Jeremiah 42
The Book of Jeremiah
܀ ܐܪܡܝܐ ܡܒ ܀
1 ܘܰܩ̣ܪܶܒܘ ܟܽܠܗܽܘܢ ܖ̈ܰܒܰܝ ܚܰܝ̈ܠܶܐ: ܘܝܽܘܚܰܢܳܢ ܒܰܪ ܩܽܘܪܰܚ: ܘܝܰܙܰܢܝܳܐ ܒܰܪ ܗܽܘܫܰܥܝܳܐ: ܘܟܽܠܶܗ ܥܰܡܳܐ ܡܶܢ ܙܥܽܘܪܳܐ ܘܰܥܕܰܡܳܐ ܠܩܰܫܺܝܫܳܐ.
2 ܘܶܐܡܰܪܘ ܠܶܐܪܰܡܝܳܐ ܒܳܥܶܝܢܢ ܡܶܢܟ ܨܰܠܳܐ ܥܠܰܝܢ ܩܕܳܡ ܡܳܪܝܳܐ ܐܰܠܳܗܳܟ: ܡܶܛܽܠ ܕܶܐܫܬܚܰܪܢ ܩܰܠܺܝܠ ܡܶܢ ܣܽܘܓܐܳܐ: ܐܰܝܟ ܕܥܰܝܢܰܝ̈ܟ ܚܳܙ̈ܝܳܢ ܠܰܢ.
3 ܘܰܢܚܰܘܶܝܢ ܡܳܪܝܳܐ ܐܰܠܳܗܰܢ ܐܽܘܪܚܳܐ ܕܢܺܐܙܰܠ ܒܳܗ̇: ܘܦܶܬܓܳܡ̈ܶܐ ܕܢܶܥܒܶܕ.
4 ܘܶܐܡܰܪ ܠܗܽܘܢ ܐܶܪܰܡܝܳܐ ܢܒܺܝܳܐ ܫܶܡܥܶ݀ܬ: ܗܳܐ ܡܨܰܠܶܐ ܐ̱ܢܳܐ ܩܕܳܡ ܡܳܪܝܳܐ ܐܰܠܳܗܟܽܘܢ: ܐܰܝܟ ܦܶܬܓܳܡܟܽܘܢ: ܘܟܽܠ ܦܶܬܓܳܡܳܐ ܕܢܶܥܢܶܝܟܽܘܢ ܡܳܪܝܳܐ ܐܰܠܳܗܟܽܘܢ ܐܶܚܰܘܶܝܟܽܘܢ: ܘܠܳܐ ܐܶܛܰܫܶܐ ܡܶܢܟܽܘܢ ܡܶܠܳܐ.
5 ܘܗܶܢܽܘܢ ܐܶܡܰܪܘ ܠܶܐܪܰܡܝܳܐ: ܢܶܗܘܶܐ ܒܰܢ ܡܳܪܝܳܐ ܣܳܗܕܳܐ ܫܰܪܺܝܪܳܐ ܘܰܡܗܰܝܡܳܢܳܐ: ܐܶܠܳܐ ܐܰܝܟ ܦܶܬܓܳܡܳܐ ܕܰܢܫܰܕܪܳܟ ܡܳܪܝܳܐ ܐܰܠܳܗܳܟ ܠܘܳܬܰܢ ܗܳܟܰܢܳܐ ܢܶܥܒܶܕ.
6 ܐܶܢ ܕܛܳܒ ܘܶܐܢ ܕܒܺܝܫ: ܒܩܳܠܶܗ ܕܡܳܪܝܳܐ ܐܰܠܳܗܰܢ ܢܶܫܡܰܥ: ܕܰܡܫܰܕܪܺܝܢܰܢ ܠܳܟ ܠܘܳܬܶܗ: ܘܢܶܛܐܰܒ ܠܰܢ ܟܰܕ ܢܶܫܡܰܥ ܒܩܳܠܶܗ ܕܡܳܪܝܳܐ ܐܰܠܳܗܰܢ.
7 ܘܡܶܢ ܒܳܬܰܪ ܥܶܣܪܳܐ ܝܰܘܡܺܝ̈ܢ: ܗܘܳܐ ܦܶܬܓܳܡܶܗ ܕܡܳܪܝܳܐ ܥܰܠ ܐܶܪܰܡܝܳܐ ܢܒܺܝܳܐ.
