Jeremiah 49
The Book of Jeremiah
܀ ܐܪܡܝܐ ܡܛ ܀
1 ܥܰܠ ܒܢ̈ܝ ܥܡܽܘܢ. ܗܳܟܰܢܳܐ ܐܳܡܰܪ ܡܳܪܝܳܐ: ܒܢܰܝ̈ܳܐ ܠܰܝܬ ܠܺܝܣܪܳܐܶܝܠ: ܐܰܘ ܝܳܪܽܘܬܳܐ ܠܰܝܬ ܠܶܗ: ܡܶܛܽܠ ܡܳܢܳܐ ܝܺܪܶܬ ܡܰܠܟܽܘܡ ܠܓܳܕ: ܘܥܰܡܶܗ ܒܩܽܘܖ̈ܝܳܗ̇ ܝܺܬܶܒ.
2 ܡܶܛܽܠ ܗܳܢܳܐ ܗܳܐ ܝܰܘ̈ܡܳܬܳܐ ܐܳܬܶܝܢ ܐܳܡܰܪ ܡܳܪܝܳܐ: ܘܰܐܫܡܰܥ ܥܰܠ ܪܰܒܰܬ ܕܰܒܢܰܝ̈ ܥܰܡܽܘܢ ܩܳܠܳܐ ܕܰܩܪܳܒܳܐ: ܘܬܶܗܘܶܐ ܠܬܶܠܳܐ ܚܰܪܒܳܐ: ܘܟܰܦܖ̈ܽܘܢܶܝܗ̇ ܒܢܽܘܪܳܐ ܢܺܐܩܕܽܘܢ: ܘܢܺܐܪܰܬ ܝܺܣܪܳܐܶܝܠ ܠܝܳܖ̈ܽܘܬܰܘܗܝ ܐܳܡܰܪ ܡܳܪܝܳܐ.
3 ܬܰܝܠܶܠ ܚܶܫܒܽܘܢ ܡܶܛܽܠ ܕܶܐܬܬܰܒܪܰܬ ܥܳܝ: ܒܰܓܶܢܘ ܟܰܦܖ̈ܽܘܢܶܝܗ̇ ܕܪܰܒܰܬ: ܐܶܬܟܰܒܢܘ ܣܰܩ̈ܶܐ: ܐܰܪܩܶܕܘ ܘܶܐܬܟܰܬܫܘ ܒܰܚ̈ܕܳܕܶܐ: ܡܶܛܽܠ ܕܡܰܠܟܽܘܡ ܢܺܐܙܰܠ ܒܰܫܒܺܝܬܳܐ: ܘܟܽܘܡܖ̈ܰܘܗܝ ܘܪܰܘܖ̈ܒܳܢܰܘܗܝ ܐܰܟܚܕܳܐ ܐܳܡܰܪ ܡܳܪܝܳܐ.
4 ܡܳܢܳܐ ܡܶܫܬܰܒܚܰܬܝ ܒܥܽܘܡܩܰܝ̈ܟܝ: ܘܰܬܟܺܝܠܰܬܝ ܥܰܠ ܐܽܘܠܽܘܢܰܝ̈ܟܝ ܒܰܪܬܳܐ ܚܰܒܺܝܒܬܳܐ: ܕܰܬܟܺܝܠܳܐ ܥܰܠ ܓܰܙܶܝ̈ܗ̇ ܘܳܐܡܪܳܐ ܡܰܢܽܘ ܢܺܐܬܶܐ ܥܠܰܝ.
5 ܗܳܐ ܡܰܝܬܶܐ ܐ̱ܢܳܐ ܥܠܰܝܟܝ ܕܶܚܠܬܳܐ: ܡܶܢ ܟܽܠܗܽܘܢ ܚܕܳܖ̈ܰܝܟܝ ܐܳܡܰܪ ܡܳܪܝܳܐ ܚܰܝܠܬܳܢܳܐ ܘܶܐܒܰܕܰܪ ܐܶܢܽܘܢ ܓܒܰܪ ܠܓܰܒܶܗ: ܘܠܰܝܬ ܕܰܡܟܰܢܶܫ ܠܰܡܒܰܕܖ̈ܶܐ.
