Jeremiah 34
The Book of Jeremiah
܀ ܐܪܡܝܐ ܠܕ ܀
1 ܦܶܬܓܳܡܳܐ ܕܰܗܘܳܐ ܥܰܠ ܐܶܪܰܡܝܳܐ ܡܶܢ ܩܕܳܡ ܡܳܪܝܳܐ: ܘܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ: ܘܟܽܠܶܗ ܚܰܝܠܶܗ: ܘܟܽܠܗܶܝܢ ܡܰܠܟ̈ܘܳܬܳܐ ܕܰܐܪܥ ܫܽܘܠܛܳܢ ܐܺܝܕܶܗ܆ ܘܟܽܠܗܽܘܢ ܥܰܡ̈ܡܶܐ ܡܶܬܟܰܬܫܺܝܢ ܥܰܠ ܐܽܘܪܺܫܠܶܡ: ܘܥܰܠ ܟܽܠܗܶܝܢ ܩܽܘܖ̈ܝܳܗ̇.
2 ܗܳܟܰܢܳܐ ܐܳܡܰܪ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ: ܙܶܠ ܘܶܐܡܰܪ ܠܨܶܕܰܩܝܳܐ ܡܰܠܟܳܐ ܕܺܝܗܽܘܕܳܐ: ܗܳܟܰܢܳܐ ܐܳܡܰܪ ܡܳܪܝܳܐ: ܗܳܐ ܡܰܫܠܶܡ ܐ̱ܢܳܐ ܠܳܗ̇ ܠܰܩܪܺܝܬܳܐ ܗܳܕܶܐ: ܒܺܐܝܕܶܗ ܕܡܰܠܟܳܐ ܕܒܳܒܶܠ: ܘܢܰܘܩܕܺܝܗ̇ ܒܢܽܘܪܳܐ.
3 ܘܰܐܢ̱ܬ ܠܳܐ ܬܶܬܦܰܠܰܛ ܡܶܢ ܐܺܝܕܰܘ̈ܗܝ: ܐܶܠܳܐ ܡܶܬܬܚܳܕܽܘ ܬܶܬܚܶܕ: ܘܒܺܐܝܕܰܘ̈ܗܝ ܬܶܫܬܠܶܡ. ܘܥܰܝܢܰܝ̈ܟ ܠܥܰܝܢܰܘ̈ܗܝ ܕܡܰܠܟܳܐ ܕܒܳܒܶܠ ܢܶܚܙ̈ܝܳܢ: ܘܦܽܘܡܳܟ ܥܰܡ ܦܽܘܡܶܗ ܢܡܰܠܶܠ: ܘܰܠܒܳܒܶܠ ܬܺܐܙܰܠ.
4 ܒܪܰܡ ܫܡܰܥ ܦܶܬܓܳܡܶܗ ܕܡܳܪܝܳܐ ܨܶܕܰܩܝܳܐ ܡܰܠܟܳܐ ܕܺܝܗܽܘܕܳܐ: ܗܳܟܰܢܳܐ ܐܳܡܰܪ ܡܳܪܝܳܐ ܥܠܰܝܟ: ܠܳܐ ܬܡܽܘܬ ܒܚܰܪܒܳܐ: ܐܶܠܳܐ ܒܰܫܠܳܡܳܐ ܬܡܽܘܬ.
5 ܘܰܐܝܟ ܕܰܐܪܩܶܕܘ ܥܰܠ ܐܰܒܳܗܰܝ̈ܟ ܡܰܠ̈ܟܶܐ ܩܰܕܡܳܝ̈ܶܐ ܕܰܗܘܰܘ ܩܕܳܡܝܟ܆ ܗܳܟܰܢܳܐ ܢܰܪܩܕܽܘܢ ܥܠܰܝܟ: ܘܳܝ ܡܳܪܳܐ ܢܰܪܩܕܽܘܢ ܥܠܰܝܟ: ܡܶܛܽܠ ܕܦܶܬܓܳܡܳܐ ܗܳܢܳܐ ܡܰܠܠܶܬ ܐܳܡܰܪ ܡܳܪܝܳܐ.
