Jeremiah 43
The Book of Jeremiah
܀ ܐܪܡܝܐ ܡܓ ܀
1 ܘܟܰܕ ܫܰܠܶܡ ܐܶܪܰܡܝܳܐ ܠܡܺܐܡܰܪ ܠܟܽܠܶܗ ܥܰܡܳܐ: ܟܽܠܗܽܘܢ ܦܶܬܓܳܡܰܘ̈ܗܝ ܕܡܳܪܝܳܐ ܐܰܠܳܗܗܽܘܢ: ܕܫܰܕܪܶܗ ܡܳܪܝܳܐ ܐܰܠܳܗܗܽܘܢ ܠܘܳܬܗܽܘܢ: ܠܡܺܐܡܰܪ ܠܗܽܘܢ ܦܶܬܓܳܡ̈ܶܐ ܗܳܠܶܝܢ.
2 ܐܶܡܰܪ ܝܰܙܰܢܝܳܐ ܒܰܪ ܗܽܘܫܰܥܝܳܐ: ܘܝܽܘܚܰܢܳܢ ܒܰܪ ܩܽܘܪܰܚ: ܘܟܽܠܗܽܘܢ ܓܰܒܖ̈ܶܐ ܖ̈ܰܫܺܝܥܶܐ ܐܶܡܰܪܘ ܠܶܐܪܰܡܝܳܐ: ܕܰܓܳܠܳܐܺܝܬ ܐܶܡܰܪܬ: ܠܳܐ ܫܰܕܪܳܟ ܡܳܪܝܳܐ ܐܰܠܳܗܰܢ ܕܬܺܐܡܰܪ ܠܰܢ: ܕܠܳܐ ܬܶܥܠܽܘܢ ܠܡܶܨܪܶܝܢ ܠܡܶܥܡܰܪ ܬܰܡܳܢ.
3 ܡܶܛܽܠ ܕܒܰܪܽܘܟ ܒܰܪ ܢܺܪܝܳܐ ܡܓܰܪܶܐ ܠܳܟ ܒܰܢ: ܕܢܰܫܠܡܰܢ ܒܺܐܝܕܳܐ ܕܟܰܠܕܳܝ̈ܶܐ: ܕܢܶܩܛܠܽܘܢܳܢ ܘܢܶܫܒܽܘܢܳܢ ܠܒܳܒܶܠ.
4 ܘܠܳܐ ܫ̣ܡܰܥ ܝܽܘܚܰܢܳܢ ܒܰܪ ܩܽܘܪܰܚ ܘܟܽܠܗܽܘܢ ܖ̈ܰܒܰܝ ܚܰܝ̈ܠܶܐ: ܘܟܽܠܶܗ ܥܰܡܳܐ ܒܩܳܠܶܗ ܕܡܳܪܝܳܐ ܐܰܠܳܗܗܽܘܢ: ܕܢܶܬܒܽܘܢ ܒܰܐܪܥܳܐ ܕܺܝܗܽܘܕܳܐ.
5 ܘܰܕܒܰܪ ܝܽܘܚܰܢܳܢ ܒܰܪ ܩܽܘܪܰܚ ܠܟܽܠܗܽܘܢ ܖ̈ܰܒܰܝ ܚܰܝ̈ܠܶܐ: ܘܰܠܟܽܠܶܗ ܫܰܪܟܳܐ ܕܶܐܫܬܚܰܪܘ ܡܶܢ ܕܒܶܝܬ ܝܺܗܽܘܕܳܐ.
6 ܠܓܰܒܖ̈ܶܐ: ܘܰܠܢܶܫ̈ܶܐ: ܘܠܰܛܠܳܝ̈ܶܐ: ܘܰܠܒܶܝܬ ܡܰܠܟܳܐ: ܟܽܠܗܶܝܢ ܢܰܦ̈ܫܳܬܳܐ ܕܰܫܒܰܩ ܢܰܒܽܘܙܰܪܕܳܢ ܪܰܒ ܕܰܚ̈ܫܶܐ: ܠܘܳܬ ܓܕܰܠܝܳܐ ܒܰܪ ܐܰܚܺܝܩܰܡ: ܒܰܪ ܫܳܦܳܢ: ܠܶܐܪܰܡܝܳܐ ܢܒܺܝܳܐ: ܘܰܠܒܰܪܽܘܟ ܒܰܪ ܢܶܪܝܳܐ.
