Jeremiah 8
The Book of Jeremiah
܀ ܐܪܡܝܐ ܚ ܀
1 ܒܙܰܒܢܳܐ ܗܰܘ ܐܳܡܰܪ ܡܳܪܝܳܐ ܢܰܦܩܽܘܢ ܓܰܖ̈ܡܶܐ ܕܡܰܠ̈ܟܶܐ ܕܺܝܗܽܘܕܳܐ: ܘܓܰܖ̈ܡܶܐ ܕܪܰܘܖ̈ܒܳܢܰܝܗܽܘܢ: ܘܓܰܖ̈ܡܶܐ ܕܟܳܗܢܰܝ̈ܗܽܘܢ: ܘܓܰܖ̈ܡܶܐ ܕܰܢܒܝܰܝ̈ܗܽܘܢ: ܘܓܰܖ̈ܡܶܐ ܕܥܳܡܽܘܖ̈ܶܝܗ̇ ܕܽܐܘܪܺܫܠܶܡ ܡܶܢ ܩܰܒܖ̈ܰܝܗܽܘܢ.
2 ܘܢܶܫܛܚܽܘܢ ܐܶܢܽܘܢ ܠܫܶܡܫܳܐ ܘܰܠܣܰܗܪܳܐ: ܘܰܠܟܽܠ ܚܰܝ̈ܠܘܳܬܳܐ ܕܰܫܡܰܝܳܐ: ܕܰܪܚܶܡܘ ܐܶܢܽܘܢ: ܘܰܦܠܰܚܘ ܐܶܢܽܘܢ: ܘܶܐܙܰܠܘ ܒܳܬܰܪܗܽܘܢ: ܘܰܫܐܶܠܘ ܒܗܽܘܢ: ܘܰܣܓܶܕ ܠܗܽܘܢ: ܠܳܐ ܢܶܬܟܰܢܫܽܘܢ ܘܠܳܐ ܢܶܬܩܰܒܪܽܘܢ: ܐܶܠܳܐ ܐܰܝܟ ܙܶܒܠܳܐ ܥܰܠ ܐܰܦܰܝ̈ ܐܰܪܥܳܐ ܢܶܗܘܽܘܢ.
3 ܘܢܶܓܒܽܘܢ ܠܗܽܘܢ ܡܰܘܬܳܐ ܡܶܢ ܚܰܝ̈ܶܐ: ܟܽܠ ܫܰܪܟܳܐ ܕܶܐܫܬܚܰܪܘ ܡܶܢ ܫܰܪܒܬܳܐ ܗܳܕܶܐ ܒܺܝܫܬܳܐ: ܒܟܽܠ ܐܰܬܖ̈ܰܘܳܬܳܐ ܕܒܰܕܪܶܬ ܐܶܢܽܘܢ ܠܬܰܡܳܢ ܐܳܡܰܪ ܡܳܪܝܳܐ ܚܰܝܠܬܳܢܳܐ.
4 ܘܬܺܐܡܰܪ ܠܗܽܘܢ: ܗܳܟܰܢܳܐ ܐܳܡܰܪ ܡܳܪܝܳܐ: ܢܶܦܠܽܘܢ ܘܠܳܐ ܢܩܽܘܡܽܘܢ: ܘܶܐܢ ܢܬܽܘܒܽܘܢ ܠܳܐ ܢܬܽܘܒܽܘܢ.
5 ܡܶܛܽܠ ܡܳܢܳܐ ܬܳܒ̣ܘ ܥܰܡܳܐ ܗܳܢܳܐ ܕܽܐܘܪܺܫܠܶܡ ܬܝܳܒܽܘܬܳܐ ܚܰܨܺܝܦܬܳܐ: ܚܰܡܣܶܢܘ ܒܢܶܟܠܳܐ ܘܠܳܐ ܨܒܰܘ ܠܰܡܬܳܒ.
6 ܐܰܨܬܶܬ ܘܫܶܡܥܶ݀ܬ ܘܠܳܐ ܗ̱ܘܳܐ ܟܺܐܢܳܐܺܝܬ ܡܡܰܠܠܺܝܢ: ܠܰܝܬ ܓܶܝܪ ܕܢܶܬܬܘܶܐ ܥܰܠ ܒܺܝܫܬܶܗ: ܘܢܺܐܡܰܪ ܡܳܢܳܐ ܥܶܒܕܶܬ: ܟܽܠܗܽܘܢ ܡܗܰܠܟܺܝܢ ܒܨܶܒܝܳܢܗܽܘܢ: ܐܰܝܟ ܣܽܘܣܝܳܐ ܕܢܳܓܶܕ ܒܰܩܪܳܒܳܐ.