6 ܘܶܐܡܰܪ ܐܶܪܰܡܝܳܐ ܠܨܶܕܰܩܝܳܐ ܡܰܠܟܳܐ ܕܺܝܗܽܘܕܳܐ: ܟܽܠܗܽܘܢ ܦܶܬܓܳܡ̈ܶܐ ܗܳܠܶܝܢ ܒܽܐܘܪܺܫܠܶܡ.
7 ܘܚܰܝܠܳܐ ܕܡܰܠܟܳܐ ܕܒܳܒܶܠ ܡܶܬܟܰܬܫܺܝܢ ܥܰܠ ܐܽܘܪܺܫܠܶܡ: ܘܥܰܠ ܟܽܠܗܶܝܢ ܩܽܘܖ̈ܝܳܐ ܕܺܝܗܽܘܕܳܐ ܕܶܐܫܬܚܰܪ: ܥܰܠ ܠܟܺܝܫ: ܘܥܰܠ ܥܰܙܩܳܐ. ܡܶܛܽܠ ܕܗܶܢܶܝܢ ܐܶܫܬܚܰܪ ܒܩܽܘܖ̈ܝܳܐ ܕܺܝܗܽܘܕܳܐ ܩܽܘܖ̈ܝܳܐ ܥܰܫܺܝ̈ܢܳܬܳܐ.
8 ܦܶܬܓܳܡܳܐ ܕܰܗܘܳܐ ܥܰܠ ܐܶܪܰܡܝܳܐ ܡܶܢ ܩܕܳܡ ܡܳܪܝܳܐ ܠܡܺܐܡܰܪ: ܡܶܢ ܒܳܬܰܪ ܕܰܐܩܺܝܡ ܡܰܠܟܳܐ ܨܶܕܰܩܝܳܐ ܩܝܳܡܳܐ ܥܰܡ ܟܽܠܶܗ ܥܰܡܳܐ ܕܒܽܐܘܪܺܫܠܶܡ: ܕܢܶܬܩܪܽܘܢ ܡܚܰܪܖ̈ܶܐ.
9 ܕܢܶܫܒܽܘܩ ܓܒܰܪ ܥܰܒܕܶܗ: ܘܰܓܒܰܪ ܐܰܡܬܶܗ ܥܶܒܪܳܝܳܐ ܘܥܶܒܪܳܝܬܳܐ ܒܢܰܝ̈ ܚܺܐܖ̈ܶܐ: ܕܠܳܐ ܢܫܰܥܒܕܽܘܢ ܓܒܰܪ ܠܰܐܚܽܘܗܝ ܝܽܗܘܕܳܝܳܐ.
10 ܘܰܫܡܰܥܘ ܟܽܠܗܽܘܢ ܪܰܘܖ̈ܒܳܢܶܐ ܘܟܽܠܶܗ ܥܰܡܳܐ: ܘܩܰܒܶܠܘ ܥܠܰܝܗܽܘܢ ܕܢܶܫܒܽܘܩ ܓܒܰܪ ܥܰܒܕܶܗ: ܘܰܓܒܰܪ ܐܰܡܬܶܗ ܒܢܰܝ̈ ܚܺܐܖ̈ܶܐ: ܕܠܳܐ ܢܶܦܠܚܽܘܢ ܐܶܢܽܘܢ ܬܽܘܒ. ܘܚܰܪܰܪܘ ܐܶܢܽܘܢ.
11 ܘܰܗܦܰܟܘ ܡܶܢ ܒܳܬܰܪܟܶܢ: ܘܫܰܥܒܶܕܘ ܐܶܢܽܘܢ ܠܰܡܚܰܪܖ̈ܶܐ ܘܰܥ̣ܒܰܕܘ ܐܶܢܽܘܢ ܥܰܒ̈ܕܶܐ.
12 ܘܰܗܘܳܐ ܦܶܬܓܳܡܶܗ ܕܡܳܪܝܳܐ ܥܰܠ ܐܶܪܰܡܝܳܐ ܠܡܺܐܡܰܪ.
