.
17 ܘܢܶܣܒܶ݀ܬ ܟܳܣܳܐ ܡܶܢ ܐܺܝܕܶܗ ܕܡܳܪܝܳܐ: ܘܰܐܫܩܺܝ݀ܬ ܠܟܽܠܗܽܘܢ ܥܰܡ̈ܡܶܐ ܕܫܰܕܪܰܢܝ ܡܳܪܝܳܐ ܥܠܰܝܗܽܘܢ.
18 ܠܽܐܘܪܺܫܠܶܡ ܘܰܠܩܽܘܖ̈ܝܳܐ ܕܺܝܗܽܘܕܳܐ: ܘܰܠܡܰܠܟܶܝ̈ܗ̇ ܘܰܠܪܰܘܪܒܳܢܶܝܗ̇: ܠܡܶܥܒܰܕ ܐܶܢܽܘܢ ܠܚܽܘܪܒܳܐ ܘܰܠܬܶܡܗܳܐ: ܘܰܠܡܰܫܪܽܘܩܺܝܬܳܐ ܥܕܰܡܳܐ ܠܝܰܘܡܳܢܳܐ.
19 ܠܦܶܪܥܽܘܢ ܡܰܠܟܳܐ ܕܡܶܨܪܶܝܢ ܘܰܠܟܽܠܗܽܘܢ ܥܰܒܕܰܘ̈ܗܝ: ܘܰܠܪܰܘܖ̈ܒܳܢܰܘܗܝ ܘܰܠܟܽܠܶܗ ܥܰܡܶܗ.
20 ܘܰܠܟܽܠܗܽܘܢ ܬܚܽܘܡܰܘ̈ܗܝ: ܘܠܟܽܠܗܽܘܢ ܡܰܠ̈ܟܶܐ ܕܰܐܪܥܳܐ ܕܥܽܘܨ: ܘܰܠܟܽܠܗܽܘܢ ܡܰܠ̈ܟܶܐ ܕܰܐܪܥܳܐ ܕܰܦܶܠܫܬܳܝ̈ܶܐ: ܘܠܰܐܫܩܳܠܽܘܢ ܘܰܠܥܳܐܙܳܐ: ܘܰܠܥܶܩܪܽܘܢ ܘܰܠܫܰܪܟܳܐ ܕܰܐܫܕܽܘܕ.
21 ܘܠܰܐܕܽܘܡ ܘܰܠܡܽܘܐܳܒ ܘܠܰܒܢܰܝ̈ ܥܰܡܽܘܢ.
22 ܘܰܠܟܽܠܗܽܘܢ ܡܰܠ̈ܟܶܐ ܕܨܽܘܪ: ܘܰܠܟܽܠܗܽܘܢ ܡܰܠ̈ܟܶܐ ܕܨܰܝܕܳܢ: ܘܰܠܡܰܠ̈ܟܶܐ ܕܓܳܙܖ̈ܳܬܳܐ ܕܰܒܥܶܒܪܳܐ ܕܝܰܡܳܐ.
23 ܘܰܠܕܳܪܳܢ: ܘܰܠܬܰܝܡܢܳܐ: ܘܰܠܒܽܘܙ: ܘܰܠܟܽܠܗܽܘܢ ܩܨܺܝ̈ܨܰܝ ܦܰܐܬܳܐ.
24 ܘܰܠܟܽܠܗܽܘܢ ܡܰܠ̈ܟܶܐ ܕܰܡܬܰܚܡܺܝܢ ܚܰܕ ܥܰܡ ܚܰܕ: ܘܰܠܟܽܠܗܽܘܢ ܡܰܠ̈ܟܶܐ ܕܥܰܖ̈ܰܒܳܝܶܐ ܕܰܫܪܶܝܢ ܒܡܰܕܒܪܳܐ.
25 ܘܰܠܟܽܠܗܽܘܢ ܡܰܠ̈ܟܶܐ ܕܙܰܡܪܳܢ ܘܰܠܟܽܠܗܽܘܢ ܡܰܠ̈ܟܶܐ ܕܥܺܝܠܰܡ: ܘܰܠܟܽܠܗܽܘܢ ܡܰܠ̈ܟܶܐ ܕܡܳܕܰܝ.