6 ܘܒܳܬܰܪܟܶܢ ܐܰܗܦܶܟ ܫܒܺܝܬܳܐ ܕܰܒܢܰܝ̈ ܥܰܡܽܘܢ: ܐܳܡܰܪ ܡܳܪܝܳܐ.
7 ܥܰܠ ܐܰܕܽܘܡ. ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ: ܠܰܝܬ ܬܽܘܒ ܚܶܟܡܬܳܐ ܒܬܰܝܡܰܢ: ܐܶܒܰܕ ܡܶܠܟܳܐ ܡܶܢ ܣܰܟܽܘܠܬܳܢ̈ܶܐ: ܐܶܫܬܰܩܠܰܬ ܚܶܟܡܰܬܗܽܘܢ.
8 ܥܪܰܩܘ ܘܶܐܬܗܦܶܟܘ: ܘܥ̣ܰܡܶܩܘ ܠܡܶܬܰܒ ܥܳܡܽܘܖ̈ܶܐ ܕܕܳܪܳܢ: ܡܶܛܽܠ ܕܰܬܒܳܪܶܗ ܕܥܺܣܽܘ ܐܰܝܬܺܝܬ ܥܠܰܘܗܝ: ܙܰܒܢܳܐ ܕܦܽܘܩܕܳܢܶܗ ܐܳܡܰܪ ܡܳܪܝܳܐ.
9 ܐܶܢ ܩܳܛܽܘܦ̈ܶܐ ܐܶܬܰܘ ܥܠܰܝܟ: ܠܳܐ ܫܳܒܩܺܝܢ ܗܘܰܘ ܒܳܥܽܘܪܳܐ: ܘܶܐܢ ܓܰܢܳܒ̈ܶܐ: ܒܠܺܠܝܳܐ ܚܰܒܶܠܘ ܐܰܝܟ ܕܰܨܒܰܘ.
10 ܐܶܢܳܐ ܓܶܝܪ ܒܨܺܝܬ ܠܥܺܣܽܘ: ܘܰܓܠܺܝܬ ܡܣܰܬܖ̈ܳܬܶܗ: ܘܶܐܬܛܰܫܺܝ ܘܠܳܐ ܐܶܫܬܟܰܚ: ܘܶܐܬܒܰܕܰܪ ܙܰܪܥܶܗ: ܘܰܐܚܰܘ̈ܗܝ ܘܰܫܒܳܒܰܘ̈ܗܝ ܘܠܰܝܬ ܐܶܢܽܘܢ.
11 ܫܒܽܘܩ ܝܰܬܡܰܝ̈ܟ ܐܶܢܳܐ ܐܰܚܶܐ: ܘܰܐܖ̈ܡܠܳܬܳܟ ܥܠܰܝ ܢܶܬܬܰܟ̈ܠܳܢ.
12 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ: ܗܳܐ ܕܠܳܐ ܙܳܕܶܩ ܗ̱ܘܳܐ ܠܗܽܘܢ ܠܡܶܫܬܳܐ ܟܳܣܳܐ ܐܶܫܬܺܝܘ: ܘܰܐܢ̱ܬ ܣܒܰܪܬ ܕܬܶܙܟܶܐ ܠܳܐ ܬܶܙܟܶܐ: ܐܶܠܳܐ ܐܳܦ ܬܶܫܬܶܐ ܟܳܣܳܐ.