8 ܘܰܩ̣ܪܳܐ ܠܝܽܘܚܰܢܳܢ ܒܰܪ ܩܽܘܪܰܚ: ܘܰܠܟܽܠܗܽܘܢ ܖ̈ܰܒܰܝ ܚܰܝ̈ܠܶܐ ܕܥܰܡܶܗ: ܘܰܠܟܽܠܶܗ ܥܰܡܳܐ ܡܶܢ ܙܥܽܘܪܳܐ ܘܰܥܕܰܡܳܐ ܠܩܰܫܺܝܫܳܐ: ܘܶܐܡܰܪ ܠܗܽܘܢ.
9 ܗܳܟܰܢܳܐ ܐܳܡܰܪ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ: ܕܫܰܕܰܪܬܽܘܢܢܝ ܠܘܳܬܶܗ ܠܡܰܪܡܳܝܽܘ ܒܳܥܽܘܬܟܽܘܢ ܩܕܳܡܰܘܗܝ.
10 ܐܶܢ ܬܶܬܒܽܘܢ ܒܰܐܪܥܳܐ ܗܳܕܶܐ: ܐܶܒܢܶܝܟܽܘܢ ܘܠܳܐ ܐܶܣܚܽܘܦܟܽܘܢ: ܘܶܐܨܽܘܒܟܽܘܢ ܘܠܳܐ ܐܶܥܩܽܘܪܟܽܘܢ: ܘܶܐܫܠܶܐ ܡܶܢ ܒܺܝܫܬܳܐ ܕܥܶܒܕܶܬ ܠܟܽܘܢ.
11 ܘܠܳܐ ܬܶܕܚܠܽܘܢ ܡܶܢ ܩܕܳܡ ܡܰܠܟܳܐ ܕܒܳܒܶܠ ܕܰܐܢ̱ܬܽܘܢ ܕܳܚܠܺܝܢ ܡܶܢܗ: ܠܳܐ ܬܶܕܚܠܽܘܢ ܡܶܢܗ ܐܳܡܰܪ ܡܳܪܝܳܐ: ܡܶܛܽܠ ܕܥܰܡܟܽܘܢ ܐ̱ܢܳܐ ܐܳܡܰܪ ܡܳܪܝܳܐ: ܠܡܶܦܪܰܩܟܽܘܢ ܘܠܰܡܦܰܨܳܝܽܘܬܟܽܘܢ ܡܶܢ ܐܺܝܕܰܘ̈ܗܝ.
12 ܘܶܐܬܶܠ ܥܠܰܝܟܽܘܢ ܖ̈ܰܚܡܶܐ ܘܶܐܪܚܰܡܟܽܘܢ: ܘܰܐܘܬܶܒܟܽܘܢ ܒܰܐܪܥܟܽܘܢ.
13 ܘܶܐܢ ܐܳܡܪܺܝܬܽܘܢ ܠܳܐ ܝܳܬܒܺܝܢܰܢ ܒܰܐܪܥܳܐ ܗܳܕܶܐ: ܡܶܛܽܠ ܕܠܳܐ ܬܶܫܡܥܽܘܢ ܒܩܳܠܶܗ ܕܡܳܪܝܳܐ ܐܰܠܳܗܟܽܘܢ.
14 ܘܶܐܡܰܪܬܽܘܢ ܠܳܐ ܗܳܟܰܢܳܐ: ܠܰܐܪܥܳܐ ܕܡܶܨܪܶܝܢ ܢܶܥܽܘܠ: ܕܠܳܐ ܢܶܚܙܶܐ ܩܪܳܒܳܐ: ܘܩܳܠܳܐ ܕܫܺܝܦܽܘܪܳܐ ܠܳܐ ܢܶܫܡܰܥ: ܘܰܠܠܰܚܡܳܐ ܠܳܐ ܢܶܟܦܰܢ: ܘܬܰܡܳܢ ܢܶܬܶܒ.
15 ܗܳܫܳܐ ܫܡܰܥܘ ܦܶܬܓܳܡܶܗ ܕܡܳܪܝܳܐ ܫܰܪܟܳܐ ܕܺܝܗܽܘܕܳܐ: ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܐܶܢ ܐܰܢ̱ܬܽܘܢ ܬܣܺܝܡܽܘܢ ܐܰܦܰܝ̈ܟܽܘܢ ܠܡܶܥܰܠ ܠܡܶܨܪܶܝܢ: ܘܬܶܥܠܽܘܢ ܠܡܶܥܡܰܪ ܬܰܡܳܢ.
16 ܗܳܝ ܚܰܪܒܳܐ ܕܕܳܚܠܺܝܢ ܐܢ̱ܬܽܘܢ ܡܶܢܳܗ̇: ܬܰܡܳܢ ܬܰܕܪܶܟܟܽܘܢ ܒܰܐܪܥܳܐ ܕܡܶܨܪܶܝܢ: ܘܟܰܦܢܳܐ ܕܰܐܢ̱ܬܽܘܢ ܕܳܚܠܺܝܢ ܡܶܢܗ: ܬܰܡܳܢ ܢܶܪܕܽܘܦ ܒܳܬܰܪܟܽܘܢ ܠܡܶܨܪܶܝܢ: ܘܬܰܡܳܢ ܬܡܽܘܬܽܘܢ.