7 ܐܳܦ ܚܽܘܪܒܳܐ ܒܰܫܡܰܝܳܐ ܝܳܕܥܳܐ ܙܰܒܢܳܗ̇: ܘܫܽܘܦܢܺܝܢܳܐ ܘܟܽܘܪܟܝܳܐ ܘܰܣܢܽܘܢܺܝܬܳܐ: ܢܳܛ݁ܪܺܝܢ ܙܰܒܢܳܐ ܕܡܰܥܰܠܗܽܘܢ: ܘܥܰܡܝ ܠܳܐ ܝܺܕܰܥܘ ܕܺܝܢܶܗ ܕܡܳܪܝܳܐ.
8 ܐܰܝܟܰܢܳܐ ܐܳܡܪܺܝܢ ܐܢ̱ܬܽܘܢ ܕܚܰܟܺܝ̈ܡܶܐ ܚܢܰܢ: ܘܢܳܡܽܘܣܶܗ ܕܡܳܪܝܳܐ ܥܰܡܰܢ: ܫܰܪܺܝܪܳܐܺܝܬ ܠܕܰܓܳܠܽܘܬܳܐ ܥܒܺܝܕ ܩܰܢܝܳܐ ܕܰܓܳܠܳܐ ܠܣܳܦܪܳܐ.
9 ܒܗܶܬܘ ܚܰܟܺܝ̈ܡܶܐ ܘܶܐܬܬܒܰܪܘ ܘܶܐܬܬܚܶܕܘ: ܡܶܛܽܠ ܕܦܶܬܓܳܡܶܗ ܕܡܳܪܝܳܐ ܐܰܣܠܺܝܘ: ܘܚܶܟܡܬܳܐ ܠܳܐ ܗܘܳܬ ܒܗܽܘܢ.
10 ܡܶܛܽܠ ܗܳܢܳܐ ܐܶܬܶܠ ܢܶܫܰܝ̈ܗܽܘܢ ܠܐ̱ܚܖ̈ܳܢܶܐ: ܘܚܰܩ̈ܠܳܬܗܽܘܢ ܠܒܶܙܬܳܐ: ܡܶܛܽܠ ܕܡܶܢ ܙܥܽܘܪܗܽܘܢ ܘܰܥܕܰܡܳܐ ܠܪܰܒܗܽܘܢ: ܟܽܠܗܽܘܢ ܢܳܟܠܺܝܢ ܢܶܟܠܳܐ: ܘܡܶܢ ܢܒܺܝ̈ܶܐ ܕܰܓ̈ܳܠܶܐ ܘܰܥܕܰܡܳܐ ܠܟܳܗܢܳܐ: ܟܽܠܗܽܘܢ ܥܳܒܕܺܝܢ ܫܽܘܩܪܳܐ.
11 ܘܡܰܐܣܶܝܢ ܬܒܳܪܳܗ̇ ܕܒܰܪܬ ܥܰܡܝ ܒܒܶܙܚܳܐ: ܘܳܐܡܪܺܝܢ: ܫܠܳܡܳܐ: ܫܠܳܡܳܐ: ܘܠܰܝܬ ܫܠܳܡܳܐ.
12 ܒܗܶܬܘ ܡܶܛܽܠ ܕܛܰܢܦܽܘܬܳܐ ܥܒܰܕܘ: ܘܒܰܗܺܝ̈ܬܳܐ ܠܳܐ ܒܳܗܬܺܝܢ: ܘܰܠܡܶܬܬܟܳܣܽܘ ܠܳܐ ܝܳܕܥܺܝܢ: ܡܶܛܽܠ ܗܳܢܳܐ ܢܶܦܠܽܘܢ ܥܰܡ ܢܳܦ̈ܠܶܐ: ܘܰܒܙܰܒܢܳܐ ܕܡܶܬܦܰܩܕܺܝܢ ܢܶܣܬܰܚܦܽܘܢ ܐܳܡܰܪ ܡܳܪܝܳܐ: ܡܣܳܦܽܘ ܐܰܣܺܝܦ ܐܶܢܽܘܢ ܐܳܡܰܪ ܡܳܪܝܳܐ.
13 ܠܰܝܬ ܥܶܢ̈ܒܶܐ ܒܰܓܦܶܬܳܐ: ܘܠܰܝܬ ܬܺܐܢ̈ܶܐ ܒܬܺܬܳܐ: ܘܛܰܖ̈ܦܶܐ ܢܬܰܪܘ: ܘܝܶܗܒܶ݀ܬ ܠܗܽܘܢ ܘܰܥ̣ܒܰܪܘ ܐܶܢܽܘܢ.