7 ܘܶܐܬܰܘ ܠܰܐܪܥܳܐ ܕܡܶܨܪܶܝܢ: ܡܶܛܽܠ ܕܠܳܐ ܫܡܰܥܘ ܒܩܳܠܶܗ ܕܡܳܪܝܳܐ: ܘܶܐܬܰܘ ܥܕܰܡܳܐ ܠܬܰܚܦܺܝܣ.
8 ܘܰܗܘܳܐ ܦܶܬܓܳܡܶܗ ܕܡܳܪܝܳܐ ܥܰܠ ܐܶܪܰܡܝܳܐ ܒܬܰܚܦܺܝܣ ܠܡܺܐܡܰܪ.
9 ܣܰܒ ܒܺܐܝܕܳܟ ܟܺܐܦ̈ܶܐ ܪܰܘܖ̈ܒܳܬܳܐ: ܘܰܛܡܽܘܪ ܐܶܢܶܝܢ ܒܰܡܠܳܛܳܐ ܒܡܰܠܒܳܢܳܐ: ܒܬܰܪܥܳܐ ܕܒܶܝܬ ܦܶܪܥܽܘܢ ܒܬܰܚܦܺܝܣ: ܠܥܺܝܢ ܓܰܒܖ̈ܶܐ ܕܺܝܗܽܘܕܳܐ.
10 ܘܶܐܡܰܪ ܠܗܽܘܢ: ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܗܳܐ ܡܫܰܕܰܪ ܐ̱ܢܳܐ ܘܕܳܒܰܪ ܐ̱ܢܳܐ ܠܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ ܥܰܒܕܝ: ܘܢܰܪܡܶܐ ܟܽܘܪܣܝܶܗ ܠܥܶܠ ܡܶܢ ܟܺܐܦ̈ܶܐ ܗܳܠܶܝܢ ܕܰܛܡܰܪܬ: ܘܢܶܫܩܽܘܠ ܙܰܝܢܶܗ ܥܠܰܝܗܶܝܢ.
11 ܘܢܺܐܬܶܐ ܘܢܶܡܚܶܗ ܠܰܐܪܥܳܐ ܕܡܶܨܪܶܝܢ: ܕܰܠܡܰܘܬܳܐ ܠܡܰܘܬܳܐ: ܘܕܰܠܫܶܒܝܳܐ ܠܫܶܒܝܳܐ: ܘܕܰܠܚܰܪܒܳܐ ܠܚܰܪܒܳܐ.
12 ܘܢܶܫܒܽܘܩ ܢܽܘܪܳܐ ܒܒ̈ܳܬܶܐ ܕܐܠܳܗ̈ܶܐ ܕܡܶܨܖ̈ܳܝܶܐ ܘܢܰܘܩܶܕ ܐܶܢܽܘܢ ܘܢܶܫܒܶܐ ܐܶܢܽܘܢ: ܘܢܶܬܥܰܛܦܺܝܗ̇ ܠܰܐܪܥܳܐ: ܐܰܝܟ ܕܡܶܬܥܰܛܰܦ ܪܳܥܝܳܐ ܠܓܽܘܠܬܶܗ ܘܢܶܦܽܘܩ ܡܶܢ ܬܰܡܳܢ ܒܰܫܠܳܡܳܐ.
13 ܘܢܶܬܒܰܪ ܩܳܝܶܡܬܳܐ ܕܒܶܝܬ ܫܡܶܫ ܕܒܰܐܪܥܳܐ ܕܡܶܨܪܶܝܢ: ܘܒ̈ܳܬܶܐ ܕܰܐܠܳܗ̈ܶܐ ܕܡܶܨܪܳܝܶܐ ܢܰܘܩܶܕ ܒܢܽܘܪܳܐ.