17 ܘܢܶܗܘܽܘܢ ܟܽܠܗܽܘܢ ܓܰܒܖ̈ܶܐ ܕܣܳܡܘ ܐܰܦܰܝ̈ܗܽܘܢ ܠܡܶܥܰܠ ܠܡܶܨܪܶܝܢ ܠܡܶܥܡܰܪ ܬܰܡܳܢ: ܢܡܽܘܬܽܘܢ ܒܚܰܪܒܳܐ: ܘܰܒܟܰܦܢܳܐ: ܘܰܒܡܰܘܬܳܢܳܐ: ܘܠܳܐ ܢܶܗܘܶܐ ܠܗܽܘܢ ܣܪܺܝܕܳܐ ܕܡܶܫܬܰܘܙܰܒ: ܡܶܢ ܩܕܳܡ ܒܺܝܫܬܳܐ ܕܡܰܝܬܶܐ ܐ̱ܢܳܐ ܥܠܰܝܗܽܘܢ.
18 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܐܰܝܟ ܕܶܐܬܬܢܺܝܚ ܪܽܘܓܙܝ ܘܚܶܡܬܝ ܥܰܠ ܥܳܡܽܘܖ̈ܶܝܗ̇ ܕܽܐܘܪܺܫܠܶܡ: ܗܳܟܰܢܳܐ ܬܶܬܢܺܝܚ ܚܶܡܬܝ ܥܠܰܝܟܽܘܢ ܡܳܐ ܕܥܰܠܬܽܘܢ ܠܡܶܨܪܶܝܢ: ܘܬܶܗܘܢ ܠܡܰܘܡܳܬܳܐ: ܘܰܠܬܶܡܗܳܐ ܘܰܠܠܰܘܛܬܳܐ: ܘܰܠܚܶܣܕܳܐ: ܘܠܳܐ ܬܶܚܙܽܘܢ ܬܽܘܒ ܐܰܬܪܳܐ ܗܳܢܳܐ: ܐܳܡܰܪ ܡܳܪܝܳܐ ܥܠܰܝܟܽܘܢ ܫܰܪܟܳܐ ܕܺܝܗܽܘܕܳܐ.
19 ܠܳܐ ܬܶܥܠܽܘܢ ܠܡܶܨܪܶܝܢ: ܘܕܰܥܘ ܕܣܰܗܕܶܬ ܒܟܽܘܢ ܝܰܘܡܳܢܳܐ.
20 ܕܰܐܢ̱ܬܽܘܢ ܐܰܛܥܺܝܬܽܘܢ ܒܢܰܦܫܟܽܘܢ: ܘܫܰܕܰܪܬܽܘܢܳܢܝ ܠܘܳܬ ܡܳܪܝܳܐ ܐܰܠܳܗܟܽܘܢ: ܘܶܐܡܰܪܬܽܘܢ ܨܰܠܳܐ ܥܠܰܝܢ ܩܕܳܡ ܡܳܪܝܳܐ ܐܰܠܳܗܰܢ: ܘܟܽܠܡܶܕܶܡ ܕܳܐܡܰܪ ܠܳܟ ܡܳܪܝܳܐ ܐܰܠܳܗܰܢ ܚܰܘܳܢ: ܘܢܶܥܒܶܕ.
21 ܘܚܰܘܺܝܬܟܽܘܢ ܝܰܘܡܳܢܳܐ: ܘܠܳܐ ܫܡܰܥܬܽܘܢ ܒܩܳܠܶܗ ܕܡܳܪܝܳܐ ܐܰܠܳܗܟܽܘܢ: ܘܥܰܠ ܟܠ ܕܫܰܕܪܰܢܝ ܠܘܳܬܟܽܘܢ ܠܳܐ ܥܒܰܕܬܽܘܢ.
22 ܗܳܫܳܐ ܕܰܥܘ: ܕܰܒܚܰܪܒܳܐ: ܘܰܒܟܰܦܢܳܐ: ܘܰܒܡܰܘܬܳܢܳܐ: ܬܡܽܘܬܽܘܢ: ܒܰܐܬܪܳܐ ܕܰܨܒܰܝܬܽܘܢ ܠܡܶܥܰܠ ܠܶܗ ܠܡܶܥܡܰܪ ܬܰܡܳܢ.