Jeremiah 46
The Book of Jeremiah
܀ ܐܪܡܝܐ ܡܘ ܀
1 ܡܫܰܩܠܳܐ ܡܶܨܪܶܝܢ. ܘܰܗܘܳܐ ܦܶܬܓܳܡܶܗ ܕܡܳܪܝܳܐ ܥܰܠ ܐܶܪܰܡܝܳܐ ܢܒܺܝܳܐ: ܕܢܶܬܢܰܒܶܐ ܥܰܠ ܥܰܡ̈ܡܶܐ.
2 ܘܥܰܠ ܡܶܨܖ̈ܳܝܶܐ: ܘܥܰܠ ܚܰܝܠܶܗ ܕܦܶܪܥܽܘܢ ܚܓܺܝܪܳܐ ܡܰܠܟܳܐ ܕܡܶܨܪܶܝܢ: ܕܰܫܪܶܐ ܗ̱ܘܳܐ ܥܰܠ ܢܰܗܪܳܐ ܦܪܳܬ ܒܟܰܪܟܡܽܘܫ: ܕܰܩܛܰܠ ܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ: ܒܫܰܢ̱ܬܳܐ ܪܒܺܝܥܳܝܬܳܐ ܕܝܽܘܝܰܩܺܝܡ ܒܰܪ ܝܽܘܫܺܝܳܐ ܡܰܠܟܳܐ ܕܺܝܗܽܘܕܳܐ ܠܡܺܐܡܰܪ.
3 ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܫܩܽܘܠܘ ܙܰܝܢܳܐ ܘܣܰܟܖ̈ܶܐ: ܘܰܩܪܽܘܒܘ ܠܰܩܪܳܒܳܐ.
4 ܦܰܓܶܕܘ ܖ̈ܟܫܳܐ: ܐܰܪܟܶܒܘ ܦܰܖ̈ܳܫܶܐ: ܣܺܝܡܘ ܣܰܢܘܖ̈ܳܬܳܐ: ܡܪܽܘܩܘ ܖ̈ܽܘܡܚܶܐ: ܠܒܰܫܘ ܫܶܖ̈ܝܳܢܶܐ.
5 ܡܶܛܽܠ ܕܰܚܙܺܝ݀ܬ ܕܗܶܢܽܘܢ ܡܶܬܬܰܒܪܺܝܢ ܘܗܳܦܟܺܝܢ ܠܒܶܣܬܰܪܗܽܘܢ: ܘܓܰܢ̱ܒܳܖ̈ܰܝܗܽܘܢ ܐܶܬܡܰܚܺܝܘ ܘܰܥܪܰܩܘ: ܘܠܳܐ ܐܶܬܦܢܺܝܘ: ܡܶܛܽܠ ܕܰܟܪܺܝܟܺܝܢ ܗܘܰܘ ܠܗܽܘܢ ܡܶܢ ܚܕܳܖ̈ܰܝܗܽܘܢ: ܐܳܡܰܪ ܡܳܪܝܳܐ.
6 ܠܳܐ ܢܶܥܪܽܘܩ ܐܰܝܢܳܐ ܕܩܰܠܺܝܠ: ܘܠܳܐ ܢܶܬܦܰܠܰܛ ܐܰܝܢܳܐ ܕܓܰܢ̱ܒܳܪ ܒܓܰܢ̱ܒܳܖ̈ܶܐ: ܥܰܠ ܝܰܕ ܢܰܗܪܳܐ ܦܪܳܬ ܐܶܬܬܩܶܠܘ ܘܰܢܦܰܠܘ ܟܽܠܗܽܘܢ.
7 ܡܰܢܽܘ ܗܳܢܳܐ ܕܰܐܝܟ ܢܰܗܪܳܐ ܣܳܠܶܩ: ܘܰܐܝܟ ܢܰܗܖ̈ܰܘܳܬܳܐ ܡܶܬܪܰܓܫܺܝܢ ܡܰܘ̈ܗܝ.