13 ܡܶܛܽܠ ܕܒܺܝ ܝܺܡܺܝ݀ܬ ܐܳܡܰܪ ܡܳܪܝܳܐ: ܕܰܠܬܶܡܗܳܐ: ܘܰܠܚܽܘܪܒܳܐ: ܘܰܠܚܶܣܕܳܐ: ܘܰܠܠܰܘܛܬܳܐ: ܬܶܗܘܶܐ ܒܽܘܨܳܪ. ܘܟܽܠܗܶܝܢ ܩܽܘܖ̈ܝܳܗ̇ ܠܚܽܘܪܒܳܐ ܢܶܗܘ̈ܝܳܢ ܠܥܳܠܰܡ.
14 ܛܶܒܳܐ ܫܶܡܥܶ݀ܬ ܡܶܢ ܩܕܳܡ ܡܳܪܝܳܐ: ܘܺܐܝܙܓܰܕܳܐ ܠܥܰܡ̈ܡܶܐ ܐܶܫܬܠܰܚ: ܩܽܘܡܘ ܢܶܣܰܩ ܥܠܶܝܗ̇ ܠܰܩܪܳܒܳܐ.
15 ܡܶܛܽܠ ܕܗܳܐ ܙܥܽܘܪܳܐ ܝܰܗܒܬܳܟ ܒܥܰܡ̈ܡܶܐ: ܘܫܺܝܛܳܐ ܒܶܝܬ ܒܢܰܝ̈ܢܳܫܳܐ.
16 ܥܰܘܠܳܟ ܐܰܛܥܝܳܟ ܘܫܽܘܒܗܳܪܶܗ ܕܠܶܒܳܟ: ܕܰܫܪܶܐ ܒܰܫܩܺܝܦܳܐ ܕܟܺܐܦܳܐ: ܘܰܐܚܺܝܕ ܒܪܰܘܡܳܐ ܕܪܳܡܬܳܐ: ܘܳܐܡܰܪ ܒܠܶܒܶܗ ܡܰܢܽܘ ܢܰܚܬܰܢܝ ܠܰܐܪܥܳܐ. ܐܶܢ ܒܶܝܬ ܟܰܘ̈ܟܒܶܐ ܬܣܺܝܡ ܩܶܢܳܟ: ܘܶܐܢ ܬܪܺܝܡ ܐܰܝܟ ܢܶܫܪܳܐ ܩܶܢܳܟ: ܡܶܢ ܬܰܡܳܢ ܐܰܚܬܳܟ ܐܳܡܰܪ ܡܳܪܝܳܐ.
17 ܘܬܶܗܘܶܐ ܐܰܕܽܘܡ ܠܚܽܘܪܒܳܐ: ܘܟܽܠ ܕܢܶܥܒܰܪ ܥܠܶܝܗ̇: ܢܶܬܡܰܗ ܘܢܰܫܪܶܩ ܥܰܠ ܟܽܠܗܶܝܢ ܡܰܚ̈ܘܳܬܳܗ̇.
18 ܘܬܶܬܗܦܶܟ ܐܰܝܟ ܕܰܗܦܰܟ ܐܰܠܳܗܳܐ ܠܰܣܕܽܘܡ ܘܰܠܥܳܡܽܘܪܳܐ ܐܳܡܰܪ ܡܳܪܝܳܐ: ܠܳܐ ܢܶܬܶܒ ܬܰܡܳܢ ܓܒܰܪ: ܘܠܳܐ ܢܶܥܡܰܪ ܬܰܡܳܢ ܒܰܪܢܳܫ.
19 ܗܳܐ ܐܰܝܟ ܐܰܪܝܳܐ ܢܶܣܰܩ ܡܶܢ ܥܽܘܫܢܳܐ ܕܝܽܘܪܕܢܳܢ ܠܕܰܝܪܳܐ ܕܳܐܬܳܢ: ܘܒܰܥܓܰܠ ܐܶܪܕܽܘܦ ܐܶܢܽܘܢ ܡܶܢܳܗ̇: ܘܓܰܕܽܘ̈ܕܶܐ ܥܠܶܝܗ̇ ܐܶܦܩܽܘܕ: ܡܰܢܽܘ ܓܶܝܪ ܐܰܟܘܳܬܝ: ܐܰܘ ܡܰܢܽܘ ܢܣܰܗܕܰܢܝ: ܐܰܘ ܐܰܝܢܳܐ ܪܳܥܝܳܐ ܕܰܢܩܽܘܡ ܩܕܳܡܝ.