13 ܗܳܟܰܢܳܐ ܐܳܡܰܪ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ: ܐܶܢܳܐ ܐܰܩܺܝܡܶ݀ܬ ܩܝܳܡܳܐ ܥܰܡ ܐܰܒܳܗܰܝ̈ܟܽܘܢ: ܒܝܰܘܡܳܐ ܕܰܐܦܩܶ݀ܬ ܐܶܢܽܘܢ ܡܶܢ ܐܰܪܥܳܐ ܕܡܶܨܪܶܝܢ ܡܶܢ ܒܶܝܬ ܥܰܒܕܽܘܬܳܐ ܠܡܺܐܡܰܪ.
14 ܡܶܢ ܒܳܬܰܪ ܫܒܰܥ ܫܢܺܝ̈ܢ: ܬܶܫܒܩܽܘܢ ܓܒܰܪ ܠܰܐܚܽܘܗܝ ܥܶܒܪܳܝܳܐ ܕܢܶܙܕܰܒܰܢ ܠܳܟ: ܘܢܶܦܠܚܳܟ ܫܶܬ ܫܢܺܝ̈ܢ: ܘܬܶܫܒܩܺܝܘܗܝ ܒܰܪ ܚܺܐܖ̈ܶܐ ܡܶܢ ܠܘܳܬܳܟ: ܘܠܳܐ ܫܰܡܥܽܘܢܝ ܐܰܒܳܗܰܝ̈ܟܽܘܢ: ܘܠܳܐ ܨܠܰܘ ܐܶܕܢܗܽܘܢ ܠܘܳܬܝ.
15 ܘܰܗܦܰܟܬܽܘܢ ܐܰܢ̱ܬܽܘܢ ܝܰܘܡܳܢܳܐ: ܘܰܥܒܰܕܬܽܘܢ ܡܶܕܶܡ ܕܫܰܦܺܝܪ ܒܥܰܝ̈ܢܰܝ: ܠܡܶܩܪܳܐ ܚܺܐܪܽܘܬܳܐ ܓܒܰܪ ܠܚܰܒܪܶܗ: ܘܰܐܩܺܝܡܬܽܘܢ ܩܝܳܡܳܐ ܩܕܳܡܝ ܒܒܰܝܬܳܐ ܕܶܐܬܩܪܺܝ ܫܶܡܝ ܥܠܰܘܗܝ.
16 ܘܰܗܦܰܟܬܽܘܢ ܘܛܰܘܶܫܬܽܘܢ ܫܶܡܝ: ܘܰܐܗܦܶܟܬܽܘܢ ܓܒܰܪ ܥܰܒܕܶܗ ܘܰܓܒܰܪ ܐܰܡܬܶܗ ܕܰܫܒܰܩܬܽܘܢ ܒܢܰܝ̈ ܚܺܐܖ̈ܶܐ ܠܢܰܦܫܗܽܘܢ: ܘܟܰܒܶܫܬܽܘܢ ܐܶܢܽܘܢ ܕܢܶܗܘܽܘܢ ܠܟܽܘܢ ܥܰܒ̈ܕܶܐ ܘܰܐܡ̈ܗܳܬܳܐ.
17 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ: ܐܰܢ̱ܬܽܘܢ ܠܳܐ ܫܡܰܥܬܽܘܢܳܢܝ ܠܡܶܩܪܳܐ ܚܺܐܪܽܘܬܳܐ ܓܒܰܪ ܠܚܰܒܪܶܗ܆ ܗܳܐ ܩܳܪܶܐ ܐ̱ܢܳܐ ܠܟܽܘܢ ܚܺܐܪܽܘܬܳܐ ܠܚܰܪܒܳܐ: ܘܰܠܟܰܦܢܳܐ: ܘܰܠܡܰܘܬܳܢܳܐ: ܐܳܡܰܪ ܡܳܪܝܳܐ: ܘܶܐܬܶܠܟܽܘܢ ܠܙܰܘܥܬܳܐ ܠܟܽܠܗܶܝܢ ܡܰܠܟ̈ܘܳܬܳܐ ܕܰܐܪܥܳܐ.