8 ܡܰܠܟܳܐ ܕܡܶܨܪܶܝܢ ܐܰܝܟ ܢܰܗܪܳܐ ܣܳܠܶܩ: ܘܰܐܝܟ ܢܰܗܖ̈ܰܘܳܬܳܐ ܡܶܬܪܰܓܫܺܝܢ ܡܰܘ̈ܗܝ: ܘܳܐܡܰܪ ܐܶܣܰܩ ܘܶܐܟܰܣܶܐ ܠܰܐܪܥܳܐ: ܘܰܐܘܒܶܕ ܩܪܺܝܬܳܐ ܘܥܳܡܽܘܖ̈ܶܝܗ̇.
9 ܪܟܰܒܘ ܖ̈ܰܟܫܳܐ: ܐܶܫܬܰܒܰܚܘ ܒܡܰܖ̈ܟܒܳܬܳܐ: ܢܶܦܩܽܘܢ ܓܰܒܖ̈ܶܐ ܟܽܘܫܳܝܶܐ ܘܦܽܘܛܝ̈ܶܐ ܐܰܚܺܝܕܰܝ̈ ܣܰܟܖ̈ܶܐ: ܘܠܽܘ̈ܕܳܝܶܐ ܕܝܳܕܥܺܝܢ ܠܡܶܫܕܳܐ ܒܩܶܫܬܳܐ.
10 ܘܢܶܗܘܶܐ ܝܰܘܡܳܐ ܗܰܘ ܠܡܳܪܝܳܐ ܚܰܝܠܬܳܢܳܐ: ܝܰܘܡܳܐ ܕܦܽܘܪܥܳܢܳܐ ܕܦܳܪܰܥ ܠܰܒܥܶܠܕܒܳܒܰܘ̈ܗܝ: ܘܬܶܐܟܽܘܠ ܚܰܪܒܳܐ ܘܬܶܣܒܰܥ: ܘܬܶܪܘܶܐ ܡܶܢ ܕܶܡܗܽܘܢ: ܡܶܛܽܠ ܕܚܰܪܒܳܐ ܢܶܥܒܶܕ ܡܳܪܝܳܐ ܚܰܝܠܬܳܢܳܐ ܒܰܐܪܥܳܐ ܕܓܰܪܒܝܳܐ ܥܰܠ ܢܰܗܪܳܐ ܦܪܳܬ.
11 ܣܰܩܝ ܠܓܶܠܥܳܕ ܘܣܰܒܝ ܖ̈ܗܶܛܢܶܐ ܒܬܽܘܠܬܳܐ ܒܰܪܬ ܡܶܨܪܶܝܢ: ܐܺܝܩܺܐ ܐܰܣܓܺܝܬܝ ܐܳܣܝܽܘܬܳܐ: ܘܥܽܘܕܪܳܢܳܐ ܠܳܐ ܗܘܳܐ ܠܶܟܝ.
12 ܫܡܰܥܘ ܥܰܡ̈ܡܶܐ ܨܰܥܪܶܟܝ: ܘܺܝܠܶܠܬܶܟܝ ܐܶܬܡܰܠܝܰܬ ܐܰܪܥܳܐ: ܡܶܛܽܠ ܕܓܰܒܪܳܐ ܒܓܰܒܪܳܐ ܐܶܬܛܪܺܝܘ: ܘܰܬܖ̈ܰܝܗܽܘܢ ܒܚܰܪܒܳܐ ܢܦܰܠܘ.
13 ܦܶܬܓܳܡܳܐ ܕܶܐܡܰܪ ܡܳܪܝܳܐ ܠܶܐܪܰܡܝܳܐ ܢܒܺܝܳܐ: ܕܢܺܐܬܶܐ ܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ ܘܢܶܚܪܒܺܝܗ̇ ܠܰܐܪܥܳܐ ܕܡܶܨܪܶܝܢ.
14 ܚܰܘܰܘ ܒܡܶܨܪܶܝܢ ܘܰܐܫܡܰܥܘ ܒܡܰܓܕܽܘܠ: ܘܰܐܫܡܰܥܘ ܒܡܰܦܰܣ: ܘܰܒܬܰܚܦܺܝܣ ܐܶܡܰܪܘ: ܐܶܬܛܰܝܰܒܘ ܘܶܐܬܬܰܩܰܢܘ: ܡܶܛܽܠ ܕܶܐܟܠܰܬ ܚܰܪܒܳܐ ܚܕܳܖ̈ܰܝܟܝ.