20 ܡܶܛܽܠ ܗܳܢܳܐ ܫܡܰܥܘ ܬܰܪܥܺܝܬܶܗ ܕܡܳܪܝܳܐ ܕܶܐܬܪܰܥܺܝ ܥܰܠ ܐܰܕܽܘܡ: ܘܡܰܚܫܰܒܬܶܗ ܕܶܐܬܚܰܫܰܒ ܥܰܠ ܝܳܬܒܰܝ̈ ܬܰܝܡܰܢ: ܕܢܶܓܪܽܘܢ ܐܶܢܽܘܢ ܒܨܺܝܖ̈ܶܐ ܕܥܳܢ̈ܳܐ: ܘܢܰܨܕܽܘܢ ܥܠܝܗܽܘܢ ܕܰܝܪܗܽܘܢ.
21 ܡܶܢ ܩܳܠܳܐ ܕܡܰܦܽܘܠܬܗܽܘܢ ܙܳܥܰܬ ܐܰܪܥܳܐ: ܝܺܠܶܠܬܳܗ̇ ܡܶܢ ܝܰܡܳܐ ܕܣܽܘܦ ܐܶܫܬܡܰܥ ܩܳܠܳܗ̇.
22 ܗܳܐ ܐܰܝܟ ܢܶܫܪܳܐ ܘܰܢܛܽܘܣ: ܘܢܶܦܪܽܘܣ ܓܶܦܰܘ̈ܗܝ ܥܰܠ ܒܽܘܨܳܪ: ܘܢܶܗܘܶܐ ܠܶܒܗܽܘܢ ܕܓܰܢ̱ܒܳܖ̈ܰܝ ܐܰܕܽܘܡ ܒܝܰܘܡܳܐ ܗܰܘ: ܐܰܝܟ ܠܶܒܳܐ ܕܰܐܢ̱ܬܬܳܐ ܕܰܡܚܰܒܠܳܐ ܠܡܺܐܠܰܕ.
23 ܥܰܠ ܕܰܪܡܣܽܘܩ ܒܶܗܬܰܬ ܚܡܳܬ ܘܰܪܦܳܕ: ܡܶܛܽܠ ܕܰܫܡܽܘܥܬܳܐ ܒܺܝܫܬܳܐ ܫ̣ܡܰܥܘ ܘܶܐܬܬܰܒܰܪܘ: ܒܝܰܡܳܐ ܕܶܚܠܬܳܗ̇: ܘܰܢܝܳܚܳܐ ܠܳܐ ܐܶܫܟܚܰܬ.
24 ܐܶܬܪܰܦܝܰܬ ܕܰܪܡܣܽܘܩ ܘܶܐܬܦܰܢܝܰܬ ܠܡܶܥܪܰܩ: ܘܰܪܬܺܝܬܳܐ ܐܰܚܕܳܗ̇: ܘܥܳܩܬܳܐ ܘܚܶܒ̈ܠܶܐ ܐܰܚܕܽܘܗ̇ ܐܰܝܟ ܕܝܳܠܶܕܬܳܐ.
25 ܐܰܝܟܰܢܳܐ ܠܳܐ ܐܶܫܬܰܒܩܰܬ ܩܪܺܝܬܳܐ ܕܬܶܫܒܽܘܚܬܳܐ ܩܪܺܝܬܳܐ ܕܚܰܕܽܘܬܳܐ.
26 ܡܶܛܽܠ ܗܳܢܳܐ ܢܶܦܠܽܘܢ ܓܰܕܽܘ̈ܕܶܐ ܒܫܽܘܩܶܝ̈ܗ̇: ܘܟܽܠܗܽܘܢ ܓܰܒܖ̈ܶܝܗ̇ ܩܖ̈ܰܒܬܳܢܶܐ ܢܶܫܬܰܬܩܽܘܢ.