18 ܘܶܐܬܶܠ ܠܓܰܒܖ̈ܶܐ ܕܰܥ̣ܒܰܪܘ ܥܰܠ ܩܝܳܡܝ: ܕܠܳܐ ܐܰܫܰܪܘ ܦܶܬܓܳܡܰܝ̈ ܩܝܳܡܳܐ ܕܰܐܩܺܝܡܘ ܩܕܳܡܝ: ܥܶܓܠܳܐ ܕܰܦ̣ܣܰܩܘ ܠܰܬܪܶܝܢ ܘܰܥ̣ܒܰܪܘ ܒܶܝܬ ܦܶܠܓܰܘ̈ܗܝ.
19 ܪܰܘܖ̈ܒܳܢܶܐ ܕܺܝܗܽܘܕܳܐ ܘܕܽܐܘܪܺܫܠܶܡ: ܘܰܡܗܰܝܡܳܢ̈ܶܐ ܘܟܳܗ̈ܢܶܐ: ܘܟܽܠܶܗ ܥܰܡܳܐ ܕܰܐܪܥܳܐ: ܕܰܥ̣ܒܰܪܘ ܒܶܝܬ ܦܶܠܓܰܘ̈ܗܝ ܕܥܶܓܠܳܐ.
20 ܘܰܐܫܠܶܡ ܐܶܢܽܘܢ ܒܺܐܝܕܳܐ ܕܰܒܥܶܠܕܒܳܒܰܝ̈ܗܽܘܢ: ܘܒܺܐܝܕܳܐ ܕܰܐܝܠܶܝܢ ܕܒܳܥܶܝܢ ܢܰܦܫܗܽܘܢ: ܘܢܶܗܘ̈ܝܳܢ ܫܠܰܕܰܝ̈ܗܽܘܢ ܡܶܐܟܽܘܠܬܳܐ ܠܦܳܪܰܚܬܳܐ ܕܰܫܡܰܝܳܐ: ܘܰܠܚܰܝܽܘܬܳܐ ܕܰܐܪܥܳܐ.
21 ܘܰܠܨܶܕܰܩܝܳܐ ܡܰܠܟܳܐ ܕܺܝܗܽܘܕܳܐ ܘܰܠܪܰܘܖ̈ܒܳܢܰܘܗܝ: ܐܰܫܠܶܡ ܐܶܢܽܘܢ ܒܺܐܝܕܳܐ ܕܰܒܥܶܠܕܒܳܒܰܝ̈ܗܽܘܢ: ܘܒܺܐܝܕܳܐ ܕܰܐܝܠܶܝܢ ܕܒܳܥܶܝܢ ܢܰܦܫܗܽܘܢ: ܘܰܒܝܰܕ ܚܰܝ̈ܠܶܐ ܕܡܰܠܟܳܐ ܕܒܳܒܶܠ ܕܣܳܠܩܺܝܢ ܥܠܰܝܗܽܘܢ.
22 ܗܳܐ ܐܶܢܳܐ ܦܳܩܶܕ ܐ̱ܢܳܐ ܐܳܡܰܪ ܡܳܪܝܳܐ: ܘܰܐܗܦܶܟ ܐܶܢܽܘܢ ܠܰܩܪܺܝܬܳܐ ܗܳܕܶܐ: ܘܢܶܬܟܰܬܫܽܘܢ ܥܠܶܝܗ̇ ܘܢܶܟܒܫܽܘܢܳܗ̇ ܘܢܰܘܩܕܽܘܢܳܗ̇ ܒܢܽܘܪܳܐ: ܘܰܠܩܽܘܖ̈ܝܳܐ ܕܺܝܗܽܘܕܳܐ: ܐܶܬܶܠ ܠܚܽܘܪܒܳܐ ܡܶܢ ܒܠܰܝ ܕܝܳܬܶܒ.