15 ܡܶܛܽܠ ܡܳܢܳܐ ܐܶܣܬܰܚܦܘ ܥܰܫܺܝ̈ܢܰܝܟܝ ܘܰܢܦܰܠܘ ܘܠܳܐ ܩܳܡܘ: ܡܶܛܽܠ ܕܡܳܪܝܳܐ ܣܚܰܦ ܐܶܢܽܘܢ.
16 ܣܽܘܓܐܗܽܘܢ ܐܶܣܬܚܶܦܘ: ܐܳܦ ܢܦܰܠܘ ܓܰܒܪܳܐ ܥܰܠ ܚܰܒܪܶܗ ܘܶܐܡܰܪܘ: ܩܽܘܡܘ ܢܶܗܦܽܘܟ ܠܥܰܡܰܢ ܘܠܰܐܪܥܳܐ ܕܶܐܬܺܝܠܶܕܢ ܒܳܗ̇: ܡܶܢ ܩܕܳܡ ܚܰܪܒܳܐ ܕܡܰܕܘܝܳܐ.
17 ܘܰܩܪܰܘ ܬܰܡܳܢ ܫܡܶܗ ܕܦܶܪܥܽܘܢ ܚܓܺܝܪܳܐ ܡܰܠܟܳܐ ܕܡܶܨܪܶܝܢ: ܕܳܠܽܘܚܳܐ ܘܡܰܥܒܰܪ ܙܰܒܢ̈ܶܐ.
18 ܚܰܝ ܐ̱ܢܳܐ ܐܳܡܰܪ ܡܳܪܝܳܐ ܡܰܠܟܳܐ ܨܒܰܐܬ ܫܡܶܗ: ܐܶܠܳܐ ܢܶܦܶܠ ܦܶܪܥܽܘܢ ܐܰܝܟ ܬܒܳܪܳܐ ܕܛܽܘܪܳܐ: ܘܰܐܝܟ ܟܰܪܡܠܳܐ ܒܓܰܘ ܝܰܡܳܐ.
19 ܡܳܐܢ̈ܶܐ ܕܰܫܒܺܝܬܳܐ ܥܒܶܕܝ ܠܶܟܝ ܒܬܽܘܠܬܳܐ ܒܰܪܬ ܡܶܨܪܶܝܢ: ܡܶܛܽܠ ܕܡܰܦܰܣ ܬܶܗܘܶܐ ܠܚܽܘܪܒܳܐ: ܘܬܶܨܕܶܐ ܡܶܢ ܒܠܰܝ ܕܝܳܬܶܒ.
20 ܡܶܨܪܶܝܢ ܥܓܶܠܬܳܐ ܫܰܦܺܝܪܬܳܐ ܡܨܰܝܰܪܬܳܐ: ܚܰܝܠܳܐ ܡܶܢ ܓܰܪܒܝܳܐ ܐܶܬܳܐ ܥܠܶܝܗ̇.
21 ܐܰܓܺܝܖ̈ܶܝܗ̇ ܒܓܰܘܳܗ̇ ܐܰܝܟ ܥܶܓ̈ܠܶܐ ܕܦܶܛܡܳܐ: ܘܳܐܦ ܗܶܢܽܘܢ ܐܶܬܦܺܢܝܘ: ܘܰܥܪܰܩܘ ܐܰܟܚܕܳܐ ܘܠܳܐ ܩܳܡܘ: ܡܶܛܽܠ ܕܝܰܘܡܳܐ ܕܰܬܒܳܪܗܽܘܢ ܐܶܬܳܐ ܥܠܰܝܗܽܘܢ ܙܰܒܢܳܐ ܕܦܽܘܩܕܳܢܗܽܘܢ.
22 ܩܳܠܶܗ ܕܚܰܝܠܳܐ ܕܰܐܝܟ ܚܶܘܝܳܐ ܕܪܳܫܶܦ: ܡܶܛܽܠ ܕܥܰܠ ܚܰܝܠܳܐ ܢܺܐܙܽܠܘܢ: ܘܰܒܟܽܘܠ̈ܒܶܐ ܢܺܐܬܽܘܢ ܥܠܶܝܗ̇ ܐܰܝܟ ܦܳܣܩܰܝ̈ ܩܰܝ̈ܣܶܐ.