14 ܘܢܺܐܡܪܽܘܢ ܥܰܠ ܡܳܢܳܐ ܝܳܬܒܺܝܢܰܢ: ܐܶܬܟܰܢܰܫܘ ܘܢܶܥܽܘܠ ܠܩܽܘܖ̈ܝܳܐ ܥܰܫܺܝ̈ܢܳܬܳܐ ܘܢܶܫܬܽܘܩ ܬܰܡܳܢ: ܡܶܛܽܠ ܕܡܳܪܝܳܐ ܐܰܠܳܗܰܢ ܫܰܬܩܰܢ: ܘܰܐܫܩܝܰܢ ܡܰܝ̈ܳܐ ܡܰܪܺܝܖ̈ܶܐ ܥܰܠ ܕܰܚܛܰܝܢ ܠܡܳܪܝܳܐ.
15 ܣܰܟܺܝܢ ܠܰܫܠܳܡܳܐ ܘܠܰܝܬ ܛܳܒܬܳܐ: ܘܰܠܙܰܒܢܳܐ ܕܳܐܣܝܽܘܬܳܐ ܘܰܗܘܳܬ ܠܰܢ ܥܳܩܬܳܐ.
16 ܡܶܢ ܕܳܢ ܐܶܫܬܡܰܥ ܨܰܗܠܳܐ ܕܖ̈ܰܟܫܶܗ: ܡܶܢ ܩܳܠܳܐ ܕܡܰܡܠܠܳܐ ܕܓܰܢ̱ܒܳܖ̈ܰܘܗܝ: ܙܳܥܰܬ ܟܽܠܳܗ̇ ܐܰܪܥܳܐ: ܘܶܐܬܰܘ ܘܶܐܟܰܠܘ ܐܰܪܥܳܐ ܘܰܡܠܳܐܳܗ̇: ܩܪܺܝܬܳܐ ܘܥܳܡܽܘܖ̈ܶܝܗ̇.
17 ܡܶܛܽܠ ܕܗܳܐ ܡܫܰܕܰܪ ܐ̱ܢܳܐ ܥܠܰܝܟܽܘܢ ܚ̈ܘܰܘܳܬܳܐ ܚܰܖ̈ܡܳܢܳܐ ܕܠܳܐ ܡܩܰܒܠܺܝܢ ܠܽܘܚ̈ܫܳܬܳܐ: ܘܰܢܢܰܟܬܽܘܢܟܽܘܢ ܐܳܡܰܪ ܡܳܪܝܳܐ.
18 ܒܠܺܝܬ ܒܥܳܩܰܬܝ: ܘܠܶܒܝ ܕܘܶܐ ܥܠܰܝ.
19 ܗܳܐ ܩܳܠ ܓܥܳܬܳܗ̇ ܕܒܰܪܬ ܥܰܡܝ ܡܶܢ ܐܰܪܥܳܐ ܪܰܚܺܝܩܬܳܐ: ܕܳܐܡܪܺܝܢ ܡܳܪܝܳܐ ܠܰܝܬ ܒܨܶܗܝܽܘܢ: ܐܰܘ ܡܰܠܟܳܗ̇ ܠܰܝܬ ܒܳܗ̇: ܡܶܛܽܠ ܕܰܐܪܓܙܽܘܢܝ ܒܰܓܠܺܝܦܰܝ̈ܗܽܘܢ ܘܰܒܕܶܚ̈ܠܳܬܳܐ ܢܽܘܟܖ̈ܳܝܳܬܳܐ.
20 ܥ̣ܒܰܪ ܚܨܳܕܳܐ ܘܰܓ̣ܡܰܪ ܩܛܳܦܳܐ: ܘܰܚܢܰܢ ܠܳܐ ܐܶܬܦܪܶܩܢ.
21 ܥܰܠ ܬܒܳܪܳܗ̇ ܕܒܰܪܬ ܥܰܡܝ ܐܶܬܟܰܡܪܶܬ ܘܬܶܡܗܳܐ ܐܰܚܕܰܢܝ.
22 ܫܥܽܘܬܳܐ ܠܰܝܬ ܒܓܶܠܥܳܕ: ܐܰܘ ܐܳܣܝܳܐ ܠܰܝܬ ܬܰܡܳܢ: ܡܶܛܽܠ ܡܳܢܳܐ ܠܳܐ ܣܶܠܩܰܬ ܐܳܣܝܽܘܬܳܗ̇ ܕܒܰܪܬ ܥܰܡܝ.