26 ܘܠܟܽܠܗܽܘܢ ܡܰܠ̈ܟܶܐ ܕܓܰܪܒܝܳܐ ܕܪܰܚܺܝܩܺܝܢ ܘܰܕܩܰܪܺܝܒܺܝܢ ܓܒܰܪ ܠܚܰܒܪܶܗ: ܘܰܠܟܽܠܗܶܝܢ ܡܰܠܟܘ̈ܳܬܳܐ ܕܺܐܝܬ ܥܰܠ ܐܰܦܰܝ̈ ܐܰܪܥܳܐ ܟܽܠܳܗ̇: ܘܡܰܠܟܳܐ ܐܰܪܺܝܫܟܳܝܳܐ ܢܶܫܬܶܐ ܒܳܬܰܪܗܽܘܢ.
27 ܘܶܐܡܰܪ ܠܗܽܘܢ ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܐܶܫܬܰܘ ܘܰܪܘܰܘ ܘܶܐܬܛܰܪܰܦܘ ܘܦܶܠܘ ܘܠܳܐ ܬܩܽܘܡܽܘܢ: ܡܶܢ ܩܕܳܡ ܚܰܪܒܳܐ ܕܰܡܫܰܕܰܪ ܐ̱ܢܳܐ ܒܰܝܢܳܬܟܽܘܢ.
28 ܘܶܐܠܳܐ ܢܶܨܒܽܘܢ ܠܡܶܣܰܒ ܟܳܣܳܐ ܡܶܢ ܐܺܝܕܳܟ ܠܡܶܫܬܳܐ: ܐܶܡܰܪ ܠܗܽܘܢ: ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܡܶܫܬܳܐ ܬܶܫܬܽܘܢ.
29 ܡܶܛܽܠ ܕܗܳܐ ܩܪܺܝܬܳܐ ܕܶܐܬܩܪܺܝ ܫܶܡܝ ܥܠܶܝܗ̇: ܡܶܢܗ̇ ܡܫܰܪܶܐ ܐ̱ܢܳܐ ܠܡܰܒܐܳܫܽܘ ܠܳܗ̇: ܘܰܐܢ̱ܬܽܘܢ ܡܶܙܟܳܐ ܬܶܙܟܽܘܢ: ܠܳܐ ܬܶܙܟܽܘܢ: ܡܶܛܽܠ ܕܚܰܪܒܳܐ ܩܳܪܶܐ ܐ̱ܢܳܐ ܥܰܠ ܟܽܠܗܽܘܢ ܥܳܡܽܘܖ̈ܶܝܗ̇ ܕܰܐܪܥܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ.
30 ܘܰܐܢ̱ܬ ܬܶܬܢܰܒܶܐ ܥܠܰܝܗܽܘܢ ܟܽܠܗܽܘܢ ܦܶܬܓ̈ܳܡܶܐ ܗܳܠܶܝܢ: ܘܬܺܐܡܰܪ ܠܗܽܘܢ: ܡܳܪܝܳܐ ܡܶܢ ܪܰܘܡܳܐ ܢܶܢܗܰܡ: ܘܡܶܢ ܡܰܥܡܪܳܐ ܕܩܽܘܕܫܶܗ ܢܶܬܶܠ ܩܳܠܶܗ: ܡܶܢܗܰܡ ܢܶܢܗܰܡ ܥܰܠ ܕܰܝܪܶܗ: ܝܳܗܳܝ ܝܳܗܳܝ ܐܰܝܟ ܥܳܨܽܘܪܳܐ ܢܶܥܢܶܐ: ܥܰܠ ܟܽܠܗܽܘܢ ܥܳܡܽܘܖ̈ܶܝܗ̇ ܕܰܐܪܥܳܐ.
31 ܡ̣ܛܳܐ ܪܓܽܘܫܝܳܐ ܥܕܰܡܳܐ ܠܣܰܘ̈ܦܶܝܗ̇ ܕܰܐܪܥܳܐ: ܡܶܛܽܠ ܕܕܺܝܢܳܐ ܠܡܳܪܝܳܐ ܥܰܡ ܥܰܡ̈ܡܶܐ: ܘܕܳܐܶܢ ܗ̱ܘ ܠܟܽܠ ܒܣܰܪ: ܘܖ̈ܰܫܺܝܥܶܐ ܐܰܫܠܶܡ ܐܶܢܽܘܢ ܠܚܰܪܒܳܐ: ܐܳܡܰܪ ܡܳܪܝܳܐ.