27 ܒܝܰܘܡܳܐ ܗܰܘ ܐܳܡܰܪ ܡܳܪܝܳܐ ܚܰܝܠܬܳܢܳܐ: ܐܶܫܒܽܘܩ ܢܽܘܪܳܐ ܒܫܽܘܩܶܝ̈ܗ̇ ܕܕܰܪܡܣܽܘܩ: ܘܬܶܐܟܽܘܠ ܣܳܚܖ̈ܳܬܶܗ ܕܒܰܪ ܗܳܕܳܕ.
28 ܕܥܰܠ ܩܶܕܳܪ ܘܥܰܠ ܡܰܠ̈ܟܘܳܬܳܐ ܕܚܳܨܽܘܪ ܕܩܰܛܶܠ ܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ. ܗܳܟܰܢܳܐ ܐܳܡܰܪ ܡܳܪܝܳܐ: ܩܽܘܡܘ ܣܰܩܘ ܥܰܠ ܩܶܕܳܪ: ܘܒܽܘܙܘ ܠܰܒܢܰܝ̈ ܡܰܕܢܚܳܐ.
29 ܡܰܫ̈ܟܢܰܝܗܽܘܢ ܘܥܳܢ̈ܗܽܘܢ ܢܶܣܒܽܘܢ: ܘܝܳܖ̈ܺܝܥܳܬܗܽܘܢ ܘܟܽܠܗܽܘܢ ܡܳܐܢܰܝ̈ܗܽܘܢ ܘܓܰܡܠܰܝ̈ܗܽܘܢ ܢܶܕܒܪܽܘܢ ܠܗܽܘܢ: ܘܢܶܩܪܽܘܢ ܥܠܰܝܗܽܘܢ ܡܓܰܖ̈ܝܳܢܶܐ ܡܶܢ ܚܕܳܖ̈ܰܝܗܽܘܢ.
30 ܥܪܰܩܘ ܘܢܳܕܘ: ܘܥ̣ܰܡܶܩܘ ܠܡܶܬܰܒ ܝܳܬܒܰܝ̈ ܚܳܨܽܘܪ ܐܳܡܰܪ ܡܳܪܝܳܐ: ܡܶܛܽܠ ܕܶܐܬܡܰܠܰܟ ܥܠܰܝܗܽܘܢ ܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ: ܘܶܐܬܚܰܫܰܒ ܥܠܰܝܗܽܘܢ ܡܰܚܫܰܒܬܳܐ: ܘܶܐܡܰܪ.
31 ܩܽܘܡܘ ܣܰܩܘ ܥܰܠ ܥܰܡܳܐ ܟܰܗܺܝܢܳܐ ܕܝܳܬܶܒ ܒܫܶܠܝܳܐ ܐܳܡܰܪ ܡܳܪܝܳܐ: ܕܠܳܐ ܬܰܖ̈ܥܶܐ ܘܠܳܐ ܣܽܘܟܖ̈ܶܐ ܠܶܗ: ܘܒܰܠܚܽܘܕܰܘܗܝ ܝܳܬܶܒ.
32 ܘܢܶܗܘ̈ܝܳܢ ܓܰܡ̈ܠܰܝܗܽܘܢ ܠܒܶܙܬܳܐ: ܘܣܽܘܓܰܐܬ ܩܶܢܝܳܢܗܽܘܢ ܠܰܕܒܳܪܬܳܐ: ܘܶܐܕܪܶܐ ܐܶܢܽܘܢ ܒܟܽܠ ܪܽܘܚ ܒܶܝܬ ܩܨܺܝܨܰܝ̈ ܦܰܐܬܳܐ: ܘܡܶܢ ܟܽܠܗܽܘܢ ܥܶܒܖ̈ܰܝܗܽܘܢ ܐܰܝܬܶܐ ܬܒܳܪܗܽܘܢ ܐܳܡܰܪ ܡܳܪܝܳܐ.