23 ܦܣܽܘܩܘ ܥܳܒܶܝ̈ܗ̇ ܐܳܡܰܪ ܡܳܪܝܳܐ: ܡܶܛܽܠ ܕܣܳܟܳܐ ܠܰܝܬ ܠܗܽܘܢ: ܡܶܛܽܠ ܕܣܰܓܺܝܐܺܝܢ ܡܶܢ ܩܰܡܨܳܐ ܘܠܰܝܬ ܠܗܽܘܢ ܡܶܢܝܳܢ.
24 ܒܶܗܬܰܬ ܒܰܪܬ ܡܶܨܪܶܝܢ: ܘܶܐܫܬܰܠܡܰܬ ܒܝܰܕ ܥܰܡܳܐ ܕܓܰܪܒܝܳܐ.
25 ܐܳܡܰܪ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ: ܗܳܐ ܐܶܢܳܐ ܦܳܩܶܕ ܐ̱ܢܳܐ ܥܰܠ ܐܰܡܽܘܢ ܕܡܰܝ̈ܳܐ: ܘܥܰܠ ܦܶܪܥܽܘܢ: ܘܥܰܠ ܡܶܨܪܶܝܢ: ܘܥܰܠ ܐܰܠܳܗܶܝ̈ܗ̇: ܘܥܰܠ ܚܰܝܠܳܗ̇: ܘܥܰܠ ܡܰܠܟܶܝ̈ܗ̇: ܘܥܰܠ ܦܶܪܥܽܘܢ ܘܥܰܠ ܟܠ ܕܰܬܟܺܝܠܺܝܢ ܥܠܰܘܗܝ.
26 ܘܰܐܫܠܶܡ ܐܶܢܽܘܢ ܒܺܐܝܕܳܐ ܕܰܒܥܶܠܕܒܳܒܰܝ̈ܗܽܘܢ: ܘܒܺܐܝܕܳܐ ܕܰܐܝܠܶܝܢ ܕܒܳܥܶܝܢ ܢܰܦܫܗܽܘܢ: ܘܒܺܐܝܕܳܐ ܕܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ: ܘܒܺܐܝܕܳܐ ܕܥܰܒܕܰܘ̈ܗܝ: ܘܒܳܬܰܪܟܶܢ ܬܶܫܪܶܐ ܐܰܝܟ ܝܰܘ̈ܡܳܬܳܐ ܕܡܶܢ ܩܕܺܝܡ: ܐܳܡܰܪ ܡܳܪܝܳܐ.
27 ܘܰܐܢ̱ܬ ܠܳܐ ܬܶܕܚܰܠ ܥܰܒܕܝ ܝܰܥܩܽܘܒ ܐܳܡܰܪ ܡܳܪܝܳܐ: ܘܠܳܐ ܬܶܬܒܰܪ ܝܺܣܪܳܐܶܝܠ: ܕܗܳܐ ܦܳܪܶܩ ܐ̱ܢܳܐ ܠܳܟ ܡܶܢ ܪܽܘܚܩܳܐ: ܘܰܠܙܰܪܥܳܟ ܡܶܢ ܐܰܪܥܳܐ ܕܰܫܒܰܝܬܗܽܘܢ: ܘܢܶܬܶܒ ܝܰܥܩܽܘܒ ܘܢܶܫܠܶܐ: ܘܢܶܫܟܰܬ ܘܢܶܬܬܢܺܝܚ ܡܰܢ ܕܡܰܗܰܪ ܠܶܗ.
28 ܘܰܐܢ̱ܬ ܠܳܐ ܬܶܕܚܰܠ ܥܰܒܕܝ ܝܰܥܩܽܘܒ ܐܳܡܰܪ ܡܳܪܝܳܐ: ܡܶܛܽܠ ܕܥܰܡܳܟ ܐ̱ܢܳܐ: ܡܶܛܽܠ ܕܶܐܥܒܶܕ ܣܰܘܦܳܢܳܐ ܒܟܽܠܗܽܘܢ ܥܰܡ̈ܡܶܐ ܕܒܰܕܰܪܬܳܟ ܬܰܡܳܢ: ܘܠܳܟ ܠܳܐ ܐܰܣܺܝܦ: ܘܶܐܪܕܶܝܟ ܒܕܺܝܢܳܐ: ܘܰܡܙܰܟܳܝܽܘ ܠܳܐ ܐܶܙܰܟܶܝܟ.