32 ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܗܳܐ ܒܺܝܫܬܳܐ ܢܳܦܩܳܐ ܡܶܢ ܥܰܡܳܐ ܠܥܰܡܳܐ: ܘܥܰܠܥܳܠܳܐ ܪܰܒܬܳܐ ܬܕܽܘܠ ܡܶܢ ܣܰܘ̈ܦܶܝܗ̇ ܕܰܐܪܥܳܐ.
33 ܘܢܶܗܘܽܘܢ ܩܛܺܝܠܰܘ̈ܗܝ ܕܡܳܪܝܳܐ ܒܝܰܘܡܳܐ ܗܰܘ: ܡܶܢ ܣܰܘ̈ܦܶܝܗ̇ ܕܰܐܪܥܳܐ ܘܰܥܕܰܡܳܐ ܠܣܰܘ̈ܦܶܝܗ̇ ܕܰܐܪܥܳܐ: ܠܳܐ ܢܰܝܠܠܽܘܢ ܘܠܳܐ ܢܰܪܩܕܽܘܢ: ܘܠܳܐ ܢܶܒܟܽܘܢ ܥܠܰܝܗܽܘܢ: ܘܠܳܐ ܢܶܬܟܰܢܫܽܘܢ ܘܠܳܐ ܢܶܬܩܰܒܪܽܘܢ: ܐܶܠܳܐ ܐܰܝܟ ܙܶܒܠܳܐ ܥܰܠ ܐܰܦܰܝ̈ ܐܰܪܥܳܐ ܢܶܗܘܽܘܢ.
34 ܐܰܝܠܶܠܘ ܖ̈ܳܥܰܘܳܬܳܐ ܘܰܐܙܥܶܩܘ: ܘܶܐܬܦܰܠܦܰܠܘ ܥܰܫܺܝܢܰܝ̈ ܥܳܢ̈ܳܐ: ܕܰܡܠܰܘ ܝܰܘ̈ܡܳܬܟܽܘܢ ܠܩܶܛܠܳܐ: ܘܬܶܬܒܽܘܢ ܘܬܶܦܠܽܘܢ ܐܰܝܟ ܡܳܐܢܰܝ̈ ܪܶܓܬܳܐ.
35 ܘܢܺܐܒܰܕ ܒܶܝܬ ܥܪܽܘܩܝܳܐ ܡܶܢ ܖ̈ܳܥܰܘܳܬܳܐ: ܘܦܽܘܠܳܛܳܐ ܡܶܢ ܕܶܟܖ̈ܶܐ ܕܥܳܢ̈ܳܐ.
36 ܩܳܠ ܙܥܳܩܬܳܐ ܕܖ̈ܳܥܰܘܳܬܳܐ: ܘܺܝܠܶܠܬܳܐ ܕܕܶܟܖ̈ܶܐ ܕܥܳܢ̈ܳܐ ܕܒܰܙ ܡܳܪܝܳܐ ܡܰܖ̈ܥܝܳܬܗܽܘܢ.
37 ܘܢܶܬܬܰܒܖ̈ܳܢ ܕܰܝܖ̈ܶܐ ܕܰܫܠܳܡܳܐ: ܡܶܢ ܩܕܳܡ ܚܶܡܬܳܐ ܕܪܽܘܓܙܶܗ ܕܡܳܪܝܳܐ.
38 ܡܶܛܽܠ ܕܰܫ̣ܒܰܩܘ ܕܰܝܪܶܗ: ܐܰܝܟ ܐܰܪܝܳܐ ܕܫܳܒܶܩ ܡܰܪܒܽܘܥܺܝܬܶܗ: ܡܶܛܽܠ ܕܰܗܘܳܬ ܐܰܪܥܗܽܘܢ ܠܚܽܘܪܒܳܐ ܡܶܢ ܩܕܳܡ ܪܽܘܓܙܶܗ ܕܡܳܪܝܳܐ: ܘܡܶܢ ܩܕܳܡ ܚܶܡܬܳܐ ܕܪܽܘܓܙܶܗ.