33 ܘܬܶܗܘܶܐ ܚܳܨܽܘܪ ܡܰܥܡܪܳܐ ܠܝܳܪܽܘܖ̈ܶܐ: ܘܚܽܘܪܒܳܐ ܥܕܰܡܳܐ ܠܥܳܠܰܡ: ܠܳܐ ܢܶܬܶܒ ܬܰܡܳܢ ܓܒܰܪ: ܘܠܳܐ ܢܶܥܡܰܪ ܬܰܡܳܢ ܒܰܪܢܳܫ. ܥܰܠ ܥܺܝܠܰܡ
34 ܦܶܬܓܳܡܶܗ ܕܡܳܪܝܳܐ ܕܰܗܘܳܐ ܥܰܠ ܐܶܪܰܡܝܳܐ ܢܒܺܝܳܐ ܕܢܶܬܢܰܒܶܐ ܥܰܠ ܥܺܝܠܰܡ: ܒܪܺܝܫ ܡܰܠܟܽܘܬܶܗ ܕܨܶܕܰܩܝܳܐ ܡܰܠܟܳܐ ܕܺܝܗܽܘܕܳܐ.
35 ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ: ܗܳܐ ܬܳܒܰܪ ܐ̱ܢܳܐ ܩܶܫܬܶܗ ܕܥܺܝܠܰܡ ܪܺܝܫ ܓܰܢ̱ܒܳܪܽܘܬܗܽܘܢ.
36 ܘܰܐܝܬܶܐ ܥܰܠ ܥܺܝܠܰܡ ܐܰܪܒܰܥ ܖ̈ܽܘܚܶܐ. ܡܶܢ ܐܰܪܒܰܥ ܙܳܘ̈ܝܳܬ ܫܡܰܝܳܐ: ܘܶܐܒܰܕܰܪ ܐܶܢܽܘܢ ܒܟܽܠܗܶܝܢ ܖ̈ܽܘܚܳܬܳܐ ܗܳܠܶܝܢ: ܘܠܳܐ ܢܶܗܘܶܐ ܥܰܡܳܐ ܕܠܳܐ ܢܶܗܘܽܘܢ ܬܰܡܳܢ ܡܒܰܕܖ̈ܶܐ ܕܥܺܝܠܰܡ.
37 ܘܶܐܬܒܰܪ ܠܥܺܝܠܰܡ ܩܕܳܡ ܒܥܶܠܕܒܳܒܰܝ̈ܗܽܘܢ: ܘܰܩܕܳܡ ܐܰܝܠܶܝܢ ܕܒܳܥܶܝܢ ܢܰܦܫܗܽܘܢ: ܘܰܐܝܬܶܐ ܥܠܰܝܗܽܘܢ ܒܺܝܫܬܳܐ: ܚܶܡܬܳܐ ܕܪܽܘܓܙܝ ܐܳܡܰܪ ܡܳܪܝܳܐ: ܘܶܐܫܰܕܰܪ ܒܗܽܘܢ ܚܰܪܒܳܐ ܥܕܰܡܳܐ ܕܶܐܓܰܡܰܪ ܐܶܢܽܘܢ.
38 ܘܰܐܪܡܶܐ ܟܽܘܪܣܰܝ ܒܥܺܝܠܰܡ: ܘܰܐܘܒܶܕ ܡܶܢ ܬܰܡܳܢ ܡܰܠ̈ܟܶܐ ܘܫܰܠܺܝܛܳܢ̈ܶܐ ܐܳܡܰܪ ܡܳܪܝܳܐ.
39 ܘܒܰܐ̱ܚܪܳܝܰܬ ܝܰܘ̈ܡܳܬܳܐ ܐܰܗܦܶܟ ܫܒܺܝܬܳܗ̇ ܕܥܺܝܠܰܡ ܐܳܡܰܪ ܡܳܪܝܳܐ.